Kumbi Muziŵa?

Ntchifukwa wuli Stefano wanguchita mantha cha po ŵanthu amutombozganga?

STEFANO wangukumana ndi gulu la ŵanthu akali. Akuyeruzga 71 a mu Mphara Yikulu ya Milandu ŵenga mugulu la ŵanthu ŵenaŵa. Yiwu ŵenga amoza mwa ŵanthu amazaza ngakulu mu Yisirayeli. Kayafa, yo wenga Wasembi Mura ndiyu walongozganga gulu ili. Myezi yimanavi kuvuli ivi vechendachitiki, iyu ndiyu walongozganga so vinthu pa nyengu yo ayeruzganga Yesu kuti wabayiki. (Mate. 26:57, 59; Machi. 6:8-12) Pa nyengu yo azanga ndi akaboni aboza kuti azisuski Stefano, yiwu anguwona chinthu chinyaki chakuziziswa ukongwa. Anguwona kuti chisku chaku Stefano chiwonekanga “nge chisku cha mungelu.”—Machi. 6:13-15.

Ntchifukwa wuli Stefano wanguchita mantha cha wati wakumana ndi gulu la ŵanthu akuchitiska mantha? Ŵechendamukwekwete ku Mphara Yikulu ya Milandu, Stefano watangwanikanga ukongwa ndi ntchitu yakupharazga mwakulongozgeka ndi mzimu waku Chiuta. (Machi. 6:3-7) Pa nyengu yo amuyeruzganga, mzimu wenuwu ndiwu wamuwovyanga ndi kumukumbusa malemba. (Yoha. 14:16) Pa chaputala 7 cha buku la Machitidu, pakonkhoska mo Stefano wangujivikiliya mwachiganga ndipu mzimu wakupaturika ungumukumbusa Malemba Ngachiheberi pafufupi 20 pamwenga kujumpha. (Yoha. 14:26) Kweni chivwanu chaku Stefano chingukho ukongwa wati wawona chiwona chaku Yesu yo wanguma kujanja lamaryi laku Chiuta.—Machi. 7:54-56, 59, 60.

Nyengu zinyaki nasi ŵanthu angatiwofya pamwenga kutitombozga. (Yoha. 15:20) Asani tikhumba kuti mzimu waku Yehova ugwirengi ntchitu mwaku isi, tiŵerengengi Mazu ngaki nyengu zosi ndi kupharazga mwaphamphu. Asani tichitengi viyo tisaniyengi so nthazi zakumaliyana ndi wo atitisuska ndipu tichitengi mantha cha.—1 Petu. 4:12-14.