Mwakuwerezawereza ŵanthu a ku Yuda alekanga kusopa Yehova ndipu asopanga achiuta aboza. Yehova wanguŵawovya kwa vyaka vinandi kuti aleki kusopa angoza. Iyu wangutuma achimi anandi kuti akatcheŵeski ŵanthu yaŵa kweni anguvwiya cha. Mumalu mwaki aŵasekanga achimi ŵenaŵa. Kumbi Yehova wanguchita wuli kuti Ayuda aleki kusopa angoza?

Fumu ya Babiloni zina laki Nebukadinezara, wathereskanga mitundu yakupambanapambana. Nyengu yakwamba wati wathereska Yerusalemu, wanguko Fumu Yehoyakini, alongozgi, asilikali ndipuso ŵanthu alusu lakupanga vinthu ndipu wanguluta nawu ku Babiloni. Iyu wanguto so vinthu vosi vo venga munyumba yaku Yehova. Pavuli paki, Nebukadinezara wanguŵika Zedekiya kuŵa fumu ya Ayuda.

Pakwamba Zedekiya wanguvwiya Nebukadinezara. Kweni mitundu yo yenga pafupi ndipuso achimi aboza, angukambiya Zedekiya kuti wagalukiyi Nebukadinezara yo walamuliyanga Babiloni. Yeremiya wangutcheŵeska Zedekiya kuti: ‘Asani ugalukiyengi, ŵanthu abayanengi mu Yuda ndipu muŵengi nja kweniso matenda.’

Zedekiya wati walamuliya kwa vyaka 8, wanguŵanaŵana kuti wagalukiyi Babiloni. Iyu wangupempha asilikali a Ijipiti kuti amuwovyi. Pavuli paki, Nebukadinezara wangutuma asilikali ŵaki kuti akabwanganduwi Yerusalemu ndipu anguzenga msasa pafupi ndi tawuni yeniyi. Yeremiya wangukambiya Zedekiya kuti: ‘Yehova wakamba kuti asani ujithereskengi ku fumu ya Babiloni, iwi ndi tawuni iyi mutaskikengi. Asani ulekengi kujithereska, Ababiloni awotchengi Yerusalemu ndipu akukongi kuti ukaje kapolu.’ Zedekiya wanguti: ‘Nditherengi cha!’

Pati pajumpha chaka ndi hafu, Ababiloni angubwanganduwa mpanda wa Yerusalemu ndi kuwuwotcha. Yiwu anguwotcha nyumba yakusopiyamu, angubaya ŵanthu anandi ndipu ŵanthu masawuzandi anguŵako kuti akaje akapolu.

Zedekiya wanguthaŵa ku Yerusalemu kweni Ababiloni angumulondo. Yiwu angumukore pafupi ndi Yeriko ndipu anguluta nayu kwaku Nebukadinezara. Fumu ya Babiloni yingutuma ŵanthu kuti abayi ŵana aku Zedekiya, mweneku wachiwona. Pavuli paki, Nebukadinezara wangutolo masu Zedekiya ndi kumuŵika mujeri ndipu pati pajumpha nyengu wangufwa. Yehova wangulayizga ŵanthu a ku Yuda kuti: ‘Asani pajumpha vyaka 70 ndazakukuweziyani kwinu ku Yerusalemu.’

Ntchinthu wuli cho chatingi chichitikiyengi achinyamata wo angutoleke ku Babiloni kuchija akapolu? Kumbi yiwu atingi alutirizengi kuja akugomezeka kwaku Yehova?

Nebukadinezara wati wako mafumu nga ku Yuda ndi kuluta nangu ku Babiloni, wangukambiya nduna yaki Ashipenazi kuti yiŵawoneriyengi. Iyu wangukambiya Ashipenazi kuti wasankhi anyamata anthazi kweniso akutowa ukongwa pakati pa Ayuda. Anyamata ŵenaŵa, atingi akasambizikengi kwa vyaka vitatu. Masambiru yanga ngatingi ngaŵawovyengi pa ma udindu ngakulungakulu ngo atingi apaskikengi ku Babiloni. Yiwu akhumbikanga kusambira kuŵerenga, kulemba ndi kulongoro chineneru cha Akadiya chaku Babiloni. Akhumbikanga so kurya vakurya vakuyanana ndi vo fumu kweniso ŵanthu a munyumba ya fumu aryanga. Anyamata yaŵa ŵenga Daniyeli, Hananiya, Mishayele ndi Azariya. Ashipenazi wanguŵapasa mazina nga chibabiloni ngakuti: Belitesazara, Shadireki, Misheki ndi Abedinego. Kumbi yiwu atingi alekengi kusopa Yehova chifukwa cha vo asambiranga?

Anyamata anayi yaŵa akhumbisiskanga kuvwiya Yehova. Yiwu aziŵanga kuti akhumbikanga cha kurya vakurya vo fumu yaryanga chifukwa Marangu ngaku Yehova ngakanizanga kurya nyama zinyaki. Mwaviyo, yiwu angukambiya Ashipenazi kuti: ‘Chondi mungatichichizganga cha kurya vakurya vo fumu yiturya.’ Ashipenazi wangukamba kuti: ‘Asani mulekengi kurya ndipuso asani fumu yawona kuti muwoneka nge mutama, yindibayengi.’

Daniyeli wanguŵanaŵana fundu yinyaki. Iyu wangukambiya yo waŵawoneriyanga kuti: ‘Chondi tipaskeni mphangwi pe ndi maji kwa mazuŵa 10. Pavuli paki muzitiwoni asani tazamuyanana ndi anyamata wo aturya vakurya vo fumu yiturya.’ Yo waŵawoneriyanga wanguzomera.

Ŵati aŵayesa kwa mazuŵa 10, Daniyeli ndi anyaki atatu awonekanga anthazi ukongwa kuluska anyamata anyawu wosi. Yehova wangukondwa chifukwa angumuvwiya. Iyu wanguwovya Daniyeli kuti waje ndi zeru zakuziŵa viwona kweniso malotu.

Ŵati amaliza kusambira, Ashipenazi wanguluta ndi anyamata wo kwaku Nebukadinezara. Fumu yingukambiskana nawu ndipu yinguwona kuti Daniyeli, Hananiya, Mishayele ndi Azariya ŵenga ndi zeru ukongwa kuluska anyamata wosi. Fumu yingusankha anyamata anayi ŵenaŵa kuti akagwirengi ntchitu ku nyumba yaki yachifumu. Kanandi yaŵafumbanga ulongozgi pa nkhani zikuluzikulu. Yehova wanguchitiska kuti aje ndi zeru kuluska anthulumi wosi azeru kweniso amasenga.

Chinanga kuti ŵenga mucharu chachilendu, Daniyeli, Hananiya, Mishayele ndi Azariya anguluwa cha kuti ŵenga ŵanthu aku Yehova. Kumbi nawi umukumbukengi Yehova nyengu zosi chinanga apapi waku pangaŵavi?