Nchinthu chakupweteka ukongwa asani m’bali widu pamwenga mubwezi widu wasezgeka mumpingu chifukwa chakuti wakuchita ubudi ndipu walapa cha. Mo tingachitiya ndi ulongozgi wa m’Bayibolo wo waperekeka pa nkhani yeniyi, vingalongo kuti titanja Chiuta ndipuso titimuvwiya.a Ŵanaŵaniyani mafumbu nganyaki ngo tingajifumba pa nkhani yeniyi.

Kumbi tingachita wuli ndi munthu wakusezgeka? Bayibolo likamba kuti: “Kusangana nayu cha, asani yumoza wakuzumbulika m’bali ndi mureŵi, pamwenga wachiŵinu, pamwenga msopangoza, pamwenga wakutuka, pamwenga wakuloŵe, pamwenga wachipanira; waviyo chinanga nkhurya nayu naku cha.” (1 Ŵakorinte 5:11) Munthu weyosi yo “ngwambula kukaniriya mu chisambizu cho, chaku Khristu,” Bayibolo likamba kuti: “Mungamulonde munyumba cha, chinanga nkhumtawuzga: chifukwa yo wamtauzga wasangana nayu mu nchitu zaki ziheni.” (2 Yohane 9-11) Tikhumbika cha kukambiskananga nkhani zauzimu ndi ŵanthu akusezgeka pamwenga kuchezanga nawu nkhani zinyaki. Chigongwi cha Alinda cha Chingelezi cha September 15, 1981 papeji 25 chikukamba kuti: “Kumutawuzga ŵaka kungachitiska kuti tiyambi kucheza nayu ndipuso kwanjana nayu. Kumbi tingayanja kuja pa ubwezi ndi munthu wakusezgeka?”

Kumbi kuleke limu kukambiskana ndi munthu wakusezgeka nkhwakwenere? Hinya. Nchifukwa wuli tikamba viyo? Chakwamba, asani tachita viyo tilongo kuti te akugomezgeka kwaku Chiuta ndipuso tivwiya Mazu ngaki. Tivwiya marangu ngaku Yehova kaya ngawoneki kuti ngakusuzga pamwenga cha. Kwanja Yehova kutitichitiska kuti tivwiyengi marangu ngaki ngosi ndipuso tiziŵa kuti iyu ndi murunji kweniso ngwachanju ndipu marangu ngaki ngatitiwovya kuti tiyanduwengi. (Yesaya 48:17; 1 Yohane 5:3) Chachiŵi, kuleka kuchitiya vinthu limoza ndi munthu wambula kulapa yo wakuchita ubudi, kutitivikiriya ndipuso kuvikiriya ŵanthu wosi m’mpingu kuti aleki kunanga ubwezi wawu ndi Chiuta kweniso kuti aleki kutole mijalidu yaki yiheni ndi chilatu chakuti mpingu ulutiriyi kuja ndi mbiri yamampha. (1 Ŵakorinte 5:6, 7) Chachitatu, kulondo fundu za m’Bayibolo kungawovya so munthu yo wakusezgeka. Asani tikoliyana ndi vo komiti ya cheruzgu yadumuwa, tingawovya munthu wakubuda, yo watondeka kuzomerezga vo ŵara ayesesa kuchita kuti amuwovyi. Kuleka kwanjana ndi munthu yo kali wenga munyidu, kungamuwovya kuti ‘wajiwezgi mu mtima,’ ndi kuwona uheni wa vo wachita ndipu pavuli paki wangawere kwaku Yehova.​—Luka 15:17.

Kumbi tingachita wuli asani munthu yo wasezgeka ndi m’bali widu? Asani vaŵa viyo, kugomezgeka kwidu pa marangu ngaku Yehova kungayeseka chifukwa cha kwanjana ko kwengapu ndi m’bali widu. Nanga tingachita nayu wuli? Chinanga kuti tingapereka fundu zosi cha zakuti tigwiriskiyengi nchitu pa chakuchitika chechosi, kweni m’nkhani iyi tikambiskanengi vigaŵa viŵi.

Nyengu zinyaki munthu wakusezgeka wangalutirizga kuja panyumba yimoza ndi abali ŵaki. Chifukwa chakuti kusezgeka kumaliska ubali cha, angalutirizga kuchita nayu vinthu vinyaki vapakhomu ndipuso kukambiskana nayu. Kweni chifukwa cha vo wachita, iyu wasankha yija kunanga ubwezi wauzimu wo wengapu ndi abali ŵaki. Asani abali ŵaki mbakugomezgeka kwaku Yehova angalutirizga cha kuchitiya nayu limoza vinthu vauzimu. Mwakuyeruzgiyapu, asani munthu wakusezgeka walipu pa nyengu yo banja lichita kusopa kwa pabanja, iyu wangakambangapu chechosi cha. Ndipu asani yo wakusezgeka ndi mwana, apapi ŵe ndi udindu wakumusambiza ndi kumupaska ulongozgi. Apapi wo atanja mwana wawu, angamuwovya mwakuchita nayu sambiru la Bayibolo.b​—Nthanthi 6:20-22; 29:17.

Nyengu zinyaki wakusezgeka wangaŵa kuti waja kutali ndi abali ŵaki. Chinanga kuti nyengu zinyaki pangakhumbika kukambiskana nayu nkhani zapachibali, atenere kuchita viyo mwakamozakamoza. Akhristu a m’banja lo asani mbakugomezgeka kwaku Chiuta, atenere cha kupereka vifukwa vakujigowoke ndi chilatu chakuti akambiskanengi ndi m’bali wawu yo wakusezgeka, yo waja kunyaki. M’malu mwaki, kuja akugomezgeka kwaku Yehova ndipuso ku gulu laki kuŵachitiskengi kuti agwiriskiyengi nchitu ulongozgi wa m’Malemba. Kugomezgeka kwawu kungasintha mtima wa munthu yo wabuda ndipuso kungamuwovya kuti wayanduwi chifukwa chakuti wachenyeka.c​—Ŵahebere 12:11.

Kumbi mphavakuchitika nivi po munthukazi wachikhristu wakhumbika kuvwala chinthu kumutu, nanga nchifukwa wuli? Tiyeni tikambiskani fundu zo wakutumika Paulo wangukambirika kulemba pa nkhani yeniyi. Iyu wangupereka ulongozgi wo ungatiwovya kuti vo tisankha pa nkhani iyi viperekengi ulemu kwaku Chiuta. (1 Ŵakorinte 11:3-16) Paulo wangukonkhoska fundu zitatu zo zingachitiska kuti munthukazi wavwali chinthu kumutu nge: (1) vakuchitika, (2) malu ngo watenere kuchitiya viyo ndipuso (3) chilatu chaki.

Vakuchitika. Paulo wakukamba vakuchitika viŵi, rombu ndi kutawula. (Vesi 4, 5) Kuromba ndi nthowa yakulongolore ndi Yehova. Mazuŵa nganu kutawula kungamiya nchitu ya kusambiza Bayibolo yo ateŵeti achikhristu achita. Kumbi Paulo wang’anamuwanga kuti munthukazi watenere kuvwala chinthu kumutu nyengu yeyosi asani waromba pamwenga kusambiza Bayibolo? Awa. Malu ngo munthukazi warombe pamwenga kusambiziya ndingu ngangachitiska kuti wavwali chinthu kumutu pamwenga cha.

Malu. Vo Paulo wangulemba vilongo kuti m’banja ndipuso mumpingu ndimu munthukazi wachikhristu watenere kuvwala