Yosefi wenga yumoza mwa ŵana akukumaliya aku Yakobe. Aku ŵaki awonanga kuti awisewu ayanjanga ukongwa Yosefi kuluska yiwu. Kumbi uwona kuti yiwu avwanga wuli? Angwamba kumuchitiya sanji. Pavuli paki, Yosefi wangulota malotu ngo wenga wechendalotepu. Wati wakambiya aku ŵaki malotu yanga, yiwu aŵanaŵananga kuti malotu ngo ngang’anamuwanga kuti zuŵa linyaki azakumugwadiya. Mwaviyo, angumutinkha ukongwa kuluska kali!

Zuŵa linyaki aku ŵaki aku Yosefi, anguluta kuchiliska mbereri pafupi ndi tawuni ya Sekemu. Pati pajumpha nyengu, Yakobe wangutuma Yosefi kuti wakawoni aku ŵaki. Yiwu ŵati amuwona wachiza, angwamba kukambisana kuti: ‘Wakulota yo watuza ko. Tiyeni timubayi!’ Angumuko ndikumuponya muzenji litali. Yuda yo wenga yumoza wa aku ŵaki wangukamba kuti: ‘Kumubaya cha! Timugulisi ŵaka kuti wakaje kapolu.’ Mwaviyo, Yosefi angumugulisa ndi ndalama 20 za siliva kwa amalonda a ku Midiyani wo alutanga ku Ijipiti.

Pavuli paki, aku ŵaki anguto mukhanju waku Yosefi ndi kuwubiza mundopa za mbuzi ndipu anguluta nawu kwa awisewu. Yiwu angukamba kuti: ‘Kumbi mukhanju uwu ngwa mwana winu cha?’ Yakobe waŵanaŵananga kuti Yosefi wabayika ndi nyama ya mudondu. Iyu wanguliya ukongwa ndipu wakananga kupembuzgika.

Yosefi angumugulisa kuti waje kapolu ku Ijipiti kwaku Potifara yo wenga ndi udindu. Kweni Yehova wavikiliyanga Yosefi. Potifara wanguwona kuti Yosefi wagwiranga umampha ntchitu ndipu wangumugomeza. Pati pajumpha nyengu yimanavi angumusankha kuti wawoneriyengi vinthu vosi vo wenga navu.

Muwolu waku Potifara wanguwona kuti Yosefi wenga wakutowa kweniso wanthazi. Zuŵa lelosi wakambiyanga Yosefi kuti wagonani nayu. Kumbi Yosefi wanguchitanji? Iyu wangukana ndipu wangukamba kuti: ‘Awa! Kuchita venivi nkhunanga. Abwana ŵangu atindigomeza ndipu yimwi ndimwi awolu ŵawu. Asani ndingagonana namwi, ndinangiyengi Chiuta!’

Zuŵa linyaki muwolu waku Potifara wanguchichizga Yosefi kuti wagonani nayu. Mwaviyo, wangumubwaka ndi kuguza chakuvwala chaki kweni Yosefi wanguthaŵa. Potifara wati waza panyumba, muwolu waki wangumukambiya boza. Iyu wangukamba kuti Yosefi wakhumbanga kumukolere. Potifara wangukwiya ukongwa ndipu wangumuŵika mujeri kweni Yehova wangumuluwa cha Yosefi.

Pa nyengu yo Yosefi wenga mujeri, Farawo fumu ya ku Ijipiti wangulota malotu ngo pengavi yo waziŵanga vo ngang’anamuwanga. Yumoza mwa ateŵeti ŵaki wangukambiya Farawo kuti Yosefi wangafwatuliya malotu ngo. Farawo wangutuma munthu mwaliŵi kuti wakamudani.

Farawo wangufumba Yosefi kuti: ‘Kumbi ungafwatuliya malotu ngangu?’ Yosefi wangukambiya Farawo kuti: ‘Kwa vyaka 7, mu Ijipiti muŵengi vakurya vinandi ndipu vyaka 7 vapanthazi kuŵengi nja. Sankhani munthu wazeru kuti wasungi vakurya kuti ŵanthu ŵinu azileki kufwa ndi nja.’ Farawo wangumuka kuti: ‘Ndasankha iwi! Iwi ujengi wachiŵi ku munthu wanthazi ukongwa mu Ijipiti!’ Kumbi Yosefi wanguziŵa wuli vo malotu ngaku Farawo ngang’anamuwanga? Yehova ndiyu wanguwovya Yosefi.

Yosefi wangusunga vakurya kwa vyaka 7. Pavuli paki, mucharu chosi mwenga nja nge mo Yosefi wangukambiya. Ŵanthu atuwanga muvyaru vakupambanapambana kuti aziguli vakurya kwaku Yosefi. Awisi a Yakobe ŵati ŵavwa kuti ku Ijipiti kwe vakurya, angutuma ŵana ŵawu 10 anthulumi kuti akaguli vakurya.

Ŵana aku Yakobe anguluta kwaku Yosefi ndipu iyu wanguŵaziŵa nyengu yeniyo kweni aku ŵaki angumuziŵa cha. Yiwu angumusindamiya mwakukoliyana ndi vo wangulota weche munamana. Yosefi wakhumbanga kuziŵa asani aku ŵaki ŵenga ŵeche ndi mtima uheni. Iyu wangukamba kuti: ‘Mwaza kuzifufuza charu chidu. Mwaza kuziwona asani charu chidu ntchambula nthazi.’ Yiwu angumuka kuti: ‘Awa! Tengapu ŵana anthulumi 12 a ku Kanani. Mubali widu yumoza wakutayika ndipu mumana ukongwa we ndi ada.’ Pavuli paki, Yosefi wanguti: ‘Mukazi nayu kunu muvurwa winu ndipu ndazakukugomezani.’ Mwaviyo, anguwere kunyumba kwa awisewu.

Chakurya chati chamala so, Yakobe wangutuma ŵana ŵaki kuti aluti ku Ijipiti. Pa nyengu iyi anguluta ndi Benjamini yo wenga mumana ukongwa paku wosi. Kuti wayesi abali ŵaki, Yosefi wangubisa kapu yasiliva muthumba laku Benjamini. Pavuli paki wangukamba kuti ŵaba. Aku ŵaki anguzizwa ukongwa ateŵeti aku Yosefi ŵati asaniya kapu muthumba laku Benjamini. Yiwu angupempha Yosefi kuti mumalu mwakulanga Benjamini, walangi yiwu.

Yosefi wanguziŵa kuti aku ŵaki akusintha. Iyu wangutondeka kulutiriza kujibisa. Mwaviyo, wanguliya ndipu wanguŵakambiya kuti: ‘Ndini mubali winu, Yosefi. Kumbi ada ŵeche amoyu?’ Abali ŵaki anguzizwa ukongwa. Iyu wanguti: ‘Mungadandawulanga cha chifukwa cha vo mungundichitiya. Chiuta ndiyu wakundituma kunu kuti ndizitaski umoyu winu. Yendesani, mukato ada muzi nawu kunu.’

Yiwu anguluta kunyumba kuchikambiya awisewu nkhani yamampha yeniyi ndipu pavuli paki anguŵato ndi kuza nawu ku Ijipiti. Chinanga kuti pangujumpha vyaka vinandi, Yosefi ndi awisi angukumana so.