Magazini Ngidu Ngakupangika Kuti Ngakondweskengi Ŵanthu Anandi
1. Kumbi muŵanda wakugomezgeka ndi wazeru wayezga wuli wakutumika Paulo?
1 Wakutumika Paulo wasinthanga nthowa zo wapharazgiyanga uthenga wamampha ndi chilatu chakuti wayanduwi ŵanthu ‘a mitundu yosi,’ mwakuyana waka, muŵanda wakugomezgeka ndi wazeru nayu wagwiriskiya nchitu magazini ngidu kuti wafikiyi ŵanthu a mijalidu ndi vigomezgu vakupambanapambana. (1 Ŵako. 9:22, 23) Kuti tigwiriskiyi nchitu umampha magazini nga Nsanja ya Olonda ndi Galamukani! titenere kukumbuka ŵanthu wo akhumbika kuŵerenga magazini yanga
2. Kumbi Galamukani! yikupangikiya ayani?
2 Galamukani!: Magazini iyi yikunozgeke kuti yifiki ku ŵanthu nge wo wakutumika Paulo wakambiskananga nawu pa nyengu yo wakambiskananga ndi ‘anthurumi a ku Athene.’ (Machi. 17:22) Anthurumi ŵenaŵa ŵenga Akhristu cha pakwamba ndipu angaziŵanga umampha cha Malemba. Mwakuyana waka, Galamukani! yikulembeke ŵanthu wo atiliziŵa kamanavi pamwenga atiliziŵa so cha Bayibolo. Vingachitika kuti ativiziŵa cha visambizu va Chikhristu, agomezga chisopa cha pamwenga aziŵa cha kuti Bayibolo le ndi fundu zakovya. Chilatu chikulu cha Galamukani! nkhovya akuŵerenga kuziŵa kuti Chiuta wauneneska waliku nadi. Chilatu chinyaki cha magazini iyi nchakuti ŵanthu ayambi kugomezga ukongwa Bayibolo ndipuso kuwovya wakuŵerenga kuti waziŵi kuti Akaboni aku Yehova mbakupambana ndi magulu nganyaki nga visopa.
3. Kumbi nkhani za mu Nsanja ya Olonda yakusambira ndi yakugaŵiya zilembeke ayani?
3 Nsanja ya Olonda: Magazini ya Nsanja ya Olonda yakugaŵiya yikulembeke ŵanthu wo atumbikaku Chiuta kweniso Malemba. Yiwu aziŵaku fundu zinyaki za m’Bayibolo kweni avwisa umampha cha visambizu vaki. Yiwu ayanana waka ndi ŵanthu wo Paulo wangukamba kuti “ŵakopa Chiuta.” (Machi. 13:14-16) Nsanja ya Olonda yakusambira yikupangikiya ukongwa Akaboni aku Yehova. Paulo waziŵanga kuti ŵanthu wo aŵerengenga makalata ngaki angaziŵanga umampha Malemba ndipuso ŵenga ndi chiziŵisku chauneneska. (1 Ŵako. 1:1, 2) Mwakuyana waka, nkhani za m’magazini ngidu ngakusambira zilembeke wo awungana ndipuso wo aziŵa mazu ndi fundu zo Akaboni aku Yehova agwiriskiya nchitu.
4. Nchifukwa wuli titenere kuŵerenga magazini yeyosi yo tigaŵiya m’munda?
4 Chinanga kuti tigaŵiya magazini nga Galamukani! ndi Nsanja ya Olonda pamoza, kanandi tikonkhoska fundu za m’magazini yimoza pe asani tikambiskana ndi ŵanthu. Mwaviyo, jani ndi chilatu cha kuŵerenga magazini yeyosi kuti muziŵi umampha nkhani zaki. Ivi vikuwovyeningi kuti muziŵi nkhani yo yingakondweska munthu weyosi yo mungakumana nayu.