Kumbi yimwi muziŵa Akaboni aku Yehova alinga? Anyaki mwaku isi mbazengezgani ŵinu, agwira namwi ntchitu pamwenga asambira namwi sukulu. Tanyaki, tikukambiskanapu namwi nkhani za m’Bayibolu. Kumbi Akaboni aku Yehova ndisi ayani, nanga ntchifukwa wuli tikambiskana pakweru ndi ŵanthu vo tigomezga?

Akaboni aku Yehova te ŵanthu nge yimwi. Tituliya mu mitundu yakupambanapambana ndipuso tichita vinthu vakupambanapambana. Anyaki aku isi kali tenga mu visopa vinyaki ndipu tanyaki tagomezganga cha kuti kwe Chiuta. Kweni techendaje Akaboni, tosi tingusaniya nyengu yakuwona mwakuphwere vo Bayibolu lisambiza. (Machitidu 17:11) Tikukoliyana ndi fundu zo tikusambira ndipu pavuli paki tikusankha kusopa Yehova Chiuta.

Tiyanduwa chifukwa chakusambira Bayibolu. Nge po viliri ndi munthu weyosi, nasiso tilimbana ndi masuzgu ndipuso vakufoka vidu. Kweni chifukwa chakugwiriskiya ntchitu fundu za m’Bayibolu zuŵa lelosi, tawona kusintha kukulu pa umoyu widu. (Sumu 128:1, 2) Ndichu chifukwa chaki tikambiyaku anyidu vinthu vamampha vo tisambira m’Bayibolu.

Tigwiriskiya ntchitu fundu zaku Chiuta pa umoyu widu. Fundu za m’Bayibolu, zititovya kuti tijengi umampha ndi anyidu, tiŵatumbikengi ndipuso tijengi akugomezgeka ndi alisungu. Fundu zenizi zititovya kuti tije ndi umoyu wamampha, tichitengi vinthu vakovya mu chigaŵa chidu, tichitengi vinthu mwakukoliyana m’banja ndipuso kuti m’banja muje mijalidu yamampha. Tiziŵa kuti Chiuta “walivi sankhu,” mwaviyo, te mu gulu la ubali wa pacharu chosi ndipu tichita vinthu mwakukoliyana kweniso tisankhana cha pamwenga kwambana chifukwa cha ndali. Chinanga kuti tiyanana ndi ŵanthu anyaki wosi, kweni te ŵanthu apade ukongwa.—Machitidu 4:13; 10:34, 35.

• Kumbi Akaboni aku Yehova ayanana wuli ndi ŵanthu anyaki wosi?

• Kumbi ndi fundu nizi zo Akaboni aku Yehova asambira m’Bayibolu?

Ŵanthu anandi agomezga kuti zina lakuti Akaboni aku Yehova, nda chisopa cho chayamba ŵaka sonu. Kweni kwa vyaka vakujumpha 2,700, ateŵeti aku Chiuta wauneneska, aziŵikanga so kuti ‘akaboni’ ŵaki. (Yesaya 43:10-12) Ndipu kufika mu chaka cha 1931, taziŵikanga ndi zina lakuti Akusambira Bayibolu. Nanga ntchifukwa wuli tikusankha zina lakuti Akaboni aku Yehova?

Liziŵikiska Chiuta widu. Mwakukoliyana ndi mabuku ngakali, zina laku Chiuta lakuti Yehova, lasanirikanga masauzandi nganandi m’Bayibolu. Mu Mabayibolu nganandi, zina lenili akulituzgamu ndipu akuŵikamu mazina ngaulemu nge ngakuti Ambuya pamwenga Chiuta. Chinanga kuti veviyo, Chiuta wauneneska wakujiziŵikiska kwaku Mosese mwakuzumbuwa zina laki lakuti Yehova po wangukamba kuti: “Ili ndi zina langu muyaya.” (Chituwa 3:15) Vo wanguchita, vikuchitiska kuti wajipatuwi ku achiuta wosi aboza. Te akukondwa ukongwa kuziŵika ndi zina lakupaturika laku Chiuta.

Lilongo ntchitu yidu. Mu nyengu yakali, ŵanthu anandi akugomezgeka kwambiya Abelu yo wenga munthu murunji, anguchitiya ukaboni kuti agomezganga Yehova. Vyaka vinandi vajumpha, Nowa, Abrahamu, Sara, Mosese, Davidi ndipuso ŵanthu anyaki angusazgika pa “mtambu ukulu wenuwu wa akaboni.” (Aheberi 11:4–12:1) Nge po munthu wangachitiya ukaboni munthu yo walivi mlandu mukhoti, nasiso titesesa kuti uneneska wakukwaskana ndi Chiuta widu uziŵiki.

Tiyezga Yesu. Bayibolu litimudana kuti “kaboni wakugomezgeka kweniso muneneska.” (Chivumbuzi 3:14) Yesu ‘wanguziŵisa zina laku Chiuta’ ndipu wangulutirizga ‘kupereka ukaboni’ wa uneneska wakukwaskana ndi Chiuta. (Yohane 17:26; 18:37) Akulondo auneneska aku Khristu, atenere kuziŵika ndi zina laku Yehova ndipuso kuliziŵikiska. Ivi ndivu Akaboni aku Yehova atesesa kuchita.

• Ntchifukwa wuli Akusambira Bayibolu angusankha zina lakuti Akaboni aku Yehova?

• Kumbi Yehova waja ndi akaboni pacharu chapasi kwa nyengu yitali wuli?

• Kumbi Kaboni mura waku Yehova ndi yani?

Bayibolu lingukambiya limu kuti pavuli pa kufwa kwaku Khristu, pakati pa Akhristu a munyengu ya akutumika pazamuja asambizi aboza ndipu azamutimbanyizga uneneska wa m’Bayibolu. (Machitidu 20:29, 30) Pati pajumpha nyengu, ivi vinguchitika nadi. Akhristu ŵenaŵa, asazganga vo Yesu wasambizanga ndi vo chasambizanga chisopa chaboza, ivi vinguchitiska kuti Chikhristu chaboza chiyambi. (2 Timote 4:3, 4) Kumbi mazuŵa nganu tingalongo wuli kuti tiziŵa uneneska wa vo Bayibolu lisambiza?

Nyengu yingukwana yakuti Yehova wavumbuwi uneneska. Yehova wangukambiya limu kuti ‘munyengu ya umaliru uneneska wazamuziŵika peposi.’ (Danyele 12:4) Mu chaka cha 1870, kagulu ka ŵanthu wo apenjanga uneneska kanguziŵa kuti visambizu va matchalitchi nganandi venga vakutuliya m’Bayibolu cha. Mwaviyo, yiwu angwamba kufufuza kuti aziŵi uneneska wa vo Bayibolu lisambiza ndipu Yehova wanguŵawovya kuti angaziŵi umampha malemba.

Ŵanthu wo akhumbisiskanga angusambira Bayibolu mwakuŵikiyapu mtima. Ŵanthu akwamba wo akhumbisiskanga kusambira Bayibolu, agwiriskiyanga ntchitu nthowa yo teche kuyigwiriskiya ntchitu mazuŵa nganu pakusambira. Yiwu akambiskananga nkhani za m’Bayibolu. Asani afika pa chigaŵa chakusuzga kuchivwisa, afufuzanga mu mavesi nganyaki kuti nkhani yo ayivwisi umampha. Asani awona kuti nkhani yo yikoliyana ndi Malemba ngosi, alembanga fundu zo asaniya. Mwakuchita viyo, azomerezganga kuti Bayibolu ndilu likonkhoski ndipu kuchita viyo kunguŵawovya kuti aziŵi uneneska wakukamba za zina laku Chiuta ndi Ufumu waki, khumbu laki ku ŵanthu ndi charu, vo vichitika asani munthu wafwa ndipuso chilindizga cha chiyuka. Kufufuza kwaviyo, kunguŵawovya kuti afwatuki ku midawuku ndi visambizu vaboza.—Yohane 8:31, 32.

Mu chaka cha 1879, Akusambira Bayibolu anguwona kuti nyengu yingukwana yakuti uneneska uziŵiki peposi. Mwaviyo, mu chaka chenicho, angwamba kutuzga magazini nga Chigongwi cha Alinda Chakupharazga Ufumu waku Yehova, magazini ngenanga ngeche kusindikizika mpaka sonu. Pasonu panu tipharazgiya ŵanthu uneneska wa m’Bayibolu muvyaru vakujumpha 240, mu vineneru vakujumpha 750. Uneneska wa m’Bayibolu wenuwu wafika peposi mazuŵa nganu kuruska kali.

• Khristu wati wafwa, ntchinthu wuli chinguchitika ndi uneneska wa m’Bayibolu?

• Kumbi ntchinthu wuli cho chatiwovya kuti tiziŵi so uneneska wa m’Bayibolu?

Kwa vyaka vinandi, Akaboni aku Yehova aja achigwiriskiya ntchitu, kusindikiza ndipuso kugaŵa Mabayibolu ngakupambanapambana. Chifukwa chakuti khumbu laku Chiuta ndakuti munthu weyosi wasambiri ‘uneneska mwakulondo,’ tinguwona kuti pakhumbikanga kufwatuliya Bayibolu lo lingawovya umampha ŵanthu. (1 Timote 2:3, 4) Mwaviyo, kwambiya mu chaka cha 1950 tingwamba kufwatuliya tivigaŵa ta Bayibolu lenili kuti ŵanthu alekengi kusuzgika kuvwa vo aŵerenga. Bayibolu lenili likufwatulika mwakugomezgeka ndipuso mwauneneska mu vineneru vakujumpha 130.

Pakhumbikanga Bayibolu lambula kusuzga kulivwisa. Chifukwa chakusintha kwa vineneru kwachitiska kuti Mabayibolu nganandi ngo ngalipu ngaje ndi mazu ngakusuzga kungavwisa. Kusanirika kwa mabuku ngakali ngo ngangufwatulika mwauneneska ndipuso ngo ngakoliyana ndi mabuku ngapakwamba, kwawovya ŵanthu kuti afwatuliyi mazu nga m’Bayibolu nga Chiheberi, Chiaramu ndi Chigiriki kwambula kusuzga.

Pakhumbikanga kuti mazu ngaku Chiuta ngafwatulikiyi mwakugomezgeka. M’malu mwakusintha mazu ngakukambirika ndi Chiuta, ŵanthu wo afwatuliya Bayibolu atenere kulifwatuliya mwakugomezgeka nge mo likulembeke. Kweni chinanga kuti veviyo, m’Mabayibolu nganandi zina laku Yehova akulituzgamu.

Pakhumbikanga Bayibolu lakuti litumbikengi yo Wakulilemba. (2 Samuele 23:2) Mu Bayibolu lasonu lenili, zina lakuti Yehova lawezgekiyamu mumalu ngo kali lasanirikanga. Mumabuku ngakali nga m’Bayibolu, zina ili lasanirikanga malu ngakukwana 7,000. (Sumu 83:18, NW) Chifukwa chakufufuza mwaphamphu kwa vyaka vinandi, Bayibolu lenili ndakukondwesa ukongwa kuliŵerenga chifukwa likonkhoska mwakuvwika umampha maŵanaŵanu ngaku Chiuta. Kaya Bayibolu lenilia mwe nalu mu chineneru chinu pamwenga mulivi, titikupemphani kuti muje ndi chiziŵirizga chakuŵerenga Mazu Ngaku Yehova zuŵa lelosi.—Yoswa 1:8; Sumu 1:2, 3.