Fumu yinyaki yo yingwamba kulamuliya Babiloni yenga Dariyo wa ku Mediya. Dariyo wanguwona kuti Daniyeli wenga munthu wakukhumbika. Iyu wangumusankha kuti walongozgengi ŵanthu amaudindu a mucharu cho. Ŵanthu yaŵa amuchitiyanga sanji ndipu akhumbanga kuti watuwepu pa udindu. Yiwu aziŵanga kuti wapempheranga kwaku Yehova katatu pa zuŵa. Mwaviyo, angukambiya Dariyo kuti: ‘Fumu, paje dangu lakuti weyosi wasopengi imwi pe. Yo waleka kuvwiya dangu lenili, watenere kuponyeka muzenji la nkharamu.’ Dariyo wanguwona kuti vo ŵanthu wo angukamba venga vamampha ndipu wangusayiniya dangu lenili.

Daniyeli wati wavwa ŵaka dangu lifya lenili wanguluta ku nyumba yaki. Iyu wangusindama pafupi ndi windu lo lenga lakujula ndipu wangupemphera kwaku Yehova. Ŵanthu wo amuchitiyanga sanji angusere mu nyumba yaki ndipu angumusaniya kuti wapemphera. Yiwu anguluta kwaku Dariyo ndikumukambiya kuti: ‘Daniyeli watikuvwiyani cha. Zuŵa lelosi wapemphera katatu kwaku Chiuta waki.’ Dariyo wamuyanjanga Daniyeli ndipu wakhumbanga cha kuti wafwi. Zuŵa losi lamphumphu waŵanaŵaniyanga mo wangataskiya Daniyeli. Kweni chinanga ndi fumu yatingi yisinthengi cha dangu lo yingusayiniya. Mwaviyo, yingulamula ŵanthu kuti aponyi Daniyeli muzenji la nkharamu zakofya ukongwa.

Dariyo wangutondeka kugona usiku chifukwa wafipiyanga mtima Daniyeli. Ndi mulenji, wanguluta ko kwenga zenji ndipu wangudana Daniyeli kuti: ‘Kumbi Chiuta waku wakutaska?’

Dariyo wanguvwa Daniyeli wachimuka kuti: ‘Mungelu waku Yehova wangujala pamilomu ya nkharamu ndipu zandipweteka cha.’ Dariyo wangukondwa ukongwa! Iyu wangulamula kuti Daniyeli watuzgiki muzenji. Daniyeli wangupwetekeka cha. Pavuli paki, fumu yingulamula kuti: ‘Ponyani ŵanthu wo anguchitiska kuti Daniyeli waponyeki muzenji.’ Ŵanthu yaŵa ŵati aponyeka muzenji, nkharamu zinguŵarya.

Dariyo wangukambiya ŵanthu dangu lakuti: ‘Weyosi watenere kopa Chiuta waku Daniyeli. Iyu wataska Daniyeli ku nkharamu.’

Kumbi upemphera kwaku Yehova zuŵa lelosi nge Daniyeli?

Esiteri wenga msungwana wa Chiyuda yo wajanga mutawuni ya Shushani ku Peresi. Vyaka vinandi kuvuli, mtundu wa Ayuda ungutoleke ku Yerusalemu ndi Nebukadanezara. Iyu wangulereka ndi mzichi waki Modikayi, mteŵeti waku Ahasiweru fumu ya ku Peresi.

Fumu Ahasiweru yakhumbanga kuto fumukazi yinyaki. Ateŵeti ŵaki anguza ndi anthukazi akutowa a mucharu cho kusazgiyapu Esiteri. Pa anthukazi wosi yaŵa, fumu yingusankha Esiteri kuja fumukazi. Modikayi wangukambiya Esiteri kuti wangasumuwanga cha kuti ndi Myuda.

Munthu munyaki wakujikuzga zina laki Hamani, wenga mura wa alongozgi wosi. Iyu wakhumbanga kuti weyosi wamusindamiyengi. Modikayi wangukana kumusindamiya. Ivi vingumukwiyisa ukongwa Hamani ndipu wakhumbanga kumubaya. Iyu wati waziŵa kuti Modikayi wenga Myuda, wangunozga kuti Ayuda wosi abayiki mucharu cho. Iyu wangukambiya fumu kuti: ‘Ayuda mbanthu akofya ukongwa mukhumbika kuŵabaya wosi.’ Ahasiweru wanguti: ‘Chita chechosi cho wakhumba, ndipu wangumupaska nthazi kuti wajalikiski dangu.’ Hamani wangupanga dangu lakuti Ayuda wosi azibayiki pa zuŵa la nambala 13 la mwezi wa Adara. Yehova wawonanga vosi venivi.

Esiteri waziŵanga cha kuti pangujalikiskika dangu lo. Mwaviyo, Modikayi wangumutumiziya kalata yo yakambanga za dangu lenili ndipu wangumukambiya kuti: ‘Luta kwa fumu kuti ukakambiskani nayu.’ Esiteri wanguti: ‘Weyosi yo waluta kwa fumu kwambula kudanika, wabayika. Fumu yandidana cha kwa mazuŵa 30, kweni ndilutengi. Asani yachisosa nthonga yaki yakundibaya cha, kweni asani yachileka kusosa yakundibaya.’

Esiteri wanguluta kwa fumu. Ndipu yati yamuwona, yingumusoske nthonga yaki. Iyu wanguluta ko kwenga fumu ndipu yingumufumba kuti: ‘Ukhumba kuti ndikuchitiyenji Esiteri?’ Iyu wangumuka kuti: ‘Nditikupemphani imwi ndi Hamani kuti muzi ku phwandu.’ Ŵe pa phwandu, Esiteri wanguŵadaniya so ku phwandu linyaki lo watingi wanozgengi zuŵa lachiŵi. Pa phwandu lachiŵi, fumu yingufumba so kuti: ‘Ukhumba kuti ndikuchitiyenji?’ Esiteri wangumuka kuti: ‘Munthu munyaki wakhumba kundibaya limoza ndi ŵanthu ŵangu. Chondi titaskeni.’ Fumu yingufumba kuti: ‘Ndiyani yo wakhumba kukubaya?’ Iyu wangumuka kuti: ‘Munthu muheni uyu, Hamani.’ Ahasiweru wangukwiya ukongwa ndipu wangulamula kuti Hamani wabayiki nyengu yeniyo.

Pengavi yo watingi watuzgengepu dangu lo Hamani wangujalikiska, chinanga ndi fumu. Mwaviyo, fumu yinguŵika Modikayi kuja mura wa alongozgi ndipu yingumupaska mazaza ngakuti wajalikiski dangu linyaki. Modikayi wangujalikiska dangu lo lazomerezanga Ayuda kuti ajivikiriyengi asani arwani ŵawu atiŵayukiya. Pa zuŵa la nambala 13 la mwezi wa Adara, Ayuda anguthereska arwani ŵawu. Kutuliya nyengu iyi, chaka chechosi Ayuda achitanga chikondwereru pa zuŵa lenili chifukwa anguthereska arwani ŵawu.