Tilivi muliska yo walipirika ndalama mu gulu lidu. M’malu mwaki, nge po venge mu nyengu yo ungwambiya mpingu wachikhristu, ŵanthu akwenere aŵikika kuti aje ŵara ndi chilatu chakuti ‘aliski mpingu waku Chiuta.’ (Machitidu 20:28) Ŵara ŵenaŵa, ŵe pa ubwezi wakukho ndi chiuta, ndipu aliska ndi kulongozga mu mpingu ‘mwakuchichizgika cha, kweni mwakukhumbisiska, mwambunu cha, kweni ndi mtima wosi.’ (1 Peturo 5:1-3) Kumbi ndi ntchitu wuli yo ŵara agwira?

Atitiphwere ndi kutivikiliya. Ŵara apereka ulongozgi kutuliya m’Malemba ndipu atovya ŵanthu mumpingu kuti alutirizgi kuja pa ubwezi ndi Chiuta. Chifukwa chakuti aziŵa kuti Chiuta ndiyu waŵapaska ntchitu yakukhumbika yeniyi, ŵara akandirizga ŵanthu aku Chiuta cha kweni atiŵawovya kuti aje ndi umoyu wamampha ndipuso walikondwa. (2 Akorinto 1:24) Nge po mliska wachitiya phamphu kuti waphwere mbereri yeyosi pakuyija, ŵara atesesa kuziŵa munthu weyosi mumpingu.—Nthanthi 27:23.

Atitisambiza mo tingachitiya khumbu laku Chiuta. Sabata yeyosi, ŵara alongozga maunganu nga mpingu kuti tije ndi chivwanu chakukho. (Machitidu 15:32) Anthulumi akujipereka ŵenaŵa, alongozga so pa ntchitu yakupharazga, alutiya nasi pamoza mu upharazgi ndi kutisambiza nthowa zakupambanapambana za mo tingachitiya mu uteŵeti.

Achiska munthu weyosi pakuyija. Kuti ubwezi widu ndi Yehova uje wakukho, ŵara atitiyende munyumba zidu pamwenga kucheza nasi pa Nyumba ya Ufumu kuti atichiski ndi kutipembuzga kutuliya m’Malemba.—Yakobe 5:14, 15.

Kusazgiyapu pa ntchitu yo agwira mumpingu, ŵara anandi agwira so ntchitu zakulembeka kweniso ŵe ndi maudindu mu mabanja ngawu ngo ngakhumbika nyengu ndipuso chovyu chawu. Abali ŵenaŵa akhumbika kuŵatumbika chifukwa cha ntchitu yo agwira mwaphamphu.—1 Atesalonika 5:12, 13.

• Kumbi ndi ntchitu wuli yo ŵara agwira mumpingu?

• Kumbi ŵara alongo wuli kuti atanja munthu weyosi mumpingu?

Bayibolu likonkhoska magulu ngaŵi nga anthulumi achikhristu wo aja ndi maudindu mumpingu, nge ‘ŵara ndi ateŵeti akovya.’ (Afilipi 1:1) Kanandi mumpingu wewosi muja ŵara ndi ateŵeti akovya akukwana. Kumbi ndi ntchitu wuli yo ateŵeti akovya agwira?

Atovya wupu wa ŵara. Ateŵeti akovya ŵe pa ubwezi wakukho ndi Yehova, yiwu mbakugomezgeka kweniso mbakunozgeka kugwira ntchitu yawu chinanga kuti anyaki mbanyamata ndipu anyaki mbara mu vyaka. Ŵanthu ŵenaŵa, agwira ntchitu zakukhumbika ukongwa zo apaskika ndipuso zinyaki zo zitenere kuchitika pa mpingu. Ivi vitovya kuti ŵara aŵikengi maŵanaŵanu ngawu pakusambiza ndi kuphwere ŵanthu aku Chiuta.

Agwira ntchitu zakupambanapambana. Ateŵeti akovya anyaki apaskika ntchitu ya ukalindi kuti alondiyengi ŵanthu wo ŵaza pa maunganu. Anyaki agwira ntchitu ya maakaunti, pa vakukweze mazu, pakupereke mabuku ndipuso agaŵiya ŵanthu a mumpingu vigaŵa vakupharazgaku. Yiwu atovya so asani pe ntchitu yakunozga Nyumba ya Ufumu. Ŵara angaŵapempha kuti awovyi ŵanthu akukota. Ateŵeti akovya mbakunozgeka kugwira ntchitu yo apaskika ndipu titenere kuŵapaska ulemu chifukwa chakujipereka kwawu.—1 Timote 3:13.

Alongo chakuwoniyapu chamampha nge Akhristu. Ateŵeti akovya asankhika chifukwa cha mijalidu yawu yamampha yachikhristu. Asani akamba nkhani pa maunganu nga mpingu, atovya kuti tije ndi chivwanu chakukho. Asani apharazgiya nasi limoza atitovya kuti tije ndi phamphu. Chifukwa chakuchita vinthu mwakukoliyana ndi wupu wa ŵara, vitovya kuti mumpingu muje chimangu ndi likondwa. (Aefeso 4:16) Mukuluta kwa nyengu, nawuso angaziyenere kuteŵete nge ŵara.

• Kumbi ateŵeti akovya mbanthu a mtundu wuli?

• Kumbi ateŵeti akovya, atovya wuli kuti mpingu uyendengi umampha?

Malemba nga Chigiriki Ngachikhristu ngazumbuwa mwakuwerezgawerezga zaku Barnaba ndi wakutumika Paulo. Ŵanthu yaŵa ateŵetiyanga nge akuwonere madera pamwenga vigaŵa, yiwu ayendiyanga mipingu ya mu nyengu ya akutumika. Chifukwa wuli? Chifukwa chakuti afipiyanga mtima umoyu wa abali ŵawu achikhristu. Paulo wangukamba kuti wakhumbanga ‘kuweriyaku kuti wakachezi ndi abali’ kuti wakaŵawoni mo aliri. Iyu wenga wakunozgeka kwenda mtunda wa makilomita mahandiredi nganandi kuti wakaŵachiski. (Machitidu 15:36) Akuwonere madera nawu achita venivi mazuŵa nganu.

Atuza kuzitichiska. Wakuwonere dera weyosi watende mipingu pafufupi 20 pamwenga kujumpha, waja sabata yimoza pa mpingu wewosi ndipu pachaka watende mpingu kaŵi. Tingayanduwa ukongwa ndi vakukumana navu vawu ndipuso va awolu ŵawu asani mbakuto. Yiwu atesesa kuziŵana ndi achinyamata ndipuso ŵanthu ŵara mu vyaka kweniso mbakunozgeka kwenda nasi mu uteŵeti wakumunda ndi kuluta nasi ku masambiru ngidu nga Bayibolu. Abali ŵenaŵa achita maulendu nga uliska limoza ndi ŵara pa mpingu kuti atiwovyi kweniso akamba nkhani zakuchiska pa maunganu nga mpingu ndi pa maunganu ngakulungakulu.—Machitidu 15:35.

Atanja ŵanthu wosi. Akuwonere madera akondweseka ukongwa kuziŵa mo vinthu viliri pa mpingu. Yiwu akumana ndi ŵara ndipuso ateŵeti akovya kuti akambiskani nawu pa vo mpingu uchita umampha ndipuso kupereka masachizgu ngo ngangawovya pakugwira ntchitu zawu. Atovya so apayiniya kuti aluti panthazi ndipuso akondwa kuziŵana ndi ŵanthu wo ayamba ŵaka sonu kuwungana ndi mpingu kweniso asani atuvwa mo alutiya panthazi. Abali ŵenaŵa atijipereka ndi mtima wosi kugwira nasi ntchitu nge ‘ateŵeti anyidu.’ (2 Akorinto 8:23) Titenere kuyesesa kutole chivwanu chawu ndi kujipereka kwawu kwaku Chiuta.—Aheberi 13:7.

• Kumbi akuwonere madera ndi vigaŵa atende mipingu chifukwa wuli?

• Kumbi mungayanduwa wuli chifukwa chakuza kwawu pa mpingu?

Asani kwachitika masoka ngachilengedu, Akaboni aku Yehova anozga mwaliŵiliŵi chovyu kuti abali ŵawu achikhristu wo akwaskika ndi masuzgu ngo awovyeki. Phamphu la viyo, lilongo chanju chakutuliya pasi pa mtima cho te nachu pa anyidu. (Yohane 13:34, 35; 1 Yohane 3:17, 18) Kumbi titovya munthowa nizi?

Tipereka ndalama. Pa nyengu yo kwenga chilala ku Yuda, Akhristu a mu nyengu ya akutumika wo ŵenga ku Antioke, angutumiza ndalama kuti zikawovyi Akhristu anyawu ku Yuda. (Machitidu 11:27-30) Mwakuyanana ŵaka, asani tavwa kuti abali ŵidu muvigaŵa vinyaki akumana ndi masuzgu, titumiza chovyu kuziya mumpingu widu kuti chikawovyi ŵanthu wo akwaskika ndi masuzgu ngo.—2 Akorinto 8:13-15.

Titovya munthowa zakupambanapambana. Ŵara wo ŵe pamalu ngo pachitika soka lachilengedu, awonesesa kuti munthu weyosi wa mumpingu walipu ndipuso weumampha. Komiti yakupereka chovyu yiwonesesa kuti ŵanthu alonde chakurya, maji, vakuvwala, malu ngakugona ndipuso chovyu chakutuliya kuchipatala. Akaboni anandi wo aziŵa ntchitu zakupambanapambana atijipereka mwakugwiriskiya ntchitu ndalama zawu kuti akagwiri ntchitu yakovya ŵanthu wo akumana ndi masuzgu nge, kuŵanozge nyumba zakugonamu ndipuso Nyumba za Ufumu zo zanangika. Chifukwa chakuti tichita vinthu mwakukoliyana nge gulu ndipuso tiziŵa mo tingagwiriya ntchitu, vitovya kuti tichitengi vinthu mwaliŵi asani pachitika masoka. Chinanga kuti titovya ŵanthu wo ‘mbabali ŵidu mu chivwanu,’ kweni titovya so ŵanthu wo ŵe mu visopa vinyaki asani nkhwakukhumbika kuchita viyo.—Agalatiya 6:10.

Titiŵapembuzga ndi Malemba ndipuso kuŵawovya kuti akunthiyepu. Ŵanthu wo akumana ndi masoka ngachilengedu akhumbika kupembuzgika ukongwa. Pa nyengu ya viyo tisaniya nthazi kutuliya kwaku Yehova, “Chiuta wakupembuzga ukongwa.” (2 Akorinto 1:3, 4) Tikondwa kukambiya ŵanthu wo akumana ndi masuzgu za malayizgu ngo nge m’Bayibolu ndi kuŵasimikizgiya kuti pambula kuswera yapa, Ufumu waku Chiuta, wazamumaliska masuzgu ngosi ngo ngachitiska kuti tisuzgikengi.—Chivumbuzi 21:4.

• Ntchifukwa wuli Akaboni aku Yehova achitapu kanthu mwaliŵi asani kwachitika masoka ngachilengedu?

• Kumbi ndi uthenga wakupembuzga nuwu wo tingakambiskana ndi ŵanthu wo apozomoka masoka ngachilengedu?

Kwati kwaja nyengu yimanavi kuti Yesu wafwi, iyu wangudana akusambira ŵaki anayi, Petro, Yakobe, Yohane ndi Andreya ndipu wanguluta nawu pamphepeti kuchikambiskana nawu. Po Yesu waŵakonkhoskiyanga vo vazamuchitika mu mazuŵa ngakumaliya panyengu yo yiyu wazamuwusa kuchanya, yiyu wangufumba fumbu lakukhumbika ukongwa lakuti: “Kumbi ndiyani yo ndi kapolu wakugomezgeka ndi wazeru, yo mbuyaki wakumuŵika kuti wawoneriyengi a munyumba yaki ndi kuŵapaska chakurya chawu pa nyengu yakwenere?” (Mateyu 24:3, 45; Mariko 13:3, 4) Yesu wang’anamuwanga chakurya chayichu cha kweni wang’anamuwanga kusambira zaku Chiuta. Iyu wasimikizgiyanga akusambira ŵaki kuti nge ‘mbuyawu,’ wazamusankha ŵanthu wo azamuwovya akumulondo ŵaki kuti azilutirizgi kusambira zaku Chiuta pa nyengu ya umaliru. Kumbi mbayani wo atingi amiyengi muŵanda mwenuyu?

Yiwu mbakulondo Yesu wo akupakika nadi ndi mzimu utuŵa. “Kapolu” wapereka chakurya chauzimu panyengu yaki kwa Akhristu kuti alutirizgi kuja pa ubwezi wakukho ndi Yehova. Isi tigomezga muŵanda mwenuyu kuti walutirizgengi kutipaska “waŵapaskengi chakurya chakukwana pa nyengu yakwenere.”—Luka 12:42.

Yiwu awonere nyumba yaku Chiuta. (1 Timote 3:15) Yesu wakupaska muŵanda udindu ukulu mu gulu laku Yehova, wakuwonere ntchitu zo zichitika pacharu chapasi, nge kuwonere vinthu vakukwaskana ndi Ufumu vo ateŵeti aku Chiuta agwiriskiya ntchitu pacharu chapasi, kulongozga ntchitu yakupharazga ndipuso kutisambiza kuporote mumipingu yidu. Kuporote munthowa zenizi, kapolu wakugomezgeka ndi wazeru watitipaska vinthu vo tikhumbikiya ndipuso pa nyengu yo titivikhumba, yiyu wapereka mabuku ngo tigwiriskiya ntchitu mu uteŵeti kweniso nkhani zo tisambira pa mawunganu ngidu nga mpingu ndipuso ngakulungakulu.

Kapolo ngwakugomezgeka ku uneneska wa m’Bayibolu kweniso pa ntchitu yakupharazga uthenga wamampha ndipu kapolu mwenuyu waphwere mwazeru vinthu vaku Khristu vo ve pacharu chapasi. (Machitidu 10:42) Yehova wawovya ŵanthu anandi kuti aje akaboni ŵaki ndipu watovya kapolu wakugomezgeka ndi wazeru kupereka vinthu vinandi vo vititiwovya kuja paubwezi ndi Chiuta.—Yesaya 60:22; 65:13.

• Kumbi ndiyani yo wakusankhika ndi Yesu kuti wapaskengi akusambira ŵaki chakurya panyengu yaki?

• Kumbi kapolu ngwakugomezgeka ndipuso ngwazeru mu nthowa wuli?

Mu nyengu ya akutumika, kagulu ka ‘akutumika ndi ŵara ku Yerusalemu’ ateŵetiyanga nge wupu wakulongozga pakupanga vakusankha vakukhumbika m’malu mwa Akhristu akusankhika wosi. (Machitidu 15:2) Yiwu akoliyananga pa vo asankhanga chifukwa alondonga vo malemba ngakamba ndipu azomeranga kulongozgeka ndi mzimu waku Chiuta. (Machitidu 15:25) Nthowa yeniyi ndiyu yigwiriskikiya ntchitu mazuŵa nganu.

Ugwiriskikiya ntchitu ndi Chiuta pakuchita khumbu laki. Abali akusankhika wo ateŵete mu Wupu Wakulongozga, afufuza Mazu Ngaku Chiuta mwakuphwere ndipu aziŵa umampha mo angayendese ntchitu yidu ndipuso mo angamukiya mafumbu ngakukwaskana ndi nkhani za chisopa. Yiwu akumana sabata yeyosi kuti akambiskani mo angawovye abali pacharu chosi chapasi. Nge mo venge mu nyengu ya akutumika, nasiso tipaskika ulongozgi wa m’Bayibolu kuziya m’makalata pamwenga akuwonere madera, vigaŵa kweniso munthowa zinyaki. Ivi vitovya kuti ŵanthu aku Chiuta achitengi vinthu mwakukoliyana. (Machitidu 16:4, 5) Wupu Wakulongozga uwonere vinthu vosi vo vititiwovya kuti tilutirizgi kuja pa ubwezi wakukho ndi Chiuta, uchiska ŵanthu wosi kuti aŵikengi ntchitu yakupharazga Ufumu panthazi kweniso uwonere ntchitu yakuŵika abali pa maudindu.

Ngwakunozgeka kulongozgeka ndi mzimu waku Chiuta. Wupu Wakulongozga ulereska kwaku Yehova, yo Wawusa Chilengedu Chosi ndipuso Yesu, yo ndi Mutu wa mpingu kuti aŵalongozgi. (1 Akorinto 11:3; Aefeso 5:23) Ŵanthu wo ŵe mu Wupu Wakulongozga atijiwona kuti ndiwu cha alongozga ŵanthu aku Chiuta. Yiwu pamoza ndi Akhristu wosi akusankhika “alutirizga kulondo Mwanawambereri kwekosi ko waluta.” (Chivumbuzi 14:4) Abali wo ŵe mu Wupu Wakulongozga, awonga ukongwa asani titiŵarombe pa ntchitu yo agwira.

• Kumbi mbayani wo ŵenga mu wupu wakulongozga mu nyengu ya akutumika?

• Kumbi Wupu Wakulongozga mazuŵa nganu usaniya wuli ulongozgi waku Chiuta?

Beteli ndi mazu nga Chiheberi ngo ngang’anamuwa kuti “Nyumba yaku Chiuta.” (Chiyambo 28:17, 19) Ma ofesi nga nthambi nga Akaboni aku Yehova ngo nge muvyaru vakupambanapambana pacharu chapasi, ngo ngatovya pakulongozga ntchitu yakupharazga ngakwenere kudanika zina lenili. Wupu Wakulongozga uteŵete ku likuru la pacharu chosi lo le ku America, ndipu kutuliya kweniko, wupu wenuwu uwonere ntchitu zo zichitika mu maofesi ngosi nga nthambi. Ŵanthu wo ateŵete mu maofesi nga nthambi, adanika kuti banja la Beteli. Nge banja, yiwu aja, agwira ntchitu, kurya ndi kusambira Bayibolu pamoza ndipuso mwakukoliyana.—Sumu 133:1.

Ŵanthu wo agwira ntchitu pa Beteli mbakujipereka. Pa Beteli yeyosi pe anthulumi ndi anthikazi achikhristu wo atijipereka pakuchita khumbu laku Chiuta ndi kugwira ntchitu ya Ufumu nyengu zosi. (Mateyu 6:33) Yiwu alonde malipiru cha kweni weyosi wapaskika chipinda chakugonamu, chakurya ndipuso ndalama zimanavi kuti zimuwovyengi pa vinthu vo wakhumba. Munthu weyosi yo we pa Beteli we ndi ntchitu yo wagwira, kaya ndi mu ofesi, ku khichini pamwenga muchipinda chakuryiya. Anyaki agwira ntchitu kumalu ngakusindikiziya mabuku, anozga munyumba, achapa vakuvwala, anozga vinthu vo vanangika ndipuso ntchitu zinyaki.

Ndi malu ngo ngatovya kulutisa panthazi ntchitu yakupharazga Ufumu. Ntchitu yikulu ukongwa pa Beteli nkhuwovya kuti uneneska wa m’Bayibolu ufikiyi ŵanthu anandi. Kabuku yaka ntchakuwoniyapu chimoza cha ntchitu zo zigwirika pa Beteli. Ndipu kakulembeka pasi pa ulongozgi wa Wupu Wakulongozga ndi kutumizika kuziya pa Intaneti kuluta ku magulu nganandi nga ŵanthu wo agwira ntchitu yakufwatuliya pacharu chosi. Pavuli paki kakusindikizika pa makina ngo ngasindikiza mabuku mwaliŵi ukongwa, ndipu makina yanga nge mu maofesi nga nthambi ngo ngagwira ntchitu yakusindikiza mabuku ndi kutumiza ku mipingu yakujumpha 110,000. Pa ntchitu zosi zo zichitika, banja la Beteli litovya ukongwa pa ntchitu yakukhumbika mwaliŵi kuluska ntchitu zosi, yakupharazga uthenga wamampha.—Mariko 13:10.

• Kumbi mbayani wo ateŵete pa Beteli, nanga ndi vinthu wuli vo apaskika?

• Kumbi banja la Beteli lelosi litovya pa ntchitu yakukhumbika ukongwa niyi?

Ŵanthu wo aja pa Beteli agwira ntchitu mu madipatimenti ngakupambanapambana pakovya ntchitu yakupharazga muvyaru vinandi. Anyaki agwira ntchitu yakufwatuliya, kusindikiza magazini, kupanga mabuku ndi mavidiyo, kugwira ntchitu munyumba yakusungiyamu mabuku pamwenga kuphwere nkhani zinyaki za m’chigaŵa cho.

Komiti ya Nthambi ndiyu yiwonere ntchitu zenizi. Wupu Wakulongozga, ukupereka mazaza pa nthambi yeyosi ku Komiti ya Nthambi yo yipangika ndi abali atatu akwenere pamwenga kujumpha. Komiti ya nthambi yeyosi, yiziŵiska Wupu Wakulongozga mo ntchitu yitende m’charu chawu ndipuso masuzgu ngo akumana nangu. Malipoti ngaviyo, ngatovya Wupu Wakulongozga kusankha nkhani zo zingalembeka mu mabuku ndipuso zo zingasambirika pa maunganu nga mpingu ndi maunganu ngakulungakulu. Ŵanthu wo amiya Wupu Wakulongozga atumizgika pafupipafupi kuti akayende nthambi ndi kupereka ulongozgi ku Komiti ya Nthambi wa mo yingagwiriya ntchitu yaki. (Nthanthi 11:14) Pa nyengu iyi, anozga unganu wapade wo wakumiya likulu la Akaboni aku Yehova wakamba nkhani kuti yichiski ŵanthu a m’charu cho.

Kovya mipingu. Abali akwenere wo ateŵete pa nthambi ndiwu azomerezga kuti mipingu yipangiki. Abali ŵenaŵa, alongozga so ntchitu yo yichitika ndi apayiniya, amishonale ndipuso akuwonere madera wo ateŵete m’charu chenicho. Yiwu anozga maunganu ngakulungakulu, kuwonere ntchitu yakumanga Nyumba za Ufumu ndipuso awonesesa kuti mabuku ngo mipingu yadanisa ngatumizika. ntchitu yeyosi yo yichitika pa ofesi ya nthambi yitovya kuti ntchitu yakupharazga yifiskiki.—1 Akorinto 14:33, 40.

• Kumbi Komiti ya Nthambi yitovya wuli Wupu Wakulongozga?

• Kumbi ndi ntchitu wuli zo zichitika pa ofesi ya nthambi?

Kuti tiyesesi kupharazga ‘uthenga wamampha’ ku “ku mtundu wewosi, fuku lelosi, lilimi lelosi ndipuso ku ŵanthu wosi,” tituzga mabuku mu vineneru vakujumpha 750. (Chivumbuzi 14:6) Kumbi tifiska wuli kuchita ntchitu yakusuzga yeniyi? Tifiska ndi chovyu cha abali a muvyaru vakupambanapambana wo alemba mabuku ndipuso abali ndi azichi akujipereka wo agwira ntchitu yakufwatuliya. Ŵanthu wosi yaŵa mbakaboni aku Yehova.

Nkhani zilembeka mu Chingelezi. Wupu Wakulongozga uwonere ntchitu yo yichitika mu Dipatimenti Yakulemba Mabuku yo ye ku likulu lidu lapacharu chosi chapasi. Dipatimenti yeniyi yipereka ntchitu yakulemba ku ŵanthu wo ŵe ku likulu lapacharu chosi la Akaboni aku Yehova ndipuso wo ŵe mumaofesi nganyaki nga nthambi wo agwira ntchitu mu Dipatimenti yeniyi. Kuja ndi ŵanthu anandi wo agwira ntchitu yakulemba, kutitiwovya kuti tilembengi nkhani zo zikwaska ŵanthu a midawuku yakupambanapambana, zo zichitiska kuti mabuku ngidu ngawovyengi ŵanthu pacharu chosi.

Nkhani zo zitumizika kwa akufwatuliya. Asani nkhani zalembeka ndi kuzomerezgeka, atizitumizga kuziya pa Intaneti kuluta ku ŵanthu wo afwatuliya pacharu chosi chapasi. Asani amala kufwatuliya, atiziŵerenga kuti awoni asani afwatuliya umampha. Ŵanthu wo afwatuliya, atesesa kuti alembi “mazu ngauneneska” mu nkhani yo afwatuliya ndipuso ngatenere kukoliyana ndi fundu zo ze ku Chingelezi.—Wakutaula 12:10.

Makompyuta ngatovya kuti ntchitu yigwiriki mwaliŵi. Chinanga kuti makompyuta ngangasere cha m’malu mwa ŵanthu wo alemba ndi kufwatuliya, kweni ntchitu yawu yitenda liŵi chifukwa cha madikishonare ndipuso nthowa zinyaki zo zitovya pakufufuza zo zisanirika pa kompyuta. Akaboni aku Yehova akupanga pulogilamu yeniyo yiwovya kuti nkhani za vineneru vakupambanapambana ndipuso vithuzi va nkhani zo, viŵikikengi vija m’malu mwaki ndi kutumizika kuti akasindikizi.—Multilanguage Electronic Publishing System (MEPS)

Ntchifukwa wuli tiŵikiyapu mtima chinanga mpha vineneru vo vikambika ndi ŵanthu masawuzandi ngamanavi? Chifukwa chakuti Yehova wakhumba kuti “ŵanthu amitundu yosi ataskiki kweniso awuziŵi umampha uneneska.”—1 Timote 2:3, 4.

• Kumbi mabuku ngidu ngapangika wuli?

• Ntchifukwa wuli tifwatuliya mabuku ngidu mu vineneru vinandi?

Gulu lidu lipharazga ndipuso ligaŵa Mabayibolu ndi mabuku nganandi chaka chechosi kwambula kulipirisa. Timanga ndi kunozga Nyumba za Ufumu ndipuso maofesi nga nthambi. Titovya ŵanthu anandi wo agwira ntchitu pa Beteli, amishonale ndipuso wo asuzgika chifukwa cha masoka ngachilengedu. Panyaki mungajifumba kuti, ‘Kumbi ndalama zakwendese ntchitu yosi iyi zituwa pani?’

Tilipirisa cha pamwenga kwendesa mbali. Chinanga kuti ndalama zo zikhumbika zinandi kuti ntchitu yidu yiluti panthazi kweni tichita kupempheska cha. Kwa vyaka 100 vajumpha, magazini yachiŵi ya Chigongwi cha Alinda yingukamba kuti, tigomezga kuti Yehova ndiyu watitiwovya ndipu “tipemphesengepu cha kuti ŵanthu atiwovyi ndipu techendachitepu kalusu kenaka.”—Mateyu 10:8.

Ntchitu yidu yitovyeka ndi vakupereka vawanangwa. Ŵanthu anandi awonga ntchitu yidu yakusambiza Bayibolu ndipu apereka ndalama kuti ziwovyi pa ntchitu yeniyi. Akaboni nawu apereka mwalikondwa nyengu, nthazi, ndalama ndi vinthu vinyaki kuti viwovyi pa ntchitu yakuchita khumbu laku Chiuta pacharu chosi chapasi. (1 Mikoka 29:9) Pa Nyumba ya Ufumu, pe mabokosi nga vakupereka ngo ŵanthu aponyamu ndalama zawu mwakukhumba ŵija. Ndalama zinandi zo ziperekeka zituliya ku ŵanthu asauchi nge po wenge munthukazi musauchi yo Yesu wangukamba vamampha vaku iyu kuti, wanguponyamu timatambala tiŵi mu bokosi lo lenga mu nyumba yakusopiyamu. (Luka 21:1-4) Mwaviyo, munthu weyosi “waŵikengi pamphepeti kanthu kanyaki” kuti wapereki “nge mo wasimikiziya mumtima mwaki.”—1 Akorinto 16:2; 2 Akorinto 9:7.

Te ndi chigomezgu chosi kuti Yehova walutirizgengi kuchiska ŵanthu wo akhumba ‘kumutumbika ndi chuma chawu’ pakovya ntchitu ya Ufumu kuti khumbu laki lifiskiki.—Nthanthi 3:9.

• Ntchinthu wuli cho chichitiska kuti gulu lidu lije lakupambana ndi visopa vinyaki?

• Kumbi vakupereka vawanangwa vigwiriskikiya ntchitu wuli?

Nyumba zo tisopiyamu zidanika kuti Nyumba za Ufumu chifukwa chakuti munyumba zenizi, tisambiriyamu fundu za m’Bayibolu zo zikonkhoska Ufumu waku Chiuta, wo wenga mutu wa uteŵeti waku Yesu.—Luka 8:1.

Ndi malu ngo pachitikiya kusopa kwauneneska muchigaŵa chidu. Asani tiluta kuchipharazga uthenga wa Ufumu tinozgeke pa malu ngenanga. (Mateyu 24:14) Nyumba za Ufumu zipambanapambana kukuwa kwaki ndi mo atizizenge kweni zosi zizengeka umampha ndipu kanandi Nyumba ya Ufumu yimoza yigwiriskikiya ntchitu ndi mipingu yinandi. Mu vyaka va pambula kuswera yapa, tazenga Nyumba za Ufumu masawuzandi nganandi [Nyumba za Ufumu 5 pa zuŵa, pa avareji] chifukwa cha unandi wa apharazgi mumipingu. Kumbi ivi vichitika wuli?—Mateyu 19:26.

Zizengeka ndi ndalama zo ziperekeka pa ntchitu yakumanga Nyumba za Ufumu. Ndalama zo ziponyeka mumabokosi, zitumizgika ku ofesi ya nthambi kuti zikagwiri ntchitu ku mpingu ya kuzenga Nyumba ya Ufumu kwambula kulipirisa ndalama zapachanya.

Zizengeka ndi ŵanthu akupambanapambana wo atijipereka kwambula kulipirika. Muvyaru vinandi, mwe Magulu Ngakuzenga Nyumba za Ufumu. Magulu ngenanga, ngaluta ku mipingu yakupambanapambana m’charu chenicho ndipuso kumadera ngakutali kuchigwira ntchitu yakuzenga ndi kusambiza abali akudera lenilo mo angagwiriya ntchitu yo. Muvyaru vinyaki, abali ndi azichi achakuwoniyapu chamampha apempheka kuti awoneriyengi ntchitu yakuzenga ndi kunozga Nyumba za Ufumu muchigaŵa cho apaskika. Ŵara wo atiyiziŵa umampha ntchitu yakuzenga agwira nawu ntchitu yo kweniso alongozga mipingu pa ntchitu yosi yo yigwirika ndipu pajaso abali anyaki wo atijipereka kugwira nawu ntchitu yo. Abali anandi a pa mpingu po pazengeka Nyumba ya Ufumu, atijipereka kuti agwiri ntchitu yeyosi yo angapaskika. Mzimu waku Yehova ndi kujipereka kwa ŵanthu ŵaki ndiku kuchitiska kuti ntchitu yeniyi yiyendengi umampha.—Sumu 127:1; Akolose 3:23.

• Ntchifukwa wuli nyumba zo tisopiyamu zidanika kuti Nyumba za Ufumu?

• Kumbi ntchinthu wuli cho chitovya kuti Nyumba za Ufumu zizengeki pacharu chosi chapasi?

Nyumba ya Ufumu yeyosi ya Akaboni aku Yehova yiziŵika ndi zina lituŵa laku Chiuta. Mwaviyo, kugwira nawu ntchitu zo zingachitiska kuti Nyumba ya Ufumu yiwonekengi umampha ndipuso yakukho ndi mwaŵi kweniso ntchigaŵa chakukhumbika ukongwa chakusopa kwidu kwakupaturika. Weyosi we ndi mwaŵi wakuchita nawu ntchitu yeniyi.

Asani mwamala maunganu jiperekeni kunozga Nyumba ya Ufumu. Asani maunganu nga mpingu ngamala, abali ndi azichi apeya mu Nyumba ya Ufumu kwambula kuchichizgika. Ndipu ntchitu yakutowesa Nyumba yosi ya Ufumu yichitika kamoza pa sabata. Mura pamwenga muteŵeti wakovya, wagaŵa ntchitu zo zitenere kugwirika. Mwakukoliyana ndi ntchitu zo zilipu, abali ndi azichi atijipereka kugwira ntchitu yakupeya, kukolopa, kutuzga mtatavu, kupuputa mawindu, kuŵika mipandu umampha, kunozga ku vimbuzi ndi kupupa uteka pamwenga kupeya pabwalu pa Nyumba ya Ufumu. Chaka chechosi asankha so zuŵa lakunozga Nyumba yosi ya Ufumu. Asani tigwira ntchitu pamoza ndi ŵana ŵidu, titiŵasambiza kuti atumbikengi malu ngo tisopiyapu.—Wakutaula 5:1.

Jiperekeni kuti mugwiri ntchitu yakunozga Nyumba ya Ufumu. Chaka chechosi paja ntchitu yakwende Nyumba ya Ufumu. Ntchitu yeniyi, yitovya kuti Nyumba ya Ufumu ayinozgengi mo mwanangika kuti yijengi yakukho ndipuso kuti aleki kuzinanga ndalama zinandi asani ayilekere. (2 Mikoka 24:13; 34:10) Nyumba ya Ufumu yo yiwoneka umampha, yija malu ngakwenere ngakusopiyamu Chiuta widu. Asani tichita nawu ntchitu yeniyi, tilongo kuti titanja Yehova ndi malu ngidu ngakusopiyapu. (Sumu 122:1) Ivi vitovya so kuti ŵanthu a m’chigaŵa chidu angawonengi mwakwenere malu ngakusopiyapu.—2 Akorinto 6:3.

• Ntchifukwa wuli titenere kuphwere malu ngidu ngakusopiyapu?

• Kumbi ndi vinthu wuli vo vichitika kuti Nyumba ya Ufumu yiwonekengi umampha?

Kumbi mukhumba kufufuza nkhani zinyaki kuti muliziŵi umampha Bayibolu? Kumbi mukhumba kulivwisa umampha lemba linyaki, kuziŵa vakukwaskana ndi munthu, malu pamwenga fundu yinyaki yo yikuzumbulika m’Bayibolu? Kumbi mukuŵanaŵanapu kuti Mazu ngaku Chiuta ngangakuwovyani pa suzgu lo mwenalu? Asani ndi viyo, kafufuzeni fundu zo mukhumba kuziziŵa pa layibulale yo ye pa Nyumba ya Ufumu.

Pasanirika mabuku ngo ngatovya pa kufufuza. Vingachitika kuti mulivi mabuku ngosi nga Akaboni aku Yehova ngo ngakonkhoska Bayibolu mu chineneru chinu. Kweni pa layibulale yo ye pa Nyumba ya Ufumu pangasanirika mabuku nganandi ngasonu. Pangasanirika so mabuku ngakupambanapambana ndi madikishonale ngo ngangakuwovyani kusaniya vinthu vo mufufuza. Mungafufuza mabuku ngo mupenja pa layibulale mwechendayambi pamwenga asani mwamaliza maunganu. Asani mwe ndi kompyuta mu Nyumba ya Ufumu yinu, mungasaniyamu Layibulare ya pa kompyuta. Iyi ndi pulogilamu ya pa kompyuta yo musanirika mabuku ngidu nganandi ndipu njambula kusuzga asani mukhumba kufufuza nkhani pamwenga malemba.

Njakovya ku ŵanthu wo akulembesa mu Sukulu ya Unganu wa Umoyu Wachikhristu Ndipuso Uteŵeti. Asani mukulembesa mu sukulu, mungagwiriskiya ntchitu mabuku ngo nge pa layibulale yo ye mu Nyumba ya Ufumu asani munozgeke nkhani yinu. Wakuwonere Unganu wa Umoyu Wachikhristu Ndipuso Uteŵeti ndiyu wawonere layibulale yeniyi. Iyu ndiyu wawonesesa kuti mabuku ngasonu ngalipu ndipuso kuti ngaŵikika umampha. Iyu pamwenga munthu yo watikusambizani Bayibolu wangakulongoni mo mungasaniriya fundu zo mukhumba. Kweni mutenere cha kuto mabuku ngo nge pa layibulale yeniyi. Asani muŵerenga mungalembangamu cha mukati, ivi viwovyengi kuti mabuku ngo ngawonekengi umampha.

Bayibolu likamba kuti asani tikhumba ‘kusaniya zeru zaku Chiuta’ titenere kuyesesa kufufuza ‘nge chuma chakubisika.’ (Nthanthi 2:1-5) Layibulale yo ye mu Nyumba ya Ufumu yingakuwovyani kuti muyambi kufufuza vinthu vo mupenja.

• Kumbi ndi vinthu wuli vo visanirika mu Nyumba ya Ufumu, vo vingakuwovyani asani mukhumba kufufuza nkhani?

• Kumbi ndi yani yo wangakuwovyani kuti mugwiriskiyengi ntchitu umampha layibulale?

Yesu Khristu wangukambiya akumulondo ŵaki kuti: “Mwakuyanana ŵaka, longoni ukweru winu ku ŵanthu wosi kuti awoni ntchitu zinu zamampha ndi kuti akankhuski Awusemwi wo ŵe kuchanya.” (Mateyu 5:16) Kuti tifiski kuchita venivi, tigwiriskiya ntchitu vipangizu va mazuŵa nganu vo visazgapu Intaneti. Webusayiti yidu ya www.pr418.com/tog njakuzomerezgeka ndipu mungasaniyapu vo tigomezga ndipuso vo tichita. Kumbi pa webusayiti yeniyi pasanirika vinthu wuli?

Kwamuka kwa m’Bayibolu pa mafumbu ngo ngafumbika kanandi. Mungasaniya kwamuka kwa mafumbu nganandi ngo ŵanthu afumba. Mwakuyeruzgiyapu, kapepala kakuti Kumbi Masuzgu Ngamalengi? ndi kakuti Kumbi Akufwa Angaja so ndi Umoyu? tisanirika pa intaneti mu vineneru vakujumpha 600. Mungasaniya so Bayibolu la Charu Chifya mu vineneru vakujumpha 130 ndi mabuku nganyaki ngakusambiriya Bayibolu kusazgapu buku lakuti, Kumbi Tingasambiranji m’Bayibolu? ndipuso magazini ngasonu nga Chigongwi cha Alinda ndi Jani Masu! Mungaŵerenga mabuku ngenanga pa intaneti kweniso kungakopa kuti mukavwisiyi pamwenga kuŵerenga pamapepala. Mungasindikiza mabuku ngenanga mu vineneru vakupambanapambana kuti mukagaŵiyeku ŵanthu wo angakondweseka nangu. Pe so mavidiyo ngo ngasanirika so mu vineneru vinandi va manja. Mungakopa maseŵeru nga mazu pe, maseŵeru nga nkhani za m’Bayibolu za ŵanthu a mu nyengu yakali ndipuso sumu kuti mukavwisiyengi pa nyengu yo mupumuwa.

Fundu Zakukhumbika Zakukwaskana ndi Akaboni aku Yehova. Pa webusayiti yeniyi pasanirika nkhani zo zachitika ŵaka sonu, mavidiyo ngakukwaskana ndi ntchitu yidu yakupharazga yapacharu chosi, nkhani zo zikwaska Akaboni aku Yehova ndipuso ntchitu yidu yakovya ko kwachitika masoka ngachilengedu. Mungasaniyapuso fundu zakukwaskana ndi maunganu ngachigaŵa ngo ngazamuchitika kunthazi kweniso ma webusayiti nga maofesi ngidu nga nthambi.

Mwakugwiriskiya ntchitu nthowa zenizi, tiŵaliska ukweru wa uneneska kuvigaŵa vakutali va charu chapasi. Ŵanthu akutuliya mu vyaru vakupambanapambana kusazgapu ku Antarctica ayanduwa. Ndi pempheru lidu kuti ‘mazu ngaku Yehova ngalutirizgi kuluta panthazi mwaliŵi’ pacharu chosi chapasi kuti Chiuta wakankhuskiki.—2 Atesalonika 3:1.

• Kumbi webusayiti ya www.pr418.com/tog yawovya wuli ŵanthu anandi kuti asambiri uneneska wa m’Bayibolu?

• Kumbi ndi vinthu wuli vo mukhumba kufufuza pa webusayiti yidu ya jw.org?