Kovya Ŵanthu Pacharu Chosi Kuti Aziŵi Kuŵerenga ndi Kulemba

Agostinho, yo waja ku Brazil wangukamba kuti: “Ndikukuliya muchigaŵa cha kumuzi. Tenga akavu ukongwa. Ndinguleka sukulu kuti ndigwirengi ntchitu mwaphamphu kuti ndiwovyengi banja lidu.” Agostinho wangwamba kuŵerenga ndi kulemba wati wafika vyaka 33. Iyu wangukamba kuti: “Kuziŵa kuŵerenga ndi kulemba kungundiwovya kuti ndileki kujikayikiya ukongwa.”

Agostinho njumoza mwa ŵanthu anandi wo Akaboni aku Yehova akuŵasambiza kuŵerenga ndi kulemba vyaka vakujumpha 70 vajumpha. Ntchifukwa wuli Akaboni aku Yehova achitiska masambiru ngenanga? Kumbi ŵanthu ayanduwa wuli ndi masambiru ngenanga?

Vakusuzga Ukongwa Kuziŵa Vinthu Asani Uziŵa Cha Kuŵerenga ndi Kulemba

Kufika mu 1935, Akaboni aku Yehova apharazganga mu vyaru 115. Kuti apharazgiyi ŵanthu a vineneru vakupambanapambana, amishonale agwiriskiyanga ntchitu nkhani za mu Bayibolu zakuchita kujambula, ndipu nyengu zinyaki agaŵiyanga mabuku nga vineneru vakweniko. Chinanga kuti ŵanthu anandi angulongo kuti akhumba kuziŵa vo Bayibolu lisambiza, kweni venga vakusuzga ukongwa kuti asambiri chifukwa aziŵanga cha kuŵerenga ndi kulemba.

Ŵanthu asuzgikanga kuziŵa mo angagwiriskiya ntchitu fundu za mu Bayibolu chifukwa chakuti aziŵanga cha kuŵerenga ndi kulemba. (Yoswa 1:8; Salimo 1:2, 3) Yiwu asuzgikanga so kufiska udindu wawu wachikhristu. Mwakuyeruzgiyapu, asani apapi aziŵa cha kuŵerenga, vasuzganga kusambiza ŵana ŵawu vo Bayibolu likamba. (Dotoronome 6:6, 7) Venga vakusuzga kuti Kaboni yo wayamba waka sonu, wagwiriskiyengi ntchitu Bayibolu pakusambiza ŵanthu anyaki asani waziŵa cha kuŵerenga.

Kwambisa Ntchitu Yakusambiza Ŵanthu Kuŵerenga ndi Kulemba

Mu vyaka va m’ma 1940 ndi 1950, Nathan H. Knorr ndi Milton G. Henschel ndiwu alongozganga Akaboni aku Yehova pa ntchitu yakupharazga. Yiwu angwenda muvyaru vakupambanapambana kuti awoni mo ntchitu yeniyi yitende. Mwaviyo, anguchiska maofesi nga nthambi nga muvyaru vo ŵanthu anandi ŵenga ajila kuŵerenga ndi kulemba, kuti abali asambizengi ŵanthu kuŵerenga ndi kulemba mumipingu.

Maofesi nga nthambi ngangupereka ulongozgi wa mo abali angasambiziya ŵanthu. Muvyaru vinyaki, boma lenga ndi nthowa zakusambiziya kweniso mabuku ngo Akaboni agwiriskiyanga ntchitu. Mwakuyeruzgiyapu ku Brazil, ofesi ya nthambi yingulonde manoti ndipuso vinthu vinyaki kutuliya ku boma ndipu anguvitumiza ku mipingu. Muvyaru vinyaki, Akaboni angupanga mapulogilamu ngawu nga mo angasambiziya ŵanthu.

Weyosi wasambiranga kuŵerenga ndi kulemba, kwali ndi munthulumi, munthukazi, mwana pamwenga mula. Abali ndi azichi akhumbikanga kuŵasambiza kuŵerenga ndi kulemba muchineneru chawu. Venivi vachitisanga kuti mumipingu yinyaki asambizengi vineneru vinandi.

Pulogilamu yo Yawovya Ŵanthu

Kumbi ŵanthu ayanduwa wuli ndi pulogilamu yeniyi? Kaboni munyaki wa ku Mexico wangukamba kuti: “Sonu ndivwisa umampha vo ve mu Bayibolu, ndipu venivi vitindiwovya kuti Bayibolu lindifikengi pa mtima. Kuziŵa kuŵerenga kwandiwovya kuti ndikambiskanengi mwakufwatuka ndi ŵanthu ndipuso ndafiska kupharazga uthenga wa mu Bayibolu ku ŵanthu anandi.”

Pulogilamu yakusambiza ŵanthu kuŵerenga ndi kulemba yawovya ŵanthu kusambira vinandi vakukwaskana ndi Bayibolu pe cha. Isaac wa ku Burundi wangukamba kuti: “Kuziŵa kuŵerenga ndi kulemba kwandiwovya kuti ndisambiri malusu ngakuzenga. Ntchitu ya kuzenga nditiyito nge ntchitu yangu ndipu sonu ndiwonere ntchitu zikulu za vakuzengazenga.”

Jesusa wa ku Peru wangwamba kusambira kuŵerenga ndi kulemba po wenga ndi vyaka 49. Iyu wangukamba kuti: “Nge munthukazi wapanyumba, ndakhumbisiskanga kuwona mtengu wa vinthu kweniso mazina ngaki kumsika. Kali venga vakusuzga ukongwa kuchita viyo. Nditingawonga ukongwa masambiru ngenanga, sonu banja langu nditiliguliya vinthu vakukhumbika mwakufwatuka.”

Kwa vyaka vinandi, maboma nga muvyaru vakupambanapambana ngaja ngachiwonga Akaboni aku Yehova chifukwa cha ntchitu yo agwira yakovya ŵanthu kuziŵa kuŵerenga ndi kulemba. Mazuŵa nganu, Akaboni aku Yehova alutirizga kusambiza ŵanthu mwakugwiriskiya ntchitu mapulogilamu kweniso vidya vo avigwiriskiya ntchitu kwa vyaka vinandi. Yiwu akupanga kweniso kupulinta mabuku pafufupi 224 miliyoni muvineneru 720 kuti ngawovyi ŵanthu kusambira kuŵerenga pamwenga kuwovya wo akuluta panthazi cha ndi sukulu.a