Malifalensi nga Nkhani za Unganu wa Umoyu Widu Ndipuso Uteŵeti
NOVEMBER 4-10
CHUMA CHAKUTULIYA MU MAZU NGAKU CHIUTA SALIMO 105
“Wakumbuka Phanganu Laki Mpaka Muyaya”
Lutirizgani Kugomezga Ukongwa Layizgu Laku Yehova la Charu Chifya
Tiyeni tikambiskani vinthu vinyaki vo Yehova wanguchitiya ŵanthu mu nyengu yakali, vo vawonekanga kuti vingachitika cha. Iyu wangukambiya Abrahamu ndi Sara kuti abalengi mwana pa nyengu yo ŵenga akukota. (Gene. 17:15-17) Wangukambiya so Abrahamu kuti mphapu yaki yazamupaskika charu cha Kanani. Kwa vyaka vinandi, Ayisirayeli wo ŵenga mphapu yaku Abrahamu ŵenga ku ukapolu ku Ijipiti. Pa nyengu iyi vawonekanga nge kuti layizgu lenili lazamufiskika cha. Kweni Yehova wangufiska vo wangulayizga. Pavuli paki, Yehova wangukamba kuti Elizabeti yo wenga wakukota wabalengi mwana. Yehova wangukambiya so Mariya yo wenga mwali kuti wabalengi Mwana. Ndipu venivi vatingi vifiskengi vo Yehova wangulayizga vyaka masawuzandi nganandi kuvuli ko mumunda wa Edeni.—Gene. 3:15.
Asani tiŵanaŵaniya malayizgu ngosi ngaku Yehova kweniso mo wangungafiskiya, tivwisa nthazi zikulu zo wenazu. Venivi vitiwovyengi kuti tigomezgengi ukongwa kuti charu chifya chizengi nadi. (Ŵerengani Yoswa 23:14; Yesaya 55:10, 11.) Ndipu kugomezga venivi kutitiwovya kuti tiwovyengi ŵanthu anyaki kuziŵa kuti charu chifya cho tilindizga ndi malotu ŵaka cha pamwenga nthanu. Yehova ndiyu wakukamba kuti kuŵengi kuchanya kufya ndi charu chapasi chifya ndipu “mazu yanga ngakugomezgeka ndipuso ngauneneska.”—Chivu. 21:1, 5.
it-2 1201¶2
Mazu
Vinthu vo Chiuta wakulenga, vamoyu ndipuso vambula umoyu vivwiya mazu ngaku Chiuta ndipuso wativigwiriskiya ntchitu kuti wafiski khumbu laki. (Sl 103:20; 148:8) Mazu ngaki ngakuthembeka; ndipuso wafiska vo walayizga. (Dt 9:5; Sl 105:42-45) Nge mo wakukambiya kuti mazu ngaki “ngaŵengeku mpaka muyaya”; ngazamuwere cha kwaku iyu kwambula kufiska khumbu laki.—Yes 40:8; 55:10, 11; 1Pe 1:25.
Fundu Zakuzirwa za mu Bayibolu
w86 11/1 19 ¶15
Achinyamata, Mungawovya Kuti Banja Linu Lije Lalikondwa Kweniso Lakukoliyana
“Yiwu angumanga malundi ngaki ndi simbi, ndipu khosi laki angulisereza muvisulu; mpaka pa nyengu yo mazu ngaki ngangufiskikiya, mazu ngaku Yehova ndingu ngangumuyengetuwa.” (Salimo 105:17-19) Yosefi wenga kapolu kweniso mukayidi kwa vyaka 13 mpaka po layizgu laku Yehova lingufiskiya. Masuzgu ngo Yosefi wangukumana nangu ngangumuwovya kuti waje munthu wamampha ukongwa. Chinanga kuti ndi Yehova cha yo wanguchitiska kuti Yosefi wakumani ndi masuzgu kweni wangungazomereza pa chifukwa chamampha. Kumbi Yosefi wagomezganga kuti “mazu ngaku Yehova” ngazamufiskika chinanga kuti wakumananga ndi masuzgu? Kumbi masuzgu ngangumuwovya kuti mijalidu yamampha yo wenga nayu yiŵi yamampha ukongwa kuluska pakwamba? Kumbi ngangumuwovya kuti waŵi wakuzikira, wakujiyuyuwa, kweniso wakukho mwauzimu ndipuso wakusimikiza mtima kuchita uteŵeti wakusuzga? Yosefi wati watuwa mu masuzgu ngenanga wanguja wamampha ukongwa nge golidi yo watuwa mu motu. Iyu wenga wakutowa kweniso wakuzirwa ukongwa kwaku Chiuta yo wangumugwiriskiya ntchitu pakumaliya paki.—Genezesi 41:14, 38-41, 46; 42:6, 9.
NOVEMBER 11-17
CHUMA CHAKUTULIYA MU MAZU NGAKU CHIUTA SALIMO 106
“Yiwu Angumuluwa Chiuta Mtaski Wawu”
“Ndiyani Yo we Kuchigaŵa Chaku Yehova?”
Ayisirayeli anguchita mantha chifukwa cha mtambu ufipa, malimphezi ndi vinthu vinyaki vakuziziswa vo Chiuta wanguŵalongo. Yiwu angupempha Mozesi kuti wakakambiskani ndi Yehova pa Phiri la Sinayi mumalu mwaku yiwu ndipu Mozesi wanguzomera. (Eki. 20:18-21) Mozesi wanguja paphiri ili kwa nyengu yitali. Viwoneka kuti Ayisirayeli angusoŵa chakuchita muchipululu chifukwa chakuti mulongozgi wawu pengavi. Panyaki yiwu agomezganga ukongwa ulongozgi wa munthu. Ayisirayeli angwamba kufipa mtima ndipu angukambiya Aroni kuti: “Tipangiyi chiuta kuti watilongozgengi chifukwa tiziŵa cha vo vachitikiya Mozesi, munthu yo wangutilongozga tichituwa mucharu cha Ijipiti.”—Eki. 32:1, 2.
Fundu Zakuzirwa za mu Bayibolu
w06 7/15 13 ¶9
Fundu Zikulu za Mubuku la Masalimo
106:36, 37. Mavesi yanga ngalongo kuti kusopa angoza kukoliyana ndi kupereka sembi ku viŵanda. Venivi vilongo kuti munthu yo wagwiriskiya ntchitu vikozgu pakusopa walongozgeka ndi viŵanda. Bayibolu lititikambiya kuti: “Jivikiliyeni kwa angoza.”—1 Yohane 5:21.
NOVEMBER 18-24
CHUMA CHAKUTULIYA MU MAZU NGAKU CHIUTA MASALIMO 107-108
“Wongani Yehova, Chifukwa Iyu Ngwamampha”
w07 4/15 20 ¶2
Mpingu Uthamikengi Yehova
Mpingu ndi gulu waka bweka cha. Kweniso ndi gulu waka la ŵanthu cha wo awungana kuti achiti masaza pamwenga vakukondwesa vinyaki. Kweni mpingu ndi gulu la ŵanthu wo awungana kuti athamiki Yehova Chiuta. Venivi ndimu venge kwamba kali nge mo buku la Masalimo likambiya. Lemba la Salimo 35:18 likamba kuti: “Ndipu ini ndikuwongeningi mu mpingu ukulu; ndikuthamikeningi pakati pa gulu la ŵanthu.” Mwakuyanana waka lemba la Salimo 107:31, lititichiska kuti: “Ŵanthu awongi Yehova chifukwa cha chanju chaki chambula kumala kweniso chifukwa cha ntchitu zaki zakuziziswa zo wachitiya ŵana a ŵanthu. Yiwu amukwezi mu mpingu wa ŵanthu.”
w15 1/15 9 ¶4
Wongani Yehova Kuti Mutumbikiki
Asani tikhumba kulutirizga kuwonga vitumbiku vo tasaniya, titenere kuziŵa kweniso kuŵanaŵaniya vitumbiku vo Yehova watipaska. Titenere so kuŵanaŵaniya mo walongore kuti watitanja ukongwa. Munthu munyaki yo wakulembaku Bayibolu wati waŵanaŵaniya mo Yehova walongore chanju chaki, wanguzizwa ukongwa kuwona vinthu vakuziziswa vo wamuchitiya.—Ŵerengani Salimo 40:5; 107:43.
Fundu Zakuzirwa za mu Bayibolu
it-2 420 ¶4
Amowabu
Davidi wati waja fumu, penga nkhondu pakati pa Ayisirayeli ndi Amowabu. Davidi wanguthereska Amowabu ndipu amupaskanga msonkhu. Pakumaliya pa nkhondu, anthulumi anandi aku Mowabu angufwa. Davidi wangukambiya anthulumi ŵenaŵa kuti agoni pasi mwakundanda mzeri ndipu wanguŵapima ndi vingwi viŵi. Ŵanthu wo angukwana penapa angubayika, kweni wo wanguŵapima chingwi chimoza wanguŵasiya amoyu. (2Sa 8:2, 11, 12; 1Mb 18:2, 11) Pa nkhondu yeniyi, Benaya mwana waku Yehoyiyada “wangubaya ŵana anthulumi ŵaŵi aku Ariyeli wa ku Mowabu.” (2Sa 23:20; 1Mb 11:22) Uchimi wo Balamu wangukamba vyaka 400 nkhondu iyi yechendachitiki, ungufiskika pa nyengu yo Davidi wanguthereska Amowabu. Uchimi uwu ungukamba kuti: “Nyenyezi yituwengi mwaku Yakobe, ndipu nthonga ya ufumu yituwengi mwaku Isirayeli. Iyu waswengi chisku chaku Mowabu kwambula kutondeka ndipuso waswengi mabwaza nga ŵana wosi anthulumi achimtimbaheka.” (Nu 24:17) Kweniso pakukamba va kuthereskeka kwa Amowabu, wakulemba buku la Masalimo wangukamba kuti Mowabu ndi “beseni lakusambiyamu” laku Chiuta.—Sl 60:8; 108:9.
NOVEMBER 25–DECEMBER 1
CHUMA CHAKUTULIYA MU MAZU NGAKU CHIUTA MASALIMO 109-112
Muwovyengi Yesu yo ndi Fumu!
w06 9/1 13 ¶6
Fundu Zikulu za Mubuku la Masalimo
110:1, 2—Kumbi “Ambuya” [aku Davidi] yo ndi Yesu Khristu, achitanganji po ŵenga kujanja lamaryi laku Chiuta? Yesu wati wayuskika wangukwere kuchanya ndipu wanguja kujanja lamaryi laku Chiuta mpaka mu 1914 kulindiza kuti wayambi kulamuliya nge Fumu. Kutuliya pa nyengu yeniyi, Yesu wangwamba kulamuliya Akhristu akusankhika, kuŵalongozga pa ntchitu yakupharazga kweniso kusambiza ŵanthu kuti aje akusambira ndipuso kuŵanozgekereska kuti azilamuliyengi ndi iyu mu Ufumu waki.—Mateyu 24:14; 28:18-20; Luka 22:28-30.
w00 4/1 18 ¶3
Wo Alimbana ndi Chiuta Angapunda Cha!
Ŵanthu angwamba kuyukiya ateŵeti aku Yehova kwambiya mu vyaka va mu ma 1900. Mu vyaru vinandi ŵanthu wo ŵe ndi vilatu viheni atesesa kukaniza ntchitu yakupharazga uthenga wamampha wa Ufumu waku Chiuta. Murwani widu Dyaboli yo ‘wayingayinga nge nkharamu yakukoroma kuti wamezi munthu munyaki’ ndiyu wachitiska anthulumi ŵenaŵa kuti atichitiyengi vinthu vankhaza. (1 Peturo 5:8) “Nyengu yakuŵikika ya ŵanthu amitundu” yati yamala mu 1914, Chiuta wangusankha mwana waki kuti waje Fumu ndipu wangumulamula kuti: “Luta pakati pa arwani ŵaku ukaŵathereski.” (Luka 21:24; Salimo 110:2) Khristu wangugwiriskiya ntchitu nthazi zaki kumutuzgaku Satana kuchanya ndi kumuwisiya pacharu chapasi. Pakuziŵa kuti kamujaliya kanyengu kamanavi, Dyaboli wakwiyiya Akhristu akusankhika ndi a mbereri zinyaki. (Chivumbuzi 12:9, 17) Kumbi ŵanthu wo alimbana ndi Chiuta vaŵamaliya wuli?
be 76 ¶2
Mukuwengi, Mulutengi Panthazi
Ulongozgi wakuti tigwiriskiyengi ntchitu mphasu zidu ung’anamuwa kuti tiyambengi ndisi kuchitapu kanthu. Kumbi mutamba ndimwi kupempha anyinu kuti musere nawu mu upharazgi? Kumbi mutesesa kupenja mipata kuti muwovyi wo ayamba sonu kuwungana, achinyamata kweniso ambula nthazi? Kumbi mutijipereka kutowesa Nyumba ya Ufumu pamwenga kuwovyaku ntchitu zinyaki pa unganu wachigaŵa ndi wapade? Kumbi nyengu zinyaki mungalembesaku kuti muchiteku upayiniya wakovya? Kumbi mungateŵetiyaku nge mpayiniya wa nyengu zosi pamwenga kuchiteŵete ku mpingu ko kukhumbika apharazgi anandi? Asani ndimwi mubali, kumbi mutesesa kufiska vo Malemba ngakamba kuti muje akwenere kuteŵete nge mteŵeti wakovya pamwenga mura? Kujipereka kwinu pa ntchitu zenizi ndipuso kuzomera maudindu mulongo kuti mukuwa mwauzimu.—Sali. 110:3.
Fundu Zakuzirwa za mu Bayibolu
it-1 524 ¶2
Phanganu
Phanganu Lakuti Yesu Wazamuja Wasembi nge Melekizedeki. Phanganu ili le pa Salimo 110:4, ndipu yo wangulemba buku la Aheberi, pa Aheberi 7:1-3, 15-17 wangulongo kuti Salimo ili likamba vaku Khristu. Yehova wanguchita phanganu ili ndi Yesu Khristu pe. Yesu wangulizumbuwa pa nyengu yo wachitanga phanganu la ufumu ndi akusambira ŵaki. (Lk 22:29) Yehova wangulayizga mwana waki Yesu Khristu kuti wazamuja wasembi nge mo venge ndi Melekizedeki. Melekizedeki wenga fumu ndipuso wasembi waku Chiuta pa charu chapasi. Yesu Khristu wazamuja Fumu kweniso Wasembi Mura pa charu chapasi cha, kweni kuchanya. Iyu wanguŵikika pa udindu wenuwu wati wakwere kuchanya. Ndipu wazamuja pa udindu wenuwu mpaka muyaya. (Ah 6:20; 7:26, 28; 8:1) Phanganu lenili lazamugwira ntchitu kwamuyaya chifukwa Yesu wazamulongozgeka ndi Yehova nge Fumu ndipuso Wasembi Mura kwamuyaya.—Ah 7:3.
DECEMBER 2-8
CHUMA CHAKUTULIYA MU MAZU NGAKU CHIUTA MASALIMO 113-118
Kumbi Timuweziyengenji Yehova?
w01 1/1 11 ¶13
Chanju Chinu Chikuwengi
Mazu ngo Yesu wangukamba ngalongo kuti chinthu chakwamba kweniso chakukhumbika ukongwa nkhwanja Yehova. Kweni tikuwa ndi mtima wakwanja Yehova cha. Tikhumbika kuchita kusambira kwanja Yehova. Tati tavwa vakukwaskana ndi iyu tingwamba kumuyanja. Kamana ndi kamana tingwamba kuziŵa mo wangunozge charu kuti ŵanthu ajengemu. (Genezesi 2:5-23) Tinguziŵa mo wanguchitiya vinthu ndi ŵanthu ŵati abuda. Wangutitayiya limu cha kweni wangunozga nthowa kuti watiwombo. (Genezesi 3:1-5, 15) Iyu wachita nasi vinthu mwalisungu mwakuti wangupereka mwana waki yumoza pe kuti watigowoke maubudi ngidu. (Yohane 3:16, 36) Kuziŵa fundu zenizi kwatiwovya kuti timuziŵi umampha Yehova. (Yesaya 25:1) Fumu Davidi yayanjanga ukongwa Yehova chifukwa chakuti wayiphweriyanga. (Salimo 116:1-9) Mazuŵa nganu, Yehova watitiphwere, watitilongozga kweniso watitichiska. Asani tisambira vinandi vakukwaskana ndi iyu, titimuyanja ukongwa.—Salimo 31:23; Zefaniya 3:17; Aroma 8:28.
w09 7/15 29 ¶4-5
Muwongengi Ndipuso Muperekengi ndi Mtima Wosi
Wamasalimo wangufumba kuti: “Kumbi ndimuweziyengenji Yehova pa vamampha vosi vo iyu wandichitiya?” (Sali. 116:12) Kumbi wangulonde vitumbiku wuli? Yehova wangumuwovya pa nyengu yo wakumananga ndi ‘masuzgu kweniso po wenga ndi chitima’ ndipuso ‘wangumutaska ku nyifwa.’ Ndichu chifukwa chaki Davidi wakhumbanga kuweze Yehova pa vamampha vo wangumuchitiya. Kumbi wangumuweze wuli? Iyu wangukamba kuti: “Ndifiskengi vo ndalapizgiya Yehova.” (Sali. 116:3, 4, 8, 10-14) Iyu wangusunga malayizgu ngosi ngo wangulayizga Yehova.
Namwi mungamuyezga. Mu nthowa wuli? Mulondongi marangu ngaku Chiuta ndi fundu zaki. Muŵikengi Yehova pamalu ngakwamba. Ndipuso muzomerezengi kuti mzimu waku Yehova ukulongozgeningi pa chechosi cho muchita pa umoyu winu. (Waku. 12:13; Aga. 5:16-18) Uneneska ngwakuti mungafiska cha kuweze Yehova pa vamampha vosi vo watikuchitiyani. Yehova wakondwa asani mutesesa kumuteŵete ndi mtima wosi. (Nthanthi 27:11) Ndi mwaŵi ukulu ukongwa kukondwesa Yehova mu nthowa yeniyi!
Vo Tisambira mu Buku la Ŵalevi
Sambiru lachiŵi: Titeŵete Yehova chifukwa chakuti tiwonga vo watitichitiya. Kuti tivwisi fundu iyi, tikambiskanengi vakukwaskana ndi sembi ya chimangu. Sembi iyi, yenga chigaŵa chakukhumbika ukongwa pakusopa kwauneneska kwa Ayisirayeli. Mu buku la Levitiko, tisambira kuti mu nyengu ya Ayisirayeli munthu waperekanga sembi ya chimangu kuti ‘walongo kuwonga.’ (Levi. 7:11-13, 16-18) Iyu waperekanga sembi iyi kuti wafiski waka dangu cha, kweni chifukwa chakuti wakhumbanga. Mwaviyo, iyu wachitanga viyo mwakukhumba yija chifukwa cha kwanja Yehova, Chiuta waki. Munthu yo waperekanga sembi, banja laki ndi asembi asangananga nyama ya sembi yo wapereka. Kweni penga vigaŵa vinyaki va nyama vo aviperekanga kwaku Yehova pe. Kumbi ndi vinthu wuli?
Sambiru lachitatu: Chifukwa chakuti titanja Yehova, titimupaska vinthu vamampha ukongwa. Yehova wawonanga kuti mafuta ntchigaŵa chamampha ukongwa cha nyama. Wangukamba so kuti viŵalu vinyaki va nyama, nge sana venga vakuzirwa ukongwa. (Ŵerengani Levitiko 3:6, 12, 14-16.) Mwaviyo, Yehova wakondwanga ukongwa asani munthu wapereka mwakukhumba yija viŵalu venivi ndi mafuta. Asani wachita viyo, walongonga kuti wakhumbisiska kumupaska vinthu vamampha ukongwa Chiuta. Mwakuyanana ŵaka, Yesu wangumupaska vinthu vamampha ukongwa Yehova mwakuchita vosi vo wangafiska pakumuteŵete. (Yoha. 14:31) Yesu wakondwanga kuchita khumbu laku Chiuta ndipuso wangayanjanga ukongwa marangu ngaki. (Sali. 40:8) Yehova watenere kuti wakondwanga ukongwa asani wawona kuti Yesu wakhumbisiska kumuteŵete!
Mwakuyanana ndi sembi za chimangu, uteŵeti wo tichitiya Yehova ulongo kuti titimuyanja. Titimupaska vinthu vamampha ukongwa Yehova chifukwa titimuyanja ndi mtima widu wosi. Iyu watenere kuti wakondwa ukongwa asani wawona kuti ateŵeti ŵaki mamiliyoni nganandi akhumbisiska kumuteŵete chifukwa chakuti atimuyanja kweniso atanja nthowa zaki! Tichiskika ukongwa asani tikumbuka kuti Yehova wawona vo tichita kweniso chifukwa cho tichitiya viyo. Mwakuyeruzgiyapu, asani ndimwi wakukota ndipu mungafiska cha kuchita vinandi nge mo mukhumbiya, mungakayikanga cha kuti Yehova watikuvwisani. Mungaŵanaŵana kuti muchita vinandi cha kweni Yehova wawona chanju cho chitikuchitiskani kuti muchiti vo mungafiska. Iyu wakondwa kulonde vinthu vamampha vo mungakwaniska kumupaska.
Fundu Zakuzirwa za mu Bayibolu
w12 5/15 22 ¶1-2
Vo Akuŵerenga Afumba
Wamasalimo wangulemba kuti: “Nyifwa ya ŵanthu ŵaki akugomezgeka Yehova watiyiwona kuti njakuzirwa.” (Sali. 116:15) Yehova wawona kuti umoyu wa mteŵeti waki weyosi ngwakuzirwa ukongwa. Kweni mazu nga pa Salimo 116 ngakamba va nyifwa ya munthu yumoza pe cha.
Asani mukamba nkhani ya maliru, mukhumbika cha kugwiriskiya ntchitu lemba la Salimo 116:15 pakukonkhoska munthu yo wafwa, chinanga kuti munthu yo wenga wakugomezgeka kwaku Yehova. Chifukwa wuli? Chifukwa chakuti wamasalimo wang’anamuwanga vinandi. Iyu wang’anamuwanga kuti Chiuta wawona kuti waluza ukongwa asani ateŵeti ŵaki wosi akugomezgeka ŵafwa.—Wonani Salimo 72:14; 116:8.
DECEMBER 9-15
CHUMA CHAKUTULIYA MU MAZU NGAKU CHIUTA SALIMO 119:1-56
“Kumbi Mnyamata Wangachita Wuli Kuti Nthowa Yaki Yilutirizgi Kuja Yakutowa?”
w87 11/1 18 ¶10
Kumbi Mulutirizga Kuja Akutowa?
Pa Aefeso 5:5 Paulo wangutcheŵeska kuti: “Pakuti fundu iyi mutiyiziŵa kweniso yimwi mwaŵeni muŵanika umampha kuti munthu weyosi yo wachita ureŵi pamwenga munthu wakufipiskika, pamwenga wambunu, ko kung’anamuwa kusopa ngoza, wazamuhara cha Ufumu waku Khristu kweniso waku Chiuta.” Kweni chaka chechosi ŵanthu masawuzandi nganandi achenyeka pamwenga kusezgeka chifukwa cha kuchita ureŵi, ko nkhunangiya liŵavu. (1 Akorinto 6:18) Kanandi venivi vichitika chifukwa chakuti munthu waleka “kuchita vinthu mwakuphwere mwakukoliyana ndi mazu [ngaku Chiuta].” (Salimo 119:9) Mwakuyeruzgiyapu, abali anandi asani ŵe pa holide achita vinthu mwambula kujiko. Akhumba cha kuchita vinthu ndi Akhristu anyawu, kweni aja pa ubwezi ndi ŵanthu wo mbakaboni cha. Yiwu achita viyo chifukwa aŵanaŵana kuti anyawu wo mbanthu amampha.’ Ndipu Akhristu anyaki atamba kuchita mijalidu yiheni yo ŵanthu yaŵa achita. Akhristu anyaki atanjana ukongwa ndi ŵanthu wo agwira nawu ntchitu. Mkhristu munyaki yo wenga mura mu mpingu wayanjananga ukongwa ndi munthukazi yo wagwiranga nayu ntchitu ndipu wanguleka banja laki ndi kwamba kuja ndi munthukazi uyu. Munthu uyu wangusezgeka. Vo Bayibolu likamba vauneneska nadi kuti, “Kwanjana ndi ŵanthu aheni kunanga nkharu yamampha”!—1 Akorinto 15:33.
w06 6/15 25 ¶1
“Nditiviyanja Ukongwa Vikumbusu Vinu”
YEHOVA wapereka vikumbusu kwa ateŵeti ŵaki kuti amalani ndi masuzgu ngo akumana nangu. Vikumbusu vinyaki titivisaniya asani tiŵerenga Bayibolu pakutija, po vinyaki titivisaniya kutuliya ku ndemanga zo abali apereka pa maunganu. Fundu zinandi zo tiŵerenga pamwenga kuvwa zija zachilendu cha kwaku isi. Fundu zo zija kuti tikuzisambirapu kali. Kweni tikhumbika kukumbusika kaŵikaŵi khumbu laku Yehova, marangu ngaki kweniso ulongozgi waki chifukwa chakuti tiluwa. Tiwongengi vikumbusu vo Chiuta watitipaska. Vikumbusu venivi vititiwovya kuti tikumbukengi vo vingutichiska kuti tijengi umoyu wo ukondwesa Chiuta. Ndichu chifukwa chaki wamasalimo wangukambiya Yehova kuti: “Nditiviyanja ukongwa vikumbusu vinu.”—Salimo 119:24.
Wezani Masu Nginu Kuti Ngaleki Kulereska Vinthu Vaŵakaŵaka!
Kweni vo tiwona vingananga maŵanaŵanu ngidu. Kukoliyana pakati pa masu ndi maŵanaŵanu ngidu nkhwanthazi ukongwa mwakuti vo masu ngidu ngawona vingachitiska kuti khumbiru liheni likuwi. Chifukwa chakuti tija mucharu cho chiwusika ndi Satana Dyaboli, vithuzi viheni ndipuso nkhani zaboza ve peposi. Vinthu venivi vingatilandizga chinanga kuti tingaviwona mwaliŵiliŵi. (1 Yoha. 5:19) Ndichu chifukwa chaki wamasalimo wangupempha Chiuta kuti: “Wezani masu ngangu kuti ngaleki kulereska vinthu vaŵakaŵaka; ndisungeni wamoyu mu nthowa yinu.”—Sali. 119:37.
Fundu Zakuzirwa za mu Bayibolu
w05 4/15 10 ¶2
Mugomezgengi Mazu Ngaku Yehova
Fundu yikulu yo ye mu Salimo 119 yilongo kuti mazu ngaku Chiuta pamwenga uthenga waki ngwakuzirwa. Kuti sumu iyi yikumbukikengi mwambula kusuzga, wamasalimo wakuyilemba mwakugwiriskiya ntchitu vilembu va alifabeti. Salimo ili le ndi mavesi 176 ngo ngakulembeka mwakugwiriskiya ntchitu alifabeti ya Chiheberi. Mu Chiheberi chakwambiriya, chaputala ichi che ndi vigaŵa 22 ndipu chigaŵa chechosi che ndi mavesi 8 ngo ngatamba ndi chilembu chakuyanana. Salimo ili likamba va mazu ngaku Chiuta, dangu, vikumbusu, nthowa, marangu, fundu ndi vyeruzgu. Mu nkhani iyi kweniso yakulondopu, tikambiskanengi mo Salimo 119 akulifwatuliya mwauneneska mu Malemba nga Chiheberi. Kuŵanaŵaniya vo vinguchitikiya ateŵeti aku Yehova akali kweniso a mazuŵa nganu kutitiwovya kuvwisa Salimo ili ndipuso kuwonga Mazu ngaku Chiuta, Bayibolu.
DECEMBER 16-22
CHUMA CHAKUTULIYA MU MAZU NGAKU CHIUTA SALIMO 119:57-120
Ntchinthu Wuli cho Chingatiwovya Kuti Tikunthiyengepu Masuzgu?
w06 6/15 20 ¶2
“Nditiliyanja Ukongwa Dangu Linu!”
Mungajifumba kuti, “Kumbi dangu laku Chiuta lingumupembuzga wuli wamasalimo kweniso kumuwovya kuti wakondwengi?” Iyu waziŵanga kuti Yehova watimuyanja ndipu venivi vingumupembuzga. Kuziŵa fundu yakuti Chiuta wakupereka dangu chifukwa cha chanju kunguwovya wamasalimo kuti wakondwengi chinanga kuti wakumananga ndi masuzgu. Iyu waziŵanga kuti Yehova wachitanga nayu vinthu mwachanju. Kweniso kugwiriskiya ntchitu ulongozgi waku Chiuta kunguwovya wamasalimo kuti waje wazeru kuphara arwani ŵaki ndipuso waje ndi umoyu. Kuvwiya dangu kungumuwovya kuti waje ndi chimangu kweniso njuŵi yamampha.—Salimo 119:1, 9, 65, 93, 98, 165.
w00 12/1 14 ¶3
Kumbi Mutiviyanja Ukongwa Vikumbusu Vaku Yehova?
Wamasalimo waviyanjanga ukongwa vikumbusu vaku Chiuta. Ndipu wangulemba kuti: “Ndichita vinthu mwaliŵi ndipu ndiswera cha kuti ndisungi marangu nginu. Vingwi va ŵanthu aheni vandizingiliza, kweni dangu linu nditililuwa cha.” (Salimo 119:60, 61) Vikumbusu vaku Yehova vititiwovya kukunthiyapu asani titombozgeka chifukwa tiziŵa kuti Awusefwi akuchanya angadumuwa vingwi vo arwani atikhwata. Yehova watitifwatuwa ku masuzgu ngidu pa nyengu yakwenere, kuti tigwirengi umampha ntchitu yakupharazga uthenga wa Ufumu.—Mariko 13:10.
w06 9/1 14 ¶4
Fundu Zikulu za Mubuku la Masalimo
119:71—Kumbi tiyanduwa wuli asani tikunthiyapu masuzgu? Masuzgu ngangatisambizga kuti timuthembengi ukongwa Yehova, tipempherengi mwakutuliya pasi pamtima, tisambirengi Bayibolu mwaphamphu ndipuso tigwiriskiyengi ntchitu vo likamba. Kweniso vo tichita asani tikumana ndi masuzgu vingavumbuwa jalidu lo tikhumbika kusintha. Asani tizomerezga kuti masuzgu ngatisinthi vitiwovyengi kuti tileki kuguŵa.
“Liyani ndi Wo Aliya”
Tikayika cha kuti Yehova Awusefwi akuchanya wo mbalisungu ndiwu atitipembuzga. (Ŵerengani 2 Akorinto 1:3, 4) Yehova yo ntchakuwoniyapu chamampha ukongwa pa nkhani yakulongo lisungu, wasimikiziya ŵanthu ŵaki kuti: “Ini ndini nditikupembuzgani.”—Yesa. 51:12; Salimo 119:50, 52, 76.
Tikhumbika kuja ndi chigomezgu kuti Yehova watiwovyengi. Mwaviyo, titenere kukambiya Yehova mwaliŵi chitima cho te nachu. Vakuchiska kuziŵa kuti iyu waziŵa mo vititiŵaŵiya ndipu watitipembuzga pa nyengu yo tikhumbikiya ukongwa chovyu. Kumbi iyu wachita wuli venivi?
Fundu Zakuzirwa za mu Bayibolu
w06 9/1 14 ¶5
Fundu Zikulu za Mubuku la Masalimo
119:96—Kumbi mazu ngakuti “vinthu vosi vakufikapu ve ndi pakumaliya” ngang’anamuwanji? Wamasalimo wakambanga mo ŵanthu awone kufikapu. Iyu watenere wang’anamuwanga kuti isi tingavwisa cha nkhani ya kufikapu chifukwa isi zeru zidu ze ndi pakumaliya. Kweni dangu laku Chiuta lilivi pakumaliya. Ndipu ulongozgi waki ugwira ntchitu ku munthu weyosi. “Ini ndawona kuti vinthu vosi vakufikapu ve ndi pakumaliya, kweni dangu linu lilivi pakumaliya.”
DECEMBER 23-29
CHUMA CHAKUTULIYA MU MAZU NGAKU CHIUTA SALIMO 119:121-176
Kumbi Mungachita Wuli Kuti Muleki Kuguŵa?
Mugwiriskiyengi Ntchitu Marangu Ngaku Chiuta ndi Fundu Zaki Kuti Musambizi Njuŵi Yinu
Kuti tiyanduwengi ndi marangu ngaku Chiuta, tikhumbika kuchita vinandi pade pa kungaŵerenga ndi kungaziŵa umampha. Titenere kutumbika marangu ndipuso kungayanja. Mazu ngaku Chiuta ngatiti: “Tinkhani cho ntchiheni, ndipu yanjani cho ntchamampha.” (Amosi 5:15) Kumbi tingachita wuli venivi? Tikhumbika kuwona vinthu nge mo Yehova wativiwone. Tiyeruzgiyi kuti musuzgika kugona tulu. Dokotala watikukambiyani kuti muryengi vakurya vakupaska nthazi, muchitengi masaza kweniso musinthi vinthu vinyaki. Mwati mwalondo ulongozgi waki, muwona kuti vitikuwovyani. Tikayika cha kuti mungamuwonga dokotala uyu chifukwa cha kukuwovyani.
Mwakuyanana ŵaka, Mlengi widu wakutipaska marangu ngo ngatitivikiliya ku masuzgu ngo tingakumana nangu asani tingachita ubudi. Ivi vititiwovya kuti tije ndi umoyu wamampha. Mwakuyeruzgiyapu, Bayibolu likamba kuti tikhumbika cha kukamba boza, uryarya, kuba, ureŵi, chiwawa ndi kuchita vamizimu. (Ŵerengani Nthanthi 6:16-19; Chivu. 21:8) Asani tiwona vitumbiku vo tisaniya chifukwa chakuvwiya Yehova, titingayanja ukongwa marangu ngaki.
w93 4/15 17 ¶12
Kumbi Achinyamata Mutesesa Kuchitanji?
Tikhumbika kutinkha vinthu viheni. (Salimo 97:10) Kumbi mungatinkha wuli vinthu vo pakwamba mwaviwonanga kuti vakukondwesa? Muŵanaŵaniyengi vo mungakumana navu! “Mungalandizgikanga cha: Chiuta wanganyozeka cha. Pakuti chechosi cho munthu wamija, ndichu so wazamuvuna; pakuti yo wamija mwakukoliyana ndi liŵavu laki, wazamuvuna kuvunda kutuliya mu liŵavu laki.” (Agalatiya 6:7, 8) Asani muyeseka kuti muchiti vinthu viheni muŵanaŵaniyengi dankha vo mungakumana navu kweniso mo vingakwiyiskiya Yehova Chiuta. (Yeruzgiyani ndi Salimo 78:41.) Kweniso muŵanaŵaniyengi masuzgu ngo mungakumana nangu asani mungato nthumbu ya padondu pamwenga matenda ngakupasirana nge Ezi. Mungasuzgika maŵanaŵanu ndipuso mbiri yinu yinganangika. Vinthu venivi mungasuzgika navu kwa nyengu yitali. Mzichi munyaki wangukamba kuti: “Ini ndi alumu ŵangu techendatolani, weyosi wangugonanapu ndi ŵanthu anyaki. Chinanga kuti tosi te Akaboni sonu, vo tachitanga kali vipangisa kuti tichitiyanengi sanji mu nthengwa yidu.” Masuzgu nganyaki ngo mungakumana nangu nkhumala kwa mauteŵeti kweniso mungasezgeka mu mpingu! (1 Akorinto 5:9-13) Likondwa la kanyengu kamanavi lingachitiska kuti mutayi vinthu vamampha vosi mwenga navu.
Fundu Zakuzirwa za mu Bayibolu
Mugomezgengi Kuti ‘Mazu Ngaku Chiuta Mbuneneska’
Nge ateŵeti aku Yehova tigomezga kuti iyu ndi “Chiuta wauneneska” kweniso kuti nyengu zosi watitikhumbiya vamampha. (Salimo 31:5; Yesa. 48:17) Tiziŵa kuti tingavigomezga vo tiŵerenga mu Bayibolu ndipu tigomezga kuti “mazu . . . ngosi [ngaku Chiuta] mbuneneska.” (Ŵerengani Salimo 119:160.) Nasi tikoliyana ndi vo kaswiri munyaki wa Bayibolu wangulemba. Iyu wanguti: “Chiuta wakukambapu cha boza ndipu vosi vo wakamba vifiskika. Ŵanthu aku Chiuta angagomezga vo Iyu wakamba chifukwa chakuti atimugomezga.”
DECEMBER 30–JANUARY 5
CHUMA CHAKUTULIYA MU MAZU NGAKU CHIUTA MASALIMO 120-126
Angupanda Mbewu ndi Masozi, Kweni Anguvuna ndi Likondwa
w04 6/1 16 ¶10
Mbakutumbikika Ŵanthu wo Apereka Unkhankhu Kwaku Chiuta
Asani tilutirizga kuja akusambira aku Yesu tija pa nkhondu ndi Satana. Lemba la Yakobe 4:7 likamba kuti, “suskani Dyaboli ndipu iyu wakuthaŵeningi.” Kuchita viyo nkhupusu cha. Tikhumbika phamphu kuti titeŵete Chiuta. (Luka 13:24) Kweni Bayibolu pa lemba la Salimo 126:5 lititilayizga kuti: “Ŵanthu wo apanda mbewu ndi masozi azamuvuna ndi likondwa likulu.” Isi tisopa Chiuta yo wawonga vo tichita. Iyu “wapereka mphotu ku ŵanthu wosi wo atimupenja ndi mtima wosi,” ndipuso watumbika wo atimukankhuska.—Aheberi 11:6.
Kumbi Chivwanu Chinu Chazamuja Chakukho?
Kumbi mwe ndi chitima chifukwa cha nyifwa ya munthu yo mwamuyanjanga? Musaniyengi nyengu yakuŵerenge nkhani za mu Bayibolu za ŵanthu wo anguyuskika, kuti mugomezgengi ukongwa kuti akufwa azamuyuka. Kumbi mwe ndi chitima chifukwa chakuti munthu munyaki wa mu banja linu wakusezgeka? Musambirengi kuti musimikiziyi kuti chilangu chaku Chiuta nyengu zosi chituŵa chamampha. Kwali mungakumana ndi suzgu wuli, mugwiriskiyengi ntchitu nyengu yeniyi kuti muje ndi chivwanu chakukho. Mumupunguliyengi vo ve mumtima winu Yehova. Mungajipatuwanga cha, kweni mumalu mwaki muchitiyengi vinthu limoza ndi abali ndi azichi. (Nthanthi 18:1) Muchitengi vinthu vo vingakuwovyani kuti mukunthiyepu chinanga kuti mungachita venivi ndi masozi. (Salimo 126:5, 6) Mulutirizgengi kuwungana, kupharazga kweniso kuŵerenga Bayibolu. Kweniso muŵikengi maŵanaŵanu nginu pa vinthu vamampha ukongwa vo Yehova wakusungiyani kunthazi. Asani muwona mo Yehova watikuwovyiyani, chivwanu chinu mwaku iyu chijengi chakukho ukongwa.
w01 7/15 18-19 ¶13-14
Lutirizgani Kugwira Ntchitu Yakuvuna!
Mazu ngo nge pa Salimo 126:5, 6 ngakupembuzga ku ŵanthu aku Chiuta wo avuna, ukongwa wo atombozgeka. Ndipu lemba ili likamba kuti: “Ŵanthu wo apanda mbewu ndi masozi azamuvuna ndi likondwa likulu. Yo waliya pakuluta kubwalu, uku wapinga thumba la mbewu, wawengeku wachidaniriza mwalikondwa, uku wapinga ntchinda zaki.” Mazu ngo wamasalimo wangukamba ngakuti kupanda kweniso kuvuna ngakamba mo Yehova waphweriyanga kweniso kutumbika Ayisirayeli wo angutuwa ku Babiloni. Yiwu angukondwa ukongwa ŵati afwatulika ku ukapolu kweni anguliya achipanda mbewu mucharu cho chalimikanga cha kwa vyaka 70 po ŵenga ku ukapolu. Mwaviyo, wosi wo angulutirizga kupanda kweniso kugwira ntchitu zakuzenga angukondwa ndi vo anguvuna ndipuso ntchitu yawu.
Tiliya asani tikumana ndi masuzgu pamwenga asani akhristu anyidu atombozgeka chifukwa cha urunji. (1 Peturo 3:14) Pakwamba ntchitu yidu yakuvuna yingawoneka yakusuzga ukongwa chifukwa chakuti phamphu lidu mu uteŵeti lingawoneka nge liluta paŵaka. Kweni asani tilutilizga kupanda kweniso kudiliya, Chiuta wazamukuzga kuphara mo tiŵanaŵaniya. (1 Akorinto 3:6) Ndipu venivi viwoneke umampha pa ntchitu yidu yakugaŵiya Mabayibolu kweniso mabuku ngidu.
Fundu Zakuzirwa za mu Bayibolu
Nthazi Zakuvikiliya—“Chiuta ndi Malu Ngidu Ngakuthaŵiyaku”
Chakwamba, ŵanaŵaniyani mo Yehova watitivikiliya mwakuliŵavu. Nge ateŵeti aku Yehova tilindizga kuti iyu wativikiliyengi nge gulu. Kweni asani wangaleka kuchita venivi, Satana wangatibaya tosi. Ŵanaŵaniyani fundu iyi: Palivi chinthu chinyaki cho Satana, yo “walamuliya charu ichi” wakhumba, kuphara kumalisiya limu kusopa kwauneneska. (Yohane 12:31; Chivumbuzi 12:17) Maboma nganyaki nganthazi ukongwa pacharu, ngakaniza ntchitu yidu yakupharazga ndipu ngatesesa kuti ngabayi ateŵeti wosi aku Chiuta. Kweni ŵanthu aku Yehova alutirizga mbwenu kuja akukho kweniso kugwira ntchitu yakupharazga mwambula mantha! Ntchifukwa wuli maboma nganthazi ngenanga ngatondeka kulekeska ntchitu ya ŵanthu amanavi ŵaka, kweniso wo awoneka kuti nkhagulu kambula kuvikilirika ka Akhristu? Ntchifukwa chakuti Yehova watitibenekere ndi mapapa ngaki nganthazi!—Salimo 17:7, 8.