Ŵanthu anandi aleka kuluta ku matchalitchi chifukwa chakuti palivi yo watiŵawovya kusaniya kwamuka kwa mafumbu ngakukhumbika ngo atuŵa nangu pa umoyu wawu. Nanga ntchifukwa wuli mutenere kuzivwisiyaku maunganu ngachikhristu ngo ngachitika ndi Akaboni aku Yehova? Kumbi ndi vinthu wuli vo mwamusaniya pa maunganu ngenanga?

Mwamusaniya likondwa chifukwa chakuja pamoza ndi ŵanthu wo atanjana. Mu nyengu ya akutumika, Akhristu angugaŵika mu magulu ndipu achitanga maunganu kuti asopi Chiuta, asambiri Malemba ndipuso kuti achiskani. (Aheberi 10:24, 25) Chifukwa cha chimangu cho chengapu pa maunganu ngenanga, awonanga kuti ŵenga pakati pa abali ndi azichi ŵawu achikhristu. (2 Atesalonika 1:3; 3 Yohane 14) Nasiso tilondo chakuwoniyapu chawu ndipu tisaniya likondwa.

Umampha wakuziŵa mo tingagwiriskiya ntchitu fundu za m’Bayibolu. Nge mo venge m’nyengu yakali, anthulumi, anthikazi ndipuso ŵana wosi awungananga pamoza. Mazuŵa nganu pe so asambizi akwenere wo agwiriskiya ntchitu Bayibolu kuti atiwovyi mo tingagwiriskiya ntchitu fundu za m’Malemba pa umoyu widu wa zuŵa ndi zuŵa. (Marangu 31:12; Nehemiya 8:8) Tosi tingamuka asani ndi nkhani yakukambiskana ndipuso kumba sumu kuti tilongo chigomezgu chidu.—Aheberi 10:23.

Vitumbiku vo vituza chifukwa chakuja ndi chigomezgu chakukho mwaku Chiuta. Wakutumika Paulo wangukambiya mpingu umoza wa m’nyengu yaki kuti: “Ndikhumbisiska kukuwonani, . . . pamwenga kuti tizichiskani mu chivwanu, chinu ndi changu.” (Aroma 1:11, 12) Asani tiwungana chigomezgu chidu chija chakukho chifukwa tikumana ndi Akhristu anyidu nyengu zosi ndipuso tiyesesa kuja ndi umoyu wachikhristu.

Wuli kuti muyesesi kusanirika pa maunganu ngidu kuti muzijiwone mwija vinthu vo takamba? Mwazamulondereka ndi manja ngaŵi. Maunganu ngosi ngawezi, palivi mbali ya vakupereka.

• Kumbi maunganu ngachikhristu ngo tichita ngakwamba wuli?

• Kumbi tingayanduwa wuli asani tisanirika pa maunganu ngachikhristu?

Chinanga kuti tingayenda mwakusuzgikiya kuti tifiki ku maunganu, titesesa kusanirika pa maunganu ngachikhristu nyengu zosi. Chinanga kuti tikumana ndi masuzgu ndipuso tivuka pavuli pakuti tagwira ntchitu zuŵa losi, ntchifukwa wuli titesesa kuti tiwunganengi pamoza ndi Akhristu anyidu?

Kutitiwovya kuti tijengi ndi umoyu wamampha. Pakukamba za ŵanthu wo tiwungana nawu mu mpingu, Paulo wangukamba kuti: “Tiŵanaŵaniyanengi.” (Aheberi 10:24) Mazu yanga ngang’anamuwa “kuŵanaŵaniyana mwakuphwere” pamwenga kuziŵana umampha. Mwaviyo, mazu ngaku Paulo ngatitichiska kuti tiŵanaŵaniyengi anyidu. Asani taziŵana umampha ndi mabanja nganyaki ngachikhristu tiwonengi kuti mabanja nganyaki ngakumananga ndi masuzgu nganandi ngakuyanana ndi ngidu kweni ngakupunda ndipu kuziŵa venivi kungatiwovya kuti nasi tipundi.

Kutitiwovya kuti tije pa ubwezi wakukho. Abali ndi azichi wo tiwungana nawu, mbanthu ŵaka cha, kweni ndi mabwezi ngidu. Nyengu zinyaki ticheza limoza nawu. Kumbi kucheza kwaviyo kutitiwovya wuli? Kutitiwovya kuti tiŵaziŵi umampha anyidu ndipu kuchita viyo kutovya kuti tije nawu pa ubwezi wakukho. Asani mabwezi ngidu ngakumana ndi masuzgu, tija akunozgeka kuŵawovya chifukwa cha ubwezi wakukho wo ulipu. (Nthanthi 17:17) Asani ticheza ndi ŵanthu wosi mu mpingu, tilongo kuti ‘tiphweriyana.’—1 Akorinto 12:25, 26.

Titikuchiskani kuti musankhi ŵanthu wo achita khumbu laku Chiuta kuti aje mabwezi nginu. Musaniyengi mabwezi ngaviyo pakati pa Akaboni aku Yehova. Yesesani kuti muwunganengi nasi nyengu zosi.

• Ntchifukwa wuli ntchinthu chakovya kuti tiwunganengi pamoza?

• Kumbi ndi zukwanji po mungayanja kuti muziwungani nasi kuti muziŵaziŵi umampha Akaboni aku Yehova?

Pa maunganu ngachikhristu ngo ngachitikanga mu nyengu ya akutumika, ambanga sumu, apempheranga, aŵerenganga ndi kukambiskana Malemba, ndipu pengavi mudawuku wewosi wo wachitikanga. (1 Akorinto 14:26) Maunganu ngidu mazuŵa nganu, ngachitika so viyo.

Fundu zo tisambira zituliya m’Bayibolu ndipuso zakovya. Pa Chisulu pamwenga pa Sabata, pa mpingu wewosi pakambika nkhani yakutuliya m’Bayibolu kwa maminiti 30, yo yikonkhoska mo Malemba ngangatiwovye pa umoyu widu ndipuso mu nyengu yo tijamu sonu. Tosi tichiskika kujula Bayibolu lidu ndi kulondo vo viŵerengeka. Pavuli pa nkhani, tisambira “Chigongwi cha Alinda” kwa ora limoza ndipu munthu weyosi ngwakuzomerezeka kumukapu pa nkhani yo yisambirika pa nyengu yo. Sambiru ili lititiwovya mo tingagwiriskiya ntchitu ulongozgi wa m’Bayibolu pa umoyu widu. Nkhani yo tisambira mu Chigongwi cha Alinda, yisambirika so ndi mipingu yakujumpha 110,000 pacharu chosi chapasi.

Tisambira mo tingasambiziya mwalusu. Tikumana so mukati mwa sabata kuti tichiti unganu wa Umoyu Widu Wachikhristu Ndipuso Uteŵeti. Vosi vo tisambira pa unganu uwu vituliya mu Kabuku ka Unganu wa Umoyu Wachikhristu Ndipuso Uteŵeti. Unganu wenuwu we ndi vigaŵa vitatu. Chigaŵa chakwamba cha unganu uwu ndi Chuma Chakutuliya M’Mazu Ngaku Chiuta. Chigaŵa ichi chititiwovya kuti tivwisi machaputala nga m’Bayibolu ngo tapaskika mu sabata yeniyo ndipu munthu weyosi mumpingu watingaŵerenge limu kunyumba. Chigaŵa chachiŵi chiziŵika kuti, Kusazgiyaku Lusu Lidu mu Uteŵeti. Chigaŵa ichi chija so ndi vakuyeruzgiyapu va mo tingakambiskiyana ndi ŵanthu fundu za m’Bayibolu. Pa nyengu yeniyi cheyamani wakambapu fundu zo zingatiwovya kuti tiŵerengengi ndipuso tikambengi nkhani mwalusu. (1 Timote 4:13) Chigaŵa chakumaliya ntchakuti, Tichitengi Vinthu Nge Akhristu. Chigaŵa chenichi chititiwovya kuziŵa mo tingagwiriskiya ntchitu fundu za m’Bayibolu pa umoyu widu wa zuŵa ndi zuŵa. Pachigaŵa chenichi tikambiskana mwakugwiriskiya ntchitu mafumbu. Venivi vititiwovya kuti tizivwisisengi ukongwa fundu za m’Bayibolu.

Asani mwazisanirika pa maunganu ngidu, tikayika cha kuti mwazamukondwa ndi fundu za m’Bayibolu zo mwazamusambira.—Yesaya 54:13.

• Kumbi ndi vinthu wuli vo mukhumba kuzivwa pa maunganu nga Akaboni aku Yehova?

• Pa maunganu ngo tichita, ndi unganu nuwu wo mukhumba kuzisanirikapu?

Kumbi mwaviwona vithuzi ivi, mo Akaboni aku Yehova avwaliya umampha pakuluta ku maunganu? Ntchifukwa wuli tiwonesesa kuti tavwala umampha ndipuso tajitowesa mwakwenere?

Tilongo kuti titumbika Chiuta. Mbuneneska kuti Chiuta walereska kawonekeru kidu kakubwalu pe cha kweni wawona so mumtima. (1 Samuele 16:7) Kweni asani tawungana kuti tisopi Chiuta, tikhumbisiska kulongo kuti titimutumbika ndipuso titumbika Akhristu anyidu. Asani tingadanika ndi pulezidenti, tiwonesesengi kuti tavwala umampha kuti timupasi ulemu. Mwakuyanana ŵaka, mo tiwoneke asani te pa maunganu vilongo kuti titumbika “mweruzgi wa charu chosi,” Yehova Chiuta ndipuso malu ngo tiwunganapu.—Chiyambo 18:25.

Tilongo fundu zo titende. Bayibolu lichiska Akhristu kuti avwalengi “mwaulemu ndipuso mwakuŵanaŵana umampha” nge ŵanthu wo “mbakujipereka kwaku Chiuta.” (1 Timote 2:9, 10) Kuvwala “mwaulemu,” kung’anamuwa kuleka kuvwala mwakujilongo pamwenga vakuvwala vakulongo liŵavu vo vingachitiska kuti ŵanthu atilereskengi. Ndipuso kuchita vinthu “mwakuŵanaŵana umampha” kutiwovyengi kuti tisankhengi vakuvwala vamampha. Fundu zenizi zititipaska mwaŵi wakusankha vakuvwala vakwenere. Kuvwala kwidu umampha kutiwovyengi kuti “tidyoŵesi chisambizu chaku Chiuta Mtaski” ndipuso ‘tikankhuski Chiuta.’ (Tito 2:10; 1 Peturo 2:12) Asani tivwala umampha pa maunganu tichitiska kuti ŵanthu awonengi kuti kusopa kwidu Yehova nkhwakuzirwa.

Mungatondekanga cha kufika pa Nyumba ya Ufumu chifukwa chakuti mulivi vakuvwala vamampha. Vakuvwala vidu vikhumbika kuja vakudula pamwenga vapachanya cha kuti vije vakutowa ndi vakwenere.

• Kumbi kuvwala umampha pa mawunganu nkhwakukhumbika chifukwa wuli?

• Kumbi ndi fundu nizi zo titenere kugwiriskiya ntchitu pa nkhani ya kuvwala ndi kujitowesa?

Asani musambira Bayibolu ndi yumoza wa Akaboni aku Yehova, mutenere kuti nyengu zosi munozgeke limu sambiru linu. Kuti muyanduwi ukongwa, mungachita umampha kunozgeke so maunganu nga mpingu. Tiyanduwa ukongwa asani te ndi chiziŵirizga chakunozgeke maunganu.

Saniyani nyengu ndi malu ngakunozgekiyapu. Kumbi ndi nyengu niyi yo mungavwisisa umampha asani muŵerenga? Nyengu ya kumulenji mwechendayambi kugwira ntchitu pamwenga usiku asani ŵana wosi agona? Chinanga kuti mungaŵerenga kwa nyengu yitali cha, kweni saniyani nyengu yakuŵerenge ndipu mungazomerezanga cha kuti chinthu chinyaki chechosi chikutimbanyizgeni. Saniyani malu ngambula viwawa ndipu asani pe vinthu vo vingakutimbanyizgani nge wayilesi, TV ndipuso foni wonesesani kuti mwazimwisa. Kupemphera mwechendayambi kusambira kukuwovyeningi kuti muleki kufipa mtima ndi vinthu va pa zuŵa lo ndipuso kuti muŵiki maŵanaŵanu nginu pa Mazu ngaku Chiuta.—Afilipi 4:6, 7.

Gwalani muzeri kusi kwa fundu zo mwasaniya ndipu yesesani kuti mukamukepu. Chakwamba ziŵani fundu yikuru ya nkhani yo. Ŵanaŵaniyani mutu waki ndipuso mo mitu yimanayimana yikoliyana ndi mutu wa nkhani, wonani vithuzi kweniso mafumbu ngakuweriyamu ngo ngalongo fundu zikuluzikulu. Pavuli paki, ŵerengani ndimi yeyosi ndipu saniyani kwamuka kwa mafumbu ngo ngalembeka. Ŵerengani malemba ngo ngalongoleka ndipuso ŵanaŵaniyani mo ngakoliyana ndi nkhani. (Machitidu 17:11) Asani mwasaniya kwamuka kwa fumbu, gwalani mzeri kusi kwaki kuti muzileki kusuzgika kumuka pa nyengu yo musambira. Asani mwe pa maunganu, soskani janja asani mungayanja ndipu mukani mu mazu nginu.

Kunozgeke nkhani zakupambanapambana zo zisambirika sabata yeyosi pa maunganu, kukuwovyeningi kuti muziŵi fundu zinandi za m’Bayibolu ndi kuzisunga mu “munyumba yakusungiyamu chuma” yinu.—Mateyu 13:51, 52.

• Kumbi mungachita wuli kuti muje ndi chiziŵirizga chakunozgeke maunganu?

• Kumbi munganozgeke wuli kuti mukamukengepu pa maunganu?

Kwambiya mu nyengu yakali, Yehova wakhumbanga kuti banja lelosi lisaniyengi nyengu yakuchitiya vinthu pamoza ndi chilatu chakuti lije pa ubwezi wakukho ndi Chiuta ndipuso kuti ŵanthu a m’banja lo ayanjanengi. (Marangu 6:6, 7) Ndichu chifukwa chaki Akaboni aku Yehova asaniya nyengu sabata yeyosi kuti achitengi kusopa kwa pabanja, akambiskanengi mwakufwasa nkhani zo zingaŵawovya pa umoyu wawu. Asani muja mwija, mungagwiriskiya ntchitu umampha nyengu yeniyi kusambira Bayibolu pakumwija pa nkhani yo mwasankha.

Yija nyengu yakundere kufupi ndi Yehova. “Ndereni kufupi ndi Chiuta, ndipu nayu wanderengi kufupi ndi yimwi.” (Yakobe 4:8) Titamba kumuziŵa umampha Yehova asani tisambira fundu zakukwaskana ndi mijalidu yaki ndipuso vo wachita vo visanirika m’Bayibolu. Nthowa yinyaki yambula kusuzga kuti muyambi kusopa kwa pabanja, nkhuŵerenge pamoza Bayibolu mwakukweza, nyengu zinyaki mwakugwiriskiya ntchitu ndondomeku ya Unganu wa Umoyu Wachikhristu Ndipuso Uteŵeti. Mungagaŵana vigaŵa vakuti muŵerengi ndipu pavuli paki munthu weyosi wangakonkhoska fundu yo wasambirapu.

Yija nyengu yakuziŵana umampha nge banja. Kusambira Bayibolu limoza nge banja kuchitiska kuti munthulumi wayanjanengi ndi muwolu waki ndipuso apapi ndi ŵana ŵawu ayanjanengi ukongwa. Nyengu yakusopa kwa pabanja yitenere kuja yakukondwesa, yachimangu ndipuso yakuti munthu weyosi mu banja wakhumbisiskengi kusanirikapu. Apapi angasankha nkhani zakovya zakuti akambiskani mwakutole misinkhu ya ŵana ŵawu, nyengu zinyaki angagwiriskiya ntchitu nkhani za mu Chigongwi cha Alinda ndi Jani Masu! ndipuso za pa jw.org/tog. Pamwenga mungakambiskana suzgu yo ŵana ŵinu akumana nayu ku sukulu ndipuso mo angayimalisiya. Mungawonere pamoza pulogilamu ya pa JW Broadcasting (lutani pa tv.jw.org) ndi kukambiskana vo mwawonere. Mungasambira so sumu zo zamumbika pa maunganu sabata yeniyo, asani mwamaliza kusopa kwa pabanja mungarya chakurya chechosi cho mwanozga.

Nyengu yo mumaliya pa kusopa Yehova sabata yeyosi, yiwovyengi kuti weyosi m’banja linu wakondwengi ndi Mazu Ngaku Chiuta ndipu Yehova wakutumbikeningi chifukwa cha phamphu linu.—Sumu 1:1-3.

• Ntchifukwa wuli titenere kuja ndi nyengu yakusopa kwa pabanja?

• Kumbi apapi angachita wuli kuti kusopa kwa pabanja kukondwesengi munthu weyosi mu banja?

Ntchifukwa wuli ŵanthu yaŵa awoneka alikondwa? Yiwu ŵe pa umoza wa maunganu ngidu ngakulungakulu. Nge po achitiyanga ateŵeti aku Chiuta a mu nyengu yakali, wo angulamulika kuti awunganengi katatu pa chaka, nasiso tija akunozgeka kusanirika pa maunganu ngakulungakulu ngenanga. (Marangu 16:16) Chaka chechosi, tija ndi maunganu ngakulungakulu. Unganu wadera ŵa zuŵa limoza wo uchitika kaŵi pachaka ndipuso unganu wachigaŵa wo uchitika mazuŵa ngatatu. Kumbi tiyanduwa wuli pa maunganu ngenanga?

Ngachitiska kuti ubali widu wachikhristu wa pacharu chosi uje wakukho. Ayisirayeli akondwanga chifukwa chakutumbika Yehova “pa unganu ukulu,” nasiso tikondwa kusopa Yehova limoza ndi anyidu pa maunganu ngenanga. (Sumu 26:12; 111:1) Maunganu ngenanga, ngatitiwovya kuti tikumanengi kweniso tichezgengi ndi Akaboni anyidu a mumipingu yinyaki ndipuso wo atuliya kuvyaru vinyaki. Pa nyengu yakupumuwa, tikondwa kuryiya pamoza chakurya pamalu nga unganu vo vitovya kuti maunganu ngaje nga chimangu. (Machitidu 2:42) Pa maunganu ngenanga ndipu tiwona chanju cho chichitiska kuti tikoliyanengi ndi ‘abali’ ŵidu pacharu chosi.—1 Peturo 2:17.

Ngatitiwovya kuti tiluti panthazi mwauzimu. Ayisirayeli ayanduwanga so chifukwa ‘avwisisanga vo vaŵerengekanga’ ndipuso vo vakonkhoskekanga kutuliya m’Malemba. (Nehemiya 8:8, 12) Nasiso tiyanduwa ndi ulongozgi wa m’Bayibolu wo tilonde pa maunganu ngidu. Nkhani yeyosi yija ndi mutu wakutuliya m’Bayibolu. Paja so nkhani zakukondwesa, zakusiliyana ndipuso vakuyeruzgiyapu, vosi ivi vititisambiza mo tingachitiya khumbu laku Chiuta pa umoyu widu. Tichiskika asani tituvwa masuzgu ngo Akhristu akumana nangu ndi mo apundiya masuzgu mu nyengu yakumaliya yinu. Pa maunganu nga chigaŵa, paja maseŵeru nga nkhani za m’Bayibolu zo zikuchitika kali ndipuso ngatitisambiza fundu zo zingatiwovya. Pa unganu wewosi, pachitika ubatizu waku wo akhumba kulongo kujipatuliya kwaku Chiuta.

• Ntchifukwa wuli kusanirika pa maunganu kutitipaska likondwa?

• Kumbi mungayanduwa wuli asani musanirika pa maunganu?

Kwati kwaja kanyengu kamanavi kuti wafwi, Yesu wangukamba kuti: “Uthenga wamampha uwu wa Ufumu, wazamupharazgika pacharu chosi chapasi kuti uje ukaboni ku ŵanthu amitundu yosi, ndipu pavuli paki umaliru uzengi.” (Mateyu 24:14) Kumbi ntchitu yakupharazga ya pacharu chosi yeniyi yatingi yifiskikengi wuli? Mwakulondo vo Yesu wachitanga pa nyengu yo wenga pacharu chapasi.—Luka 8:1.

Titesesa kufikiya ŵanthu munyumba zawu. Yesu wangusambiza akusambira ŵaki kuti apharazgengi uthenga wamampha khomu ndi khomu. (Mateyu 10:11-13; Machitidu 5:42; 20:20) Apharazgi akwamba ŵenaŵa, angupaskika vigaŵa vakuti akapharazgeku. (Mateyu 10:5, 6; 2 Akorinto 10:13) Mwakuyanana ŵaka mazuŵa nganu, ntchitu yidu yakupharazga yichitika mwadongosolu ndipu mpingu wewosi upaskika chigaŵa chakuti upharazgengeku. Kuchita viyo kutitiwovya kuti tichiti vo Yesu wangukamba kuti “tipharazgengi ku ŵanthu ndi kupereka ukaboni mwakukwana.”—Machitidu 10:42.

Titesesa kufikiya ŵanthu kwekosi ko angasanirika. Yesu wakulongo chakuwoniyapu chamampha ukongwa chakupharazga ko kwasanirikanga ŵanthu anandi, iyu wapharazganga m’mphepeti mwa nyanja ndipuso ku visimi ko kwasanirikanga ŵanthu. (Mariko 4:1; Yohane 4:5-15) Nasiso tikambiskana ndi ŵanthu fundu za m’Bayibolu kwekosi ko angasanirika kaya mumsewu, kumusika, kumalu ngo asungiyaku nyama pamwenga pa telefoni. Tipharazgiya so azengezgani ŵidu, wo tigwira nawu ntchitu, wo tisambira nawu sukulu ndipuso abali ŵidu asani tasaniya nyengu. Kugwiriskiya ntchitu nthowa zenizi, kwawovya kuti ŵanthu mamiliyoni nganandi pacharu chosi chapasi avwi ‘uthenga wamampha wa utaski.’—Sumu 96:2.

Kumbi pe munthu munyaki yo muŵanaŵana kuti mungamukambiyaku uthenga wamampha wa Ufumu waku Chiuta ndipuso vo wazakumuchitiya kunthazi? Mungawusunganga ŵaka cha uthenga wa chilindizga wenuwu. Yesesani kweche sonu kukambiya ŵanthu za uthenga wenuwu.

• Kumbi ndi ‘uthenga wamampha’ nuwu wo utenere kupharazgika?

• Kumbi Akaboni aku Yehova atimuyezga wuli Yesu pa nkhani yakupharazga?

Mazu ngakuti “mpayiniya” kanandi ngang’anamuwa munthu yo wapharazga muvigaŵa vasonu ndipu wajula nthowa kuti ŵanthu anyaki alondo. Yesu wenga mpayiniya yo wangutumika pacharu kuti wazichiti ntchitu yakupaska umoyu ndi kujula nthowa yakuti ŵanthu azitaskiki. (Mateyu 20:28) Mazuŵa nganu, akumulondo ŵaki ayezga iyu mwakuchita phamphu ‘kupanga akusambira.’ (Mateyu 28:19, 20) Ŵanthu anyaki achitaku nawu uteŵeti wenuwu wo udanika kuti, upayiniya.

Mpayiniya ndi munthu yo wapharazga nyengu zosi. Akaboni aku Yehova wosi mbapharazgi a uthenga wamampha. Anyaki asintha vakuchita vawu kuti aje apayiniya a nyengu zosi, ndipu apharazga maora 70 mwezi wewosi. Kuti afiski kuchita ntchitu yeniyi, apharazgi anandi agwira ganyu. Apharazgi anyaki asankhika kuti akateŵete nge apayiniya apade kumalu ngo kukhumbika apharazgi a Ufumu anandi ndipu apharazga kwa maora 130 pamwenga kujumpha mwezi wewosi. Apayiniya agutiskika ndi vinthu vimanavi vo asaniya ndipu aja ndi chigomezgu chosi kuti Yehova waŵapaskengi vo akhumbika pa umoyu wawu. (Mateyu 6:31-33; 1 Timote 6:6-8) Ŵanthu wo angafiska cha kuchita upayiniya wa nyengu zosi, ateŵete nge apayiniya akovya pa nyengu yo awona kuti angafiska ndipu asazgiyaku uteŵeti wawu mwa kupharazga kwa maora 30 pamwenga 50 pa mwezi.

Mpayiniya wachiskika chifukwa chakwanja Chiuta ndi ŵanthu. Nge po wachitiyanga Yesu, nasiso tiziŵa kuti mazuŵa nganu ŵanthu anandi ŵe pa ubwezi cha ndi Chiuta. (Mariko 6:34) Isi te ndi uthenga wauneneska wo ungaŵawovya sonu panu kweniso kuti aje ndi chilindizga cha munthazi. Kwanja ŵanthu kuchitiska mpayiniya kuti wagwiriskiyi ntchitu nyengu ndi nthazi zaki kuti wawovyi ŵanthu kuja pa ubwezi ndi Chiuta. (Mateyu 22:39; 1 Atesalonika 2:8) Kuchita viyo, kutovya mpayiniya kuti waje ndi chigomezgu chakukho, waje pa ubwezi wamampha ndi Chiuta ndipuso waja ndi likondwa.—Machitidu 20:35.

• Kumbi mpayiniya ndi yani?

• Kumbi ntchinthu wuli cho chichitiska apharazgi anyaki kuti aje apayiniya a nyengu zosi?

Akaboni aku Yehova akwamba kali kuja ndi sukulu zakusambiza ŵanthu Bayibolu. Sukulu izi zitovya ŵanthu wo atijipereka kugwira ntchitu yakupharazga Uthenga wa Ufumu kuti apharazgengi mwalusu.—2 Timote 4:5.

Sukulu ya Apayiniya. Asani mupharazgi wachita upayiniya wa nyengu zosi kwa chaka chimoza wangasere sukulu yeniyi yo yichitika kwa mazuŵa 6. Sukulu iyi yichitikiya mu Nyumba ya Ufumu yakufupi ndiko ŵanthu aja. Sukulu iyi yitovya apayiniya kuti aje pa ubwezi ndi Yehova, kuti apharazgengi mwalusu ndipuso kuti alutirizi kuchita uteŵeti wawu mwakugomezeka.

Sukulu ya Apharazgi a Ufumu. Sukulu iyi yichitika kwa myezi yiŵi ndipu yikunozgeka kuti yiwovyi apayiniya alusu wo akhumba kuchiteŵete kuchigaŵa ko kwe apharazgi amana. Yiwu ayezga mupharazgi walusu Yesu Khristu ndipu akamba mazu ngakuti “Ini ndilipu! Nditumeni!” (Yesaya 6:8; Yohane 7:29) Asani munthu wasamuka wakhumbika kuja ndi umoyu wambula kukhumba vinthu vinandi. Midawuku, malu ndipuso vakurya vingaja vakupambana ndi vo tinguziŵiliya. Mungakhumbika so kusambira chineneru chinyaki. Sukulu iyi yitovya abali ndi azichi ambula kuto pamwenga kuyirwa kweniso wo ŵe pa nthengwa a vyaka vakwambiya 23 mpaka 65, kuti aje ndi mijalidu yamampha ndipuso malusu ngo ngangaŵawovya kuti afiski kuchita uteŵeti wo Yehova waŵapaska.

Sukulu ya Giliyadi. Mu Chiheberi mazu ngakuti “Giliyadi” ngang’anamuwa “Ukaboni.” Kwambiya mu chaka cha 1943 po sukulu iyi yingwambiya, amishonale akujumpha 8,000 wo akusere sukulu iyi aja achitumizika m’vyaru vakupambanapambana kuti akachitiyi ukaboni ‘pacharu chosi.’ (Machitidu 13:47) Mwakuyeruzgiyapu, pa nyengu yo amishonale angufikiya ku Peru, kwengavi mpingu wewosi kweni sonu kwe mipingu yakujumpha 1,000. Pa nyengu yo amishonale angwamba kuteŵete ku Japan, kwenga Akaboni ambula kukwana 10, kweni sonu kwe Akaboni akujumpha 200,000. Ku Sukulu ya Giliyadi ŵanthu asambira Bayibolu kwa myezi 5. Apayiniya apade pamwenga amishonale, wo ateŵete pa Beteli, kweniso akuwonere madera ndiwu asere sukulu iyi kuti yiŵawovyi kulutisa panthazi ntchitu ya kupharazga yo yichitika pacharu chosi.

• Kumbi chilatu cha Sukulu ya Upayiniya ntchakuti wuli?

• Kumbi mbayani wo asere Sukulu ya Apharazgi a Ufumu?