Kumbi Ntchinthu Wuli Cho Chingatiwovya kuti Tizije ndi Umoyu Wamampha Kunthazi?

Nge mo nkhani zajumpha zakambiya, ŵanthu ayesesa kuti asaniyi umoyu wamampha mwakuthemba vinthu nge, nthazi yambula kuwoneka, masambiru, chuma kweniso kuja munthu wamampha. Kweni kuchita venivi, kungayanana waka ndi kugwiriskiya ntchitu mapu yakulandizga pakuluta kumalu ngachilendu. Kumbi venivi ving’anamuwa kuti palivi ulongozgi wakuthembeka wo ungawovya kuti tizije ndi umoyu wamampha? Awa!

ULONGOZGI WAKUTULIYA KU MUNTHU WAKUTHEMBEKA

Kanandi asani tisankha vakuti tichiti, tifumba munthu mura kweniso wazeru kuphara isi. Mwakuyanana ŵaka, tingasaniya ulongozgi wo ungatiwovya kuti tizije ndi umoyu wamampha kunthazi ku Munthu yo ndi mura ukongwa kweniso wazeru kuphara isi. Tingaŵerenga ulongozgi Waki mubuku lo lingwamba kulembeka vyaka pafufupi 3,500 vo vajumpha. Buku lenili lidanika kuti Bayibolu.

Ntchifukwa wuli mungalithemba Bayibolu? Chifukwa Munthu yo wakulilemba ndi mura kweniso ngwazeru ukongwa muchilengedu chosi. Bayibolu litimukonkhoska kuti “Wamazuŵa Nganandi” yo ‘ngwamuyaya mpaka muyaya.’ (Daniyeli 7:9; Salimo 90:2) Iyu ndi “Mlengi wa kuchanya, Chiuta wauneneska, Yo wakupanga charu chapasi.” (Yesaya 45:18) Iyu watitikambiya kuti zina laki ndi Yehova.—Salimo 83:18.

Chifukwa chakuti Bayibolu likutuliya ku Mlengi wa ŵanthu wosi, likambapu cha kuti mudawuku pamwenga mtundu unyaki wa ŵanthu ngwapachanya ukongwa kuluska unyaki. Ulongozgi waki utovya nyengu zosi ndipu ŵanthu pacharu chosi chapasi ayanduwa nawu. Lisanirika mu vineneru vinandi ndipu ndakuwanda ukongwa pacharu chosi chapasi kuluska buku linyaki lelosi.a Venivi ving’anamuwa kuti munthu weyosi wangaliŵerenga ndipuso kugwiriskiya ntchitu ulongozgi waki. Fundu zenizi zikoliyana ndi vo Bayibolu likamba kuti:

“Chiuta walivi sankhu, kweni iyu walondere munthu wakutuliya mu mtundu wewosi yo watimuwopa ndi kuchita urunji.”—MACHITIDU 10:34, 35.

Nge mo mpapi wachanju wapereke ulongozgi ku ŵana ŵaki, Yehova Chiuta Mbada achanju wo atitiwovya kuziya mu Mazu ngawu Bayibolu. (2 Timote 3:16) Mungagomezga Mazu ngaki chifukwa chakuti iyu ndiyu wakutilenga kweniso waziŵa vo vingatiwovya kuti tikondwengi pa umoyu.

TINGATHEMBA ULONGOZGI WA MU BAYIBOLU

Tingagomezga kuti Bayibolu le ndi ulongozgi wo ungatiwovya kuti tizije ndi umoyu wamampha chifukwa vyaka pafufupi 2,000 vo vajumpha, lingukambiya limu vinthu vo vazamuchitika pacharu chapasi kweniso nkharu yo ŵanthu ŵenayu mazuŵa nganu.

VINTHU VO VICHITIKA

“Pakuti mtundu wazamuyukiyana ndi mtundu unyaki, kweniso ufumu ndi ufumu unyaki. Kwazamuchitika vidilirisi vikuluvikulu ndipu mumalu ngakupambanapambana mwazamuja nja ndi milili.”—LUKA 21:10, 11.

NKHARU

“Mu mazuŵa ngakumaliya, kuŵengi nyengu zakusuzga ukongwa. Pakuti ŵanthu azamuja akujiyanja, akwanja ndalama, akujiŵikamu, akujikuzga, akunyoza, ambula kuvwiya apapi, ambula kuwonga, ambula kugomezgeka, ambula chanju chakuwa nachu, ambula kukoliyana ndi anyawu, akukamba vinthu viheni va ŵanthu anyaki, ambula kujiko, akofya, akutinkha vamampha, akupereka anyawu, ambula kuvwa va anyawu, akujitukumuwa chifukwa cha kunyada, akwanja vakukondwesa mumalu mwakwanja Chiuta.”—2 TIMOTE 3:1-4.

Kumbi mukambanji asani muwona kuti vo Bayibolu lingukambiya limu kali ukongwa vichitika nadi mazuŵa nganu? Tikayika cha kuti mukoliyana ndi Leung wa ku Hong Kong, yo wangukamba kuti: “Mauchimi nga mu Bayibolu ngakulembeka kali ukongwa. Munthu wangafiska cha kukambiya limu vinthu vo vichitikengi kunthazi mwauneneska viyo. Bayibolu litenere kuti likulembeka ndi munthu munyaki wazeru ukongwa kuphara isi.”

Bayibolu le ndi mauchimi nganandi ukongwa ngo ngakufiskika kali.b Ivi vilongore limu kuti Bayibolu ndi Mazu ngaku Chiuta nadi. Yehova wakamba kuti: “Ndini Chiuta, ndipu palivi so munyaki wakuyanana nani. Kutuliya pakwamba ndikambiya limu vo vichitikengi.” (Yesaya 46:9, 10) Mwaviyo, mphakuvwika kuti tithembengi vo Bayibolu likamba pa nkhani ya vo vichitikengi kunthazi.

ULONGOZGI WO UNGAKUWOVYANI SONU MPAKA MUYAYA

Asani mugwiriskiya ntchitu ulongozgi wo usanirika mu Bayibolu, muyanduwa mwaŵeni. Wonani fundu zinyaki izi.

KUWONA NDALAMA NDIPUSO NTCHITU MWAKWENERE

“Kupumuwa kamanavi nkhwamampha kuluska kugwira ntchitu mwaphamphu ndi kutchimbiza mphepu.”—WAKUTAWULA 4:6.

KUJA NDI BANJA LALIKONDWA

“Munthulumi weyosi wayanjengi muwolu waki nge mo watijiyanjiya mweneku, ndipuso munthukazi nayu wamutumbikengi ukongwa mulumu waki.”—AEFESO 5:33.

KUKOLIYANA NDI ŴANTHU ANYAKI

“Leka kukwiya ndipu jowo ukali; ungaguŵanga cha mpaka kuchita chinthu chiheni.”—SALIMO 37:8.

Kugwiriskiya ntchitu vo Bayibolu likamba kungakuwovyani sonu kweniso kuti muzije ndi umoyu wamampha kunthazi. Mu Bayibolu, tisaniyamu malayizgu ngaku Chiuta ngakukondwesa nge yanga

CHIMANGU NDIPUSO KUVIKILILIKA

“Azamukondwa ukongwa ndi chimangu chikulu.”—SALIMO 37:11.

WEYOSI WAZAMUJA NDI NYUMBA KWENISO CHAKURYA

“Yiwu azamuzenga nyumba ndi kujamu, ndipuso azamulima minda ya mphereska ndi kurya vipasu vaki.”—YESAYA 65:21.

KWAZAMUŴAVI KUTAMA PAMWENGA NYIFWA

“Nyifwa yazamuŵaku so cha, kwazamuŵavi kuliya, kukuta pamwenga urwirwi.”—CHIVUMBUZI 21:4.

Kumbi mukhumbika kuchitanji kuti muzisaniyi umoyu wenuwu? Ŵerengani nkhani yakulondopu.

a Kuti muziŵi vinandi pa nkhani yakufwatuliya Bayibolu kweniso mo likugaŵikiya ku ŵanthu, lutani pa www.jw.org/tog ndipu wonani po palembeka kuti VO BAYIBOLU LISAMBIZA > MBIRI NDIPUSO BAYIBOLU.

b Kuti muziŵi vinandi, wonani mutu 9 mu buku lakuti The Bible—God’s Word or Man’s? lo likulembeka ndi Akaboni aku Yehova. Lisanirika so pa www.jw.org. Wonani po palembeka kuti LIBRARY > BOOKS & BROCHURES.