SAMBIRU 47
Kumbi Mwe Akunozgeka Kubatizika?
Mwasambira vinandi vakukwaskana ndi Yehova kutuliya po mukwambiya kusambira Bayibolu. Tikayika cha kuti mukusintha vinthu vinyaki pa umoyu winu mwakukoliyana ndi vo mukusambira. Kweni panyaki pe chinthu chinyaki cho chitikutondekesani kujipereka kwaku Yehova ndi kubatizika. Mu sambiru ili tiwonengi vinthu vinyaki vo vichitiska kuti ŵanthu anandi atondekengi kubatizika kweniso mo yimwi mungamaliyana navu.
1. Kumbi mukhumbika kuziŵa vinthu vinandi wuli mwechendabatiziki?
Kuti mubatiziki mukhumbika dankha ‘kuziŵa umampha uneneska.’ (1 Timote 2:4) Kumbi venivi ving’anamuwa kuti mukhumbika dankha kuziŵa mo mungamukiya fumbu lelosi lo ŵanthu angakufumbani lakukwaskana ndi Bayibolu? Awa! Chinanga mbakhristu wo akubatizika kali, nawu alutirizga mbwenu kusambira. (Akolose 1:9, 10) Kweni mukhumbika kuziŵa dankha fundu zikuluzikulu za mu Bayibolu. Ŵara mumpingu akuwovyeningi kuziŵa asani muziŵa vakukwana.
2. Kumbi ndi vinthu wuli vo mukhumbika kuchita mwechendabatiziki?
Mwechendabatiziki mukhumbika dankha ‘kulapa ndi kung’anamuka.’ (Ŵerengani Machitidu 3:19.) Ivi ving’anamuwa kuti mukhumbika kujivwiya chitima kutuliya pasi pa mtima chifukwa cha maubudi ngo mukuchitapu ndipuso kumupempha Yehova kuti wakugowokiyeni. Mukhumbika so kukana kuchita vinthu viheni ndipuso kusimikiza mtima kuti muchitengi vinthu vo Yehova wakondwa navu. Kusazgapu pa vinthu venivi, mukhumbika so kuchitiya limoza vinthu vinyaki ndi mpingu, nge kuwungana kweniso kupharazga nge mupharazgi wambula kubatizika.
3. Ntchifukwa wuli mukhumbika cha kopa kubatizika?
Ŵanthu anyaki atopa kuti asani angabatizika afiskengi cha kuchita vo amulayizga Yehova. Mbuneneska nadi kuti nyengu zinyaki munangisengi, ndipu chinanga mbanthulumi kweniso anthukazi akugomezgeka wo azumbulika mu Bayibolu, nawu anangisanga. Kweni Yehova waziŵa kuti ŵanthu wo atimusopa anganangisa vinthu chifukwa mbambula kufikapu. (Ŵerengani Salimo 103:13, 14.) Iyu wakondwa asani muyesesa kuchita vosi vo mungafiska ndipu wakuwovyeningi! Yehova watitisimikiziya kuti palivi cho ‘chingatipatuska ku chanju chaki.’—Ŵerengani Aroma 8:38, 39.
SAMBIRANI VINANDI
Wonani mo kumuziŵa umampha Yehova kweniso kuzomera chovyu chaki kungakuwovyiyani kumalana ndi chinthu chechosi cho chingakutondekesani kubatizika.
4. Muziŵeni umampha Yehova
Kumbi mukhumbika kuziŵa vinthu vinandi wuli vakukwaskana ndi Yehova mwechendabatiziki? Kuti mumuyanjengi Yehova kweniso kuti mumukondwesengi, mukhumbika kumuziŵa umampha ukongwa. Woneriyani VIDIYO kuti muwoni mo ŵanthu anyaki wo asambira Bayibolu achitiya venivi. Pavuli paki kambiskanani fumbu lo le mumphata.
Nge po tawone mu vidiyo, kumbi ndi vinthu wuli vo vinguwovya ŵanthu anyaki kuti anozgeke kubatizika?
Ŵerengani Aroma 12:2, pavuli paki kambiskanani mafumbu yanga:
Kumbi yilipu fundu ya mu Bayibolu yo mukayikiya pamwenga mukayika kuti Akaboni aku Yehova asambiza uneneska?
Asani ndi viyo, kumbi ntchinthu wuli cho mungachita?
5. Malanani ndi vinthu vo vingakutondekesani kubatizika
Weyosi wakumana ndi masuzgu asani wasankha kuti wajipereki kwaku Yehova ndi kubatizika. Kuti muwoni chakuwoniyapu, woneriyani VIDIYO, ndipu pavuli paki kambiskanani mafumbu ngo nge mumphata.
Nge po tawone mu vidiyo, kumbi ndi masuzgu wuli ngo Narangerel wangukumana nangu wati wasankha kuteŵete Yehova?
Kumbi kwanja Yehova kungumuwovya wuli kuti wamalani ndi masuzgu ngenanga?
Ŵerengani Nthanthi 29:25 ndipuso 2 Timote 1:7, pavuli paki kambiskanani fumbu ili:
Kumbi ntchinthu wuli cho chititiwovya kuja ndi chiganga kuti timalani ndi vinthu vo vingatitondekesa kubatizika?
6. Yehova wakuwovyeningi
Yehova wakuwovyeningi kuti muchitengi vinthu vo vitimukondwesa. Woneriyani VIDIYO, pavuli paki kambiskanani mafumbu ngo nge mumphata.
Nge po tawone mu vidiyo, ntchifukwa wuli yo wasambiranga Bayibolu watondekanga kubatizika?
Kumbi ndi vinthu wuli vo wangusambira vo vingumuwovya kuti wamugomezgengi ukongwa Yehova?
Ŵerengani Yesaya 41:10, 13, pavuli paki kambiskanani fumbu ili:
Ntchifukwa wuli mungasimikiza mtima kuti mufiskengi layizgu lo mungakamba pakujipereka kwaku Yehova?
7. Mumuwongengi ukongwa Yehova chifukwa watikuyanjani
Kuŵanaŵaniya ukongwa mo Yehova watikuyanjiyani, kungakuwovyani kuti mumuwongengi ukongwa kweniso mukhumbisiskengi kumuteŵete mpaka muyaya. Ŵerengani Salimo 40:5, pavuli paki kambiskanani fumbu ili:
Kumbi ndi vitumbiku nivi vakutuliya kwaku Yehova vo yimwi muwonga ukongwa?
Mchimi Yeremiya wamuyanjanga ukongwa Yehova kweniso mazu ngaki, ndipu wawonganga ukongwa mwaŵi wo wenga nawu wakuziŵika ndi zina laku Yehova. Iyu wangukamba kuti: “Mazu nginu nganguja chinthu chakuzayiya ndipuso chakukondwesa mumtima mwangu, chifukwa ndadanika ndi zina linu, yimwi Yehova, Chiuta.” (Yeremiya 15:16) Kambiskanani mafumbu yanga:
Ntchifukwa wuli ndi mwaŵi wapade kuja Kaboni waku Yehova?
Kumbi mukhumba kubatizika kuti muje Kaboni waku Yehova?
Kumbi chilipu cho chitikutondekesani kubatizika?
Nanga kumbi muwona kuti mukhumbika kuchitanji kuti mubatiziki?
ŴANTHU ANYAKI AKAMBA KUTI: “Ndiwona kuti ndingafiska cha kuchita vo munthu wakubatizika watenere kuchita.”
Ndimu namwi muwone?
KUMBI MWASAMBIRANJI?
Yehova wangakuwovyani kuti mumalani ndi chinthu chechosi cho chingakutondekesani kubatizika.
Kuweriyamu
Kumbi mukhumbika kuziŵa vinthu vinandi wuli kutuliya mu Bayibolu mwechendabatiziki?
Kumbi ndi vinthu wuli vo mukhumbika kusintha pa umoyu winu mwechendabatiziki?
Ntchifukwa wuli mukhumbika cha kopa kubatizika?
FUFUZANI
Wonani chifukwa cho mukhumbikiya kusankha kubatizika.
“Kumbi Mwe Akunozgeka Kubatizika?” (Chigongwi cha Alinda, March 2020)
Wonani mo mungamaliyana ndi vinthu vinyaki vo vingakutondekesani kubatizika.
“Ntchinthu Wuli cho Chitinditondekesa Kubatizika?” (Chigongwi cha Alinda, March 2019)
Wonani mo munthu munyaki wangumaliyana ndi masuzgu ngakulungakulu kuti wabatiziki.
Pakwamba, munthu munyaki zina laki Ataa wakhumbanga cha kubatizika. Wonani cho chingumuchitiska kuti wasinthi ndi kusankha chinthu chakukhumbika ukongwa chenichi.