Ndondomeku ya Sabata ya March 25

SABATA YAKWAMBIYA MARCH 25

Sumu 33 ndi Rombu

□ Sambiru la Bayibolo la Mpingu:

bt-CN mutu 20 ndimi 16-20 (Mamin. 30)

□ Sukulu ya Uteŵeti Waku Chiuta:

Kuŵerenga Bayibolo: Luka 4-6 (Mamin. 10)

Na. 1: Luka 4:22-39 (Mamin. 4 pamwenga kusikiya pasi)

Na. 2: Kumbi Ŵanthu a Mitundu Yosi Akutuliya Nunkhu?—rs-CN peji 234 ndimi 2 mpaka peji 235 ndimi 1 (Mamin. 5)

Na. 3: Kumbi pe Ukaboni Wuli Wakuti Yesu Wakuyuskika?—1 Ŵakor. 15:3-7 (Mamin. 5)

□ Unganu wa Uteŵeti:

Sumu 111

Mamin. 5: Yambiskani Sambiru la Bayibolo pa Chisulu Sabata Yakwamba ya Mwezi. Chitani chakuyeruzgiyapu cha mo mungayambiskiya sambiru la Bayibolo pa Chisulu sabata yakwamba ya mwezi wa April mwakugwiriskiya nchitu masachizgu ngo nge pa peji 8. Chiskani wosi kuti azigwireku nchitu iyi.

Mamin. 25: “Mo Tingagwiriskiya Nchitu Kabuku Kakuti, Uthenga Wamampha Wakutuliya Kwaku Chiuta.” Nkhani ya mafumbu ndi kwamuka. Pakukambiskana ndimi 6, chitani vakuyeruzgiyapu viŵi.

Sumu 97 ndi Rombu

Mo Tingagwiriskiya Nchitu Kabuku Kakuti, Uthenga Wamampha Wakutuliya Kwaku Chiuta

Kabuku Kasonu ko Kakunozgeka Kuti Katiwovyi Kuti Tije ndi Maulendu ngakuweriyaku Kweniso Kwambisa Masambiru nga Bayibolo

1. Kumbi nkhabuku kasonu nankha ko kakutuzgika pa Unganu Wachigaŵa wa mutu wakuti “Vikiliyani Mtima Winu,” ko kangatiwovya kusaniya maulendu ngakuweriyaku kweniso kwambisa masambiru nga Bayibolo?

¹ Pa Unganu Wachigaŵa wa mutu wakuti “Vikiliyani Mtima Winu,” tingukondwa ukongwa kulonde kabuku kasonu ko kangatiwovya kusaniya maulendu ngakuweriyaku kweniso kwambisa masambiru nga Bayibolo. Kabuku ka Uthenga Wamampha Wakutuliya Kwaku Chiuta, kasere m’malu mwa kabuku ka Chiuta Wakhumbanji, ndipu timabuku yiti tiyanana chifukwa chakuti nkhani zaki zifupizifupi. Ivi vingatiwovya kuti tilekengi kusuzgika pakuchitiska masambiru tama wima. Kabuku ka Chiuta Wakhumbanji kakonkhoska ukongwa fundu zo Mkhristu watenere kulondo pa umoyu waki, vo vingaŵa vakusuzga kwa munthu yo wasambira ŵaka uneneska, kweni kabuku kasonu yaka kakonkhoska ukongwa uthenga wamampha wo usanirika m’Bayibolo.—Mac. 15:35.

2. Nchifukwa wuli kabuku ka Uthenga Wamampha kakutuzgika?

² Nchifukwa wuli kakutuzgika? Abali pa charu chosi aja achipempha buku linyaki lambula kusuzga kulivwa lo lingakopa ŵanthu kuti aziŵi uneneska ndipuso lo lingawovya kuti ayambi kusambira buku la Bayibolo Lisambizanji, lo tigwiriskiya nchitu pakusambiza ŵanthu Bayibolo. Ŵanthu wo atanja cha kusambira mabuku ngakulungakulu angayanja ukongwa kusambira mwakugwiriskiya nchitu kabuku. Kweniso timabuku tisuzga cha kutifwatuliya mu vineneru vinandi.

3. Kumbi kabuku kasonu yaka kapambana wuli ndi mabuku nganyaki ngakusambiziya?

³ Mo Kakulembeke: Mabuku nganandi ngo tisambiziya ŵanthu ngakulembeka munthowa yakuti munthu wakhoza kuŵerenga pakuyija ndi kusambira uneneska. Kweni kabuku yaka nkhakupambana ndi mabuku nganyaki ngosi. Kakulembeke kuti mupharazgi wawovyiyengi munthu kusambira Bayibolo. Mwaviyo, asani mukhumba kugaŵiya munthu kabuku yaka, mungachita umampha kuŵerenga ndi kukambiskana ndimi yimoza pamwenga ziŵi. Ndimi zaki zifupi mwakuti mukhoza kukambiskana ndi munthu chakuma wima pamwenga pa malu ngo wagwiriya nchitu. Chinanga kuti sambiru 1 ndilu lakwenere kwambiyapu, kweni mungayambiya peposi mwakulingana ndi nkhani yo mukhumba kukambiskana.

4. Kumbi kabuku yaka kangatiwovya wuli kuti tisambizengi kutuliya m’Bayibolo?

⁴ M’mabuku ngidu nganandi, mu ndimi musanirika kwamuka kwa mafumbu ngo ngafumbika. Kweni m’kabuku yaka, Bayibolo ndilu limuka mafumbu. Ŵanthu anandi atanja kusambira vinthu kutuliya m’Bayibolo m’malu mwakusambira kutuliya m’mabuku ngidu. Pa chifukwa ichi, malemba ngosi ngo nge m’kabuku yaka ngakoleka mazu cha. Mwaviyo muyesesengi kuŵerenga malemba ngosi kutuliya m’Bayibolo. Ivi vingawovya kuti munthu yo musambira nayu waziŵengi kuti vo wasambira vituliya kwaku Chiuta.—Yes. 54:13.

5. Nchifukwa wuli mupharazgi weyosi watenere kunozgeke wechendaluti kuchisambiza?

⁵ Kabuku yaka kakonkhoska malemba ngosi cha. Chifukwa wuli? Kakunozgeke kuti wakusambira wafumbengi mafumbu kweniso kuti msambizi wagwiriskiyengi nchitu lusu lakusambiza. Chinthu chakukhumbika ukongwa nkhunozgeke mwechendaluti kuchisambiza. Kweni pakusambiza, mungaŵereŵetanga vinthu vinandi cha. Tiziŵa kuti tikondwa limu kukonkhoska Malemba, kweni asani tifumba mweneku wanyumba vo lemba ling’anamuwa, vitovya kuti waziŵi uneneska mwaliŵi. Asani tingafumba mafumbu mwalusu, vingawovya ukongwa kuti mweneku wanyumba wavwisisi vo wasambira.—Mac. 17:2.