Akusambira Anayi Anguja Alovi a Ŵanthu

Yesu wati wathaŵa ŵanthu a ku Nazareti wo akhumbanga kumubaya, wanguluta mutawuni ya Kaperenao. Tawuni iyi yenga pafupi ndi Nyanja ya Galileya, yo yaziŵikanga so kuti “nyanja ya Genesareti.” (Luka 5:1) Venivi vingufiska uchimi wo we mubuku laku Yesaya wakuti ŵanthu a ku Galileya wo aja mumphepeti mwa nyanja azamuwona ukweru ukulu.—Yesaya 9:1, 2.

Wati wafika ku Galileya, Yesu wangulutirizga kupharazga kuti: “Ufumu wakuchanya we pafupi.” (Mateyu 4:17) Kwenuku, Yesu wangukumana ndi akusambira ŵaki anayi. Pakwamba, yiwu ayendanga ndi Yesu, kweni ŵati aweku ku Yudeya pamoza ndi Yesu, yiwu angwamba so ntchitu yawu ya ulovi. (Yohane 1:35-42) Kweni iyi, yenga nyengu yakuti ayendengi ndi Yesu nyengu zosi kuti waŵasambizi mo angapharazgiya kuti azilutirizgi ntchitu yeniyi asani iyu waluta kuchanya.

Yesu wachiyenda mumphepeti mwa nyanja, wanguwona Simoni Peturo, mvurwa waki Andireya ndipuso ŵanthu anyaki wo ŵenga nawu achisuka mukwawu. Yesu wanguluta po penga ŵanthu ŵenaŵa ndipu wangukwera boti laku Peturo. Pavuli paki, iyu wangumupempha kuti walitutuzgiyi pataliku ndi mtunda. Boti lati landere kamanavi, Yesu wanguja pasi ndipu wangwamba kusambiza ŵanthu anandi wo ŵenga kumtunda. Iyu wanguŵasambiza fundu zauneneska zakukwaskana ndi Ufumu.

Pavuli paki, Yesu wangukambiya Peturo kuti: “Vuŵiya kundimba, ndipu uponyi mukwawu waku kuti ubayi somba.” Peturo wangumuka kuti: “Msambizi, tasuzgika usiku wosi kweni tawe ŵaka, sonu pakuti mwakamba ndimwi, ndiponyengi mukwawu.”—Luka 5:4, 5.

Yiwu anguponya nadi mukwawu, ndipu angubaya somba zinandi mwakuti mukwawu wawu ungwamba kuperuka! Mwaliŵi, angudana alovi anyawu wo ŵenga muboti linyaki lo lenga pafupi kuti aziŵawovyi. Kwa kanyengu kamanavi waka, maboti ngosi ngaŵi nganguzaza ndi somba ndipu ngangwamba kubira. Peturo wati wawona venivi, wangugwada panthazi paku Yesu ndi kukamba kuti: “Tuwaniku kwaku ini Ambuya, chifukwa nde wakubuda.” Yesu wangumuka kuti: “Ungawopanga cha. Kwamba sonu uŵengi mlovi wa ŵanthu.”—Luka 5:8, 10.

Yesu wangukambiya Peturo ndi Andireya kuti: “Ndilondoni, ndipu ndikusambuskeningi alovi a ŵanthu.” (Mateyu 4:19) Iyu wangudana so alovi anyaki ŵaŵi, Yakobe ndi Yohane ŵana aku Zebediya. Nawu angwamba kulondo Yesu nyengu yeniyo. Mwaviyo, ŵanthu anayi ŵenaŵa angusiya ntchitu yawu ya ulovi, ndipu anguja akusambira aku Yesu akwamba wo angwamba kumulondo nyengu zosi.