Kumbi Bayibolu Likambanji Vakukwaskana ndi Khrisimasi?

Vo Bayibolu likamba

Bayibolu likamba cha zuŵa lo Yesu wakuwiya, ndipuso likambapu cha kuti tikondweriyengi kuwaku kwaki. Buku linyaki lingukamba kuti: “Chiuta wakutilamulapu cha kuti tikondweriyengi Khrisimasi, ndipu Khrisimasi yizumbulikamu cha mu Chipanganu Chasonu.”—McClintock and Strong Cyclopedia

Mumalu mwaki, mbiri yilongo kuti Khrisimasi yikwambiya ku miyambu ya visopa. Bayibolu lilongo kuti tikwiyisa Chiuta asani titimusopa munthowa yo iyu waleka kuzomereza.—Ekisodo 32:5-7.

Mbiri ya vo vichitika pa Khrisimasi

1. Kukondwere zuŵa lo Yesu wakuwiya: “Akhristu akwambiriya akondweriyanga cha kuwaku kwaku Yesu chifukwa awonanga kuti kukondwere kuwaku kwa munthu weyosi ndi mwambu wa ŵanthu wo aleka kusopa Chiuta.”—The World Book Encyclopedia.

2. Alongozgi a visopa atenere kuti angusankha zuŵa lenili kuti likoliyani ndi miyambu ya ŵanthu wo aleka kusopa Chiuta yo yachitikanga pa zuŵa lenili pamwenga asani pajumpha mazuŵa ngamanavi mu nyengu yeniyi ya chifuku.

3. Kupaskana mphasu, kuchita phwandu: Buku la The Encyclopedia Americana likamba kuti: “Satunaliya, phwandu la Chiroma lo lachitikanga mkatikati mwa December, ndiku kukutuliya miyambu yinandi yo yichitika pa Khrisimasi. Mwakuyeruzgiyapu, kuchita maphwandu ngakulungakulu, kupaskana mphasu, kweniso kubuska makandulu ndivu vachitikanga pa phwandu lenili.” Buku la Encyclopædia Britannica likamba kuti “ntchitu zosi ndipuso mabizinesi ngosi ngakanizikanga” pa zuŵa lenili la Satunaliya.

4. Mababu nga Khrisimasi: Mwakukoliyana ndi vo buku la The Encyclopedia of Religion likamba, ŵanthu a ku Europe atowesanga nyumba zawu “ndi timababu kweniso vinthu vakupambanapambana va girini” kuti akondwere nyengu ya chifuku yeniyi kweniso kuti adikisi mizimu yiheni.

5. Tivimiti takutowa: “Ŵanthu anyaki agomezganga kuti chimiti chinyaki chakutowa chawovyanga ŵanthu mwamasenga. Ŵanthu asopanga chimiti cha girini chenichi asani akhumba kuti lumwi liŵali.”—The Encyclopedia Americana.

6. Chimiti cha Khrisimasi: “Ŵanthu anandi wo alekanga kusopa Chiuta ku Europe angulutirizga mbwenu kusopa chimiti ŵati asintha ndi kuja Akhristu.” Nthowa yimoza yo achitiyanga venivi “nkhuŵika chimiti cha Yule pakhomu pamwenga mkati mwa nyumba mu nyengu ya vikondwereru venivi va muchifuku.”​—Encyclopædia Britannica.