SAMBIRU 17
Kumbi Yesu ndi Munthu Wamtundu Wuli?
Asani tisambira vinthu vo Yesu wakambanga ndi kuchita po wenga pacharu chapasi, tiwona mijalidu yaki yamampha yo yititiwovya kuti tije pa ubwezi ndi iyu kweniso Awisi a Yehova. Kumbi iyu wenga ndi mijalidu wuli? Nanga isi tingamuyezga wuli pa umoyu widu?
1. Kumbi Yesu wayanana ndi Awisi mu nthowa wuli?
Yesu waja wachisambira ndipuso wachiwona vinandi kutuliya kwa Awisi pa vyaka mabiliyoni nganandi vo waja nawu kuchanya. Mwaviyo iyu waŵanaŵana, watuvwa ndipuso wachita vinthu nge yiwu. (Ŵerengani Yohane 5:19.) Yesu walongo mijalidu yosi ya Awisi, ndipu wangukamba kuti: “Munthu weyosi yo wawona ini, wawona so Ada.” (Yohane 14:9) Asani mungasambira mijalidu yaku Yesu, mumuziŵengi umampha Yehova. Mwakuyeruzgiyapu, Yesu wachitanga vinthu mwalisungu ndi ŵanthu, ndipu venivi vilongo kuti Yehova watikuphweriyani.
2. Kumbi Yesu walongo wuli kuti watimuyanja ukongwa Yehova?
Yesu wangukamba kuti: “Kuti charu chiziŵi kuti nditanja Ada, ndichitengi nge mo Ada akundilamuliya.” (Yohane 14:31) Pa nyengu yo wenga pacharu chapasi, Yesu wangulongo kuti watiŵayanja ukongwa Awisi chifukwa waŵavwiyanga chinanga wangakumana ndi masuzgu ngakulu. Yesu wayanjanga so kukambiya ŵanthu vakukwaskana ndi Awisi, ndipu waŵawovyanga kuti aje nawu pa ubwezi.—Yohane 14:23.
3. Kumbi Yesu walongo wuli kuti watanja ŵanthu?
Bayibolu likamba kuti Yesu ‘watiwuyanja ukongwa mtundu wa ŵanthu.’ (Nthanthi 8:31, mazu ngamumphata) Iyu wangulongo kuti watiŵayanja nadi ŵanthu chifukwa waŵachiskanga ndipuso waŵawovyanga ndi mtima wosi. Iyu wachitanga vakuziziswa, ndipu vakuziziswa venivi valongonga nthazi zaki pe cha, kweni valongonga so kuti watiŵachitiya lisungu ŵanthu. (Mariko 1:40-42) Yesu wachitanga vinthu mwachanju ndi ŵanthu kweniso mwambula kwanjiya. Iyu wakambanga mazu ngakuchiska ndipu wawovyanga ŵanthu a mtima wamampha wo amuvwisiyanga kuti alindizengi vinthu vamampha vo vichitikengi kunthazi. Iyu wenga wakunozgeka kusuzgika ndipuso kufwiya ŵanthu wosi chifukwa waŵayanjanga. Kweni iyu watanja ukongwa ŵanthu wo avwiya vo iyu wasambiza.—Ŵerengani Yohane 15:13, 14.
SAMBIRANI VINANDI
Sambirani vinandi vakukwaskana ndi mijalidu yaku Yesu. Ndipuso wonani mo tingalongore chanju kweniso jalidu lakupaska nge mo iyu wachitiyanga.
4. Yesu watiŵayanja ukongwa Awisi
Vo Yesu wachitanga vititisambiza mo tingalongore kuti titanja Chiuta. Ŵerengani Luka 6:12 ndipuso Yohane 15:10; 17:26. Asani mwaŵerenga lemba lelosi pakulija, kambiskanani fumbu ili:
Kumbi tingalongo wuli kuti titanja Yehova nge mo Yesu wachitiyanga?
Yesu waŵayanjanga ukongwa Awisi akuchanya ndipu wakambiskananga nawu kaŵikaŵi mu pempheru
5. Yesu waŵanaŵaniya ŵanthu wo asuzgika
Yesu waŵikanga panthazi vakukhumba va ŵanthu mumalu mwa vakukhumba vaki. Chinanga wangavuka wuli, iyu wagwiriskiyanga ntchitu nyengu ndipuso nthazi zaki kuti wawovyi ŵanthu. Ŵerengani Mariko 6:30-44, pavuli paki kambiskanani mafumbu yanga:
Kumbi lemba ili lilongo wuli kuti Yesu waŵanaŵaniyanga ŵanthu?—Wonani vesi 31, 34, 41, ndi 42.
Ntchifukwa wuli Yesu wawovyanga ŵanthu?—Wonani vesi 34.
Pakuti Yesu wakutoliyaku mijalidu yaku Yehova, kumbi venivi vilongo kuti Yehova ndi munthu wamtundu wuli?
Nanga isi tingalongo wuli kuti tiŵanaŵaniya ŵanthu nge mo Yesu wachitiyanga?
6. Yesu we ndi jalidu lakupaska
Yesu wenga wakupaska chinanga kuti wengavi vinthu vinandi, ndipu nasi wakutichiska kuti tije ndi jalidu lenili. Ŵerengani Machitidu 20:35, pavuli paki kambiskanani fumbu ili:
Mwakukoliyana ndi vo Yesu wangukamba, tingachita wuli kuti tikondwengi?
Woneriyani VIDIYO, pavuli paki kambiskanani fumbu ili:
Kumbi ndi nthowa nizi zo tingapaskiya anyidu chinanga kuti tilivi vinthu vinandi?
Kumbi muziŵa?
Bayibolu lititikambiya kuti tipempherengi kwaku Yehova mu zina laku Yesu. (Ŵerengani Yohane 16:23, 24.) Asani tipemphera mu zina laku Yesu, tilongo kuti tiwonga vo iyu wakuchita kuti watiwovyi kuja pa ubwezi ndi Yehova.
ŴANTHU ANYAKI AKAMBA KUTI: “Chiuta watoliyaku kanthu cha masuzgu ngidu.”
Pakuti Yesu wakutoliyaku mijalidu ya Awisi, kumbi vo iyu wachitanga vilongo wuli kuti Yehova watitiŵanaŵaniya?
KUMBI MWASAMBIRANJI?
Yesu watimuyanja ukongwa Yehova kweniso watanja ŵanthu. Mungamuziŵa umampha Yehova asani mungaziŵa Yesu, chifukwa iyu wakutoliyaku mijalidu ya Awisi.
Kuweriyamu
Kumbi tingalongo wuli kuti titanja Yehova nge mo Yesu wachitiyanga?
Kumbi tingalongo wuli kuti titanja ŵanthu nge mo Yesu wachitiyanga?
Kumbi ndi jalidu nili laku Yesu lo litikukondwesani ukongwa?
FUFUZANI
Wonani mijalidu yinyaki yaku Yesu yo tingatoliyaku.
“Kuti Muyezgi Yesu, Mukhumbika . . .” (Yesu Ndi Nthowa, Uneneska ndi Umoyu, peji 317)
Wonani chifukwa cho titenere kupemphera mu zina laku Yesu?
“Ntchifukwa Wuli Tikhumbika Kupemphera mu Zina Laku Yesu?” (Chigongwi cha Alinda, February 1, 2008)
Kumbi Bayibolu likambapu chechosi chakukwaskana ndi mo Yesu wawonekiyanga?
Kumbi mo Yesu waŵawoniyanga anthukazi vititisambizanji?
“Chiuta Wakhumba Kuti Anthukazi Apaskikengi Ulemu” (Chigongwi cha Alinda, September 1, 2012)