Zuŵa linyaki ndi usiku, Nebukadinezara wangulota malotu ngakofya. Iyu wangudana anthulumi ŵaki azeru kuti amukambiyi vo ngang’anamuwanga. Kweni pengavi yo waziŵanga vo ngang’anamuwanga. Pakumaliya paki, fumu yingukambiya Daniyeli.

Nebukadinezara wangukambiya Daniyeli kuti: ‘Ndalota chimiti cho chingukuwa ukongwa ndipu chingufika kumitambu. Chitenere kuti chawonekanga kwekosi pacharu. Chenga ndi mani ngakutowa kweniso vipasu vinandi. Nyama zapumuwanga mumuduzi waki ndipu tiyuni tazenganga vizimbu mu mphanda zaki. Pavuli paki, mungelu wanguza kutuwa kuchanya. Iyu wangudaniriza kuti: “Udumuwi chimiti ndipu udumuwi so mphanda zaki. Kweni siya chisina ndi misisi yaki pasi, chiŵi chakumangika chisulu ndi mkuŵa. Mtima wa chimiti usinthengi, ujengi nge wa munthu cha kweni nge wa nyama ndipu ulutirizgengi kuja viyo kwa nyengu 7. Ŵanthu wosi aziŵengi kuti Chiuta ndiyu Ngwakulamuliya ndipu wangapasa ufumu weyosi yo wakhumba.”’

Yehova wanguvumbuliya Daniyeli vo malotu ngo ngang’anamuwanga. Daniyeli wati waziŵa, wanguchita mantha. Iyu wanguti: ‘Fumu, mphanyi lotu ili lenga lakukwaskana ndi arwani ŵinu kweni likwaska yimwi. Chimiti cho chingudumulika, ndimwi. Ufumu winu umalengi ndipu mwamukurya uteka mudondu nge mo zichitiya nyama za mudondu. Kweni chifukwa chakuti mungelu wangukamba kuti siyani chisina, mwazamuja so fumu.’

Pati pajumpha chaka, Nebukadinezara wayendanga pachanya pa nyumba yaki yachifumu wachikamba za Babiloni. Iyu wanguti: ‘Awonani tawuni yikulu yo ndikuzenga. Awonani mo ndatchukiya.’ Pa nyengu yo walongoronga, mazu ngangutuwa kuchanya ngakuti: ‘Nebukadinezara! Sonu ufumu waku wamala.’

Nebukadinezara wangufuntha nyengu yeniyo ndipu wajanga nge nyama yamudondu. Iyu wangutuwa munyumba yaki yachifumu ndi kuluta kuchija ndi nyama mudondu. Sisi laku Nebukadinezara lingukuwa ukongwa nge mavungwa nga nombu ndipu njoŵi zaki zenga nge njoŵi za chiyuni.

Pati pajumpha vyaka 7, Nebukadinezara wanguja so umampha ndipu Yehova wangumuŵika so kuja fumu ya Babiloni. Pavuli paki, Nebukadinezara wangukamba kuti: ‘Ndithamikengi Yehova Fumu yo yikupanga kuchanya. Sonu ndaziŵa kuti Yehova Ngwakulamuliya. Iyu wasisa akujikuzga ndipu wapasa ufumu kwaku weyosi yo wakhumba.’

Pati pajumpha nyengu, Belisazara wanguja fumu ya Babiloni. Zuŵa linyaki ndi usiku, wangudana ŵanthu 1 sawuzandi wo ŵenga ndi maudindu ku Babiloni kuti akachiti phwandu. Iyu wangukambiya ateŵeti ŵaki kuti ato makapu ngagolidi ngo Nebukadinezara wanguto munyumba yakusopiyamu yaku Yehova. Belisazara ndi alendu ŵaki angumwiya mumakapu ngenanga ndipu anguthamika achiuta ŵawu. Mwamabuchibuchi, janja linguwoneka ndipu lingwamba kulemba mazu ngakuziziswa pachimati muchipinda cho aryiyangamu.

Belisazara wanguchita mantha. Iyu wangudana amasenga ŵaki ndipu wanguŵalayizga kuti: ‘Yo wakambengi vo mazu yanga ngang’anamuwa, wajengi wachitatu ndipu waŵengi ndi udindu ukulu mu Babiloni.’ Amasenga wo angwesa kweni pengavi yo wangukamba vo mazu ngo ngang’anamuwanga. Pavuli paki, kunguza fumukazi ndipu yingukamba kuti: ‘Pe munthu munyaki zina laki Daniyeli yo wafwatuliyanga malotu ngaku Nebukadinezara. Iyu wangakukambiyani vo mazu yanga ngang’anamuwa.’

Daniyeli wanguza kuzikumana ndi fumu Belisazara. Iyu yingukamba kuti: ‘Asani ungafiska kuŵerenga ndi kufwatuliya mazu yanga, ndikupasengi nekelesi yagolidi, ujengi wachitatu ndipu uŵengi ndi udindu ukulu mu Babiloni.’ Daniyeli wanguti: ‘Ndipenja mphasu zinu cha, kweni ndikukambiyeningi vo mazu yanga ngang’anamuwa. Awusemwi, a Nebukadinezara ŵenga akujikuzga ndipu Yehova wanguŵasisa. Imwi muziŵa vo vinguŵachitikiya kweni muleke dala kutumbika Yehova. Mumwiya vinyu mumakapu ngagolidi ngo ngakutoleka mu nyumba yakusopiyamu. Mwaviyo, Chiuta walemba mazu yanga ngakuti: Mene, Mene, Tekelu, Parasini. Kung’anamuwa kuti Amedi ndi Aperisiya azamuthereska Babiloni ndipu yimwi mujengi so fumu cha.’

Vawonekanga kuti pengavi yo watingi wathereskengi Babiloni. Tawuni iyi yenga yakuvikilirika ndi mpanda wakukho ndipuso msinji wo wenga ndi maji nganandi. Usiku weniwo, Amedi ndi Aperisiya anguyukiya Babiloni. Fumu Sayirasi ya Aperisiya yingupatusa maji nga mumsinji kuti asilikali ŵaki akafiki ku mageti nga tawuni yeniyi. Ŵati afika, angusaniya kuti mageti ngenga ngakujulika! Asilikali wo angusere mukati, anguthereska tawuni yo ndipu angubaya fumu. Pavuli paki, Sayirasi ndiyu wanguja fumu ya Babiloni.

Chaka chechendamali, Sayirasi wangupharazga kuti: ‘Yehova wandikambiya kuti nkhazengi so nyumba yaki yakusopiyamu ku Yerusalemu. Ŵanthu ŵaki wosi wo akhumba kuwovya angaluta.’ Mwaviyo, nge mo Yehova wangulayizgiya, Ayuda anandi anguwere kwawu pati pajumpha vyaka 70 kutuliya po Yerusalemu wangubwangandulikiya. Sayirasi wangutumiza makapu ngagolidi ndi ngasiliva kweniso viyaŵi vinyaki vo Nebukadinezara wanguto munyumba yakusopiyamu. Kumbi wawona mo Yehova wanguwovye ŵanthu ŵaki mwakugwiriskiya ntchitu Sayirasi?