Benihadadi, fumu ya Siriya yingulutirizga kuyukiya Ayisirayeli. Mchimi Elisha watcheŵeskanga fumu ya Ayisirayeli asani fumu ya Siriya yikhumba kuyiyukiya. Ivi vinguwovya kuti fumu ya Ayisirayeli yileki kukoleka. Mwaviyo, Benihadadi wanguŵanaŵana kuti wakako Elisha. Iyu wanguvwa kuti Elisha wenga mutawuni ya Dotani ndipu wangutuma asilikali ŵaki kuti akamuko.

Asilikali a ku Siriya anguza ku Dotani ndi usiku. Ndi mulenji, muteŵeti waku Elisha wangutuwa kubwalu ndipu wanguwona kuti tawuni yo yazungulizika ndi gulu likulu la asilikali. Iyu wanguchita mantha ndipu wangudaniriza kuti: ‘Elisha tichitenji?’ Elisha wangukamba kuti: ‘Isi te ndi anandi kuluska wo ŵe ndi yiwu.’ Nyengu yeniyo, Yehova wanguchitiska kuti mteŵeti waku Elisha wawoni kuti mapiri ngo nganguzunguliya tawuni yo ajanga, ngenga ndi mahachi nganandi ndi magaleta nga nkhondu ngakofya.

Pa nyengu yo asilikali a Siriya akhumbanga kuko Elisha, iyu wangupemphera kuti: ‘Yehova, chondi achitiseni kuti aleki kuwona.’ Mwamabuchibuchi, asilikali yaŵa anguziŵaku cha ko ŵenga chinanga kuti awonanga. Elisha wangukambiya asilikali wo kuti: ‘Mwe mu tawuni yo mupenja cha. Ndilondoni nkhakulongoni munthu yo mupenja.’ Yiwu angulondo Elisha mpaka ku Samariya ko kwajanga fumu ya Ayisirayeli.

Asilikali a Siriya anguziŵa mwakuswera ko ŵenga. Fumu ya Ayisirayeli yingufumba Elisha kuti: ‘Kumbi ndiŵabayi?’ Kumbi Elisha wanguwona kuti uwu wenga mwaŵi wakuweze ŵanthu yaŵa, wo akhumbanga kumuchitiya vinthu viheni? Awa. Elisha wanguti: ‘Kuŵabaya cha. Apaskeni chakurya ndipu muŵakambiyi kuti awere kwawu.’ Mwaviyo, fumu yo yinguŵanozge phwandu la chakurya ndipu pavuli paki, yinguŵakambiya kuti akengi.

Yezebeli wenga ndi mwana munthukazi zina laki Ataliya yo wenga muheni nge iyu. Ataliya wangutorana ndi fumu ya charu cha Yuda. Mulumu waki wati wafwa, mwana waki ndiyu wangwamba kuwusa. Mwana waki wati wafwa, Ataliya wangujiŵika kuŵa wakulamuliya wa Yuda. Iyu wanguyesesa kuti wamali mtundu wosi wachifumu mwakubaya weyosi yo watingi wazilamuliyengi mumalu mwaki. Iyu wangubaya so chinanga mbazuku ŵaki anthulumi wo ŵenga ŵana a mwana waki. Ŵanthu wosi amuwopanga.

Wasembi Mura Yehoyada pamoza ndi muwolu waki Yehosheba anguziŵa kuti vo Ataliya wachitanga venga viheni ukongwa. Yiwu anguŵika umoyu wawu pangozi pakubisa mzuku munthulumi waku Ataliya. Zina laki lenga Yowashi. Yiwu amuleliyanga munyumba yakusopiyamu.

Pa nyengu yo Yowashi wenga ndi vyaka 7, Yehoyada wanguwunganiska alongozgi a mafuku ndi Alevi ndipu wanguŵakambiya kuti: ‘Muje alonda a visasa va nyumba yakusopiyamu ndipu mungazomerezanga weyosi cha kuseremu.’ Pavuli paki, Yehoyada wanguŵika Yowashi kuja fumu ya Yuda ndipu wangumuvwalika chisoti chachifumu. Ŵanthu a ku Yuda angudaniliza kuti: ‘Fumu yije ndi umoyu utali!’

Fumukazi Ataliya yinguvwa vo ŵanthu adanirizanga ndipu yingutchimbiriya kunyumba yakusopiyamu. Yati yawona fumu yasonu, yingudaniriza kuti: “Chiŵembu! Chiŵembu!” Alongozgi a mafuku anguko fumukazi yiheni yeniyi ndi kuluta nayu kutali kuchiyibaya. Kumbi ŵanthu anguchita wuli ndi vinthu viheni vo fumukazi yeniyi yinguchitiya mtundu wenuwu?

Yehoyada wanguwovya mtundu wenuwu kuchita phanganu ndi Yehova ndipu yiwu angulayizga kuti asopengi Yehova pe. Yehoyada wanguŵakambiya kuti agumuwi nyumba yakusopiyamu Bala ndi kuphwanya angoza. Iyu wangusankha asembi ndi Alevi kuti agwirengi ntchitu pa nyumba yakusopiyamu ndi chilatu chakuti ŵanthu ayambi so kusopiyamu. Iyu wanguŵika alonda pa geti kuti alondengi nyumba yakusopiyamu ndi chilatu chakuti munthu weyosi wakufipiskika waleki kuseremu. Pavuli paki, Yehoyada ndi alongozgi anguluta ndi Yowashi ku nyumba yachifumu ndipu angumuŵika pa mpandu wachifumu. Ŵanthu a ku Yuda angukondwa. Yiwu atingi ateŵetiyengi Yehova ndipu pakumaliya paki atingi afwatukengi ku fumukazi yiheni Ataliya kweniso kukusopa Bala. Kumbi uwona mo kuleka kuchita mantha kwaku Yehoyada, kunguwovye ŵanthu anandi?