SAMBIRU 16
Vinthu vo Yesu Wanguchita po Wenga Pacharu
Ŵanthu anandi awona kuti Yesu wenga mwana yo wangusuzgika ukongwa, anyaki atiti wenga mchimi wazeru ndipu anyaki akamba kuti wenga waka munthu yo wengaku pacharu kweni wakufwa. Kweni kumbi pe vinyaki vo tingasambira kwaku iyu asani tiwona umoyu wo wajanga we pacharu chapasi? Mu sambiru ili, tiwonengi vinthu vinyaki vakukhumbika ukongwa vo Yesu wanguchita pa nyengu yo wenga pacharu chapasi kweniso mo venivi vingakuwovyiyani.
1. Kumbi ndi ntchitu yakukhumbika ukongwa niyi yo Yesu wachitanga?
Ntchitu yikulu yo Yesu wachitanga yenga ya ‘kupharazga uthenga wamampha wa Ufumu waku Chiuta.’ (Ŵerengani Luka 4:43.) Iyu wapharazganga uthenga wamampha wakuti Chiuta wajalikiskengi ufumu pamwenga kuti boma lo lazamumalisa masuzgu ngosi nga ŵanthu.a Yesu wanguchita mphwayi cha kupharazga uthenga wamampha wenuwu ku ŵanthu kwa vyaka vitatu ndi hafu.—Mateyu 9:35.
2. Ntchifukwa wuli Yesu wachitanga vakuziziswa?
Bayibolu likonkhoska “ntchitu zanthazi, vakuziziswa ndipuso visimikizu vo Chiuta wanguchita [kuziya mwaku Yesu].” (Machitidu 2:22) Chiuta wangupaska nthazi Yesu zakuchitiya vakuziziswa nge kulamuliya vinthu va muchilengedu, kuryisa ŵanthu masauzandi mwakuziziswa, kuchizga akutama ndipuso kuyuska akufwa. (Mateyu 8:23-27; 14:15-21; Mariko 6:56; Luka 7:11-17) Vakuziziswa vo Yesu wachitanga vilongore limu kuti Chiuta ndiyu wangumutuma. Vakuziziswa venivi valongonga so kuti Yehova we ndi nthazi zakumalisiya masuzgu ngidu ngosi.
3. Kumbi umoyu wo Yesu wajanga pacharu utitisambizanji?
Yesu wavwiyanga Yehova pa chechosi. (Ŵerengani Yohane 8:29.) Chinanga kuti ŵanthu anyaki amususkanga, Yesu wangulutirizga kuvwiya Awisi mpaka po wangufwiya. Vo wanguchita vilongo kuti ŵanthu angamuteŵete mbwenu Chiuta chinanga kuti angakumana ndi masuzgu ngakulu. Mwaviyo, Yesu wakutisiliya “chakuwoniyapu kuti [tilondongi] maphazi ngaki mwakugomezgeka.”—1 Peturo 2:21.
SAMBIRANI VINANDI
Wonani mo Yesu wapharazgiyanga uthenga wamampha ku ŵanthu ndipuso vakuziziswa vo wachitanga.
4. Yesu wapharazganga uthenga wamampha
Yesu wayendanga wapasi maulendu ngatalingatali mumisewu yafuvu kuti wakapharazgi uthenga wamampha ku ŵanthu anandi. Ŵerengani Luka 8:1, pavuli paki kambiskanani mafumbu yanga:
Kumbi Yesu wapharazgiyanga ŵanthu wo azanga kwaku iyu pe kuti azivwisiyi vo wasambizanga?
Kumbi Yesu wachitanga wuli kuti wasaniyengi ŵanthu?
Chiuta wangukambiya limu kuti Mesiya wazamupharazga uthenga wamampha. Ŵerengani Yesaya 61:1, 2, pavuli paki kambiskanani mafumbu yanga:
Kumbi Yesu wangufiska wuli uchimi wenuwu?
Kumbi muwona kuti ŵanthu akhumbika kuvwa uthenga wamampha wenuwu mazuŵa nganu?
5. Yesu wasambizanga vinthu vakukhumbika ukongwa
Kusazgiyapu pa uthenga wamampha wa Ufumu wo wapharazganga, Yesu wasambizanga so fundu zo zingawovya ŵanthu pa umoyu wawu. Wonani fundu zinyaki zo wangukamba pa Upharazgi wa Paphiri. Ŵerengani Mateyu 6:14, 34 ndi 7:12, pavuli paki kambiskanani mafumbu yanga:
Kumbi ndi fundu nizi zakovya zo Yesu wangukamba mu mavesi ngenanga?
Kumbi muwona kuti fundu zenizi zingatiwovya mazuŵa nganu?
6. Yesu wachitanga vakuziziswa
Yehova wangupaska nthazi Yesu kuti wachitengi vakuziziswa. Kuti muwoni chinyaki mwa vakuziziswa vo Yesu wanguchita, ŵerengani Mariko 5:25-34 pamwenga woneriyani VIDIYO. Pavuli paki kambiskanani mafumbu ngo nge mumphata.
Nge mo tawone mu vidiyo iyi, kumbi munthukazi yo watamanga wagomezganganji?
Kumbi ntchinthu wuli cho chakukondwesani ukongwa mu chakuziziswa ichi?
Ŵerengani Yohane 5:36, pavuli paki kambiskanani fumbu ili:
Kumbi vakuziziswa vo Yesu wachitanga ‘vingupereka ukaboni’ wuli wakukwaskana ndi iyu?
Kumbi muziŵa?
Nkhani zosi zakukwaskana ndi Yesu zisanirika mumabuku nganayi nga mu Bayibolu ngo ngadanika kuti Uthenga Wamampha ndipu mabuku ngaki ndi Mateyu, Mariko, Luka ndi Yohane. Weyosi yo wakulembaku Uthenga Wamampha wakulemba vinthu vinyaki vakupambanaku ndi vo munyaki wakulemba. Kweni asani tiŵerenga nkhani zosi zenizi mu Bayibolu, zititiwovya kuti tivwisi umampha mo Yesu wajaliyanga pacharu.
MATEYU
ndiyu wangwamba kulemba buku la Uthenga Wamampha. Nkhani za mu buku ili zikamba ukongwa vo Yesu wasambizanga, ukongwa vakukwaskana ndi Ufumu waku Chiuta.
MARIKO
ndiyu wakulemba buku lifupi ukongwa pa mabuku ngosi nga Uthenga Wamampha. Buku ili, le ndi nkhani zakukondwesa ukongwa ndipuso zakovya.
LUKA
wakulemba nkhani zo zilongo kuti Yesu wawonanga kuti kupemphera nkhwakukhumbika ukongwa, ndipuso zo zikonkhoska mo Yesu wachitiyanga vinthu mwaulemu ndi anthukazi.
YOHANE
wavumbuwa vinandi vakukwaskana ndi mijalidu yaku Yesu ndipu wakonkhoska vinthu vinandi vo Yesu wakambiskananga ndi mabwezi ngaki ngapamtima ndipuso ŵanthu anyaki.
ŴANTHU ANYAKI AKAMBA KUTI: “Yesu wenga Mesiya cha kweni wenga waka munthu wamampha.”
Yimwi muwona wuli?
KUMBI MWASAMBIRANJI?
Yesu wapharazganga vakukwaskana ndi Ufumu waku Chiuta, wachitanga vakuziziswa ndipu wavwiyanga Yehova pa chechosi.
Kuweriyamu
Kumbi ndi ntchitu yakukhumbika ukongwa niyi yo Yesu wachitanga po wenga pacharu?
Kumbi vakuziziswa vo Yesu wachitanga vilongonji?
Kumbi ndi fundu nizi zakovya zo Yesu wasambizanga?
FUFUZANI
Kumbi ndi nkhani niyi yo Yesu wayikambanga ukongwa?
Wonani chifukwa cho titenere kugomezge kuti Yesu wachitanga nadi vakuziziswa.
“Kumbi Mungasambiranji pa Vakuziziswa vo Yesu Wachitanga?” (Chigongwi cha Alinda, July 15, 2004)
Ŵerengani nkhani iyi kuti muwoni mo munthu munyaki wangusinthiya wati wawona mo Yesu wachitiyanga vinthu mwachanju ndi ŵanthu.
“Ndenga Wakujikuzga Ukongwa” (Chigongwi cha Alinda, November 1, 2014)
Wonani mundandanda wa vinthu vakukhumbika ukongwa vo Yesu wanguchita mwakukoliyana ndi nyengu yo vinguchitikiya.
a Mu Sambiru 31-33 ndimu musambirengi vinandi vakukwaskana ndi Ufumu waku Chiuta.