Kumbi Vikondwereru Vosi Vikondwesa Chiuta?

Yehova wakhumba kuti tikondwengi ndi umoyu kweniso kuti nyengu zinyaki tikondwengi ndi vinthu vinyaki. Kweni kumbi ndi vikondwereru vosi ndipuso maholidi ngosi ngo ngatimukondwesa? Kumbi tingalongo wuli kuti titanja Yehova pa nkhani yeniyi?

1. Ntchifukwa wuli Yehova wakondwa cha ndi vikondwereru vinandi vo vichitika?

Mungazizwa kuziŵa kuti vikondwereru vinandi vikoliyana cha ndi malemba ndipuso vikwamba ndi ŵanthu wo asopanga angoza. Mwaviyo, tingakamba kuti vikondwereru venivi vikutuliya ku visopa vaboza. Mwakuyeruzgiyapu, vikondwereru vinyaki vikoliyana ukongwa ndi kugomezga vamizimu kweniso chisambizu chakuti mzimu utufwa cha asani munthu wafwa. Vikondwereru vinyaki vikoliyana ukongwa ndi vamasenga kweniso kugomezga chiuta wa mwaŵi. (Yesaya 65:11) Ndichu chifukwa chaki Yehova watcheŵeska ŵanthu ŵaki kuti: “Mujipatuwi, kweniso lekani kukwaska chinthu chakufipiskika.”—2 Akorinto 6:17.a

2. Kumbi Yehova wativiwona wuli vikondwereru vo vitumbika ukongwa ŵanthu?

Yehova watititcheŵeska kuti tikhumbika cha ‘kuthemba ŵanthu.’ (Ŵerengani Yeremiya 17:5.) Maholidi nganyaki ngatumbika akulamuliya kweniso asilikali. Maholidi nganyaki ngaja ngakukondwere mbendera ndipuso vinthu vinyaki va boma kweniso zuŵa lo charu chingusaniriya wanangwa wakujilamuliya. (1 Yohane 5:21) Kweni pa maholidi nganyaki, ŵanthu akondwere vakuchitika vandali kweniso vamawupu ngo ngavikiliya ŵanthu. Kumbi Yehova wangavwa wuli asani tingapereka ulemu ukulu ku munthu pamwenga wupu wo uchiska vinthu vo vikoliyana cha ndi vo Iyu wakhumba?

3. Kumbi ndi vinthu nivi vo vichitiska kuti Yehova waleki kukondwa ndi vikondwereru vinyaki?

Bayibolu likaniza ‘kumwa mwakujumpha mwesu, kuchita maphwandu nga viwawa kweniso kumwa mwamaphara.’ (1 Peturo 4:3) Pa vikondwereru vinyaki, ŵanthu achita vinthu mwambula kujiko kweniso achita vinthu vabwekabweka. Kuti tilutirizgi kuja pa ubwezi ndi Yehova, tikhumbika cha kuchitaku vinthu venivi chinanga nkhamanavi.

SAMBIRANI VINANDI

4. Kanani vikondwereru vo vileka kutumbika Yehova

Ŵerengani Aefeso 5:10, pavuli paki kambiskanani mafumbu yanga:

• Kumbi ndi vinthu wuli vo tikhumbika kusimikiziya dankha asani tikhumba kukondweriyaku holidi?

• Kumbi ndi maholidi nanga ngo ngakutchuka kunu kwidu?

• Kumbi muwona kuti maholidi ngenanga ngatumbika Yehova?

Mwakuyeruzgiyapu, kumbi mukujifumbapu kuti Chiuta watuvwa wuli asani ŵanthu akondwere mazuŵa ngawu ngakuwiya? Mu Bayibolu, palivi po pazumbulika mteŵeti waku Yehova yo wangukondweriyapu zuŵa laki lakuwiya. Kweni muzulimbika waka ŵanthu ŵaŵi wo angukondwere mazuŵa ngawu ngakuwiya, ndipu wosi asopanga Yehova cha. Ŵerengani Genezesi 40:20-22 ndipuso Mateyu 14:6-10. Pavuli paki kambiskanani mafumbu yanga:

• Kumbi ndi vinthu vakuyanana nivi vo vinguchitika pa vikondwereru ivi vakukumbukiya zuŵa lakuwiya?

• Mwakukoliyana ndi vo taŵerenga pa mavesi yanga, kumbi muwona kuti Yehova watuvwa wuli asani ŵanthu akondwere mazuŵa ngakuwiya?

Panyaki mungajifumba mbwenu kuti, ‘Kumbi Yehova wangaguŵa asani ndingasanirika pa chikondwereru chakukumbukiya zuŵa lakuwiya pamwenga pa chikondwereru chinyaki chechosi cho chileka kukoliyana ndi malemba?’ Ŵerengani Ekisodo 32:1-8. Pavuli paki, woneriyani VIDIYO ndi kukambiskana mafumbu yanga.

VIDIYO: Maholidi Ndipuso Vikondwereru Vo Vileka Kukondwesa Chiuta (5:07)

• Ntchifukwa wuli tikhumbika kusimikiziya dankha asani Yehova wangakondwa navu?

• Kumbi tingachita wuli venivi?

Vo vingatiwovya kuziŵa asani chikondwereru chitimukondwesa cha Chiuta

• Kumbi chikutuliya mumalemba? Kuti muziŵi, fufuzani mo chikwambiya.

• Kumbi chitumbika ukongwa munthu, wupu pamwenga vinthu vinyaki va boma? Titumbika ukongwa Yehova kuphara chechosi, ndipu tigomezga kuti iyu pe ndiyu wamalisengi masuzgu pacharu chosi.

• Kumbi miyambu yaki ndipuso vinthu vo vichitika visuskana ndi fundu za mu Bayibolu? Tikhumbika kuja akutowa pa masu paku Chiuta.

5. Wovyani ŵanthu anyaki kuti atumbikengi vo yimwi mugomezga

VIDIYO: Mukonkhoskengi Mwazeru Vo Mugomezga (2:01)

Ŵerengani Mateyu 7:12, pavuli paki kambiskanani mafumbu yanga:

• Mwakukoliyana ndi vesi ili, kumbi mukhumbika kukaniza abali ŵinu kuti aleki kuchitaku holidi yinyaki?

• Kumbi mungachita wuli kuti musimikiziyi abali ŵinu kuti mutiŵayanja kweniso kuti mutiŵaŵanaŵaniya chinanga kuti muchitengeku nawu cha chikondwereru chinyaki?

6. Yehova wakhumba kuti tikondwengi

Yehova wakhumba kuti tisaniyengi nyengu yakukondwe ndi ŵanthu a mubanja lidu kweniso mabwezi ngidu. Ŵerengani Wakutawula 8:15, pavuli paki kambiskanani fumbu ili:

• Kumbi vesi ili lilongo wuli kuti Yehova wakhumba kuti tikondwengi?

Yehova wakhumba kuti ŵanthu ŵaki asaniyengi nyengu yakukondwe limoza. Woneriyani VIDIYO kuti muwoni mo venivi vichitikiya pa unganu widu wavyaru.

VIDIYO: Mo Abali ndi Azichi Alongoriyana Chanju pa Unganu Wavyaru (5:40)

Ŵerengani Agalatiya 6:10, pavuli paki kambiskanani mafumbu yanga:

• Kumbi tikhumbika kuchita vikondwereru pe kuti “tichitiyi vamampha ŵanthu”?

• Kumbi ndi nampha po mungakondwa, asani mungachichizgika kupaska munthu chifukwa chakuti kwe holidi pamwenga asani mungamupaska kutuliya pasi pa mtima pa zuŵa linyaki lelosi?

• Akaboni aku Yehova anandi nyengu zinyaki anozge phwandu ŵana ŵawu kweniso atiŵapaska mphasu. Asani namwi mwe ndi ŵana, kumbi ndi vinthu vapade nivi vo mungaŵachitiya?

KUMBI MWASAMBIRANJI?

Yehova wakhumba kuti tisaniyengi nyengu yakukondwe ndi ŵanthu a mubanja lidu kweniso mabwezi ngidu. Kweniso wakhumba kuti tingachitangaku cha vikondwereru vo vileka kumukondwesa.

Kuweriyamu

• Kumbi tingajifumba mafumbu nanga kuti tiziŵi asani chikondwereru chinyaki chitimukondwesa cha Yehova?

• Kumbi tingachita wuli kuti tiwovyi abali ŵidu ndipuso mabwezi ngidu kuti avwisi vo tikusankha pa nkhani ya maholidi?

• Kumbi muziŵa wuli kuti Yehova wakhumba kuti tikondwengi?

FUFUZANI

Wonani maholidi nganyaki ngo Akhristu achitaku cha.

“Ntchifukwa Wuli Akaboni aku Yehova Achitaku cha Maholidi Nganyaki?” (Nkhani ya pa webusayiti)

Wonani vifukwa vinayi vo tigomezge kuti Chiuta wakondwa cha ndi kukondwere zuŵa lakuwiya.

“Ntchifukwa Wuli Akaboni aku Yehova Akondwere Cha Mazuŵa Ngakuwiya?” (Nkhani ya pa webusayiti)

Wonani mo achinyamata wo atanja Yehova atimukondwese pa nyengu ya vikondwereru.

Ndiwi Wakuzirwa Kwaku Yehova (11:35)

Akhristu mamiliyoni nganandi akusankha kuleka kuchitaku Khrisimasi. Kumbi atuvwa wuli chifukwa cha vo akusankha?

“Akondwa Ukongwa Chinanga Kuti Achitaku cha Khrisimasi” (Chigongwi cha Alinda, December 1, 2012)