Ntchifukwa Wuli Pacharu Pachitika Vinthu Viheni Ndipuso Masuzgu?

Kanandi asani pachitika masuzgu, munthu weyosi wafumba kuti, “Ntchifukwa wuli venivi vachitika?” Kweni tikondwa ukongwa kuziŵa kuti Bayibolu limuka fumbu lenili!

1. Kumbi Satana wanguchitanji kuti pacharu payambi kuchitika vinthu viheni?

Satana Dyaboli wangugarukiya Chiuta. Iyu wakhumbanga kuti walamuliyengi. Mwaviyo, wangunyenga Adamu ndi Heva kuti nawu agarukiyi Chiuta. Satana wangukamba boza kwaku Heva kuti wamupusisi. (Genezesi 3:1-5) Boza lo wangukamba linguchitiska kuti Heva wayambi kuŵanaŵana kuti Yehova watiŵanola chinthu chinyaki chamampha. Vo Satana wangukamba vang’anamuwanga kuti ŵanthu angaja umoyu wakukondwa asani angaleka kuvwiya Chiuta. Satana wangukambiya Heva kuti wafwengi cha, ndipu lenili ndilu lenga boza lakwamba. Mwaviyo, mphakuvwika kuti Bayibolu likamba Satana kuti “ngwaboza ndipuso ndi wisi wa boza.”—Yohane 8:44.

2. Kumbi Adamu ndi Heva angusankha kuchitanji?

Yehova wangupaska Adamu ndi Heva chechosi. Iyu wanguŵakambiya kuti angarya vipasu va muchimiti chechosi cha mumunda wa Edeni kupatuwaku va muchimiti chimoza. (Genezesi 2:15-17) Kweni yiwu angusankha kurya chipasu cha muchimiti cho wanguŵakaniza. Heva “wangupontho chipasu cha muchimiti cho ndi kurya.” Pavuli paki, Adamu “nayu wangurya.” (Genezesi 3:6) Wosi ŵaŵi angumuvwiya cha Chiuta. Chifukwa chakuti Adamu ndi Heva ŵenga akufikapu, venga vakusuzga cha kwaku yiwu kuchita cho ntchakwenere. Kweni chifukwa chakuti angusankhiya dala kuleka kuvwiya Chiuta, yiwu angubuda ndipuso angukana ulamuliru waki. Vo yiwu angusankha vinguyambisa masuzgu ngakulu.—Genezesi 3:16-19.

3. Kumbi tikumana ndi masuzgu wuli chifukwa cha vo Adamu ndi Heva angusankha?

Adamu ndi Heva ŵati asankha kuleka kuvwiya Chiuta angubuda, ndipu ubudi wenuwu angupasiyaku so ŵana ŵawu. Pakukamba zaku Adamu, Bayibolu lititi: ‘Ubudi ukusere mucharu kuziya mwa munthu yumoza, ndipu nyifwa yikuza chifukwa cha ubudi, nyifwa nayu yikusapaliya ku ŵanthu wosi chifukwa wosi akubuda.’—Aroma 5:12.

Tisuzgika pa vifukwa vakupambanapambana. Nyengu zinyaki tisuzgika chifukwa cha kusankha uheni vinthu. Nyengu zinyaki tisuzgika chifukwa cha vinthu viheni vo ŵanthu anyaki asankha. Kweniso nyengu zinyaki tikumana ndi masuzgu chifukwa chakuti te pa malu ngaheni ndipuso nyengu yiheni.—Ŵerengani Wakutawula 9:11.

SAMBIRANI VINANDI

4. Kumbi ndiyani yo wachitiska masuzgu ngo tikumana nangu?

Ŵanthu anandi agomezga kuti charu che mumanja mwaku Chiuta. Kumbi venivi vauneneska? Woneriyani VIDIYO.

VIDIYO: Kumbi Ndiyani yo Walamuliya Charu? (1:24)

Ŵerengani Yakobe 1:13 ndipuso 1 Yohane 5:19, pavuli paki kambiskanani fumbu ili:

• Kumbi Chiuta ndiyu wachitiska masuzgu ndipuso vinthu viheni?

5. Wonani vo vachitika kutuliya po Satana wakwambiya kulamuliya

VIDIYO: Kachigaŵa ka Vidiyo Yakuti Ntchifukwa Wuli Chiuta Wazomereza Kuti Tisuzgikengi? (3:07)

Ŵerengani Genezesi 3:1-6, pavuli paki kambiskanani mafumbu yanga:

• Kumbi ndi boza wuli lo Satana wangukamba?—Wonani vesi 4 ndi 5.

• Kumbi Satana wangukambanji vo vilongo nge kuti Yehova waŵanolanga chinthu chinyaki chamampha ŵanthu?

• Kumbi vo Satana wangukamba vilongo kuti taŵanthu tikhumbika kulamulika ndi Yehova kuti tikondwengi?

Ŵerengani Wakutawula 8:9, pavuli paki kambiskanani fumbu ili:

• Kumbi ntchinthu wuli cho chachitika kutuliya po Yehova wakuleke kulamuliya charu?

1. Adamu ndi Heva ŵenga akufikapu kweniso ajanga mu Paradayisu. Kweni yiwu anguvwiya Satana ndipu angugarukiya Yehova

2. Adamu ndi Heva ŵati agarukiya Chiuta, ubudi, masuzgu ndi nyifwa vingusapaliya pacharu

3. Yehova watuzgengepu ubudi, masuzgu ndipuso nyifwa. Ŵanthu azamuja so akufikapu kweniso azamuja mu Paradayisu

6. Yehova vitimuŵaŵa ukongwa asani tisuzgika

Kumbi Chiuta vitimuŵaŵa asani tisuzgika? Wonani vo Fumu Davidi ndipuso wakutumika Peturo angulemba. Ŵerengani Salimo 31:7 ndipuso 1 Peturo 5:7, pavuli paki kambiskanani fumbu ili:

• Kumbi mutuvwa wuli mumtima kuziŵa kuti Yehova wawona masuzgu ngo mukumana nangu kweniso kuti watikuŵanaŵaniyani?

KUMBI MWASAMBIRANJI?

Satana Dyaboli kweniso ŵanthu ŵaŵi akwamba ndiwu akwambisa masuzgu ngo tikumana nangu. Chiuta vitimuŵaŵa ukongwa asani tisuzgika ndipu watuzgengepu masuzgu ngosi pambula kuswera yapa.

Kuweriyamu

• Kumbi ndi boza wuli lo Satana Dyaboli wangukambiya Heva?

• Kumbi tikumana ndi masuzgu wuli chifukwa cha kugaruka kwaku Adamu ndi Heva?

• Kumbi tiziŵa wuli kuti Yehova vitimuŵaŵa ukongwa asani tisuzgika?

FUFUZANI

Wonani vo mazu ngakuti ubudi ngang’anamuwa.

“Kumbi Ubudi Ntchinthu Wuli?” (Nkhani ya pa webusayiti)

Ŵerengani vinandi vakukwaskana ndi nkhani yo Satana Dyaboli wangwambisa mumunda wa Edeni.

“Ntchifukwa Wuli Chiuta Wazomereza Kuti Tisuzgikengi?” (Nkhani ya mu Chigongwi cha Alinda)

Wonani kwamuka kwakupembuzga kwa fumbu lakusuzga ukongwa.

“Ntchifukwa Wuli Ŵanthu Anandi Angubayika ndi Ulamuliru wa Nazi ku Germany? Nanga Ntchifukwa Wuli Chiuta Wanguzomereza Kuti Venivi Vichitiki?” (Nkhani ya pa webusayiti)

Wonani vo munthu munyaki wangusambira chifukwa cha masuzgu ngo wakumananga nangu.

Nde Ndija Cha Sonu (5:09)