Vo Akuŵerenga Afumba

Kumbi lemba la Wakutawula 5:8 likamba va ulamuliru wa ŵanthu pamwenga waku Yehova?

Lemba ili likamba kuti: “Asani muchigaŵa chaku wawona mukavu wakandirizgika kweniso urunji ndi cheruzgu chakunyoloka vikandirizgika, ungazizwanga cha. Pakuti pe munthu munyaki wapachanya kuluska mulongozgi mwenuyu yo wawona vo iyu wachita, kweniso pe anyaki wo mbapachanya ukongwa kuluska mo yiwu alili.”​—Waku. 5:8.

Mo isi taŵanthu tiwone, tingakamba kuti lemba ili likamba za ŵanthu wo ŵe ndi udindu mu boma. Kweni asani tingaŵanaŵaniyapu ukongwa, likamba so vakukwaskana ndi Yehova ndipu fundu yeniyi njakuchiska ukongwa.

Lemba la Wakutawula 5:8, likamba va wakulamuliya yo wakandilizga akavu ndi kuŵachitiya vinthu mwambula urunji. Wakulamuliya mwenuyu watenere kukumbuka kuti pe munthu munyaki wa udindu wapachanya ukongwa mu boma yo wawona vo wachita. Ndipu pangaŵa so ŵanthu anyaki wo ŵe ndi udindu wapachanya kuluska yiwu. Kweni vachitima kuti akulamuliya wosi ŵenaŵa, achita vinthu mwa chinyengu ndipu ŵanthu asuzgika chifukwa cha vinthu vambula urunji vo yiwu achita.

Chinanga kuti vinthu vingafika paheni wuli, kweni tipembuzgika kuziŵa kuti Yehova wawona vinthu vo ŵanthu ‘apachanya ukongwa’ achita. Tingamuponye mphingu zidu Yehova ndi kumupempha kuti watiwovyi. (Sumu 55:22; Afi. 4:6, 7) Tiziŵa kuti “masu ngaku Yehova ngatendatenda pacharu chosi, kuti walongo nthazi zaki pakovya ŵanthu wo mtima wawu ngwamphumphu kwaku iyu.”​—2 Miko. 16:9.

Mwaviyo, lemba la Wakutawula 5:8 likamba chayivu vo vichitika mu boma, kuti nyengu zosi patuŵa munthu munyaki yo watuŵa wapachanya kuluska anyaki. Kweni chakuzirwa ukongwa, lemba ili lititikumbusa kuti Yehova ndiyu wapachanya ukongwa kuluska weyosi ndipu ndiyu we ndi mazaza ngakulu. Yehova ndiyu walamuliya ndipu wagwiriskiya ntchitu Mwana waki Yesu Khristu, yo ndi Fumu ya Ufumu waki. Chiuta Wanthazizosi yo wawona chechosi wachita vinthu mwaurunji. Ndipu mwana waki nayu wachita so viyo.