KUMBI chilatu chaku Yesu we pacharu chapasi chenga chakuti wuli? Iyu wangukamba kuti: “Kutindenere kutaula makani ghakunozga gha ufumu waku Chiuta pakuti ndatumikiya chenichi.” (Luka 4:43) Tiyeni tikambiskani vinthu vinayi vo Yesu wangusambiza vakukwasana ndi Ufumu wo, vo venga fundu yikulu ya upharazgi waki.

1. Yesu Wangusankhika Kuja Fumu. Yesu wangukamba kuti iyu ndiyu wenga Mesiya wakulayizgika. (Yohane 4:​25, 26) Iyu wangukamba so kuti wenga Fumu yo mchimi Danyele wanguwona mu chiwona chaki. Yesu wangukambiya akutumika ŵaki kuti zuŵa linyaki wazamuja “pa chitengo cha unkhankhu” ndipu nawu so azamuja pa vitengu va ufumu. (Mateyu 19:28) Iyu wangukamba kuti wo wamuwusa nawu adanika kuti “kamskambu kamana” ndipu wangukamba kuti we so ndi “mberere zinyake” zo zenga chigaŵa cha kamskambu kamana cha.​—⁠Luka 12:32; Yohane 10:⁠16.

2. Ufumu waku Chiuta wazamuchitisa kuti paje urunji. Yesu wangukamba kuti Ufumu wo, wazamumalisa vinthu vambula urunji mwa kutowesa zina laku Yehova Chiuta ndipuso kutuzgapu kunyozeka kosi ko Satana wachita, kutuliya po kugaruka kungwambiya mu Edene. (Mateyu 6:​9, 10) Yesu, wayanjiyanga cha chifukwa zuŵa ndi zuŵa wasambizanga anthurumi ndi anthukazi, akukhupuka ndipuso akavu mwambula kusankha. Chinanga kuti chilatu chaki chakwamba chenga chakuti wasambizi Ayisraele, Iyu wanguwovya so Asamaria ndipuso ŵanthu Amitundu wo ŵenga Ayuda cha. Mwakupambana ndi alongozgi a visopa a mnyengu yaki, iyu wachitanga vinthu mwambula kwanjiya.

3. Ufumu waku Chiuta ngwa charu ichi cha. Panyengu yo Yesu wenga pacharu chapasi, ndipu pe chimtimbaheka cha vakuchitika va ndali. Charu cho wanguwiyaku, chenga pasi pa muwusu wa charu chinyaki. Ndipu ŵanthu anguyesesa kumuchichizga kuti waserere mu vakuchitika va ndali, kweni iyu wanguthaŵa. (Yohane 6:​14, 15) Iyu wangukambiya munthu munyaki wa ndali kuti: “Ufumu wangu kuti ngwa charu chino cha.” (Yohane 18:36) Iyu wangukambiya akumulondo ŵaki kuti: “Mwe ŵa charu cha.” (Yohane 15:19) Iyu wanguŵazomerezga cha kuti agwiriskiyi nchitu vidya va nkhondu chinanga nkhumuvikiriya navu.​—⁠Mateyu 26:​51, 52.

4. Muwusu waku Khristu wazamuja wachanju. Yesu wangulayizga kuti wapumuzgengi ŵanthu mwa kumaliska masuzgu ngawu. (Mateyu 11:​28-30) Iyu wachitanga vo wakambanga. Yesu wangupereka ulongozgi wachanju ndipuso wakovya mo angakunthiyapu masuzgu, kusankha mabwezi ngamampha, kumalana ndi suzgu la kwanja vinthu vakuliŵavu ndipuso kusaniya likondwa. (Mateyu chaputala 5 mpaka 7) Chifukwa chakuti wachitanga vinthu mwachanju, kwenga kwambura kusuzga kuti ŵanthu amitundu yakupambanapambana, chinanga ndi wo akandirizikanga, amufikiyi ndipu aziŵanga kuti waŵalongongi chanju ndi ulemu. Yesu wazamukuŵa nadi Wakuwusa wamampha ukongwa!

Penga so nthowa inyaki yamampha ukongwa yo Yesu wasambiziyanga za Ufumu waku Chiuta. Iyu wanguchita vakuziziswa vinandi. Kumbi nchifukwa wuli wachitanga venivi? Tiyeni tiwoni.

​—⁠Nkhani iyi yatuliya m’buku la Mateyu, Marko, Luka ndi Yohane.

CHIUTA wangupaska nthazi Yesu zakuchita vinthu vo ŵanthu anyaki atingi afiskengi cha kuvichita. Yesu wachitanga vakuziziswa vinandi vikuluvikulu, ŵanthu anandi achiwona. Vakuziziswa venivi vingulongo kuti Yesu we ndi nthazi pa arwani ŵaki ndi masuzgu ngo ŵanthu ambula kufikapu atondeka kungamalisa. Tiyeni tiwoni vakuwoniyapu ivi.

Kusoŵa vakurya ndipuso vakumwa. Chakuziziswa chakwamba cho Yesu wanguchita chenga kusambuska maji kuja vinyu. Pa vakuchitika viŵi, iyu wanguryiska ŵanthu masauzandi nganandi mwakusambuska tiviŵandi timanavi ta mkate ndi somba. Pa vakuchitika vosi viŵi ivi, penga chakurya chakukwana weyosi.

Matenda. Yesu wachizganga “nthenda yose ndi unthomboru wose” pakati pa ŵanthu. (Mateyu 4:23) Iyu wachizganga ambula kuwona, ambula kuvwa, a makhati ndipuso a viziririsi. Wachizganga so akupunduka, amukwakwa ndipuso akupwetekeka. Pengavi matenda ngo watondekanga kungachizga.

Chimphepu chakofya. Pa nyengu yo Yesu ndi akusambira ŵaki ayambukanga Nyanja ya Galile kungwamba chimphepu. Akusambira ŵaki anguchita mantha. Yesu wanguyilelesa waka mphepu yo ndi kukamba kuti: “Chetama! Ja bata!” Pa nyengu yeniyo, mphepu yinguleka ndipu kunguŵa bata likulu. (Marko 4:​37-39) Pachakuchitika chinyaki, iyu wangwenda pa maji pa nyengu yo kwenga mphepu yakofya ukongwa.​—⁠Mateyu 14:​24-33.

Mizimu iheni. Mizimu yiheni ye ndi nthazi ukongwa kuluska ŵanthu. Ŵanthu anandi alivi nthazi zakuthaŵiya arwani aku Chiuta ŵenaŵa. Kweni kanandi asani Yesu wayikambiya mizimu yeniyi kuti ituwemu, iyu wayichitisanga kuti yiŵaleki ŵanthu wo yaŵasuzganga. Yesu wayiwopanga cha mizimu yiheni. M’malu mwaki yaziŵanga nthazi yo wenga nayu ndipu yamuwopanga.

Nyifwa. Mphakwenere nadi kuti nyifwa yidaniki kuti, “Wamawongu wakumaliya,” nyifwa ndi murwani ndipu palivi munthu weyosi yo wangayithereska. (1 Ŵakorinte 15:26) Kweni Yesu wayuskanga akufwa, wanguyuska mnyamata yo anyina ŵenga choko ndipu wanguyuska so msungwana yo apapi ŵaki ŵenga ndi chitima ukongwa. Pa chakuchitika chakuziŵika ukongwa, Yesu wanguyuska bwezi laki la pamtima Lazaro pawumba wa ŵanthu wo ŵenga ndi chitima chikulu, chinanga kuti Lazaro wangufwa kwa mazuŵa nganayi. Chinanga mbarwani chayiwu aku Yesu anguchitiya ukaboni wakuti iyu wanguchita nadi chakuziziswa ichi.​—⁠Yohane 11:​38-48; 12:​9-11.

Kumbi nchifukwa wuli Yesu wanguchita vakuziziswa vosi ivi? Chinanga kuti venga viyo, ŵanthu wosi wo Yesu wanguŵawovya akufwa. Kweni vakuziziswa vaki vingumaliya pa nyengu yeniyo pe cha. Valongonga kuti mauchimi ngosi ngakukwasana ndi muwusu wa Fumu ya Umesiya ngenga ndi pakwambiya paki. Palivi so kukayika kuti Fumu yakuŵikika ndi Chiuta yingamaliska nja, matenda, mphepu yakofya, mizimu iheni ndipuso nyifwa. Yesu wakulongo kali kuti Chiuta wakumupaska nthazi zakuchitiya vinthu vosi ivi.

​—⁠Nkhani iyi yatuliya mu buku la Mateyu, Marko, Luka ndi Yohane.

ŴE pa Phiri la Maolivete achiwona kutowa kwa Yerusalemu ndi kasopi waki, akutumika aku Yesu anayi angumufumba pakuyija vinthu vinyaki vo wangukambapu kali. Yapa ndipu Yesu wakamba kali kuti nyumba yakusopiyamu ya ku Yerusalemu yazamubwanganduka. Ndipuso pakwamba wanguŵakambiyapu kali za “kamaridu ka mugonezi wo.” (Mateyu 13:​40, 49) Akutumika angumufumba kuti: ‘Kumbi chisimikizgu cha kuza kwinu ndipuso cha umaliru wa mgonezu wunu nchinthu wuli?’​—⁠Mateyu 24:⁠3.

Pakumuka, Yesu wanguŵakambiya za vinthu vo vatingi vizichitikengi, Yerusalemu wechendabwangaduki. Kweni vo wangukamba Yesu vasazgangapu vinthu vo vatingi vizichitikengi kunthazi. Pavuli paki uchimi waki wazamufiskika ukongwa kunthazi pa charu chosi chapasi. Yesu wangukamba uchimi wo wasazgangapu vakuchitika va charu ndi mijalidu ya ŵanthu kuti ndivu vazamupanga chisimikizgu. Chisimikizgu cho chatingi chilongongi ŵanthu apacharu chapasi kuti kuza kwaku Yesu nge fumu kwayambaku. Ndipuso chatingi chilongongi kuti Yehova Chiuta waŵika Yesu kuja Fumu ya Umesiya yo yingulayizgika kwa nyengu yitali. Chisimikizgu cho chatingi chilongongi kuti Ufumu wenga pafupi kutuzgapu uheni ndi kuzisa chimangu ku mtundu wa ŵanthu. Mwaviyo, vinthu vo Yesu wangukambiya limu vatingi vilongongi kumala kwa mgonezu wakali, pa vakuchitika va visopa, ndali ndi vakuchitika va ŵanthu vo vichitika mazuŵa nganu ndipuso kwamba kwa mgonezu wufya.

Pakukonkhoska vo vazamuchitika pa charu chapasi pa nyengu ya kuza kwaki nge Fumu ya kuchanya, Yesu wangukamba kuti kwazamuja nkhondu za vyaru, kupereŵere kwa vakurya, vidiririsi ndipuso matenda. Kuleka kutumbika marangu kwazamuluta panthazi. Akusambira auneneska aku Yesu azamupharazga uthenga wamampha wa Ufumu waku Chiuta pa charu chosi chapasi. Vinthu vosi ivi vazamufika pakusuzga ukongwa pa “chisuzgu chikulu” cho chechendachitikepu kwamba kali.​—⁠Mateyu 24:⁠21.

Kumbi akulondo aku Yesu azamuziŵa wuli kuti chisuzgu chikulu chepafupi? Yesu wangukamba kuti: ‘Sambirani ku chimiti cha mkuyu.’ (Mateyu 24:32) Mo mani nga mkuyu ngawoneke ngalongo kuti nyengu ya chihanya ye pafupi. Mwakuyana waka, kuchitika kwa vinthu vosi vo Yesu wangukamba kulongo kuti umaliru we pafupi. Palivi munthu weyosi yo waziŵa zuŵa ndi nyengu chayiyu yo chisuzgu chikulu chiyambiyengi, kweni Ada pe ŵija. Mwaviyo, Yesu wanguchiska akusambira ŵaki kuti: “Cheŵani, khazgani ndi kuromba chifukwa kuti muziŵa cha kufika kwa nyengu yo.”​—⁠Marko 13:⁠33.

​—⁠Nkhani iyi yatuliya pa Mateyu chaputala 24 ndi 25; Marko chaputala 13; Luka chaputala 21.