Kumbi Wusewu Wenga Abrahamu Pamwenga Dyaboli?

Yesu weche ku Yerusalemu ku Phwandu la Mahema (pamwenga kuti Misasa) wangulutirizga kusambiza ŵanthu fundu za uneneska. Ayuda anyaki wo ŵenga ku phwandu lenili angumukambiya kuti: “Isi te mbewu yaku Abrahamu ndipu techendajepu kapolu wa munthu weyosi.” Yesu wanguŵamuka kuti: “Ndiziŵa kuti ndimwi mbewu yaku Abrahamu, kweni mupenja kundibaya, chifukwa mazu ngangu ngajalikiskika cha mwaku yimwi. Ndilongoro vinthu vo ndinguwona pa nyengu yo ndenga ndi Ada, kweni yimwi muchita vinthu vo mukuvwa kutuliya kwa awusemwi.”—Yohane 8:33, 37, 38.

Yesu wachikamba mazu yanga wang’anamuwanga kuti Awisi apambananga ndi wusewu wa Ayuda. Kweni Ayuda anguziŵa cha vo Yesu wang’anamuwanga ndipu anguwerezapu so kukamba kuti: “Abrahamu ndiyu wusefwi.” (Yohane 8:39; Yesaya 41:8) Chifukwa chakuti yiwu angutuliya nadi kwaku Abrahamu yo wenga bwezi laku Chiuta, aŵanaŵananga kuti asopanga Chiuta wauneneska yo Abrahamu wasopanga.

Chinanga kuti venga viyo, Yesu wangukoliyana navu cha vo yiwu angukamba ndipu wanguŵamuka kuti: “Asani mwenga ŵana aku Abrahamu, mwatingi muchitengi ntchitu zaku Abrahamu.” Mwana walondo vo awisi achita. Yesu wangulutirizga kukamba kuti: “Kweni sonu mupenja kundibaya, ndamunthu wakuti nditikukambiyani uneneska wo ndikuvwa kwaku Chiuta. Abrahamu wakuchitapu cha ivi.” Pavuli paki, wangukamba mazu ngo nganguŵaziziswa ukongwa kuti: “Muchita ntchitu za awusemwi.”—Yohane 8:39-41.

Ayuda anguvwisa mbwenu cha kuti wusewu yo Yesu wakambanga ndiyani. Yiwu angukamba kuti ŵenga ŵana apadondu cha ndipu anguti: “Tikubalika mu chigololu cha isi. Wusefwi njumoza pe, Chiuta.” Kumbi Chiuta wenga nadi Wusewu? Yesu wangukamba kuti: “Asani Chiuta wenga Wusemwi, mwatingi mundiyanjengi. Chifukwa ndikutuliya kwaku Chiuta ndipu nde panu. Ndikuza mwakukhumba kwangu cha, kweni Iyu ndiyu wakundituma.” Pavuli paki Yesu wangufumba fumbu ndipu wangumuka so yija. Iyu wanguti: “Ntchifukwa wuli muleka kuvwisa vo ndikamba? Chifukwa mungavwa cha mazu ngangu.”—Yohane 8:41-43.

Yesu wanguyesesa kulongo vo vatingi viŵachitikiyengi chifukwa chakuti angumukana. Kweni pa nyengu iyi, wangukamba mwambula kubisa kuti: “Yimwi mukutuliya kwa wusemwi Dyaboli, ndipu mukhumba kuchita khumbu la wusemwi.” Kumbi wusewu wenga munthu wamtundu wuli? Yesu wangumukonkhoska kuti: “Iyu wenga wakubaya ŵanthu kwamba pakwamba, ndipu wakumapu cha mu uneneska, chifukwa mwaku iyu mulivi uneneska.” Pavuli paki, Yesu wangulutirizga kukamba kuti: “Munthu yo watuliya kwaku Chiuta, watuvwa mazu ngaku Chiuta. Yimwi mutuvwa cha chifukwa chakuti mukutuliya kwaku Chiuta cha.”—Yohane 8:44, 47.

Ayuda angukwiya ukongwa chifukwa cha mazu ngo Yesu wangukamba ndipu angumuka kuti: “Kumbi tinganangisa kukamba kuti, ‘We Msamariya, ndipuso we ndi chiŵanda’?” Pakukamba kuti Yesu wenga “Msamariya” Ayuda angulongo kuti amutumbikanga cha Yesu. Chinanga kuti yiwu angukamba mazu ngakunyoza, kweni Yesu wangutoliyaku kanthu cha ndipu wanguŵamuka kuti: “Ini ndilivi chiŵanda, kweni nditumbika Ada ndipu yimwi mutinditumbika cha.” Vo Yesu wangukamba pavuli paki vingulongo kuti vo Ayuda anguchita yenga nkhani yikulu. Iyu wanguti: “Weyosi yo wasunga mazu ngangu wazamuwona nyifwa cha.” Yapa, Yesu wang’anamuwanga kuti akutumika kweniso ŵanthu anyaki wo amulondonga alekengi kufwa cha. Kweni wakambanga kuti yiwu azamukufwa “nyifwa yachiŵi” cha, kung’anamuwa chilangu chamuyaya. Ŵanthu wo azamukufwa nyifwa yachiŵi ndiwu azamuyuskika cha.—Yohane 8:48-51; Chivumbuzi 21:8.

Kweni Ayuda awonanga kuti Yesu wakamba kuti ŵanthu wo avwiya mazu ngaki, azamukufwa cha. Yiwu angukamba kuti: “Sonu taziŵa kuti we ndi chiŵanda nadi. Abrahamu wakufwa, achimi nawu so viyo, kweni yiwi ukamba kuti, ‘Weyosi yo wasunga mazu ngangu wazamuyesapu nyifwa cha.’ Kumbi yiwi we mura kuluska wusefwi Abrahamu yo wakufwa? . . . Sonu yiwi utijiwona kuti ndiwi yani?”—Yohane 8:52, 53.

Viwoneke limu kuti Yesu wakambanga kuti iyu ndi Mesiya. Kweni m’malu mwakumuka fumbu lo yiwu angumufumba kuti iyu ndiyani, wangukamba kuti: “Asani nditijikankhuska ndija, ndikuti unkhankhu wangu ngwaŵaka. Ada wo mukamba kuti ndi Chiuta winu, ndiwu atindikankhuska. Chinanga kuti yimwi mutiŵaziŵa cha, kweni ini nditiŵaziŵa. Ndipu asani ndingakamba kuti nditiŵaziŵa cha, ndiŵengi waboza nge yimwi.”—Yohane 8:54, 55.

Sonu, Yesu wangukamba vakukwaskana ndi wusewu wakugomezgeka kuti: “Awusemwi Abrahamu angukondwa ukongwa achilindizga kuwona zuŵa langu. Yiwu anguliwona ndipuso angukondwa.” Chifukwa chakuti Abrahamu wagomezganga vo Chiuta wangulayizga, wakhumbisiskanga kuwona kuza kwaku Mesiya. Ayuda angugomezga cha vo Yesu wangukamba ndipu angumumuka kuti: “Wechendafiki ndi vyaka 50, mbwenu ukamba kuti ukuwona Abrahamu?” Yesu wanguŵamuka kuti: “Nditikuneneskiyani kuti Abrahamu wechendaŵeku, ini ndipu ndiliku kali.” Pakukamba mazu ngenanga, Yesu wang’anamuwanga kuti iyu wenga kuchanya nge mungelu wanthazi, wechendazi pacharu chapasi.—Yohane 8:56-58.

Ayuda, angukwiya ukongwa Yesu wati wakamba kuti wengaku kali Abrahamu wechendaweku. Mwaviyo, yiwu akhumbanga kumuponya mya, kweni Yesu wangutuwamu munyumba yakusopiyamu kwambula kupwetekeka.