MUTU 15
“Ndazamumalisa Uhuli Waku”
FUNDU YIKULU: Vo tisambira pa vakuyeruzgiyapu va mahuli ngo ngazumbulika mubuku la Ezekiyeli kweniso Chivumbuzi
1, 2. Kumbi ndi huli la mtundu wuli lo munthu wangalichitiya lisungu cha?
VIJA vakupaska chitima kuwona kuti munthu munyaki wayamba uhuli. Tingajifumba kuti ndi vinthu wuli vo vamuchitiska kuti wayambi jalidu laŵakaŵaka lenili. Kumbi wangwamba uhuli weche mwana chifukwa chakuti munthu munyaki mu banja lawu wamuchitiyanga vinthu vankhaza? Pamwenga wangwamba kuchita jalidu lenili chifukwa cha ukavu? Pamwenga wanguthaŵa vinthu vankhaza vo mulumu waki wamuchitiyanga? Nkhani zakupaska chitima nge zenizi zivwika kanandi mucharu chiheni ichi. Mwaviyo, mphakuvwika kuti Yesu Khristu wanguchitiya chitima mahuli nganyaki ngo ngengaku mu nyengu yaki. Iyu wangukamba kuti wo alapa ndi kusintha umoyu wawu angaja ndi chilindizga cha umoyu wamampha.—Mate. 21:28-32; Luka 7:36-50.
2 Kweni tiyeni tikambiskani za huli linyaki lakupambana ukongwa ndi huli lo talikamba pachanya yapa. Yeruzgiyani kuti muwona munthukazi yo wasankhiya dala kwamba uhuli. Iyu watiliwona kuti ndi jalidu lakuchitiska soni cha kweni lamampha. Iyu waŵika mtima waki pa kusaniya ndalama kweniso vinthu vinyaki vo wangasaniya. Sonu tiyeruzgiyi kuti munthukazi uyu waleke dala mulumu waki wamampha kweniso wakugomezgeka ndi kwamba kuchita uhuli. Asani ndi viyo, vingaŵa vakusuzga kumuchitiya lisungu munthukazi waviyo. Mo isi tingavwiya vakukwaskana ndi huli lenili ndimu so Yehova Chiuta, wawone chisopa chaboza cho watichiyeruzgiya ndi huli.
3. Kumbi tikambiskanengi nkhani nizi mu mutu uwu?
3 Mu buku la Ezekiyeli mwe nkhani ziŵi zo zikonkhoska za uhuli ndipu zilongo mo ŵanthu aku Chiuta ku Isirayeli ndi ku Yuda anguchitiya vinthu mwambula kugomezgeka. (Ezekiyeli chaputala 16 ndi 23) Kweni techendakambiskani nkhani zenizi tiyeni tikambiskani dankha za huli linyaki lakuyeruzgiya. Ilu lingwamba kuchita uhuli Ezekiyeli kweniso Ayisirayeli ŵechendaŵeku ndipu leche kuchita uhuli mpaka msanawale. Huli lenili likambika mu buku la Chivumbuzi lo ndi buku lakumaliya la mu Bayibolu.
“Nyinawu wa Mahuli”
4, 5. Kumbi “Babiloni Mukulu” wamiyanji, nanga tiziŵa wuli venivi? (Wonani chithuzi cho che papeji 162.)
4 Mu chiwona cho wakutumika Yohane wangulemba mu buku la Chivumbuzi, wangulemba vakukwaskana ndi munthukazi yo wenga huli. Munthukazi uyu wadanika kuti “huli likulu” kweniso “Babiloni Mukulu, nyinawu wa mahuli.” (Chivu. 17:1, 5) Kwa vyaka vinandi, alongozgi a visopa kweniso Akaswiri a Bayibolu atondeka kumuziŵa umampha munthukazi mwenuyu. Yiwu atimukonkhoska mwakupambanapambana ndipu anyaki akamba kuti wamiya Babiloni, Roma pamwenga Tchalitchi la Katolika. Kweni Akaboni aku Yehova akuliziŵa kali ukongwa “huli likulu” lenili. Huli ili limiya visopa vosi vaboza pacharu chapasi. Kumbi tiziŵa wuli venivi?
5 Huli ili lisuskika chifukwa chakuti lichita ureŵi ndi “mafumu nga charu chapasi” pamwenga kuti andali. Mwaviyo, tingakamba kuti limiya andali cha. Kusazgiyapu yapa, buku la Chivumbuzi lilongo kuti “amalonda a pacharu chapasi” aliya chifukwa chakubwangandulika kwa Babiloni Mukulu. Mwaviyo, Babiloni Mukulu wamiya amalonda cha. So kumbi iyu ndiyani? Iyu we ndi mulandu wakuchita “vamizimu,” kusopa angoza kweniso wapusisa ŵanthu. Kumbi asi venivi ndivu alongozgi avisopa achinyengu achita pacharu ichi? Wonani so kuti huli ili likonkhoskeka kuti lakwera pachanya pamwenga kuti le ndi mazaza pa andali a mucharu ichi. Huli ili litombozga so ateŵeti akugomezgeka aku Yehova Chiuta. (Chivu. 17:2, 3; 18:11, 23, 24) Kumbi asi venivi ndivu chisopa chaboza chaja chichichita kwamba kali mpaka sonu?
Babele wa mu nyengu yakali yo pavuli paki wangudanika kuti Babiloni, ndiku kungwambiya visopa vakupambanapambana, visambizu kweniso vinthu vinyaki vosi vo vichitika mu chisopa chaboza (Wonani ndimi 6)
6. Kumbi Babiloni Mukulu ndi “nyinawu wa mahuli” mu nthowa wuli?
6 Sonu ntchifukwa wuli Babiloni Mukulu, wadanika kuti “huli likulu” kweniso “nyinawu wa mahuli”? Ntchifukwa chakuti chisopa chaboza chagaŵikana mu magulu nganandi. Kwambiya pa nyengu yo vineneru vingutimbanyizgikiya pa Babele pamwenga kuti Babiloni, visambizu va chisopa chaboza vasapaliya pacharu chosi ndipu venivi vachitiska kuti paje visopa vakupambanapambana. Mwaviyo, mphakuvwika kuti zina lakuti “Babiloni Mukulu” likwambiya ku Babiloni ko visopa vaboza vikwambiya. (Gene. 11:1-9) Sonu tingakamba kuti visopa vosi venivi ve nge “ŵana anthukazi” a chisopa chimoza yo ndi huli likulu. Kanandi Satana wagwiriskiya ntchitu visopa venivi pakunyenga ŵanthu kuti achitengi vinthu vamizimu, kusopa angoza kweniso midawuku yinyaki yo yileka kutumbika Chiuta. Ndichu chifukwa chaki ŵanthu aku Chiuta atcheŵeskeka kuti aleki kukoliyana ndi chisopa chakunyenga chenichi cho chikusapaliya pacharu chosi kuti: “Tuwaniku kwaku iyu, mwaŵanthu ŵangu, asani mukhumba cha kusangana nayu maubudi ngaki”!—Ŵerengani Chivumbuzi 18:4, 5.
7. Ntchifukwa wuli tivwiya mazu ngakutcheŵeska ngakuti, “tuwaniku” ku Babiloni Mukulu?
7 Kumbi yimwi muvwiya mazu ngakutcheŵeska ngenanga? Ŵanthu akhumba kuja mu visopa chifukwa “aziŵa kuti akhumbika Chiuta.” (Mate. 5:3) Kumbukani kuti Yehova ndiyu wakulenga ŵanthu kuti ajengi ndi khumbu lenili. Munthu wangamalisa khumbu lenili pijapija asani wasopa Yehova mwauneneska. Ateŵeti aku Yehova akhumba cha kukoliyana ndi chisopa chaboza. Kweni Satana Dyaboli we ndi chilatu chinyaki. Iyu watanja kunyenga ŵanthu aku Chiuta kuti awiri muchiŵana chakuchita uhuli wauzimu. Kanandi chiŵana chenichi chitimuyende umampha. Kufika mu nyengu yaku Ezekiyeli, ŵanthu aku Chiuta ndipu achitapu ureŵi wauzimu kananandi ŵaka. Tingachita umampha kukambiskana mo ve nge chifukwa vingatisambiza vinandi vakukwaskana ndi fundu zaku Yehova, urunji waki kweniso lisungu laki.
“Ungusambuka Huli”
8-10. (a) Kumbi ntchinthu nichi chakukhumbika ukongwa pa kusopa kwauneneska? (b) Nanga Yehova watuvwa wuli asani ateŵeti ŵaki ayamba kukoliyana ndi chisopa chaboza? Konkhoskani.
8 Mu buku laku Ezekiyeli, Yehova wagwiriskiya ntchitu chakuyeruzgiyapu cha huli kuti walongo mo wangukwaskikiya chifukwa chakuleka kugomezgeka kwa ŵanthu ŵaki. Yehova wangukambiya Ezekiyeli kulemba nkhani ziŵi zo zilongo mo vingumuŵaŵiya ŵanthu ŵaki ŵati amujowo chifukwa chakuleka kugomezgeka kweniso chifukwa chakuchita ureŵi wauzimu. Ntchifukwa wuli Yehova wayeruzgiya ŵanthu ŵaki ndi mahuli?
9 Kuti tivwisi kwamuka kwa fumbu ili, chakwamba tikhumbika kukumbuka chinthu chakukhumbika ukongwa pa kusopa kwauneneska cho tingukambiskana mu Mutu 5 wa buku ili. Mu Dangu lo Yehova wangupaska Ayisirayeli, wangukamba kuti: “Ungajanga ndi achiuta anyaki cha, kupatuwaku ini . . . Ini Yehova Chiuta waku, ndini Chiuta yo wakhumba kuti ŵanthu ajiperekengi kwaku ini pe.” (Eki. 20:3, 5) Pavuli paki, wangukamba so fundu yauneneska yeniyi mu nthowa iyi: “Mungasindamiyanga chiuta munyaki cha, chifukwa Yehova ndi Chiuta yo waziŵika kuti wakhumba kuti ŵanthu ajiperekengi kwaku iyu pe. Iyu ndi Chiuta yo wakhumba kuti ŵanthu ajiperekengi kwaku iyu pe.” (Eki. 34:14) Yapa Yehova wangukamba fundu yakuvwika umampha ukongwa. Yehova wangazomereza kusopa kwidu pijapija asani tisopa iyu pe.
10 Kuti tivwisi mo Yehova wavwiya, tiyeni tiŵanaŵaniyi vo vichitika munthengwa. Wosi ŵaŵi munthulumi ndi munthukazi, aziŵa kuti pe chinthu chinyaki cho weyosi wakhumbika kupereka kwa mulumu waki pamwenga muwolu waki pe. Asani yumoza waku yiwu wayamba kukopana ndi munthu munyaki pamwenga wachita ureŵi, munyaki munthengwa yawu wangachita sanji kweniso wangajivwa kuti wamuchitiya chinyengu. (Ŵerengani Aheberi 13:4.) Mwakuyanana ŵaka, Yehova watijivwa kuti nkhumuchitiya chinyengu asani ŵanthu ŵaki wo angujipereka kwaku iyu pe, ayamba kusopa achiuta aboza. Mu Ezekiyeli chaputala 16, Yehova wakonkhoska mo wangukwaskikiya ŵanthu ŵaki ŵati amuchitiya chinyengu.
11. Kumbi Yehova wangukambanji vakukwaskana ndi Yerusalemu kweniso mo wangwambiya?
11 Mu Ezekiyeli chaputala 16 ndimu Yehova wakulongoro kwa nyengu yitali ndipu wenuwu ndiwu uchimi utali ukongwa mu Malemba ngosi nga Chiheberi. Yehova wakonkhoska ukongwa va tawuni ya Yerusalemu yo yimiya Yuda wambula kugomezgeka. Iyu wakonkhoska nkhani yakupaska chitima ya mo mtundu wenuwu ungwambiya kweniso vinthu vachinyengu vo ungumuchitiya. Mtundu wa Yuda wenga nge mwana yo wengavi wakumuwovya, wakubinkha kweniso wambula kuphwerereka. Apapi ŵaki ŵenga Akanani wo asopanga achiuta aboza. Mwakuti kwa nyengu yitali, Yerusalemu walamulikanga ndi Ayebusi, fuku la Akanani mpaka po Davidi wanguthereske mtundu wenuwu. Yehova wangumulenge lisungu mwana mwenuyu ndipu wangumusambika kweniso wangumuphwere. Pati pajumpha nyengu, iyu wanguja nge muwolu waku Yehova. Mwakuti Ayisirayeli wo angwamba kuja mutawuni yeniyi, ŵenga mu phanganu ndi Yehova, lo wanguchita nawu kali mu nyengu yaku Mozesi. (Eki. 24:7, 8) Yerusalemu wati waja likulu la charu cha Yuda, Yehova wangumutumbika, wangumukhupusa kweniso wangumutowesa ukongwa, nge mo munthulumi wakukhupuka ukongwa ndipuso wanthazi wangaphwere muwolu waki yo watimuyanja mwakumupaska vinthu vakujitowese.—Ezeki. 16:1-14.
Solomoni wanguzomereza kuti anthukazi achilendu wo wanguto amuchitiski kuti wanangi Yerusalemu ndi kusopa angoza (Wonani ndimi 12)
12. Kumbi kusopa kwaboza kungwamba wuli mu Yerusalemu?
12 Wonani vo vinguchitika pavuli paki. Yehova wangukamba kuti: “Ungwamba kuthemba kutowa kwaku, ndipu ungusambuka huli chifukwa cha kutchuka kwaku. Wajikonga cha, wachitanga uhuli ndi weyosi yo wajumphanga munthowa ndipu wamupaskanga kutowa kwaku.” (Ezeki. 16:15) Mu nyengu yaku Solomoni, Yehova wanguŵatumbika ŵanthu ŵaki kweniso kuŵakhupuska, mwakuti Yerusalemu yinguja tawuni yakutowa ukongwa mu nyengu yakali. (1 Mafu. 10:23, 27) Kweni kamana ndi kamana ŵanthu anguleka kuja akugomezgeka. Chifukwa chakuti Solomoni wakhumbanga kukondwesa anthukazi anandi achilendu wo wanguto, wangwamba kufipiska Yerusalemu mwakusopa achiuta aboza. (1 Mafu. 11:1-8) Ndipu ŵanthu anyaki wo anguja mafumu pavuli paku iyu, anguchita vinthu viheni ukongwa kuluska iyu ndipu angufipiska charu chosi ndi kusopa kwaboza. Kumbi Yehova wanguvwa wuli ndi vinthu va uhuli kweniso vachinyengu vo achitanga? Iyu wangukamba kuti: “Vinthu vaviyo vitenere cha kuchitika, ndipu vingazichitikanga so cha.” (Ezeki. 16:16) Kweni ŵanthu ŵaki ŵenaŵa wo angulanda, angulutirizga kuchita vinthu vaukazuzi venivi.
Ayisirayeli anyaki aperekanga sembi ŵana ŵawu kwa achiuta aboza nge Moleki
13. Kumbi ŵanthu aku Chiuta ku Yerusalemu, ŵenga ndi mulandu wakuchita vinthu viheni nivi?
13 Ŵanaŵaniyani mo Yehova vingumuŵaŵiya kweniso mo wanguserukiya wachiwona vinthu viheni vo ŵanthu ŵaki akusankhika achitanga. Iyu wangukamba kuti: “Unguto ŵana ŵaku anthulumi ndipuso ŵana ŵaku anthukazi wo ungundibaliya ndipu unguŵapereka kwa angoza ŵenaŵa nge sembi. Kumbi ukhorwa cha ndi uhuli waku? Ungubaya ŵana ŵangu ndi kuŵapereka nge sembi mwakuŵajumphisa pamotu.” (Ezeki. 16:20, 21) Vinthu viheni vo ŵanthu yaŵa achitanga, vilongore limu kuti Satana ndi muheni ukongwa. Iyu watanja kunyenga ŵanthu aku Yehova kuti achitengi mijalidu yiheni yeniyi. Kweni Yehova wawona vosi venivi. Chiuta wazamutuzgapu ntchitu zosi ziheni zaku Satana ndi kuweziyapu vinthu vo wakunanga ndipu wazamuchita urunji.—Ŵerengani Yobu 34:24.
14. Nge mo Yehova wangukambiya mu chakuyeruzgiyapu chaki, kumbi mku waki ndi mvurwa waki wa ku Yerusalemu wenga yani, nanga ndiyani yo wanguchita vinthu viheni ukongwa pa atatu ŵenaŵa?
14 Yerusalemu wakhumbikanga kuchita soni ndi vinthu viheni vo wachitanga kweni iyu wanguchita soni cha. Mumalu mwaki, wangulutirizga kuchita uhuli. Yehova wangukamba kuti Yerusalemu wapambananga ukongwa ndi anthukazi anyaki wo achitanga uhuli chifukwa wachitanga kulipira ŵanthu kuti wachitengi nawu uhuli. (Ezeki. 16:34) Chiuta wangukamba kuti Yerusalemu wachitanga vinthu nge ‘anyina,’ kung’anamuwa mafuku ngo ngasopanga achiuta aboza ngo nyengu yinyaki ngajanga mucharu chenichi. (Ezeki. 16:44, 45) Wachilutirizga kukonkhoska chakuyeruzgiyapu cha nthengwa, Yehova wangukamba kuti mku waku Yerusalemu wenga Samariya yo wangwamba kuchita uhuli wauzimu Yerusalemu wechendayambi. Chiuta wangukamba so kuti mvurwa waki ndi Sodomu. Venivi vingukumbusa weyosi vakukwaskana ndi tawuni ya Sodomu yo yingubwangandulika chifukwa chakujikuzga kweniso kuchita ureŵi. Yapa, Yehova wang’anamuwanga kuti Yerusalemu wanguchita vinthu viheni ukongwa kuluska Samariya ndi Sodomu. (Ezeki. 16:46-50) Ŵanthu aku Chiuta anguvwiya cha vo iyu waŵatcheŵeskanga ndipu angulutirizga kuchita mijalidu yawu yaukazuzi.
15. Kumbi Yehova wakhumbanganji pakupereka uthenga wacheruzgu cha tawuni ya Yerusalemu, nanga venivi vingupereka chilindizga wuli?
15 Kumbi Yehova watingi wachitengenji? Iyu wangulayizga Yerusalemu kuti: “Ndiwunganisa vibwezi vaku vosi vo unguvikondwesa” ndipu “ndazakukupereka mu manja mwawu.” Yehova wangukamba kuti mitundu yo yasopanga achiuta aboza yo ŵanthu ŵaki akoliyananga nayu ndiyu yazamubwanganduwa Yerusalemu, kuto vinthu vaki vakujitowese ndipuso vinthu vaki vakuzirwa. Yehova wangukamba so kuti: “Azakukuponya ndi mya, yiwu azakukubaya ndi malipanga ngawu.” Kumbi Yehova wakhumbanganji pakupereka uthenga wacheruzgu wenuwu? Iyu wakhumbanga kuŵabaya cha ŵanthu ŵaki. Mumalu mwaki, iyu wakhumbanga ‘kumalisa uhuli wawu.’ Chiuta wangukamba so kuti: “Ukali wangu wazamutuniya paku yiwi, ndipu ukali wangu wazamutuwaku kwaku yiwi; ndazamujalika mtima wangu pasi ndipu ndazamulutirizga cha kuja wakukwiya.” Nge mo tingusambiriya mu Mutu 9 wa buku ili, Yehova wakhumbanga kuti ŵanthu ŵaki waziŵaweze kucharu chawu asani ukapolu wamala. Chifukwa wuli? Iyu wangukamba kuti: “Ndazamukumbuka phanganu lo ndinguchita nawi pa unamana waku.” (Ezeki. 16:37-42, 60) Mwakupambana ndi ŵanthu ŵaki, Yehova wangulongo kuti ngwakugomezgeka nadi.—Ŵerengani Chivumbuzi 15:4.
16, 17. (a) Ntchifukwa wuli sonu tikamba so cha kuti Ohola ndi Oholiba amiya Matchalitchi nga Chikhristu? (Wonani bokosi lakuti “Mahuli Ngaŵi nga Paubali.”) (b) Kumbi ndi fundu nizi zo tisambira mu Ezekiyeli chaputala 16 ndi 23?
16 Kuziya mu mazu nganthazi kweniso ngatali ngo Yehova wangukamba mu Ezekiyeli chaputala 16, iyu watitisambiza fundu yakukhumbika ukongwa yakukwaskana ndi fundu zaki za urunji, urunji waki kweniso lisungu laki. Venivi ndivu so wakukamba mu Ezekiyeli chaputala 23. Akhristu auneneska mazuŵa nganu, avwiya uthenga wakuvwika umampha wo Yehova wakukamba wakukwaskana ndi uhuli wa ŵanthu ŵaki. Tikhumbika cha kumuguŵiska Yehova nge mo wanguchitiya Yuda ndi Yerusalemu. Mwaviyo, tikhumbika kukhwecha mtundu wewosi wakusopa angoza. Vinthu venivi visazgapu jalidu la mbunu kweniso vinthu vakuliŵavu, vo vingaŵa mtundu unyaki wakusopa angoza. (Mate. 6:24; Ako. 3:5) Tikhumbika kulutirizga kumuwonga Yehova chifukwa wakulongo lisungu pakuweziyapu kusopa kwauneneska mu mazuŵa nganu ngakumaliya ndipuso kuti wazomerezengi cha kuti kufipiskiki! Iyu wakuchita “phanganu lamuyaya” ndi Isirayeli wauzimu ndipu phanganu lenili lazamumalapu cha chifukwa yiwu azamulekapu cha kuja akugomezgeka pamwenga kuchita uhuli wauzimu. (Ezeki. 16:60) Mwaviyo, tiyeni tilutirizgi kuwukoleska mwaŵi wo tenawu wakukoliyana ndi ŵanthu akutowa aku Yehova mazuŵa nganu.
17 Kweni kumbi vo Yehova wangukamba vakususkana ndi mahuli ngo ngakonkhoseka mu buku la Ezekiyeli, vititisambizanji vakukwaskana ndi “huli likulu,” lo ndi Babiloni Mukulu? Tiyeni tiwoni.
‘Wazamusanirika so Cha’
18, 19. Kumbi mahuli ngo ngakonkhoskeka mu Ezekiyeli, ndi huli lo likonkhoskeka mu Chivumbuzi ngayanana wuli?
18 Yehova wasintha cha. (Yako. 1:17) Iyu weche kuchitinkha chisopa chaboza. Mwaviyo, tizizwa cha kuti cheruzgu cho wangupereka ku mahuli ngo ngakonkhoskeka mu buku la Ezekiyeli, ndichu so wazamupereka ku “huli likulu” lo likambika mu buku la Chivumbuzi.
19 Mwakuyeruzgiyapu, wonani kuti chilangu cho mahuli nga mu uchimi waku Ezekiyeli ngangulonde chingutuliya kwaku Yehova chayiku cha, kweni chingutuliya ku ŵanthu a mu vyaru vo ŵanthu aku Chiuta ambula kugomezgeka achitanga nawu ureŵi wauzimu. Mwakuyanana ŵaka, chisopa chaboza chisuskika chifukwa chakuchita ureŵi wauzimu ndi “mafumu nga charu chapasi.” Kumbi chilangu chaki chazamutuliya pani? Bayibolu likamba kuti andali ŵenaŵa ‘azamutinkha huli lo, ndipu azakulisakaza ndi kulileka le nkhuli. Azamukurya mnofu waki ndi kuliwotche limu ndi motu.’ Ntchifukwa wuli maboma nga charu ichi ngazamuchita venivi? Chifukwa Chiuta ‘wazamuŵika venivi mumitima yawu kuti ngachiti vo iyu waŵanaŵana.’—Chivu. 17:1-3, 15-17.
20. Kumbi ntchinthu wuli cho chilongo kuti cheruzgu cha Babiloni chazamukuŵa chakumaliya?
20 Mwaviyo, Yehova wazamugwiriskiya ntchitu maboma nga charu ichi kuti ngapereki cheruzgu chaki pa visopa vosi vaboza kusazgapu visopa vinandi vo vikamba kuti vachikhristu. Cheruzgu ichi chazamukuŵa chakumaliya, pazamuŵavi chigowoke kweniso mwaŵi wakuti visopa visinthi nthowa zawu. Buku la Chivumbuzi likamba kuti Babiloni ‘wazamusanirika so cha.’ (Chivu. 18:21) Angelu aku Chiuta azamukondwa ukongwa ndi kubwangandulika kwaki ndipu azamukamba kuti: “Thamikani Ya! Josi lakutuliya ku huli lo lilutirizga kukwera muyaya mpaka muyaya.” (Chivu. 19:3) Cheruzgu ichi chazamukuŵa chakumaliya. Chiuta wazamuzomereza so cha kuti chisopa chaboza chiŵeku ndi kutimbanyizga kusopa kwa uneneska. Asani Babiloni wazilonde cheruzgu chakofya ndi kubwangandulika, vazamukuŵa nge josi lituwa kwaku iyu ndi kukwera muyaya mpaka muyaya.
Vyaru vo Babiloni Mukulu wachita navu uhuli kwa nyengu yitali ndipuso kuvilongozga, vazakumuyukiya ndi kumubwanganduwa (Wonani ndimi19, 20)
21. Kumbi kubwangandulika kwa chisopa chaboza, kwazamukuŵa kwamba kwa nyengu niyi, nanga nyengu yeniyi yazamumala ndi vinthu wuli?
21 Asani maboma nga charu ichi ngaziyukiya Babiloni Mukulu, ngazamukuŵa kuti ngapereka cheruzgu chaku Chiuta, vo vazamuwovya kuti khumbu laku Yehova lifiskiki. Kwenuku kwazamukuŵa kwamba kwa chisuzgu chikulu cho chechendachitikepu kali. (Mate. 24:21) Chisuzgu chikulu chazamumala ndi Aramagedoni yo ndi nkhondu yaku Yehova ndipu yazamutuzgapu vinthu viheni va mu nyengu yinu. (Chivu. 16:14, 16) Nge mo mitu yakunthazi ya buku ili yikonkhoskiyengi, buku la Ezekiyeli likonkhoska vinandi vakukwaskana ndi mo chisuzgu chikulu chazamuchitikiya. Kweni kumbi ndi fundu nizi zo tisambira mu Ezekiyeli chaputala 16 ndi 23, zo tikhumbika kuzikumbuka ndi kuzigwiriskiya ntchitu?
Maboma nga charu ichi ngazamuyukiya Babiloni Mukulu kuti ngapereki cheruzgu chaku Chiuta (Wonani ndimi 21)
22, 23. Kumbi nkhani za mahuli zo zikonkhoskeka mu buku la Ezekiyeli ndi Chivumbuzi, zititikwaska wuli pa uteŵeti widu wakupaturika?
22 Satana watanja kutimbanyizga ŵanthu wo asopa mwauneneska. Palivi cho chitimukondwesa ukongwa kuluska kutipatuska pakusopa kwa uneneska kweniso asani tayamba kuchita vinthu vakuyanana ndi vo mahuli ngo ngakonkhoskeka mu buku la Ezekiyeli ngachitanga. Titenere kukumbuka kuti Yehova walekere cha wo atimugarukiya pakusopa kwauneneska kweniso wo achita vinthu mwambula kugomezgeka. (Nume. 25:11) Tikhumbika kuŵa kutali ndi chisopa chaboza, ‘mwakuleka kuko chechosi’ cho Chiuta watichiwona kuti ntchakufipiskika. (Yesa. 52:11) Mwaviyo, tiseleriyapu cha pa viwawa va ndali vo vichitika mucharu chakugaŵikana ichi. (Yoha. 15:19) Tichitaku cha vinthu vakulongo kuti titanja ukongwa charu chidu, chifukwa tiwona kuti kuchita viyo, kuyanana ŵaka ndi kusopa kwaboza ko Satana wachiska.
23 Kuluska vosi, titenere kukumbuka kuti ndi mwaŵi ukulu kusopa Yehova munyumba yaki yakutowa yauzimu yakusopiyamu. Mwaviyo, po tikondwa ndi ndondomeku yakuzirwa iyi, mphanyi tinguŵikiyapu mtima kuti tileki kuchitaku chechosi chakukwaskana ndi chisopa chaboza kweniso uhuli waki!