VO MUNGACHITA KUTI MULEKENGI KUSUZGIKA MAŴANAŴANU

Kumbi Kusuzgika Maŵanaŵanu Kung’anamuwanji?

Mazu ngakuti kusuzgika maŵanaŵanu ngang’anamuwa vo liŵavu la munthu lichita asani wakumana ndi suzgu yikulu. Pa nyengu iyi, wongu utumiza mahomoni nganandi mu liŵavu. Venivi vichitiska kuti munthu watutengi mwabefu, ndopa zitchimbiyengi ukongwa, mapapu ngatondekengi kugwira umampha ntchitu yaki ndipuso kuti minofu yikunganengi pamoza. Mwakuti mwechendaziŵi umamphaumampha vo vichitikengi, liŵavu linu lija kuti lanozgeka kali. Kweni asani chinthu chakusuzga cho chajumphapu, mtima uja mumalu ndipu liŵavu linu liwere mwakali.

KUSUZGIKA MAŴANAŴANU KWAMAMPHA NDIPUSO KUHENI

Kusuzgika maŵanaŵanu nkhwakawi ndipu kutambiya mu wongu kweniso kutovya kuti munthu waje wakunozgeka kumalana ndi chinthu chinyaki chakusuzga pamwenga chakofya. Ndipu kusuzgika maŵanaŵanu kwamampha kutovya kuti munthu wachitepu kanthu mwaliŵi. Kweniso kutovya kuti tifiski vilatu vidu nge kukwera mayesu, ma intavyu nga ntchitu pamwenga vakuchitika vinyaki.

Kweni kusuzgika ukongwa maŵanaŵanu pamwenga kwanyengu yitali nkhwakofya. Asani mujaliya ŵaka kusuzgika maŵanaŵanu mungayamba kutama, kuleka kukondwa kweniso mungayamba kuluwaluwa vinthu. Ndipu nkharu yinu kusazgapu mo muchitiya vinthu ndi ŵanthu vingasintha. Kusuzgika maŵanaŵanu kwanyengu yitali kungachitiska munthu kuti wayambi kuchita vinthu vo vingananga umoyu waki. Kungachitiska so munthu kuti wayambi kufipa mtima, kuvuka kweniso kuja ndi maŵanaŵanu ngakukhumba kujibaya.

Pakuti ŵanthu asuzgika maŵanaŵanu munthowa zakupambanapambana, venivi vingayambisa matenda nganandi. Ndipu vingakwaska so pafufupi liŵavu losi la munthu.

MO KUSUZGIKA UKONGWA MAŴANAŴANU KUNGAKWASKIYA LIŴAVU LINU

Misipi.

Misipi yichitiska kuti muliŵavu mutuwengi mahomoni nge adirenolayini (adrenaline) ndi kotiso (cortisol). Mahomoni ngenanga ngachitiska kuti mututengi mwabefu, ndopa zitchimbiyengi ukongwa kweniso kuti shuga wa mu ndopa waje munandi pa nyengu yo mwakumana ndi chinthu chinyaki chakofya. Kweni kusuzgika ukongwa maŵanaŵanu kungachitiska kuti:

mukwiyengi liŵi, kufipa mtima, kutimbanyizgika maŵanaŵanu, kuŵaŵa kwa mutu ndipuso kusoŵa tulu

Mamasuzi.

Minofu ya mu liŵavu linu yikungana kuti muleki kupwetekeka. Kweni kusuzgika ukongwa maŵanaŵanu kungachitiska:

kuphwanya kwa liŵavu, kuŵaŵa kwa mutu ndipuso kumangikana kwa minofu

Katutiru.

Mututa mwaliŵiliŵi kuti muguzi mphepu ya okusijini. Kweni kusuzgika ukongwa maŵanaŵanu kungachitiska kuti:

muphanikengi ndipuso kututa mwakusuzgikiya

Ndopa.

Mtima ututa mwaliŵiliŵi kweniso usuzgika kutumiza ndopa mu liŵavu losi. Misipi yo mutenda ndopa yitizitumiza ku malu ko kukhumbika ukongwa ndopa nge ku mamasuzi. Kweni kusuzgika ukongwa maŵanaŵanu kungachitiska kuti:

mutamengi bp, nthenda ya mtima kweniso sitiroku

Mahomoni.

Chidyokomeru chituza mahomoni nge adirenolayini (adrenaline) ndi kotiso (cortisol) vo vitovya kuti liŵavu linu limalani ndi suzgu lakusuzgika maŵanaŵanu. Chiŵindi chichitiska kuti shuga wa mu ndopa waje munandi mu liŵavu. Venivi vitovya kuti muje ndi nthazi zinandi. Kweni kusuzgika ukongwa maŵanaŵanu kungachitiska:

nthenda ya shuga, kutama ukongwa, kujaliya kusinthasintha kawonekeru ndi vakuchita kweniso kututuŵa

Matumbu.

Nthowa yo chakurya chigayikiya mu liŵavu linu yingatimbanyizgika. Kweni kusuzgika ukongwa maŵanaŵanu kungachitiska:

mseru, kuwukuwa, kutuwa pamoyu ndipuso kuleka kuchita chimbuzi

Viŵalu vakubaliya.

Kusuzgika maŵanaŵanu kungakwaska khumbiru lakugonana ndipuso mo viŵalu vigwiriya ntchitu. Kweni kusuzgika ukongwa maŵanaŵanu kungachitiska kuti:

munthulumi waŵevi nthazi pa nyengu yakugonana ndipuso kuti munthukazi watondeki kumaliza umampha mazuŵa ngaki ngakusamba