Kwambiya mu September, Kabuku ka Unganu wa Umoyu Widu Wachikhristu kajengi ndi masachizu ngasonu nga vo mungakamba ndipu ngaŵengi ndi mutu wakuti, “Sambizani Unenesa.” Chilatu chidu chikulu ntchakuti tisambizengi unenesa mwakugwirisiya ntchitu fumbu ndi lemba.

Asani tawona kuti munthu wakhumba kuziŵa vinandi, tingamusiliya, buku pamwenga tingamuwonesa vidiyo ya pa jw.org. Tikhumbika kuyesesa kuweliyaku mwaliŵi kuti tikalutilizi nkhani yo takambisananga nayu. Masachizu nga vo mungakamba ngasonu kweniso nkhani za akusambira zituliyengi pa fundu zikuluzikulu za mubuku la Kumbi Tingasambiranji M’Bayibolu? Tingasaniya so mafumbu ndi malemba nganyaki ngo ngangatiwovya kuti tiziweliyeku pamwenga kuti tichitisi sambiru la Bayibolu mwakugwirisiya ntchitu Bayibolu pe.

Pe nthowa yimoza pe yakuluta ku umoyu wamuyaya. (Mat. 7:13, 14) Chifukwa chakuti tipharazgiya ŵanthu a visopa vakupambanapambana, tikhumbika kusambiza unenesa wa m’Bayibolu wo munthu weyosi wangawuyanja. (1 Tim. 2:4) Po tikambisana ndi ŵanthu nkhani zakupambanapambana za m’Bayibolu ndipuso asani lusu lidu lakusambiza unenesa wa m’Bayibolu liluta panthazi, tikondwengi ukongwa ndipu tisuzikengi cha kusambiza ŵanthu anyaki unenesa.—2 Tim. 2:15.

Ŵanthu wosi pacharu chapasi akhumbika kupembuzika. (Wak. 4:1) M’mwezi wa September tazamugwira ntchitu yapade yakugaŵiya Chigongwi cha Alinda cho chazamuja ndi nkhani zakupembuza. Muziyesesi kugaŵiya ŵanthu anandi magazini iyi. Chifukwa chakuti tikhumba kuti tikambisanengi ndi ŵanthu masu ndi masu kuti tiziŵapembuzi, tikhumbika cha kuzisiya magazini panyumba yo palivi ŵanthu.

VO TINGAZIKAMBA

“Tosi tikhumba kupembuzika nyengu zinyaki. Kumbi muwona kuti ndiyani yo wangatipembuza? [Ŵerengani 2 Ŵakorinte 1:3, 4.] Magazini ya Chigongwi cha Alinda iyi yikonkhosa mo Chiuta wapembuziya ŵanthu.”

Asani munthu walongo kuti wakhumba kuziŵa vinandi ndipu wazomela kulonde magazini, . . .

Pavuli paki apempheni kuti musambirengi nawu Bayibolu.

KAMBANI MAZU NGO NGANGAKUWOVYANI KUTI MUZIWELIYEKU

Fumbani fumbu lakuti muzikambisani pa ulendu wakuweliyaku nge lakuti, “Ntchifukwa wuli Chiuta wazomeleza kuti ŵanthu asuzikengi?”