Chakwamba Kayanjani ndi Mubali Waku​—Kumbi Tingachita Wuli Venivi?

Yeruzgiyani kuti muja ku Galileya, mu nyengu yaku Yesu. Mwaluta ku Yerusalemu kuchichita Phwandu la Misasa. Mutawuni iyi mwazaza ŵanthu wo atuliya kuvigaŵa vakutali ukongwa. Yimwi mukhumba kupereka sembi kwaku Yehova. Muguza mbuzi yinu yo mwayimanga ndi chingwi ndipu mutenda mutimisewu ta mutawuni yeniyi yo yazaza ndi ŵanthu anandi ndipu muluta kunyumba yakusopiyamu. Mwafika ndipu muwona kuti nyumba yakusopiyamu yazaza ndi ŵanthu anandi wo akhumba so kupereka sembi. Kweni sonu nyengu yakwana yakuti imwi mupereki mbuzi yinu kwa asembi. Pa nyengu yeniyi mukumbuka kuti mubali winu, yo panyaki we pagulu lenili pamwenga kuchili kunyaki mutawuni yeniyi, we namwi ndi chifukwa. Yesu wakonkhosa vo mutenere kuchita pa chakuchitika nge ichi. (Ŵerengani Mateyu 5:24.) Kumbi imwi ndipuso mubali winu yo mwamunangiya mungachita wuli kuti muje so pa chimangu nge mo Yesu wakambiya? Chongani ansala yakwenere mutimabokosi tiŵi to te mumphata.

IMWI MUTENERE . . .

• kukambisana ndi mubali winu pijapija asani muwona kuti pe vifukwa vakuvwika vakuti wangaguŵiya nadi

• kumuwovya mubali winu asani muwona kuti watanja kuguŵa liŵi pamwenga asani muwona kuti nayu wachitisa kuti paŵi masuzgu

• kuvwisiya mwaulemu asani mubali winu wakonkhosa mo wavwiya chinanga kuti muleka kuvwisa vo wakamba ndipuso kupepesa mwakutuliya pasi pa mtima chifukwa cha mo vamupweteke mumtima pamwenga vo vachitika chifukwa cha vo munguchita

MUBALI WINU WATENERE . . .

• kukambiya abali ndi azichi mumpingu vo mwamunangiya kuti amuwovyi

• kukuchawutani, kukukumbusani kekosi ko mukumunangiya, ndipuso kukhumba kuti imwi ndimwi muzomeri kuti ndimwi mukunanga

• kukuwongani chifukwa cha kujiyuyuwa kweniso kujipereka kwinu kuti mukambisani nayu, ndipuso kukugowokiyani kutuliya pasi pa mtima

Chinanga kuti mazuŵa nganu tipereka sembi za nyama cha, kumbi Yesu wangusambiza kuti pe kukoliyana wuli pankhani yakuja mwachimangu ndi anyidu kweniso kusopa ko Chiuta wazomereza?