Anthukazi wo anguluta kumuwunda waku Yesu anguzizwa ukongwa ŵati awona kuti muwunda ngwamwazi. Mariya wa ku Magadala wangutchimbiriya kwaku “Simoni Peturo ndipuso kwa wakusambira munyaki yo Yesu wamuyanjanga ukongwa,” zina laki Yohane. (Yohane 20:2) Pa nyengu iyi, anthukazi anyaki wo ŵenga kumuwunda wenuwu anguwona mungelu. Yiwu anguwona so mungelu munyaki yo wenga mukati mwa muwunda wachikumbusu yo “wanguvwala mukhanju utuŵa.”—Mariko 16:5.

Yumoza wa angelu ŵenaŵa, wanguŵakambiya kuti: “Mungawopanga cha chifukwa ndaziŵa kuti mupenja Yesu yo wangupayikika pachimiti. Iyu we kunu cha, chifukwa wayuskika nge mo wangukambiya. Zani kunu kuti muwoni po wangugona. Sonu yimwi lutani mwaliŵi ndipu mukakambiyi akusambira ŵaki kuti: ‘Wakuyuskika ku nyifwa, wadanjiyapu kuluta ku Galileya.’” (Mateyu 28:5-7) Chifukwa chakuti anthukazi wo ŵenga ndi “mantha kweniso chifukwa chakutimbanyizgika maŵanaŵanu,” angutchimbiya kuti akakambiyi akusambira vo vinguchitika.—Mariko 16:8.

Mariya wangukumana ndi Peturo ndi Yohane. Mtima we muchanya, wanguŵakambiya kuti: “Aŵatuzgamu Ambuya mumuwunda, ndipu tiziŵa cha kuti aŵaŵika pani.” (Yohane 20:2) Peturo ndi Yohane nawu angutchimbiriya kumuwunda. Yohane ndiyu watchimbiyanga ukongwa ndipu ndiyu wangwamba kufika. Iyu wangulingiza mukati ndipu wanguwona salu zo angukulungamu Yesu kweni wangusere mukati cha.

Peturo wati wafika wangusere mukati mumuwunda. Iyu wanguwona salu zo angukulungiya Yesu kweniso salu zo angumukulungiya kumutu. Yohane nayu wangusere mukati ndipu wanguvwana vo Mariya wangumukambiya. Chinanga kuti Yesu wangukambiya akusambira ŵaki kuti wazamuyuskika, kweni pa nyengu iyi, pengavi yo wanguvwana kuti Yesu wanguyuskika nadi. (Mateyu 16:21) Chifukwa cha kuzizwa, yiwu anguwere kwawu. Kweni Mariya wanguweriyaku so kumuwunda ndipu wangujaliya kwenuku.

Pa nyengu iyi, anthukazi anyaki alutanga kuchikambiya akusambira anyaki kuti Yesu wayuskika. Ŵe munthowa, yiwu angukumana ndi Yesu ndipu wanguŵakambiya kuti: “Timoneni!” Yiwu anguwa pa maphazi ngaki ndipu “angumugwadiya.” Pavuli paki, Yesu wanguŵakambiya kuti: “Mungawopanga cha! Lutani mukakambiyi abali ŵangu kuti aluti ku Galileya, kweniko ndiku akundiwona.”—Mateyu 28:9, 10.

Kwati kwachitika chidilirisi kweniso ŵati awona angelu, asilikali wo ŵenga alonda kumuwunda waku Yesu “angumbwambwanthiya ndipu angumila nge ŵanthu akufwa.” Ŵati ayuka, yiwu anguluta mutawuni “kuchikambiya ŵara ŵa asembi vosi vo vinguchitika.” Pavuli paki, asembi anguwungana limoza ndi ŵara ŵa Ayuda ndipu angukambiskana nkhani yeniyi. Ŵati akambiskana, angupangana kuti apaski ndalama asilikali kuti aleki kukamba vo vinguchitika. Kweni akambengi kuti: “Akusambira ŵaki anguza usiku kuzimuba isi te mu tulu.”—Mateyu 28:4, 11, 13.

Kali, asani asilikali Aroma agona usiku pa nyengu yo agwira ntchitu, abayikanga. Chifukwa cha venivi, asembi anguŵakambiya kuti: “Asani nduna yavwa nkhani yeniyi [boza lakuti angugona tulu], tamukonkhoska ndisi vosi vo vachitika, mungafipanga mtima cha.” (Mateyu 28:14) Mwaviyo, asilikali ŵenaŵa angulonda ndalama zo anguŵapaska ndipu anguchita vo asembi anguŵakambiya. Chifukwa cha venivi, nkhani yaboza yakuti akusambira anguba thupi laku Yesu yinguwanda kwa Ayuda wosi.

Mariya wa ku Magadala wenga weche kumuwunda ndipu waliyanga. Wati walereska mukati, wanguwona angelu ŵaŵi wo anguvwala vituŵa. Yiwu anguja pasi po panguŵikika thupi laku Yesu, munyaki kumutu, munyaki kumalundi. Angelu ŵenaŵa angumufumba kuti: “Wamunthukazi yiwi, uliyanji?” Mariya wanguŵamuka kuti: “Aŵatuzgamu Ambuya ndipu ndiziŵa cha kuti aŵaŵika pani.” Mariya wati wang’anamukiya kuvuli wanguwona so munthu munyaki. Munthu mwenuyu, wanguwerezapu so fumbu lo angelu angumufumba ndipu wangusazgiyapu so kuti: “Upenja yani?” Mariya waŵanaŵananga kuti munthu mwenuyu wenga mlimi yo waphweriyanga munda, ndipu wangukamba kuti: “Ada, asani ndimwi mwaŵato, ndikambiyeni ko mwaŵaŵika ndipu ndakuŵato.”—Yohane 20:13-15.

Yapa, Mariya waziŵanga cha kuti walongoronga ndi Yesu yo pa nyengu iyi wanguyuskika. Kweni wati wakamba kuti “Mariya!” iyu wanguziŵa kuti munthu yo walongoronga nayu wenga Yesu chifukwa cha mo wangumudaniya. Mariya wangudaniriza mwakukondwa kuti: “Raboni!” (kung’anamuwa kuti “Msambizi!”) Chifukwa chakuti Mariya waŵanaŵananga kuti Yesu waluta kuchanya nyengu yeniyo, iyu wanguko chakuvwala chaki mwanthazi. Kweni Yesu wangumukambiya kuti: “Leka kundikaniriya chifukwa ndechendakwere kwa Ada. Kweni luta kwa abali ŵangu ndipu ukaŵakambiyi kuti, ‘Ndikwere kwa Ada wo Mbawusemwi, ndipuso kwaku Chiuta wangu yo ndi Chiuta winu.’”—Yohane 20:16, 17.

Mariya wangutchimbiriya ko akutumika kweniso akusambira anyaki aku Yesu anguwungana. Wati wafika, wanguŵakambiya kuti: “Ndawona Ambuya!” Venivi, vayanananga ndi vo anthukazi anyaki anguŵakambiya. (Yohane 20:18) Kweni vo anthukazi wo anguŵakambiya “anguviwona nge venga vambula fundu.”—Luka 24:11.

Pa Sabata, pa Nisani 16, akusambira aku Yesu ŵenga ndi chitima ukongwa. Yiwu anguvwisa cha kuti ntchifukwa wuli angusaniya kuti muwunda ngwamwazi. (Mateyu 28:9, 10; Luka 24:11) Pa zuŵa lenili, Kileopa ndi wakusambira munyaki angutuwa mutawuni ya Yerusalemu ndipu alutanga ku muzi wa Emawusi, wo wenga pa mtunda wa makilomita pafufupi 11.

Ŵe munthowa, yiwu akambiskananga vinthu vo vinguchitika. Pavuli paki, munthu munyaki wangwamba kwenda nawu limoza. Iyu wanguŵafumba kuti: “Ndi nkhani wuli yo mususkana munthowa muchiyenda?” Kileopa wangumuka kuti: “Kumbi we mulendu yo waja yija mu Yerusalemu kuti uleki kuziŵa vo vachitika mwenimo mu mazuŵa yanga?” Munthu yo wanguŵafumba kuti: “Vinthu nivi?”—Luka 24:17-19.

Yiwu angumuka kuti: “Vinthu vakukwaskana ndi Yesu wa ku Nazareti, . . . Takhazganga kuti munthu mwenuyu ndiyu wazamutaska Isirayeli.”—Luka 24:19-21.

Kileopa ndi wakusambira munyaki yo wenga nayu angulutirizga kukonkhoske munthu mwenuyu vinthu vo vinguchitika pa zuŵa lenili. Yiwu angukamba kuti anthukazi anyaki anguluta kumuwunda waku Yesu kweni angusaniya kuti muwunda wenga mwazi. Anthukazi ŵenaŵa anguwona mungelu yo wanguŵakambiya kuti Yesu wayuskika. Yiwu angukambiya so munthu yo kuti ŵanthu anyaki anguluta kumuwunda kwenuku ndipu ‘angusaniya kuti vinthu ve nge mo anthukazi wo angukambiya.’—Luka 24:24.

Akusambira ŵaŵi ŵenaŵa awonekanga kuti avwisanga cha kweniso angutimbanyizgika ukongwa ndi vo vinguchitika. Munthu yo ayendanga nayu wangukamba mwanthazi kuti waŵawovyi kusintha maŵanaŵanu ngawu ngaheni, ngo ngaŵachitiskanga kuti aje ndi chitima ukongwa. Iyu wanguti: “Ŵanthu ambula zeru yimwi kweniso amitima yambula kuvwana liŵi vinthu vo achimi akukamba! Kumbi penga pakwenere cha kuti Khristu wakumani ndi masuzgu ngenanga ndi kulonde unkhankhu waki?” (Luka 24:25, 26) Munthu yo wangulutirizga kuŵakonkhoske Malemba nganandi ngo ngakambanga vakukwaskana ndi Khristu.

Ŵati ŵaja kamanavi kufika kumuzi wa Emawusi, akusambira wosi ŵaŵi akhumbanga kuziŵa vinandi. Mwaviyo, angukambiya munthu yo ŵenga nayu kuti: “Jani ndi isi chifukwa chakuti sonu ndi mazulu ndipu lumwi le pafupi kusere.” Munthu yo wanguzomera ndipu ŵati afika mumuzi wo, anguryiya limoza chakurya. Achirya, munthu yo wangupemphera, wangumenya chiŵandi ndipu wanguŵapaska. Wati wachita venivi, yiwu angumuŵanika kuti ndi Yesu ndipu pavuli paki wangusoŵa ŵaka warawara. (Luka 24:29-31) Pa nyengu iyi, anguvwana kuti Yesu wayuskika nadi.

Akusambira ŵenaŵa angukondwa ukongwa ndipu angwamba kukambiskana vo vinguchitika kuti: “Asi mitima yidu yakoliyanga nge motu wachikambiskana nasi ndipuso wachitijuliya Malemba munthowa?” (Luka 24:32) Yiwu anguwere ku Yerusalemu mwaliŵiliŵi ndipu kwenuku angusaniya akutumika ŵe limoza ndi ŵanthu anyaki. Kileopa ndi wakusambira munyaki ŵechendakonkhoski vo vinguŵachitikiya, anguvwa ŵanthu anyaki chikamba kuti: “Ambuya ayuskika nadi, ndipu awoneke kwaku Simoni!” (Luka 24:34) Pavuli paki, Kileopa ndi wakusambira munyaki angukamba vo vinguŵachitikiya. Nawu ŵenga akaboni pa nkhani yeniyi, chifukwa anguwona ndi masu ngawu kuti Yesu wayuskika nadi.

Pavuli paki, panguchitika chinthu chakuziziswa ukongwa. Yesu wanguwoneke muchipinda cho yiwu ŵenga chinanga kuti visasa vosi venga vakujala. Yiwu angubisama muchipinda chenichi chifukwa chakuti awopanga Ayuda. Chinanga kuti venga viyo, Yesu wanguma pakati pawu ndipu yiwu anguzizwa ukongwa kuti iyu wasere wuli. Iyu wanguŵakambiya mwakuzika kuti: “Chimangu chiŵi namwi.” Kweni ŵanthu wosi anguchita mantha ukongwa chifukwa “aŵanaŵananga kuti awona mzimu” nge po anguchitiya nyengu yinyaki.—Luka 24:36, 37; Mateyu 14:25-27.

Kuti waŵawovyi kuziŵa kuti iyu wenga muzukwa cha pamwenga chinthu chinyaki nge mo yiwu aŵanaŵaniyanga, Yesu wanguŵalongo manja ndi maphazi ngaki. Ndipu wanguŵakambiya kuti: “Ntchifukwa wuli musuzgika maŵanaŵanu, ndipu ntchifukwa wuli mukayika mumitima yinu? Wonani manja ndi maphazi ngangu kuti musimikizi kuti ndini. Ndikoni ndipu wonani, chifukwa mzimu ulivi mnofu ndi viwanga nge mo mutindiwone ini.” (Luka 24:36-39) Yiwu angukondwa ukongwa ndipuso angusoŵa chakukamba. Kweni pa nyengu iyi, akayikiyanga mbwenu kamanavi.

Yesu wanguŵafumba fumbu kuti waŵawovyi kuleka kukayika. Iyu wanguti: “Kumbi mwe ndi chakurya chechosi?” Yiwu angumupaska chipindi cha somba yakotcha ndipu iyu wangurya. Pavuli paki wanguŵakambiya kuti: “Pa nyengu yo ndenga namwi [ndechendafwi], ndingukukambiyani kuti vinthu vosi vakukwaskana ndi ini vo vikulembeka mu Dangu laku Mozesi, mu Vakulemba va Achimi, ndipuso mubuku la Masalimo, vitenere kufiskika.”—Luka 24:41-44.

Yesu wati wawoneke kwaku Kileopa ndi wakusambira munyaki, wanguŵawovya kuvwisa Malemba. Ndipu venivi ndivu so wanguchita pa nyengu iyi. Iyu wanguti: “Ivi ndivu vikulembeka kuti Khristu wazamukumana ndi masuzgu, ndipuso wazamuyuskika ku nyifwa pa zuŵa lachitatu. Ndipuso kuti chifukwa cha zina laki, kulapa kuti maubudi ngagowokereki, kwazamupharazgika ku mitundu yosi kwambiya ku Yerusalemu. Yimwi mwazamuja akaboni a vinthu venivi.”—Luka 24:46-48.

Pa nyengu yo akusambira anguwungana muchipinda, wakutumika Tomasi pengavi. Pati pajumpha mazuŵa, akusambira anyaki angumukambiya mwakukondwa kuti: “Tawona Ambuya!” Kweni Tomasi wanguŵakambiya kuti: “Ndingagomezga cha kwambula kuti ndawona mabamba nga mumanja mwawu mo angukhomeka ndi mizumali ndipuso kuserezamu chikumbu changu mumabamba ngo, kweniso kuserezamu manja ngangu mumbaŵala mwawu.”—Yohane 20:25.

Pati pajumpha mazuŵa 8, akusambira anguwungana so muchipinda ndipu visasa vosi venga vakujala kweni pa nyengu iyi, Tomasi wengapu. Yesu wanguwoneke pakati pawu we ndi liŵavu nge la munthu ndipu wangukamba kuti: “Chimangu chiŵi namwi.” Pavuli paki wangukambiya Tomasi kuti: “Ŵika chikumbu chaku yapa ndipu wona manja ngangu, ndipuso sereza janja laku mumbaŵala mwangu. Leka kukayika, kweni gomezga.” Tomasi wangudaniriza kuti: “Ambuya kweniso Chiuta wangu!” (Yohane 20:26-28) Kwambiya pa nyengu yeniyi, Tomasi wangukayika so cha kuti Yesu wayuskika nadi ndi liŵavu lauzimu ndipu wamiya Yehova Chiuta.

Yesu wangumukambiya kuti: “Kumbi wagomezga chifukwa chakuti wandiwona? Mbakutumbikika wo agomezga ŵechendawoni.”—Yohane 20:29.