Chaka chechosi achinyamata anandi wo alereke mubanja la Akaboni aku Yehova, abatizika. Kumbi namwi mukhumba kubatizika? Asani ndi viyo, chakwamba mukhumbika kuziŵa vo kujipatuliya ndipuso kubatizika kung’anamuwa.

• Kumbi ubatizu ung’anamuwanji?

• Kumbi kujipatuliya kung’anamuwanji?

• Ntchifukwa wuli ubatizu ngwakukhumbika ukongwa?

• Vo achinyamata anyinu akamba

• Fundu zaboza ndipuso zauneneska

Kumbi ubatizu ung’anamuwanji?

Bayibolu likamba kuti ubatizu nkhumuwaza waka munthu maji cha, kweni kumubiza mu maji ndipu kuchita venivi kumiya vinthu vakukhumbika ukongwa.

• Kubizika mumaji pa ubatizu kulongo pakweru kuti muchitengi vakukhumba vinu cha.

• Kuzuwuka mumaji kulongo kuti mwayamba umoyu wasonu kuti muchiti vo vikondwesa Chiuta.

Asani munthu wabatizika waziŵa kuti Yehova ndiyu ngwakwenere kutikambiya cho ntchamampha kweniso chiheni ndipu mutimulayizga kuti nyengu zosi muchitengi vo iyu wakhumba.

Ŵanaŵaniyani fundu iyi: Ntchifukwa wuli mukhumbika kulayizga pagulu kuti muvwiyengi Yehova? Wonani pa 1 Yohane 4:19 ndi Chivumbuzi 4:11.

Kumbi kujipatuliya kung’anamuwanji?

Mwechandabatiziki, mukhumbika dankha kujipatuliya kwaku Yehova pakumwija. Mungachita wuli?

Kuziya mupempheru, mukambiya Yehova kuti mumuteŵetiyengi kwa umoyu winu wosi kweniso muchitengi vo iyu wakhumba kwali vinthu vingaŵa wuli pa umoyu winu.

Munthu wabatizika pakweru kulongo kuti wakujipatuliya kwaku Yehova. Mulongo pakweru kuti mwaleka umoyu wakuchita vo mukhumba ndipu sonu muchitengi vo Yehova wakhumba.—Mateyu 16:24.

Ŵanaŵaniyani fundu iyi: Ntchifukwa wuli munthu waja ndi umoyu wamampha asani wajipereka kwaku Yehova? Wonani pa Yesaya 48:17, 18 ndi Aheberi 11:6.

Ntchifukwa wuli ubatizu ngwakukhumbika ukongwa?

Yesu wangulongo kuti ubatizu ngwakukhumbika ukongwa kwa akusambira ŵaki. (Mateyu 28:19, 20) Mwaviyo, ubatizu weche wakukhumbika ukongwa kwa Akhristu mazuŵa nganu. Bayibolu likamba kuti ubatizu ngwakukhumbika ukongwa kuti munthu wazitaskiki.—1 Peturo 3:21.

Kweni mukhumbika kubatizika chifukwa chakwanja Yehova ndipuso muwona kuti ubwezi winu ndi iyu ngwakukhumbika. Mutenere kuja ndi maŵanaŵanu nge ngo wakulemba sumu munyaki wenga nangu. Iyu wangulemba kuti: “Kumbi ndimuweziyengenji Yehova pa vamampha vosi vo iyu wandichitiya? . . . Ndipu ndidaniyengi pa zina laku Yehova. Ndifiskengi vo ndalapizgiya Yehova.”—Salimo 116:12-14.

Ŵanaŵaniyani fundu iyi: Kumbi ndi vinthu wuli vamampha vo Yehova wakuchitiyani ndipu mungamuweziyanji? Wonani pa Dotoronome 10:12, 13 ndi Aroma 12:1.

Asani mulondo fundu za mu Bayibolu pa umoyu winu ndipuso mwe pa ubwezi wamampha ndi Chiuta, mungayamba kuŵanaŵana kuti mungabatizika sonu. Kweni kumbi mungaziŵa wuli asani mwe akunozgeka nadi kubatizika?a

Mu nkhani iyi muziŵengi

• Unandi wa vinthu vo mukhumbika kuziŵa

• Vo mutenere kuchita

• Vo achinyamata anyinu akamba

Unandi wa vinthu vo mukhumbika kuziŵa

Kuti munthu wabatiziki wakhumbika kuloŵeza fundu cha, nge mo wachitiya mwana wa sukulu kuti wakakweri mayesu. Kweni mukhumbika kugwiriskiya ntchitu “lusu linu lakuŵanaŵana” kuti mugomezgengi kuti vo Bayibolu lisambiza vauneneska nadi. (Aroma 12:1) Mwakuyeruzgiyapu:

• Kumbi mugomezga kuti Chiuta waliku nadi ndipu ndiyu mutenere kumusopa?

  Bayibolu likamba kuti: “Weyosi yo watuza kwaku Chiuta, watenere kugomezga kuti iyu waliku nadi ndipuso kuti wapereka mphotu ku ŵanthu wosi wo atimupenja ndi mtima wosi.”—Aheberi 11:6.

  Jifumbeni kuti: ‘Ntchifukwa wuli ndigomezga mwaku Chiuta?’ (Aheberi 3:4) ‘Ntchifukwa wuli nditimusopa?’—Chivumbuzi 4:11.

  Asani mukhumba chovyu, ŵerengani nkhani ya mutu wakuti “Kodi Zinthu Zinachita Kulengedwa?—Gawo 1: N’chifukwa Chiyani Ndimakhulupirira Kuti Kuli Mulungu?”

• Kumbi mugomezga kuti uthenga wo ukulembeka mu Bayibolu ukutuliya nadi kwaku Chiuta?

  Bayibolu likamba kuti: “Malemba ngosi ngakukambirika ndi Chiuta, ndipu ngatovya pakusambiza, pakuchenya, pakunyoloska vinthu ndipuso pakulunguchizga mu urunji.”—2 Timote 3:16.

  Jifumbeni kuti: ‘Ntchifukwa wuli ndigomezga kuti Bayibolu ndi buku la zeru za ŵanthu cha?’—Yesaya 46:10; 1 Atesalonika 2:13.

  Asani mukhumba chovyu, ŵerengani nkhani ya mutu wakuti “Kumbi Bayibolu Lingandiwovya Wuli?—Chigaŵa chakwamba: Kuŵanaŵaniya Fundu za mu Bayibolu”

• Kumbi mugomezga kuti Yehova wagwiriskiya ntchitu mpingu wa Chikhristu kuti wafiski khumbu laki?

  Bayibolu likamba kuti: “Kwaku iyu [Chiuta] kuŵi unkhankhu kuporote mu mpingu ndipuso mwaku Khristu Yesu ku migonezi yosi muyaya mpaka muyaya.”—Aefeso 3:21.

  Jifumbeni kuti: ‘Kumbi fundu zo ndisambira mu Bayibolu pa maunganu Ngachikhristu, nditiziwona kuti zituliya ku ŵanthu pamwenga kwaku Yehova?’ (Mateyu 24:45) ‘Kumbi ndiluta ku maunganu chinanga kuti apapi ŵangu aleka kulutaku (asani akuzomerezani kuti muluti)?’—Aheberi 10:24, 25.

  Asani mukhumba chovyu, ŵerengani nkhani ya mutu wakuti “Ntchifukwa Wuli Ndikhumbika Kusanirika pa Maunganu ku Nyumba ya Ufumu?”

Vo mutenere kuchita?

Mukhumbika kuja akufikapu cha kuti mubatiziki. Kweni mukhumbika kulongo kuti mukhumbisiska nadi ‘kutuwaku ku chinthu chiheni ndi kuchita chamampha.’ (Salimo 34:14) Mwakuyeruzgiyapu:

• Kumbi mulondo fundu zaku Yehova pa umoyu winu?

  Bayibolu likamba kuti: “Lutirizgani kuŵa ndi njuŵi yamampha.”—1 Peturo 3:16.

  Jifumbeni kuti: ‘Kumbi ndilongo wuli kuti ‘lusu langu la kuvwisa vinthu ndikulisambiza kupambanisa pakati pa chamampha ndi chiheni.’?’ (Aheberi 5:14) ‘Kumbi ndi zuŵanji po ndingukana kuchita chinthu chiheni cho achinyamata anyangu akhumbanga kuti ndichiti? Kumbi mabwezi ngo nde nangu ngatindichiska kuchita cho ntchamampha?’—Nthanthi 13:20.

  Asani mukhumba chovyu, ŵerengani nkhani ya mutu wakuti “Kumbi Ndingayisambiza Wuli Njuŵi Yangu?”

• Kumbi muziŵa kuti mwazamumuka kwaku Yehova pa vo muchita?

  Bayibolu likamba kuti: “Weyosi waku isi, wazamumuka yija kwaku Chiuta.”—Aroma 14:12.

  Jifumbeni kuti: ‘Kumbi ndichita vinthu mwauneneska?’ (Aheberi 13:18) ‘Kumbi ndizomereza vo ndinangiska, pamwenga ndibisa pamwenga so nditumba mulandu ŵanthu anyaki kuti ndiwu achitiska?’—Nthanthi 28:13.

  Asani mukhumba chovyu, ŵerengani nkhani ya mutu wakuti “Kodi Ndizitani Ndikalakwitsa Zinazake?”

• Kumbi mwe pa ubwezi wamampha ndi Yehova?

  Bayibolu likamba kuti: “Ndereni kufupi ndi Chiuta, ndipu nayu wanderengi kufupi ndi yimwi.”—Yakobe 4:8.

  Jifumbeni kuti: ‘Kumbi ndi vinthu wuli vo ndichita kuti ndije pa ubwezi ndi Yehova?’ Mwakuyeruzgiyapu, ‘Kumbi ndiŵerenga Bayibolu zuŵa lelosi?’ (Salimo 1:1, 2) ‘Ndipemphera nyengu zosi?’ (1 Atesalonika 5:17) ‘Kumbi ndi vinthu wuli vo ndizumbuwa mu mapempheru ngangu? Nanga kumbi mabwezi ngangu ndi mabwezi so ngaku Yehova?’—Salimo15:1, 4.

  Asani mukhumba chovyu, ŵerengani nkhani ya mutu wakuti “Kumbi Bayibolu Lingandiwovya Wuli?—Chigaŵa Chachiŵi: Vo Mungachita Kuti Mukondwengi Pakuŵerenga Bayibolu” ndipuso yakuti “N’chifukwa Chiyani Ndiyenera Kupemphera?”

VO VINGAKUWOVYANI: Kuti munozgeke kubatizika, ŵerengani mutu 37 mu buku lakuti Mayankho a Zimene Achinyamata amafunsa—Buku Lachiwiri. Ŵerengani ukongwa fundu zo ze pa peji 308 ndi 309.

Kumbi muchita mantha kujipereka kwaku Yehova kweniso kubatizika? Asani ndi viyo, nkhani iyi yikuwovyeningi kuti muleki kuchita mantha.

Munkhani iyi tikambiskanengi mafumbu yanga

• Wuli asani ndingachita ubudi ukulu pavuli pakuti ndabatizika?

• Wuli asani nditopa udindu wo ndingaŵa nawu asani ndabatizika?

• Wuli asani nditijiwona kuti nde wambula kwenere kuteŵete Yehova?

• Vo achinyamata anyinu akamba

Wuli asani ndingachita ubudi ukulu pavuli pakuti ndabatizika?

Ntchifukwa wuli mungachita mantha?: Panyaki muziŵa munthu munyaki yo wakuchitapu ubudi ukulu ndipu wakutuzgika mu mpingu. (1 Akorinto 5:11-13) Mukhoza kufipa mtima kuti namwi vingakuchitikiyani.

“Pakwamba ndati ndaŵanaŵana vakuti ndibatiziki ndachitanga mantha kuti ndikhoza kuchita ubudi ukulu. Ndaŵanaŵaniyanga waka mo venivi vingakwaskiya apapi ŵangu.”—Rebekah.

Lemba: “Munthu muheni waleki nthowa yaki . . . Iyu wawere kwaku Yehova, yo wamuchitiyengi lisungu, Wawere kwaku Chiuta widu, pakuti wagowokengi ukongwa.”—Yesaya 55:7.

Ŵanaŵaniyani fundu iyi: Chinanga kuti ŵanthu ambula kulapa atuzgika mu mpingu kweni Yehova wachitiya lisungu ŵanthu wo mwakujiyuyuwa, alapa ndikuzomereza ulongozgi wo apaskika.—Salimo 103:13, 14; 2 Akorinto 7:11.

Kweni fundu njakuti: Chinanga kuti mwe ambula kufikapu, Yehova wangakuwovyani kukunthiyapu mayeseru. (1 Akorinto 10:13) Kuluska vosi, ndiyani wangasankha vo mukhumbika kuchita? Mwaŵeni? Pamwenga munthu munyaki?

“Ndawopanga kuti ndingachita ubudi pavuli pakuti ndabatizika kweni ndinguziŵa kuti ndingachita ubudi asani ndileka kubatizika. Ndinguziŵa so kuti ndikhumbika cha kuzomerza kuti mantha nga vo vingazichitika munthazi vinditondekesi kuchita vo ndikhumba kuchita.”—Karen.

Fundu yakukhumbika: Asani mungasankha kubatizika, mukhwechengi kuchita ubudi nge mo ateŵeti aku Yehova anandi achitiya.—Afilipi 2:12.

Asani mukhumba chovyu, wonani nkhani yakuti “Kodi Ndingatani Kuti Ndisagonje Poyesedwa?”

Wuli asani nditopa udindu wo ndingaŵa nawu asani ndabatizika?

Ntchifukwa wuli mungachita mantha?: Mwakuyeruzgiyapu, mungaŵa kuti muziŵa achinyamata anyaki wo akusama ndipu achita vinandi pakuteŵete Yehova. Mungafipa mtima kuti ŵanthu nawu akhazengi kuti namwi muchitengi mwakuyananaku.

“Mkhristu wakubatizika we ndi mwaŵi ukulu ukongwa wakuteŵete Yehova, kweni ŵanthu anyaki mbakunozgeka cha pamwenga angafiska cha chifukwa cha mo vinthu viliri.”—Marie.

Lemba: “Kweni weyosi wasandi vakuchita vaki ndipu pavuli paki waŵengi ndi chifukwa chakukondwe pa vo iyu mweneku wachita, kweni mwakujiyeruzgiya ndi munthu munyaki cha.”—Agalatiya 6:4.

Ŵanaŵaniyani fundu iyi: Mumalu mwakujiyeruzgiya ndi ŵanthu anyaki, muŵanaŵaniyengi ukongwa mazu nga pa lemba la Mariko 12:30, lo lititi: “Uyanjengi Yehova Chiuta waku ndi mtima waku wosi.”

Ziŵani kuti mukhumbika kuteŵete Yehova ndi mtima winu wosi, munthu cha. Asani mutimuyanja ukongwa Yehova, musaniyengi nthowa zakuchitiya vosi vo yimwi mungafiska pakumuteŵete.

“Ubatizu ngwakukhumbika ukongwa ndipu ndi mphingu cha. Asani mucheza ndi ŵanthu amampha, akuwovyeningi. Kamana ndi kamana namwi muyambengi kuchita vinthu vo vingakuwovyani kuti mukondwengi. Asani mukhwecha kubatizika vingaŵa vakukupwetekani.”—Julia.

Fundu yakukhumbika: Muwongengi chanju cho Yehova watikulongoni. Venivi vingakuwovyani kuti muchitengi vo yimwi mungafiska pakumuteŵete.—1 Yohane 4:19.

Asani mukhumba chovyu, wonani nkhani yakuti “Kodi Ndine Munthu Wodalirika?”

Wuli asani nditijiwona kuti nde wambula kwenere kuteŵete Yehova?

Ntchifukwa wuli mungachita mantha?: Yehova ngwakulamuliya wa chilengedu chosi. Iyu wapambana ukongwa ndi ŵanthu! Mungazizwa kuziŵa fundu yakuti Yehova watikuziŵani.

“Chifukwa chakuti apapi ŵangu Mbakaboni aku Yehova, ndafipanga mtima kuti ubwezi wangu ndi Yehova ngwakukho cha ndipuso kuti pakundija Yehova wakundiguziya cha kwaku iyu.”—Natalie.

Lemba: “Palivi munthu yo wangaza kwaku ini kwambula kuti Ada wo akundituma amuguza.”—Yohane 6:44.

Ŵanaŵaniyani fundu iyi: Chifukwa chakuti mukhumba kubatizika vilongo kuti Yehova watikuguziyani kwaku iyu kuti muje nayu paubwezi wakukho. Kumbi mungayanja kuja nayu paubwezi?

Mukumbukengi kuti ndi Yehova yo wakujalikisa fundu ku ŵanthu wo iyu wakhumba kuŵaguziya kwaku iyu, ndimwi cha pamwenga munthu munyaki weyosi. Ndipu Mazu ngaki ngatitisimikiziya kuti asani ‘tinderengi kufupi ndi Chiuta,  .  nayu wanderengi kufupi ndi yimwi.’—Yakobe 4:8.

“Chifukwa chakuti muziŵa Yehova ndipuso kuti wakuguziyani kwaku iyu, mbukaboni wakulongo kuti watikuyanjani. So asani maŵanaŵanu nginu ngatikukambiyani kuti mwe ambula kwenere kumuteŵete, mujikumbusengi kuti iyu watikuwonani viyo cha. Ndipu nyengu zosi Yehova wachita vinthu mwakwenere.”—Selina.

Fundu yakukhumbika: Asani muchita vinthu vo Bayibolu likamba, ndikuti muŵengi akwenere kusopa Yehova. Iyu wakhumba kuti mumusopengi.—Chivumbuzi 4:11.

Asani mukhumba chovyu, wonani nkhani yakuti “Ntchifukwa Wuli Nditenere Kupemphera?”