“Tenga ndi Phamphu Kweniso Chanju Chikulu Kuluska Kali”

Ŵanthu 8 sawuzandi anguwungana mu holu yinyaki pa chinkhondi mu September 1922. Pa zuŵa ili kungufunda liwi ukongwa. Cheyamani wa unganu wangukamba kuti yo wakhumba kutuwa watuwi kweni asani watuwa wazomerezekengi cha kusere.

Sumu zakwambiya unganu zati zamala, mubali Joseph F. Rutherford wanguluta pa pulatifomu. Abali ndi azichi anandi anguja cheti kuti avwisiyi nkhani kweni amanavi ayendangayendanga chifukwa cha kufunda. Mbali Rutherford wanguŵapempha kuti aje pasi kuti avwisiyi. Kumbi pa nyengu iyi wengapu yo wanguziŵa kuti kuchanya kwa holu angumangiliyaku chisalu?

Nkhani ya Mubali Rutherford yenga ya mutu wakuti: “Ufumu wakuchanya wepafupi.” Kwa ora limoza ndi hafu, mazu ngaki nganthazi ngavwikanga mu holu yosi po wakonkhosanga mo achimi akali angupharazgiya mwambula mantha za Ufumu wo utuza. Pakumaliya wangufumba kuti, “Kumbi mugomeza kuti Fumu ya unkhankhu yikwamba kuwusa?” Ŵanthu wosi angumuka mwakudaniriza kuti: “Hinya!”

Iyu wanguti, “Iku kuleka cha kuchipharazga, imwi ŵana aku Chiuta wapachanya ukongwa.” Mubali Rutherford wangudaniriza kuti, “Awonani, Fumu yiwusa! Imwi ndimwi ateŵeti ŵaki akupharazga za Ufumu uwu. Mwaviyo, pharazgani, pharazgani, pharazgani za Fumu ndi ufumu waki.”

Pa nyengu iyi, chisalu cho anguchimangiliya kuchanya chingudambasulika. Chenga ndi mazu ngakuti: “Pharazgani za Fumu ndi ufumu waki.”

Ray Bopp wangukamba kuti, “abali ndi azichi angukondwa ukongwa.” Anna Gardner wangukamba kuti, “holu yingusukunyika ndi manja ngo ŵanthu ambanga.” Fred Twarosh wanguti, “Ŵanthu wosi angusoka nyengu yimoza.” Evangelos Scouffas wangukamba kuti, “Venga nge kuti chinthu chinyaki chanthazi chatisosa ndipu tinguma. Masu ngidu nganguzaza ndi masozi.”

Abali ndi azichi anandi wo ŵenga pa unganu uwu ndipu ayamba kali kupharazga uthenga wamampha wa Ufumu. Kweni sonu anguchiskika ukongwa. Ethel Bennecoff wangukamba kuti: “Akusambira Bayibolu angutuwa pa unganu uwu [ŵe] ndi phamphu kweniso chanju chikulu kuluska pakwamba.” Odessa Tuck yo panyengu yo wenga ndi vyaka 18, wangusimikiza kuzomera pemphu lakuti, “Ndiyani yo walutengi?” Iyu wangukamba kuti: “Ndaziŵanga cha kuti ndingachipharazga nunkhu, ndingachipharazga wuli ndipuso kuti ndamupharazganji. Chinthu chimoza cho ndaziŵanga chenga chakuti ndakhumbanga kuja nge Yesaya yo wangukamba kuti, ‘Ndini panu! Nditumeni!’” (Yes. 6:8) Ralph Leffler wangukamba kuti, “Zuŵa ili, lenga kwamba kwa ntchitu yakupharazga Ufumu yo yichitika pa charu chosi chapasi mazuŵa nganu.”

Ntchakuziziswa cha kuti unganu wo unguchitika mu 1922 Cedar Point, Ohio, ngwambula kuluwika mu mbiri ya ŵanthu aku Chiuta. George Gangas wangukamba kuti, “Unganu uwu ungundichiska kuti ndingajanga cha ku maunganu.” Iyu wakumbuka kuti wechendajepu ku maunganu ngachigaŵa. Julia Wilcox wanguti: “Ndingakonkhoska cha mo ndikondwe asani mu mabuku ngidu alembamu za unganu wo unguchitika mu 1922, ku Cedar Point. Nditijivwa nge kuti nyengu zosi ndingakambanga kuti, ‘Yewu Yehova, chifukwa chakundizomereza kuŵapu.’”

Tikayika cha kuti tanandi mazuŵa nganu tikumbuka maunganu ngachigaŵa ngo ngangutikondwesa ndipuso ngo ngangutiwovya kuti tije ndi phamphu kweniso kwanja Chiuta widu ndi Fumu yaki. Asani tiŵanaŵaniya maunganu yanga, nasi tichiskika kukamba kuti, “Yewu Yehova, chifukwa chakundizomereza kuŵapu.”