“Ndichilereska Vamoyu”

Tikayika cha kuti Ezekiyeli wanguwonapu vikozgu vakujoba va ng’ombi zinthulumi kweniso nkharamu zo zenga ndi mapapa kweniso mitu ya ŵanthu, chifukwa vikozgu ivi vasanirikanga munyumba zachifumu kweniso zakusopiyamu. Vikozgu venivi vasanirikanga mucharu chosi cha Asiriya kweniso Babiloni. Mwakuyanana ndi ŵanthu anyaki, Ezekiyeli nayu watenere kuti wazukumanga ndi vikozgu venivi chifukwa vinyaki venga vitali pafufupi mamita 6. Chinanga kuti vikozgu venivi vawonekanga vakofya, kweni venga vakufwa chifukwa venga vakujobeka ŵaka pa mya.

Mwakupambana ndi vikozgu venivi, vinthu vinayi vo Ezekiyeli wanguwona venga “vamoyu.” Yeniyi yenga mphambanu yikulu ukongwa! Ezekiyeli wanguzizwa ukongwa ndi vo wanguwona mwakuti mazu ngakuti “vamoyu,” wangungalemba maulendu 11 wachiyamba kulemba uchimi waki. (Ezeki. 1:5-22) Ezekiyeli wanguwona kuti vamoyu vinayi venivi vaseleriyanga kwakuyanana kweniso vayendiyanga limoza pasi pa mpandu waufumu waku Chiuta. Venivi vitenere kuti vingumusambiza Ezekiyeli kuti chilengedu chosi che pasi paku Yehova. Chifukwa cha chiwona chenichi, mazuŵa nganu nasi tizukuma mbwenu ndi unkhankhu, nthazi kweniso ulamuliru waku Yehova.—1 Mbiri 29:11.