Kumbi Mungagomezga Visopa pa Nkhani ya Mijalidu?

Sylvia yo wagwira nchitu yakuphwere ŵanthu akukota wo atama, wangukamba kuti, “Ku koleji ko ndenga ndasambiranga limoza ndi ŵanthu wo akambanga kuti atanja kusopa. Kweni yiwu abiyanga mayesu ndipuso agwiriskiyanga nchitu munkhwala wakutimbanyizga wongu. Chisopa chinguŵawovya cha kuti asinthi umoyu wawu.”

Munthu munyaki zina laki Lionel, wangukamba kuti: “Wo ndigwira nawu nchitu atanja kupusika kuti atama. Yiwu awoneka kuti ŵe mu chisopa kweni chitiŵawovya cha, atichiwona nge mpandu wo awuŵika ŵaka munyumba kweni atiwugwiriskiya nchitu cha.”

Chisopa chitiŵawovya cha ŵanthu anandi kuti asinthi, aje ndi mijalidu yamampha. Ŵanthu anandi mazuŵa nganu awoneka nge ‘awopa Chiuta’ kweni alongo kuti ‘akana nthazi yaki.’ (2 Timote 3:5) Alongozgi avisopa alongo chakuwoniyapu chamampha cha ku mbereri zawu ndipuso atizichenya cha, mwakugwiriskiya nchitu Malemba kuti zijengi ndi mijalidu yamampha. Vambula kuziziswa asani ŵanthu anandi agomezga kuti Chiuta wakondweseka cha ndi jalidu lawu.

VO BAYIBOLO LISAMBIZA

Bayibolo lilongo kuti Chiuta watuvwa nge mo tivwiya ndipu vakuchita vidu vitimukwaska ukongwa. Pa nyengu yo Ayisraele angugarukiya Chiuta “ŵangumuchitiska chitima!” (Sumu 78:40) Kuja “chimwemwi kuchanya” asani munthu waleka mijalidu yiheni. (Luka 15:7) Asani munthu wayamba kuziŵa mijalidu yamampha ya Ada ŵidu akuchanya, ubwezi waki ndi Chiuta uja wakukho ndipu watanja vo Chiuta watanja ndi kutinkha vo iyu watinkha.—Amosi 5:15.

KUMBI AKABONI AKU YEHOVA ACHITA WULI?

Nyuzipepala yinyaki yingukamba za Akaboni aku Yehova kuti, “atovya ŵanthu kuti awovyengi anyawu, kuti ajengi akugomezgeka m’charu cho aja ndipuso atovya mabanja kuti ngajengi ngakukho.” Nyuzipepala yo yingukamba so kuti: “Yiwu alondo fundu zakuzirwa za mijalidu yamampha. Agomezga kuti kukweŵa foja, kumwa moŵa mwa uloŵevu, kugwiriskiya nchitu munkhwala mwambula kwenere, kutchova juga, uhuli ndi kugonana kwa anthurumi pe kweniso anthukazi pe vingananga ubwezi wawu ndi Chiuta.”—Deseret News of Salt Lake City, Utah, U.S.A.

Kumbi kuziŵa mijalidu yaku Chiuta kutiŵawovya wuli Akaboni aku Yehova? Sylvia yo tamuzumbuwa pakwamba wangukamba so kuti: “Ŵanthu anandi wo ndigwira nawu nchitu atanja kuchita vinda. Kungaja kwambula kusuzga kwamba kuchitanga nawu jalidu lenili. Kweni kuziŵa mo Yehovaa wawone jalidu lenili, kutindiwovya kuti ndichitengi vinthu vamampha. Ndini wakukondwa ndipuso nde ndi chimangu mumtima.” Sylvia wagomezga kuti kuchita vinthu mwakukoliyana ndi vo chisopa chaki chisambiza, kwamuwovya kuti waje ndi mijalidu yamampha.

[Mazu ngam’mphata]

[Chithuthuzi papeji 6]

[Fundo yo yakonkhoskeka papeji 6]

Kumbi alongozgi avisopa awovya mbereri zawu kuti zigwiriskiyengi nchitu fundu zaku Chiuta za mijalidu yamampha?