Mo Tingasazgiyaku Lusu Lidu mu Uteŵeti—Vo Tingachita Kuti Tiziweriyeku

Nchifukwa Wuli Nkhwakukhumbika? Asani tasaniya munthu yo walongo kuti we ndi linweka, tikhumbika kuweriyaku kuti tikadiriyi mbewu yauneneska yo tikupanda. (1 Ŵakor. 3:6) Kanandi kuti tichiti venivi, techendatuwepu pa khomu lo tipharazga tikhumbika kukambiskana nayu mu nthowa yakuti tiziweriyeku so ndipu tingamufumba zuŵa lo tingaziya. Kusazgapu pa fundu yeniyi, mbumampha kumufumba fumbu kuti tizimuki pa ulendu wakuweriyaku. Ivi viwovyengi kuti mweneku wanyumba wakhumbisiski kuzivwa kwamuka ndipu asani fumbu lo limukika m’buku lenilo tamusiliya, kwambula kukayika waliŵerengengi. Kuchita viyo, kungatiwovya kuti tizileki kusuzgika pa ulendu wakuweriyaku chifukwa tasankha kali nkhani yo tamukambiskana ndipuso mweneku wanyumba watiyiziŵa. Asani taluta so kunyumba kwaki, tingamukambiya kuti taza kuzimuka fumbu lo tingumufumba pa ulendu wakwamba ndipu pavuli paki tingalutirizga kukambiskana.