Soka Mugonezi wo Wenga Wambula Kuvwiya

Yesu wamutumbikanga ukongwa Yohane Mubatizi. Kweni kumbi ŵanthu anyaki amuwonanga wuli Yohane? Yesu wangukamba kuti: “Mugonezi uwu . . . we nge ŵana anamana wo aja mumisika ndipu akambiya anyawu mwakudaniriza, kuti: ‘Tingukumbiyani fyoliru, kweni yimwi munguvina cha; tingubongo, kweni yimwi mungujipuma cha pachifuŵa chifukwa cha chitima.’”—Mateyu 11:16, 17.

Kumbi penapa Yesu wang’anamuwanganji? Iyu wangukamba kuti: “Yohane wanguza ndipu waryanga cha pamwenga kumwa, kweni ŵanthu akamba kuti: ‘We ndi chiŵanda.’ Mwana wa munthu wakuza ndipu waturya ndi kumwa kweni ŵanthu akamba kuti: ‘Awonani! Munthu uyu ndi munkharyi ndipu watanja kumwa vinyu, ndi munyawu wa akusonkhesa msonkhu ndi akubuda.’” (Mateyu 11:18, 19) Yohane wajanga nge Mnaziri ndipu wamwanga vinyu cha kweni ŵanthu a mu nyengu yaki akambanga kuti wenga ndi chiŵanda. (Maŵerengedu 6:2, 3; Luka 1:15) Kweni Yesu wajanga nge ŵanthu anyaki wosi. Iyu wamwanga kweniso waryanga chakurya kwambula kujumphisa mwesu kweni ŵanthu akambanga kuti wenga munkharyi. Venivi vingulongole limu kuti kwenga kwakusuzga kukondwesa munthu weyosi.

Yesu wanguyeruzgiya ŵanthu a mu nyengu yaki ndi ŵana anamana wo anguja pasi mumisika wo angukana kuvina pa nyengu yo anyawu anguŵambiya fyoliru kweniso anguleka kuliya anyawu achibongo. Yesu wangukamba kuti: “Mwemosi mo vingaŵiya, zeru yiziŵika kuti njirunji chifukwa cha ntchitu zaki.” (Mateyu 11:16, 19) Mwaviyo, “ntchitu” pamwenga kuti vo Yesu ndi Yohane achitanga vingulongo kuti vo ŵanthu aŵanenanga venga vaboza.

Yesu wati wamala kukonkhoska vakukwaskana ndi mugonezi wenuwu, wanguchenya tawuni ya Korazini, Betisayida, ndi Kaperenao ko wanguchita vinthu vinandi vakuziziswa. Yesu wangukonkhoska kuti asani wanguchita vakuziziswa venivi ku matawuni nga Turo ndi Sidoni ngo ngenga muchigaŵa cha Fonike, ŵanthu a kwenuku atingi alapengi. Iyu wangukamba so za tawuni ya Kaperenao ko kanandi wajanga wachichita uteŵeti waki. Ŵanthu anandi a mutawuni yeniyi anguvwiya cha uthenga waki. Iyu wanguti: “Pa Zuŵa la Cheruzgu, cheruzgu chaku chazamukuŵa chikulu kuluska cha Sodomu.”—Mateyu 11:24.

Pavuli paki, Yesu wanguthamika Awisi wo abisiya “ŵanthu azeru ndi akusambira” uneneska wakuzirwa wa m’Malemba kweni atiwuvumbuwa kwa ŵanthu akunyozeka, wo ŵe nge ŵana anamana. (Mateyu 11:25) Iyu wangukambiya ŵanthu wo ŵenga nge ŵana anamana kuti: “Zani kwaku ini mosi yimwi akulakatuka ndi ntchitu ndipuso akufyoka ndi katundu muzitu, ndipu ini ndazakukusisipuwani. Pingani goli langu ndipu sambirani kwaku ini chifukwa nde wakuzika kweniso wakujiyuyuwa ndipu mwazamusisipulika. Chifukwa goli langu ndipusu.”—Mateyu 11:28-30.

Kumbi Yesu wanguŵasisipuwa wuli ŵanthu? Alongozgi avisopa aŵachitiyanga nkhaza ŵanthu mwa kuŵachichizga kuti alondongi midawuku yawu. Mwakuyeruzgiyapu, achichizganga ŵanthu kuti alondongi marangu ngakusuzga ngakukwaskana ndi Sabata ngo yiwu angujalikiska. Kweni Yesu wanguŵasisipuwa mwa kuŵasambiza uneneska wakukwaskana ndi Chiuta, wo wengavi miyambu yo alongozgi avisopa asambizanga. Iyu wangusisipuwa ŵanthu wo ŵenga akuguŵa chifukwa cha kukandirizgika ndi ŵanthu andali wo ŵenga ndi maudindu. Wangusisipuwa so ŵanthu wo ajivwiyanga chitima chifukwa cha ubudi. Yesu wanguŵakonkhoske vo angachita kuti maubudi ngawu ngagowokereki kweniso kuti aje pa chimangu ndi Chiuta.

Weyosi yo wazomera kunyamuwa goli laku Yesu, wangajipereka kwaku Chiuta ndi kwamba kuteŵete Awusefwi akuchanya wo mbalisungu. Kuchita venivi, nkhwakusuzga cha chifukwa marangu ngaku Chiuta ngazitu cha.—1 Yohane 5:3.