Chiuta Wakupanga Kuchanya ndi Charu Chapasi

Yehova Chiuta ndi Mlengi widu. Iyu ndiyu wakupanga vinthu vosi, vo tiwona ndi vo tileka kuviwona. Wechendapangi vinthu vo tiwona, wangulenga angelu anandi ukongwa. Kumbi utiŵaziŵa angelu? Angelu ŵenge Yehova ndipu iyu ndiyu wakuŵalenga. Nge mo tileke kumuwone Chiuta, angelu nawu tingaŵawona cha. Mungelu wakwamba yo Yehova wangupanga ndiyu wangumuwovya kupanga vinthu. Iyu wangumuwovya kulenga nyenyezi, mapulaneti ndi vinthu vinyaki vosi. Yimoza mwa mapulaneti ngenanga, ntcharu chapasi chakutowa cho tijamu.

Yehova wangunozga charu chapasi kuti nyama ndi ŵanthu ajengemu. Wanguchitisa kuti lumwi liŵaliyengi charu chapasi. Wangupanga so mapiri, nyanja zikuluzikulu ndipuso misinji.

Ntchinthu wuli so chinyaki cho wangupanga? Yehova wangukamba kuti: ‘Ndipangengi uteka, maluŵa ndi vimiti.’ Mwaviyo, mitundu yakupambanapambana ya vipasu, mphangwi ndi maluŵa vingwamba kume. Pavuli paki, Yehova wangulenga so vinyama kweniso viyuni vakupambanapambana. Nyama zinyaki zenga zakusambira mumaji ndi zakukwaŵa. Iyu wangupanga nyama zimanazimana nge akalulu, ndipuso zikuluzikulu nge njovu. Kumbi yiwi utanja nyama niyi?

Yehova wati wapanga venivi, wangukambiya mungelu wakwamba kuti: “Tiyeni tipangi munthu.” Ŵanthu akulengeka mwakupambana ndi vinyama. Yiwu akulengeka ndi lusu lakuti apangengi vinthu. Alongoro, kuseka ndipuso kupemphera. Yiwu akupaskika udindu wakuti aphweriyengi charu ndi vinyama. Kumbi utimuziŵa munthu yo wangwamba kumulenga? Tiyi tiwoni.