Vo Akuŵerenga Afumba

Kumbi po Satana wakambiyanga Heva kuti wafwengi cha asani wangarya chipasu cha muchimiti chakuziŵisa chamampha ndi chiheni, wangwambisa chisambizu cho chawanda mazuŵa nganu chakuti mzimu wa munthu utufwa cha?

Awa. Dyaboli wangumukambiyapu cha Heva kuti asani warya chipasu cho Chiuta wangumukaniza, wafwengi liŵavu pe kweni mzimu waki ulutirizgengi kuja ndi umoyu ku malu nganyaki. Mumalu mwaki, wangumukambiya kuti asani warya chipasu ‘wafwengi cha.’ Iyu wang’anamuwanga kuti Heva wajengi ndi umoyu wamampha ndipuso wamuyaya pacharu chapasi kwambula kuwusika ndi Chiuta.​—Chiya. 2:17; 3:3-5.

Asani chisambizu chaboza cho chawanda mazuŵa nganu chakuti mzimu utufwa cha chingwambiya mu Edeni cha, nanga chingwamba zukwanji? Tiziŵa umampha cha. Kweni cho tiziŵa ntchakuti kusopa kwaboza kungumala pa nyengu ya Chigumula cho chinguchitika mu nyengu yaku Nowa. Ivi ving’anamuwa kuti visambizu vosi vaboza vingumala pa Chigumula chifukwa Nowa pe ndi banja laki wo asopanga Chiuta mwauneneska, ndiwu angupona.

Mwaviyo, chisambizu chaboza chakuti mzimu utufwa cha, chitenere kuti chingwamba Chigumula chati chajumphapu. Kumbi chisambizu ichi chinguwanda wuli? Chiuta wati watimbanyizga vineneru pa sonju ya Babele, ŵanthu angumbininikiya “pacharu chosi chapasi.” Tikayika cha kuti ŵanthu ŵenaŵa ndiwu angwamba kuwandisa kosi ko alutanga kuti mzimu wa munthu utufwa cha. (Chiya. 11:8, 9) Kwali chisambizu ichi chingwamba zukwanji, kweni tikayika cha kuti Satana Dyaboli yo ndi “wisi wa boza,” ndiyu wanguchitiska kuti chisambizu ichi chiyambi ndipu wangukondwa chati chawanda.​—Yoha. 8:44.