Ŵanthu wo ajanga mutawuni ya Nineve ku Asiriya, ŵenga ndi mijalidu yiheni. Yehova wangukambiya mchimi waki Yona kuti waluti ku Nineve wakaŵatcheŵeski kuti aleki kuchita vinthu viheni. Kweni Yona wanguthaŵa ndipu wanguluta kunyaki. Iyu wangukwera sitima yo yalutanga ku Tashishi.

Pa nyengu yo sitima yayendenga panyanja, kunguza chimphepu chikulu ndipu wo agwiranga ntchitu musitima yeniyi anguchita mantha. Yiwu angupemphera kwa achiuta ŵawu ndipu anguŵafumba kuti: ‘Ntchifukwa wuli ivi vititichitikiya?’ Pakumaliya, Yona wanguŵakambiya kuti: ‘Ini ndini ndachitisa. Ndithaŵa vo Yehova wandikambiya kuti nkhachiti. Ndiponyeni munyanja ndipu chimphepu chimalengi.’ Wo agwiranga ntchitu musitima akhumbanga cha kumuponya kweni iyu wanguŵachichizga. Ŵati amuponya munyanja, mphepu yo yinguleka.

Yona waŵanaŵananga kuti wafwengi. Pa nyengu yo wabilanga munyanja, iyu wangupemphera kwaku Yehova. Pavuli paki, Yehova wangutuma chisomba. Ichu chingumumeza kweni chingumubaya cha. We mumoyu mwa chisomba cho, Yona wangupemphera kuti: ‘Ndilayizga kuti ndivwiyengi imwi nyengu zosi.’ Yehova wangusunga Yona mumoyu mwa chisomba kwa mazuŵa ngatatu ndipu pavuli paki wanguchitisa kuti chimuwukuliyi kumtunda.

Pakuti Yehova wangutaska Yona, kumbi venivi ving’anamuwa kuti wakhumbikanga so cha kuluta ku Nineve? Awa. Yehova wangumukambiya so Yona kuti waluti. Pa nyengu iyi Yona wanguvwiya. Iyu wanguluta kweniko ndipu wangukambiya ŵanthu aheni wo ajanga kweniko kuti: ‘Kwaja mazuŵa 40 ndipu Nineve wabwangandulikengi.’ Pavuli paki panguchitika vinthu vinyaki. Ŵanthu a ku Nineve anguvwiya ndipu angusintha mijalidu yawu yiheni. Fumu ya ku Nineve yingukambiya ŵanthu ŵaki kuti: ‘Pempherani kwaku Chiuta ndipu mulapi. Panyaki watinangengi cha.’ Yehova wati wawona kuti ŵanthu wo angulapa, wanguyinanga cha tawuni ya Nineve.

Yona wangukwiya chifukwa tawuni yeniyi yingubwangandulika cha. Ŵanaŵaniya fundu iyi: Yehova wanguzikira ndi Yona ndipuso wangumuchitiya lisungu kweni Yona wanguŵachitiya lisungu cha ŵanthu a ku Nineve. Mumalu mwaki wanguja pasi pa chimiti cha monu kubwalu kwa tawuni ndipu wangukondwa cha. Pavuli paki, chimiti cho chingufota ndipu Yona wangukwiya. Mwaviyo, Yehova wangumukambiya kuti: ‘Kumbi uchitiya lisungu chimiti mumalu mwakuchitiya lisungu ŵanthu a ku Nineve? Ini ndaŵalongo lisungu ndipu abayika cha.’ Kumbi Yehova wang’anamuwanganji? Ŵanthu a ku Nineve ŵenga akukhumbika ukongwa kuluska chimiti chechosi.

Ufumu wa Asiriya ungulonda ufumu wa mafuku 10 wa Ayisirayeli. Sonu Senakeribu fumu ya Asiriya yakhumbanga kulonda so ufumu wa mafuku ngaŵi wa Yuda. Iyu wangwamba kulonda matawuni nga a Yuda umoza ndi umoza. Kweni tawuni yo wayikhumbisiskanga ukongwa yenga ya Yerusalemu. Vo Senakeribu walekanga kuziŵa venga vakuti, Yehova wavikiliyanga tawuni ya Yerusalemu.

Hezekiya fumu ya Yuda, yingupasa Senakeribu ndalama zinandi kuti waleki kulonda tawuni ya Yerusalemu. Chinanga kuti Senakeribu wangulonda ndalama, wangutuma mbwenu asilikali ŵaki anthazi kuti akalondi tawuni yeniyi. Ŵanthu a mutawuni iyi anguchita mantha chifukwa Asiriya ŵenga pafupi kufika ku Yerusalemu. Pavuli paki, Hezekiya wanguŵakambiya kuti: ‘Mungachitanga mantha cha. Asilikali Aasiriya mbanthazi kweni Yehova wachitisengi kuti tije anthazi ukongwa kuluska yiwu.’

Senakeribu wangutuma Rabishaki kuti waluti ku Yerusalemu ndi kuchiwofyeza ŵanthu. Rabishaki wanguma kubwalu kwa tawuni ndipu wangudaniriza kuti: ‘Yehova wangakuwovyani cha. Mungazomerezanga cha kuti Hezekiya wakupusiseni. Palivi chiuta yo wangakutaskani kwaku isi.’

Hezekiya wangufumba Yehova cho wangachita. Yehova wangumuka kuti: ‘Ungachitanga mantha cha ndi vo Rabishaki wakamba. Senakeribu walondengi cha tawuni ya Yerusalemu.’ Pavuli paki, Hezekiya wangulonde kalata kutuwa kwaku Senakeribu. Mukalata yo wangulembamu kuti: ‘Utheri ŵaka. Yehova wakutaskengi cha.’ Hezekiya wangupemphera kuti: ‘Chondi Yehova, titaskeni kuti weyosi waziŵi kuti imwi mwija ndimwi Chiuta wauneneska.’ Yehova wangumukambiya kuti: ‘Fumu ya Asiriya yizengi cha mutawuni ya Yerusalemu. Ini ndivikiliyengi tawuni yangu.’

Senakeribu wenga ndi chigomezgu kuti pambula kuswera walondengi Yerusalemu. Yehova wangutuma mungelu ndi usiku kuluta kumsasa wa asilikali a Asiriya, wo anguzenga kubwalu kwa tawuni ya Yerusalemu. Mungelu wangubaya asilikali 185 sawuzandi! Asilikali anthazi ukongwa aku Senakeribu angubayika. Iyu watingi wachitengi kanthu cha chifukwa wanguthereskeka. Mwaviyo, wanguwere kwawu. Yehova wanguvikiliya Hezekiya ndi tawuni ya Yerusalemu nge mo wangulayizgiya. Kumbi yiwi watingi ugomezengi Yehova asani wengaku ku Yerusalemu?