Ŵanthu wo angutumika ŵati aluta mutawuni ya Yeriko, angufikiya ku nyumba ya munthukazi munyaki zina laki Rahabi. Fumu ya ku Yeriko yinguvwa kuti kwaza ŵanthu kutuwa ku Yisirayeli ndipu yingutuma asilikali kuti aluti kunyumba yaku Rahabi. Iyu wangubisa anthulumi ŵaŵi Achiyisirayeli ŵenaŵa kuchanya kwa nyumba ndipu wangukambiya asilikali kuti aluti kunyaki kuchiŵapenja. Rahabi wangukambiya ŵanthu wo angutumika kuti: ‘Ndikuwovyeningi chifukwa ndiziŵa kuti Yehova we namwi ndipuso kuti muthereskengi charu chidu. Ndilayizgeni kuti mwazakuŵabaya cha ŵanthu a mubanja langu.’

Ŵanthu wo angutuwa ku Yisirayeli angukambiya Rahabi kuti: ‘Tilayizga kuti palivi munthu mweniyo wazamuja munyumba yaku yo wazamukufwa.’ Angumukambiya so kuti: ‘Manga chingwi chiyera ichi pawindu la nyumba yaku ndipu iwi ndi ŵanthu a mubanja laku mwazamubayika cha.’ Kumbi uŵanaŵana kuti Rahabi wanguvwa wuli?

Rahabi wangukambiya ŵanthu wo angutuwa ku Yisirayeli kuti atuliyi pawindu mwakugwiriskiya ntchitu chingwi. Yiwu anguluta kumapiri ndipu angubisama kwa mazuŵa ngatatu ŵechendawere kwaku Yoswa. Pavuli paki Ayisirayeli anguyambuka Msinji wa Yorodani ndipu angunozgeka kulonda charu. Tawuni ya Yeriko yenga yakwamba kulonda. Yehova wanguŵakambiya kuti azunguliyengi tawuni yo kamoza pa zuŵa kwa mazuŵa 6. Ndipu pa zuŵa la nambala 7, anguzunguliya tawuni yo maulendu 7. Pavuli paki asembi angumba mbata ndipu asilikali angudaniriza. Mwaviyo, tawuni yo yingubwangandulika. Kweni nyumba yaku Rahabi yo yingugumatiza ku mpanda, yinguwa cha. Rahabi ndi ŵanthu a mubanja laki angutaskika chifukwa chakuti wangugomezga Yehova.

Nkhani yakukwaskana ndi tawuni ya Yeriko yinguwanda muvigaŵa vinyaki va mucharu cha Kanani. Mafumu ngawu ngangukoliyana kuti ngachiti nkhondu ndi Ayisirayeli. Kweni Agibiyoni anguŵanaŵana kuti achiti vinthu vakupambana ndi venivi. Yiwu anguvwala malaya ngakuperuka ndipu anguluta kwaku Yoswa ndi kumukambiya kuti: ‘Tatuliya kucharu chakutali. Tavwa zaku Yehova ndi vosi vo wangukuchitiyani ku Ijipiti ndi ku Mowabu. Tilayizgeni kuti mutibayengi cha ndipu tijengi ateŵeti ŵinu.’

Yoswa wanguŵagomeza ndipu wanguzomera kuti waŵabayengi cha. Pati pajumpha mazuŵa ngatatu wanguziŵa kuti angutuliya kucharu chakutali cha. Yiwu angutuliya ku Kanani. Yoswa wangufumba Agibiyoni kuti: ‘Ntchifukwa wuli mungutipusika?’ Yiwu angumuka kuti: ‘Tenga ndi mantha! Tiziŵa kuti Yehova Chiuta winu ndiyu watikurwiyani nkhondu. Chondi mungatibayanga cha.’ Yoswa wanguchita vo wangulayizga ndipu wanguŵabaya cha.

Pati pajumpha nyengu yimanavi, mafumu ngankhondi nga ku Kanani ndi asilikali ŵawu angwamba kuwofyeza Agibiyoni. Yoswa ndi asilikali ŵaki angwenda usiku wosi kuti akaŵataski. Kwati kwacha, angwamba kuchita nawu nkhondu. Akanani angwamba kuthaŵiya mumalu ngakupambanapambana. Kwekosi ko athaŵiyanga Yehova wanguŵawisiya vuwa ya mya yikuluyikulu. Pavuli paki Yoswa wangupempha Yehova kuti wamisi lumwi. Ntchifukwa wuli Yoswa wangupempha Yehova kuti wamisi lumwi lo lenga lechendamepu? Ntchifukwa chakuti Yoswa wagomezanga Yehova. Lumwi lingusere cha kwa zuŵa lamphumphu mpaka po Ayisirayeli anguthereske mafumu nga ku Kanani ndi arwani ŵawu.