SAMBIRU 37
Vo Bayibolu Likamba pa Nkhani ya Ndalama Ndipuso Ntchitu
Kumbi mukufipapu mtima chifukwa chakusoŵa ndalama ndipuso ntchitu? Vija vakusuzga ukongwa kusaniya vakukhumbika pa umoyu kweniso kusopa Yehova pa nyengu yimoza. Kweni Bayibolu le ndi fundu zo zingatiwovya.
1. Kumbi Bayibolu likambanji pa nkhani ya ntchitu?
Chiuta wakhumba kuti tikondwengi ndi ntchitu yo tigwira. Bayibolu likamba kuti “palivi chinthu chamampha ku munthu kuluska . . . kusaniya likondwa chifukwa cha ntchitu yaki yo wagwira mwaphamphu.” (Wakutawula 2:24) Yehova wagwira ntchitu mwaphamphu. Asani nasi tigwira ntchitu mwaphamphu nge iyu, titimukondwesa ndipuso tituvwa umampha mumtima.
Ntchitu njakukhumbika. Kweni tikhumbika cha kuyiwona kuti njakukhumbika ukongwa kuluska kusopa Yehova. (Yohane 6:27) Yehova watitilayizga kuti wazakutipaska vo tikhumbika pa umoyu asani titimuŵika pamalu ngakwamba.
2. Kumbi ndalama tikhumbika kuziwona wuli?
Chinanga kuti Bayibolu lizomereza kuti “ndalama . . . zivikiliya,” kweni litititcheŵeska so kuti ndalama pe pakuzija zingatiwovyapu cha kuti tikondwengi. (Wakutawula 7:12) Ndichu chifukwa chaki tichiskika kuti tingayanjanga ukongwa ndalama cha, kweni ‘tikhorwengi ndi vo tenavu pasonu panu.’ (Ŵerengani Aheberi 13:5.) Asani tikhorwa ndi vo tenavu, tisuzgikengi maŵanaŵanu cha chifukwa cha mtima wakukhumbisiska kusaniya vinandi. Kweniso kungatiwovya kuti tileki kuto ngongoli zambula kukhumbika. (Nthanthi 22:7) Mtima wakukhorwa ungatiwovya so kuti tilekengi kuchitaku juga kweniso mabizinesi ngo ŵanthu akamba kuti ngakatamusa liŵi.
3. Kumbi tingalongo wuli kuti te akupaska?
Yehova ndi Chiuta wakupaska, ndipu nasi tingamuyezga asani tilongo kuti te “akupaska, [kweniso] akunozgeka kugaŵana ndi” anyidu. (1 Timote 6:18) Tingapereka ndalama zidu kuti ziwovyi pampingu kweniso tingazigwiriskiya ntchitu pakuwovya ŵanthu, ukongwa abali ndi azichi wo akhumbika chovyu. Yehova waŵika ukongwa mtima waki pa unandi wa ndalama zo tipereka cha, kweni mtima wo tilongo asani tipereka. Asani tipereka ndi mtima wosi, tikondwengi kweniso tikondwesengi Yehova.—Ŵerengani Machitidu 20:35.
SAMBIRANI VINANDI
Wonani umampha wakuwona ntchitu mwakwenere kweniso kukhorwa ndi vo tenavu.
4. Mugwirengi ntchitu mwaphamphu kuti mutumbiki Yehova
Chifukwa chakuti te pa ubwezi ndi Yehova, tikhumbika kuwona ntchitu mwakwenere. Woneriyani VIDIYO, pavuli paki kambiskanani mafumbu yanga:
Mu vidiyo yo tawonere, ntchinthu wuli cho chakukondwesani ndi mo Jason wawoniyanga kweniso wagwiriyanga ntchitu?
Nanga ntchinthu wuli cho wanguchita kuti walekengi kuwona ntchitu kuti njakukhumbika ukongwa?
Ŵerengani Akolose 3:23, 24, pavuli paki kambiskanani fumbu ili:
Ntchifukwa wuli nkhani ya mo tiwone ntchitu njakukhumbika ukongwa?
Ntchitu njakukhumbika. Kweni tikhumbika cha kuyiwona kuti njakukhumbika ukongwa kuluska kusopa Yehova
5. Kukhorwa ndi vo te navu nkhwakovya
Ŵanthu anandi atesesa kuti asaniyi ndalama zinandi ukongwa. Kweni Bayibolu lititipaska ulongozgi wakupambana ndi maŵanaŵanu ngenanga. Ŵerengani 1 Timote 6:6-8, ndipu pavuli paki kambiskanani fumbu ili:
Kumbi Bayibolu lititichiska kuti tichitengenji?
Tingakondwa mbwenu chinanga tingaŵa ndi vinthu vimanavi. Woneriyani VIDIYO, pavuli paki kambiskanani fumbu lo le mumphata.
Chinanga kuti mabanja ngo tawona mu vidiyo nge ndi ndalama zimanavi, kumbi ntchinthu wuli cho chitiŵawovya kuti akondwengi?
Kweni wuli asani te ndi ndalama zakukwana kali kweni tikhumba mbwenu zinyaki? Yesu wangukonkhoska ntharika yo yilongo kuti maŵanaŵanu ngaviyo ngaheni ukongwa. Ŵerengani Luka 12:15-21, pavuli paki kambiskanani fumbu ili:
Kumbi mwasambiranji pa ntharika yaku Yesu?—Wonani vesi 15.
Ŵerengani ndi kuyeruzgiya Nthanthi 10:22 ndipuso 1 Timote 6:10. Pavuli paki kambiskanani mafumbu yanga:
Kumbi muwona kuti chakukhumbika ukongwa ndi nichi pakati pa ndalama ndi kuja pa ubwezi ndi Yehova? Ntchifukwa wuli muwona viyo?
Kumbi munthu wakumana ndi masuzgu wuli asani wakukhumbisiska kusaniya ndalama zinandi?
6. Yehova watipaskengi vo tikhumbika
Chivwanu chidu mwaku Yehova chingayeseka asani tisoŵa ndalama kweniso ntchitu. Woneriyani VIDIYO kuti muwoni vo tingachita asani tikumana ndi masuzgu ngenanga, ndipu pavuli paki kambiskanani mafumbu ngo nge mumphata.
Nge po tawone mu vidiyo, kumbi mubali wakumananga ndi masuzgu wuli?
Kumbi ndi vinthu wuli vo wanguchita kuti wamalani ndi masuzgu ngenanga?
Ŵerengani Mateyu 6:25-34, pavuli paki kambiskanani fumbu ili:
Kumbi Yehova walayizga kuti waŵachitiyengenji ŵanthu wo atimuŵika panthazi?
ŴANTHU ANYAKI AKAMBA KUTI: “Ndikhumbika kugwira ntchitu mwaphamphu kuti ndiphwere banja langu. Ndingafiska cha kuluta ku maunganu sabata yeyosi.”
Kumbi ndi lemba nili lo litikusimikiziyani kuti kusopa Yehova ndiku kutenere kuja panthazi nyengu zosi?
KUMBI MWASAMBIRANJI?
Ntchitu kweniso ndalama vakukhumbika, kweni vingatitondekesanga cha kuteŵete Yehova.
Kuweriyamu
Kumbi ntchinthu wuli cho chingakuwovyani kuti muwonengi ntchitu mwakwenere?
Kumbi kukhorwa ndi vo mwe navu kungakuwovyani wuli?
Kumbi mungalongo wuli kuti mugomezga layizgu laku Yehova lakuti waŵapaskengi vakukhumbika ŵanthu ŵaki?
FUFUZANI
Wonani asani Bayibolu likamba kuti ndalama ziheni.
“Kumbi Ndalama ndi Msisi wa Vinthu Vosi Viheni?” (Nkhani ya pa webusayiti)
Wonani vo tingachita ndi ndalama zidu kuti tikondwesi Chiuta.
“Kumbi Bayibolu Likambanji pa Nkhani Yakupaska?” (Nkhani ya pa webusayiti)
Kumbi kuchita juga kulivi suzgu lelosi?
“Vo Bayibolu Likamba pa Nkhani ya Juga” (Jani Masu!, March 2015)
Wonani vo vinguchitiska kuti munthu munyaki yo wenga munkhungu kweniso watchovanga juga wasinthi umoyu waki.
“Ndangayanjanga Ukongwa Maphara nga Mahachi” (Chigongwi cha Alinda, November 1, 2011)