Kumbi Vyeruzgu vo Chiuta Waperekanga Vilongo Kuti Ngwankhaza?

KUTI timuki fumbu ili, tiyeni tikambiskani mwakudumuwa vyeruzgu viŵi va m’Bayibolo vakutuliya kwaku Chiuta. Vyeruzgu venivi ndi Zandi wa mu nyengu yaku Nowa ndipuso kubayika kwa Akanani.

ZANDI WA MU NYENGU YAKU NOWA

VO ANYAKI AKAMBA: “Chiuta wenga wankhaza chifukwa wanguzisa zandi yo wangubaya ŵanthu wosi kupatuwaku Nowa ndi banja laki.”

VO BAYIBOLO LIKAMBA: Chiuta wakukamba kuti: “Ndilivi likondwa mu nyifwa ya muheni, kweni kuti muheni waweku ku nthowa yaki, waŵi ndi umoyu.” (Ezekiele 33:11) Mwaviyo, kubayika kwa ŵanthu aheni mu nyengu yaku Nowa kungumukondwesa cha Chiuta chinanga nkhamanavi. Nanga nchifukwa wuli wanguŵabaya?

Bayibolo limuka kuti Chiuta wanguyeruzga ŵanthu aheni mu nyengu yakali kuti vije ‘nge chenjezgu kwaku wo ambula kopa Chiuta.’ (2 Petro 2:5, 6) Kumbi vo Chiuta wanguchita vilongonji?

Chakwamba, Chiuta wangulongo kuti chinanga kuti vitimukondwesa cha kubaya ŵanthu aheni kweni watinkha ŵanthu ankhaza wo achitiska masuzgu ndipu wazakuŵayimba mulandu pa vo achita. Iyu wazamumaliska uzila urunji ndipuso masuzgu ngosi panyengu yaki.

Chachiŵi, vo Chiuta wanguchita vilongo kuti iyu watcheŵeska dankha ŵanthu mwachanju wechendapereki cheruzgu. Nowa wangutcheŵeska ŵanthu kweni yiwu anguzeleza. Bayibolo likamba kuti: “Ŵanguziŵa kanthu cha mpaka chazandi cho chinguza, ndi chinguŵakukurwiska wosi.”—Mateyu 24:39.

Kumbi Chiuta wanguchita nadi venivi? Hinya. Mwakuyeruzgiyapu, Iyu wangutcheŵeska ŵanthu ŵaki Ayisraele kuti asani achitengi vinthu viheni nge mo mitundu yinyaki yo yinguŵazunguliya yachitiyanga, ndikuti watingi wazomerezgengi kuti arwani ŵawu alondi charu chawu, abwanganduwi msumba wawu wa Yerusalemu ndipuso aŵatole ku ukapolu. Ayisraele angwamba so kuchita vinthu viheni ndipu angufika pakupereka sembi mwana. Kumbi Yehova wanguchitapu kanthu? Hinya, iyu waperekanga cheruzgu pavuli pakuti watumiza achimi kuti akatcheŵeski ŵanthu ŵaki mwakuwerezgawerezga kuti aleki nthowa zawu nyengu yechendamali. Ndipu wangukamba kuti: “Ambuya Chiuta kuti wachita kanthu cha kakuwubendi, kwambura kuti wadankha wakavumbuliya ku ateŵeti ŵaki amchimi.”—Amosi 3:7.

MO VITIKUKWASKIYANI: Vo Yehova wachitanga pakupereka cheruzgu, vititichitiska kuti tije ndi chigomezgu. Tikhumbika kuja ndi chigomezgu kuti kunthazi Chiuta wazamuyeruzga ŵanthu ankhaza wo azisa masuzgu. Bayibolo likamba kuti: “Aheni ŵakadumulikanga . . . Kweni akuzika ndiwu akaharanga charu, akondwengi mu chimangu chikuru.” (Sumu 37:9-11) Kumbi imwi muŵanaŵana wuli za cheruzgu cho Chiuta wazisengi kuti wazituzgepu masuzgu nga ŵanthu? Kumbi tingakamba kuti Chiuta ngwankhaza pamwenga ngwalisungu?

KUBAYIKA KWA AKANANI

VO ANYAKI AKAMBA: “Akanani angubayika mwankhaza ndipu viyanana ŵaka ndi mo ŵanthu abayikiya mwankhaza mazuŵa nganu.”

VO BAYIBOLO LIKAMBA: “Nthowa [zaku Chiuta] zosi za urunji. Chiuta ndiyu mukongorekwa ndi wambura kalema.” (Marangu 32:4) Mwaviyo, vo Chiuta wachita kuti walongo urunji, tingaviyeruzgiyanga cha ndi nkhondu zo ŵanthu achita. Nchifukwa wuli tikamba viyo? Chifukwa chakuti Chiuta wawona nge mo ŵanthu awone cha, pakuti iyu wawona mu mtima.

Mwakuyeruzgiyapu, panyengu yo Chiuta wangupereka cheruzgu pa msumba wa Sodomu ndi Gomora kuti yibwanganduliki, munthu wakugomezgeka Abrahamu wakhumbanga kuziŵa urunji waku Chiuta pa nkhani iyi. Iyu wanguŵanaŵanapu cha kuti Chiuta yo ndi murunji ‘wangaparanya [wangabaya] nadi arunji pamoza ndi aheni.’ Chiuta wangumukambiya mwakuzizipizga kuti chinanga mwatingi mujengi ŵanthu 10 arunji mu Sodomu, watingi wabwanganduwengi cha msumba wo chifukwa cha ŵanthu ŵeniwo. (Chiyambo 18:20-33) Ivi vakuziŵikiya limu kuti Chiuta wangusanda mitima ya ŵanthu wo ndipu wanguwona kuti ŵenga aheni ukongwa.—1 Mikoka 28:9.

Mwakuyanana ŵaka, Chiuta wanguwona kuti Akanani ŵenga aheni ndichu chifukwa chaki wangulamula kuti abayiki. Yiwu ŵenga ankhaza ukongwa mwakuti awotchanga pamotu ŵana ŵawu amoyu kuŵapereka sembi.a (2 Ŵakaronga 16:3) Akanani anguziŵa kuti Yehova wangulangula Ayisraele kuti ahari charu chosi. Wo angukana kutuwamu m’charu cho ndipu angusankha kuti achiti nkhondu, mwadala angukana kuvwiya Ayisraele kweniso Yehova, yo wangulongo maukaboni nganthazi kuti wavikiliyanga ŵanthu ŵaki.

Chinanga kuti venga viyo, Chiuta wanguchitiya lisungu Akanani wo anguleka kuchita vinthu viheni ndipu angwamba kulondo fundu zaku Yehova za mijalidu yamampha. Mwakuyeruzgiyapu, Rahabi yo wenga huli wangutaskika limoza ndi a m’banja laki. Kweniso ŵanthu wo ajanga ku Kanani mumsumba wa Gebeoni, ŵati apempha kuti Ayisraele aŵachitiyi lisungu, wosi pamoza ndi ŵana ŵawu anguŵabaya cha.—Yoswa 6:25; 9:3, 24-26.

MO VITIKUKWASKIYANI: Pe fundu yakukhumbika ukongwa yo tingasambira pa cheruzgu cho Chiuta wangupereka kwa Akanani. “Zuŵa la cheruzgu ndi la chinangiku cha ŵanthu ambula uwopa Chiuta” le pafupi ukongwa kufika. (2 Petro 3:7) Asani titanja Yehova, tazamuyanduwa panyengu yo wazamutuzgapu masuzgu ngo ŵanthu akumana nangu mwakutuzgapu ŵanthu wosi wo akana muwusu waki wa urunji.

Yehova watitikumbuska mwachanju kuti vo apapi asankha vikwaska ŵana ŵawu. Mazu ngaki ngatiti: ‘Sankhanipu umoyu alinga kuti imwi ndi mphapu zinu mujengi amoyu, pakwanja Ambuya Chiuta winu, pakuvwiya mazu ngaki, ndi kumeremete kwaku iyu.’ (Marangu 30:19, 20) Kumbi mazu ngenanga, ngalongo kuti Chiuta ngwankhaza pamwenga watanja ŵanthu ndipuso wakhumba kuti asankhengi vinthu vamampha?