Zuŵa linyaki ndi usiku, Fumu Nebukadinezara wangulota malotu ngakuziziswa. Malotu ngenanga ngangumusuzga maŵanaŵanu ndipu wangutondeka kugona. Iyu wangudana amasenga ŵaki ndipu wangukamba kuti: ‘Ndikambiyeni vo ndalota.’ Yiwu angumuka kuti: ‘Tikambiyeni ndimwi fumu vo mwalota.’ Nebukadinezara wanguŵakambiya kuti: ‘Awa! Imwi ndimwi mukambi vo ndalota ndipu asani mutondekengi ndikubayeningi.’ Yiwu angumukambiya kuti: ‘Tikambiyeni malotu nginu ndipu pavuli paki timukambiyeningi vo ngang’anamuwa.’ Iyu wanguti: ‘Mosi mukhumba kundipusisa. Ndikambiyeni vo ndalota!’ Yiwu angukambiya fumu kuti: ‘Palivi munthu pacharu chapasi yo wangakamba vo munthu walota. Vo mwafumba vingachitika cha.’

Nebukadinezara wangukwiya ukongwa ndipu wangulamula kuti anthulumi wosi azeru wo ŵenga mucharu chaki abayiki. Ŵanthu wo atingi abayikengi asazgangapu Daniyeli, Shadireki, Misheki ndi Abedinego. Daniyeli wangupempha fumu kuti yiŵalindizepu dankha. Pavuli paki, iyu ndi anyaki wo wenga nawu, angupemphera kwaku Yehova kuti waŵawovyi. Kumbi Yehova wanguchita wuli?

Mu chiwona, Yehova wanguziŵisa Daniyeli malotu ngo Nebukadinezara wangulota ndipuso vo ngang’anamuwanga. Mawa laki, Daniyeli wanguluta kwa munthu yo wateŵetiyanga fumu ndipu wangukamba kuti: ‘Anthulumi wosi azeru mungaŵabayanga cha. Ini ndingakamba vo fumu yalota.’ Mteŵeti yo wanguluta ndi Daniyeli kwaku Nebukadinezara. Daniyeli wangukambiya fumu kuti: ‘Chiuta wavumbuwa vo vikuchitikiyeningi kunthazi. Malotu ngo mwalota ngakuti: Munguwona chikozgu chikulu cho chenga ndi mutu wa golidi, nganga ndi manja venga va siliva, lufu ndi viŵa venga va mkuŵa, misolonthi yenga ya chisulu ndipu maphazi ngenga ngakusazganikana chisulu ndi dongu. Pavuli paki, mwa ungudumulika kutuwa ku phiri ndipu unguphwanya maphazi nga chikozgu. Chikozgu cho chinguphwanyika kuja fuvu ndipu fuvu lo linguputa ndi mphepu. Mwa unguja phiri likulu ndipu linguzaza charu.’

Wati wakonkhoska venivi, Daniyeli wanguti: ‘Malotu nginu ngang’anamuwa kuti: Ufumu winu ndi mutu wa golidi. Ndipu siliva wamiya ufumu wo wazamuŵapu pavuli pinu. Pazamuja so ufumu wo wazamuyanana ndi mukuŵa ndipu wazamulamuliya charu chosi. Ufumu wakulondopu, wazamuja wakukho nge chisulu. Pakumaliya, pazamuja ufumu wo wazamugaŵikana, wo wazamukuŵa ndi vigaŵa vinyaki vakukho nge chisulu ndipu vinyaki vambula kukho nge dongu. Mwa wo unguja phiri, ndi Ufumu waku Chiuta. Yiwu wazamutuzgapu maufumu ngosi ndipu wazamujaku kwamuyaya.’

Nebukadinezara wanguwa kavunama panthazi paku Daniyeli. Iyu wanguti: ‘Chiuta waku wakuvumbuliya malotu yanga. Palivi Chiuta wakuyanana nayu.’ Mumalu mwakubaya Daniyeli, Nebukadinezara wangumuŵika kuŵa mulongozgi wa anthulumi wosi azeru ndipuso kuti walamuliyengi ku Babiloni. Kumbi uwona mo Yehova wangumukiya pempheru laku Daniyeli?

Fumu Nebukadinezara yati yalota chikozgu, nyengu yinyaki yingupanga chikozgu cha golidi. Iyu yinguŵika chikozgu chenichi muchidika cha Dura ndipu yingudana ŵanthu akuzirwa a mucharu cho kusazgapu Shadireki, Misheki ndi Abedinego kuti akawungani panthazi pa chikozgu chenichi. Fumu yingulamula kuti: ‘Asani mwavwa ŵaka kuliya kwa mbata, bangu ndi fyoliru mutenere kusindamiya chikozgu. Weyosi yo walekengi kuchisindamiya waponyekengi mung’anju ya motu.’ Kumbi Aheberi atatu ŵenaŵa asindamiyengi chikozgu chenichi pamwenga asopengi Yehova pe?

Fumu yingulamula kuti ambi sumu. Weyosi wangusindama ndi kusopa chikozgu kupatuwaku Shadireki, Misheki ndi Abedinego. Anthulumi anyaki anguŵawona ndipu anguchikambiya fumu kuti: ‘Anyamata Achiheberi atatu akana kusopa chikozgu chinu.’ Nebukadinezara wanguŵadana ndipu wanguŵakambiya kuti: ‘Ndikupaseningi so mwaŵi unyaki wakusopa chikozgu. Asani mwakana ndikuponyeningi mung’anju ya motu. Palivi chiuta yo wangakutaskani kwaku ini.’ Yiwu angumuka kuti: ‘Tikhumba mwaŵi unyaki so cha. Chiuta widu wangatitaska. Kweni chinanga kuti wangaleka kutitaska, tisopengi mbwenu cha chikozgu chinu, fumu.’

Nebukadinezara wangukwiya ukongwa. Iyu wangukambiya ateŵeti ŵaki kuti: ‘Sonkhezani ng’anju maulendu 7 kuluska mo mwasonkhiyanga nyengu zosi.’ Pavuli paki wangulamula asilikali ŵaki kuti: ‘Mangani anyamata yaŵa ndipu aponyenimu.’ Ng’anju yo yingukole ukongwa ndipu asilikali wo angundere kufupi angufwa nyengu yeniyo. Aheberi atatu ŵenaŵa, anguŵaponya mumotu. Nebukadinezara wati wawona mung’anju, wanguwona kuti mwenga ŵanthu 4 wo ayendanga m’malu mwa ŵanthu atatu. Iyu wanguchita mantha ndipu wangufumba alongozgi ŵaki kuti: ‘Asi tinguponyamu ŵanthu atatu? Ndiwona ŵanthu anayi ndipu yumoza wawoneka nge mungelu!’

Nebukadinezara wanguluta pafupi ndi ng’anju ndipu wangudana kuti: ‘Tuwanimu, imwi ateŵeti aku Chiuta Wapachanya Ukongwa!’ Weyosi wanguzizwa kuwona Shadireki, Misheki ndi Abedinego atuwa mung’anju kwambula kufya. Liŵavu, sisi kweniso vakuvwala vawu vingufya cha ndipu anunkhanga fungu la motu cha.

Nebukadinezara wanguti: ‘Chiuta waku Shadireki, Misheki ndi Abedinego ngwanthazi ukongwa. Iyu wangutuma mungelu kuti waŵataski. Palivi chiuta munyaki wakuyanana ndi wawu.’

Nge Aheberi atatu, kumbi ukhumbisiskengi kuja wakugomezeka kwaku Yehova mwambula kutoliyaku kanthu vo vingakuchitikiya?