SAMBIRU 19
Kumbi Akaboni aku Yehova Mbakhristu Auneneska?
Isi Akaboni aku Yehova tigomezga kuti te Akhristu auneneska. Chifukwa wuli? Wonani ko kutuliya vo tigomezga, zina lo tiziŵika nalu kweniso mo tilongore kuti titanjana.
1. Kumbi vo Akaboni aku Yehova agomezga vituliya pani?
Yesu wangukamba kuti: “Mazu . . . [ngaku Chiuta] mbuneneska.” (Yohane 17:17) Mwakuyanana ndi Yesu, vo Akaboni aku Yehova agomezga vituliya mu Mazu ngaku Chiuta. Mwakuyeruzgiyapu, wonani mbiri yidu. Kukumaliya kwa vyaka va m’ma 1800, kagulu ka akusambira Bayibolu kangwamba kufufuza Malemba. Yiwu angwamba kugomezga vo asaniyanga mu Malemba chinanga kuti vapambananga ndi vo matchalitchi ngasambizanga. Pavuli paki, akambiyangaku ŵanthu anyaki fundu za mu Bayibolu zenizi.a
2. Ntchifukwa wuli tiziŵika kuti Akaboni aku Yehova?
Yehova wadana ŵanthu wo atimusopa kuti akaboni ŵaki chifukwa akamba uneneska wakukwaskana ndi iyu. (Aheberi 11:4–12:1) Mwakuyeruzgiyapu, mu nyengu yakali Chiuta wangukambiya ŵanthu ŵaki kuti: “Yimwi ndimwi akaboni ŵangu.” (Ŵerengani Yesaya 43:10.) Yesu wadanika kuti “Kaboni Wakugomezgeka.” (Chivumbuzi 1:5) Mwaviyo, mu 1931 tingusankha kuti tiyambi kuziŵika kuti Akaboni aku Yehova. Tikondwa ukongwa kuziŵika ndi zina lenili.
3. Kumbi Akaboni aku Yehova alongo wuli kuti atanjana nge mo Yesu wachitiyanga?
Yesu waŵayanjanga ukongwa akusambira ŵaki mwakuti waŵawonanga nge ŵanthu a mu banja laki. (Ŵerengani Mariko 3:35.) Mwakuyanana waka, Akaboni aku Yehova ŵe nge banja lakukoliyana lapacharu chosi. Ndichu chifukwa chaki tidanana kuti abali ndi azichi. (Filimoni 1, 2) Tivwiya so dangu lakuti: “Muyanjengi gulu losi la abali.” (1 Peturo 2:17) Akaboni aku Yehova alongo kuti atanjana mu nthowa zakupambanapambana. Mwakuyeruzgiyapu, yiwu atovya anyawu pacharu chosi chapasi asani akumana ndi masuzgu.
SAMBIRANI VINANDI
Yiziŵeni umampha mbiri ya Akaboni aku Yehova, kweniso wonani ukaboni wakuti te Akhristu auneneska.
Vo Akhristu auneneska agomezga ativito mu Bayibolu ndipuso apharazgiya anyawu
4. Vo tigomezga vituliya mu Bayibolu
Yehova wangukambiya limu kuti ŵanthu azakuwuziŵa umampha uneneska wa mu Bayibolu. Ŵerengani Daniyeli 12:4 ndipuso mazu ngamumphata pa lemba ili, pavuli paki kambiskanani fumbu ili:
Kumbi ndi “vinthu vinandi” nivi vo ŵanthu aku Chiuta azamuziŵa chifukwa cha kulutirizga kufufuza mu Bayibolu?
Wonani vo kagulu ka akusambira Bayibolu, kusazgapu Charles Russell kachitanga pakusambira Mazu ngaku Chiuta. Woneriyani VIDIYO, pavuli paki kambiskanani fumbu ili:
Nge po tawone mu vidiyo, kumbi Charles Russell ndi anyaki achitanga wuli pakusambira Bayibolu?
Kumbi muziŵa?
Nyengu zinyaki tisintha vo tigomezga. Chifukwa wuli? Nge mo lumwi liŵaliya kamanakamana, Chiuta nayu watovya ŵanthu ŵaki kuvwisa Mazu ngaki kamanakamana. (Ŵerengani Nthanthi 4:18.) Mwaviyo, chinanga kuti Bayibolu lisintha cha, kweni isi tisintha vo tigomezga asani tavwisa vo likamba.
5. Tichita vinthu mwakukoliyana ndi zina lidu
Ntchifukwa wuli tikusankha kuti tiziŵikengi kuti Akaboni aku Yehova? Woneriyani VIDIYO, pavuli paki kambiskanani fumbu lo le mumphata.
Ntchifukwa wuli mphakwenere kudanika kuti Akaboni aku Yehova?
Ntchifukwa wuli Yehova wakusankha ŵanthu kuti aje Akaboni ŵaki? Ntchifukwa chakuti iyu wakhumba kuti yiwu alongongi kuti iyu ndi Chiuta wauneneska ndipuso asuskengi maboza ngo ngakambika ngakukwaskana ndi iyu. Mwakuyeruzgiyapu, wonani maboza ngaŵi ngo ŵanthu akamba.
Visopa vinyaki visambiza ŵanthu ŵawu kuti Chiuta wakhumba kuti agwiriskiyengi ntchitu vikozgu pakumusopa. Kweni ŵerengani Levitiko 26:1, ndipu pavuli paki kambiskanani mafumbu yanga:
Kumbi ndivu Bayibolu likamba? Kumbi Yehova watuvwa wuli asani tisopa angoza?
Alongozgi anyaki a visopa asambiza kuti Yesu ndi Chiuta. Kweni ŵerengani Yohane 20:17, ndipu pavuli paki kambiskanani mafumbu yanga:
Kumbi ndivu Bayibolu likamba? Kumbi Chiuta ndipuso Yesu ndi munthu yumoza?
Kumbi mutuvwa wuli kuziŵa kuti Yehova wakutuma Akaboni kuti apharazgi uneneska wakukwaskana ndi iyu ndipuso Mwana waki?
6. Titanjana
Bayibolu likamba kuti Akhristu mbakukoliyana nge mo viŵalu va liŵavu viliri. Ŵerengani 1 Akorinto 12:25, 26, pavuli paki kambiskanani mafumbu yanga:
Kumbi Akhristu auneneska akhumbika kuchita wuli asani Mkhristu munyawu wakumana ndi masuzgu?
Kumbi muwona kuti Akaboni aku Yehova atanjana?
Asani Akaboni aku Yehova a mucharu chinyaki akumana ndi masuzgu, Akaboni aku Yehova pacharu chosi achitapu kanthu mwaliŵi. Kuti muwoni chakuwoniyapu, woneriyani VIDIYO. Pavuli paki kambiskanani fumbu lo le mumphata.
Kumbi ntchitu yakupereka chovyu yo Akaboni aku Yehova agwira yilongo wuli kuti atanjana?
Akhristu auneneska atovya wo akumana ndi masuzgu
ŴANTHU ANYAKI AKAMBA KUTI: “Chisopa cha Akaboni aku Yehova chazaku sonu.”
Kumbi Yehova wakwamba zukwanji kudana ŵanthu wo atimusopa kuti akaboni ŵaki?
KUMBI MWASAMBIRANJI?
Akaboni aku Yehova mbakhristu auneneska. Te nge banja lapacharu chosi, vo tigomezga vituliya mu Bayibolu kweniso tipharazga uneneska wakukwaskana ndi Yehova.
Kuweriyamu
Ntchifukwa wuli tikusankha kuti tiziŵikengi kuti Akaboni aku Yehova?
Kumbi tichita wuli vinthu ndi Akaboni anyidu?
Kumbi muwona kuti Akaboni aku Yehova mbakhristu auneneska?
FUFUZANI
Wonani mbiri yidu.
Akaboni aku Yehova Alongo Chivwanu, Chigaŵa 1: Kutuwa M’mdima (1:00:53)
Wonani chakuwoniyapu cho chilongo mo Akaboni aku Yehova avumbuliya visambizu vaboza.
Wonani kwamuka kwa mafumbu ngakukwaskana ndi Akaboni aku Yehova.
“Mafumbu ngo Ŵanthu Afumba Kaŵikaŵi Ngakukwaskana ndi Akaboni aku Yehova” (Nkhani za pa webusayiti)
Stephen waŵatinkhanga ukongwa ŵanthu a mitundu yinyaki mwakuti waŵachitiyanga nkhaza. Wonani vo iyu wanguwona pakati pa Akaboni aku Yehova vo vingumuchitiska kuti wasinthi.
“Nkharu Yangu Yingunangika Ukongwa” (Chigongwi cha Alinda, September 1, 2015)
a Tikwamba kusindikiza magazini ya Chigongwi cha Alinda kutuliya mu 1879 kuti tikonkhoskengi uneneska wa mu Bayibolu.