LAYIBULARE YA PA INTANETI
Watchtower
LAYIBULARE YA PA INTANETI
Chitonga (Malawi)
  • BAYIBOLU
  • MABUKU
  • MAUNGANU
  • w22 December pp. 28-30
  • Kumbi Mwanozgeka ‘Kuzihara Charu Chapasi’?

Vidiyo yo mwasankha palivi.

Pepani, vidiyo iyi yikana kujula.

  • Kumbi Mwanozgeka ‘Kuzihara Charu Chapasi’?
  • Chigongwi cha Mlinda Chakupharazga Ufumu Waku Yehova (Chakusambira)—2022
  • Mitu yimanayimana
  • Nkhani Yakuyanana
  • KUMBI MWANOZGEKA KUZINOZGA CHARU KUTI CHIJE PARADAYISU?
  • KUMBI MWANOZGEKA KUZIŴAPHWERE ŴANTHU WO AZAMUYUSKIKA?
  • KUMBI MWANOZGEKA KUZISAMBIZA ŴANTHU WO AZAMUYUSKIKA?
  • Ŵanthu wo Akufwa Azamuyuka
    Kumbi Tingasambiranji m’Bayibolu?
  • Chigaŵa 10
    Vwiyani Chiuta
  • Kumbi Chiyuka Ntchinthu Wuli?
    Mafumbu ngo Bayibolu Limuka
  • Chiyuka Chilongo Kuti Chiuta Ngwachanju, Ngwazeru Kweniso Ngwakuzikira
    Chigongwi cha Alinda Chakupharazga Ufumu Waku Yehova (Chakusambira)—2020
Wonani Vinandi
Chigongwi cha Mlinda Chakupharazga Ufumu Waku Yehova (Chakusambira)—2022
w22 December pp. 28-30
Ŵanthu agwira ntchitu yakunozga charu kuti chije paradayisu. Anyaki ayola vinthu vakunangika, anyaki azenga nyumba ndipu anyaki alima.

Kumbi Mwanozgeka ‘Kuzihara Charu Chapasi’?

TOSI tikhaza kufiskika kwa layizgu laku Yesu lakuti: “Mbakukondwa akuzika, chifukwa azamuhara charu chapasi.” (Mate. 5:5) Akusankhika azamuhara charu chapasi pa nyengu yo azamulamuliya limoza ndi Yesu kuchanya nge mafumu. (Chivu. 5:10; 20:6) Kweni Akhristu anandi auneneska mazuŵa nganu, azamuhara charu chapasi ndi kuzija mwenimo kwamuyaya. Yiwu azamukuŵa akufikapu, azamujanga mwalikondwa kweniso mwachimangu. Kuti venivi vizichitiki, yiwu azamugwira ntchitu zinyaki. Mwakuyeruzgiyapu, yiwu azamunozga charu kuti chije paradayisu, azamuwonenesesa kuti ŵanthu wo ayuskika ŵe ndi vinthu vakukhumbika kweniso azakuŵasambiza. Tiyeni tiwoni vo nasi tingachita kulongo kuti nasi tikhumba kuzichita vinthu venivi mucharu chifya.

KUMBI MWANOZGEKA KUZINOZGA CHARU KUTI CHIJE PARADAYISU?

Yehova wati walamula ŵanthu kuti ‘azazi charu chapasi ndipuso kuchithereska,’ wangulongo kuti charu chosi chapasi chatingi chiŵengi paradayisu. (Gene. 1:28) Ŵanthu wo azamuhara charu chapasi, azamukhumbika kuvwiya dangu lenili. Pakwamba charu chazamukuŵa paradayisu cha chifukwa munda wa Edeni kulivi. Asani Aramagedoni yajumphapu ŵaka, tazamukuŵa ndi ntchitu yikulu yakutowesa vigaŵa vinyaki va charu chapasi vo ŵanthu ananga sonu. Yeniyi yazamukuŵa ntchitu yikulu ukongwa!

Venivi vititikumbusa ntchitu yo Ayisirayeli angugwira ŵati aweku ku Babiloni. Charu chawu chinguja kwambula ŵanthu kwa vyaka 70. Kweni Yesaya wangukambiya limu kuti Yehova wazakuŵawovya Ayisirayeli kuti charu chawu chije so chakutowa. Uchimi wo wakambanga kuti: “Wazamusambusa chipululu chaki kuja nge Edeni kweniso chipalamba chaki kuja nge munda waku Yehova.” (Yesa. 51:3) Yehova wanguwovya Ayisirayeli kunozga charu chawu kuti chije so chakutowa. Mwakuyanana ŵaka, Yehova wazamuwovya ŵanthu wo azamuhara charu chapasi kuti achinozgi kuja paradayisu wakutowa. Ndipu pasonu panu mungalongo kuti mukhumbisiska kuzigwiraku ntchitu yeniyi.

Nthowa yimoza yo mungachitiya venivi nkhuyesesa kuti panyumba pinu pajengi pakutowa. Mungachita venivi chinanga kuti ŵanthu wo muja nawu pafupi mbakazuzi ndipu aphwere cha panyumba pawu. Mungawovya so pakutowesa kweniso kunozga Nyumba yinu ya Ufumu kweniso Malu nga Unganu. Asani mungafiska mungasayina so fomu yakuti muwovyengi asani kwachitika masoka nga chilengedu. Venivi vingalongo kuti mwe akunozgeka kovya abali ndi azichi ŵinu asani akhumbika chovyu. Jifumbeni kuti: ‘Kumbi ndingasambira malusu ngo ndingazingagwiriskiya ntchitu asani Yehova wazindizomereza kuzihara charu chapasi?’

Abali ndi azichi atowesa ndi kunozga so Nyumba ya Ufumu.

KUMBI MWANOZGEKA KUZIŴAPHWERE ŴANTHU WO AZAMUYUSKIKA?

Yesu wati wayuska ŵaka mwana munthukazi waku Yairo wangukambiya ŵanthu kuti amupaski chakurya. (Mariko 5:42, 43) Kuphwere mwana munthukazi wa vyaka 12 yitenere kuti yenge ntchitu yikulu ukongwa cha. Kweni aŵanaŵaniyani ŵaka ntchitu yikulu yo tazamukuŵa nayu asani Yesu wazifiska layizgu laki lakuti, “ŵanthu wosi wo ŵe mumiwunda yachikumbusu, azamukuvwa mazu ngaki ndipu azamutuwamu.” (Yoha. 5:28, 29) Chinanga kuti Bayibolu likamba vinandi cha pa nkhani iyi, kweni tikayika cha kuti ŵanthu wo azamuyuskika azamukhumbika kuŵapaska chakurya, malu ngakuja kweniso vakuvwala. Kumbi pasonu panu, mungalongo wuli kuti mwe akunozgeka kovya ŵanthu ŵenaŵa? Ŵanaŵaniyani mafumbu yanga.

Kumbi pasonu panu mungachitanji kulongo kuti mwe akunozgeka kuzihara charu chapasi?

Abali ndi azichi wo akondwa ŵe ku chiŵaza cha ndegi ndipu alonde alendu wo ŵaza ku unganu wa vyaru ku Paris.

Asani apharazga kuti wakuwonere dera watuzga kuzicheze mpingu winu, kumbi mutimudana kuti wakaryi chakurya ku nyumba kwinu? Asani ŵanthu wo ateŵete pa Beteli uteŵeti wawu wasintha pamwenga asani wakuwonere dera waleka kuwonere dera, kumbi mungaŵawovya kusaniya nyumba? Asani muchigaŵa chinu muchitikengi unganu wachigaŵa pamwenga wapade, kumbi mungajipereka kulonde alendu pamwenga kugwiraku ntchitu unganu wechendayambi pamwenga asani wamala?

KUMBI MWANOZGEKA KUZISAMBIZA ŴANTHU WO AZAMUYUSKIKA?

Mwakukoliyana ndi vo lemba la Machitidu. 24:15 likamba, tilindizga kuti ŵanthu mabiliyoni nganandi azamuyuskika. Anandi mwa ŵanthu ŵenaŵa angumuziŵa cha Yehova ŵechendafwi. Yiwu azamupaskika mwaŵi wakuti amuziŵi Yehova asani ayuskika.a Ateŵeti akugomezgeka aku Chiuta, azamuwovya kusambiza ŵanthu ŵenaŵa asani aziyuskika. (Yesa. 11:9) Mzichi Charlotte yo wangupharazgaku ku Europe, South America ndi ku Africa wakhumbisiska kuzigwiraku ntchitu yeniyi. Iyu wakamba kuti: “Ndikhumbisiska kuzisambiza ŵanthu wo azamuyuskika. Asani ndiŵerenga nkhani yakukwaskana ndi munthu munyaki wa mu nyengu yakali, kanandi ndiŵanaŵana kuti: ‘Asani munthu uyu wamuziŵanga Yehova, watingi wajengi munthu wamampha.’ Ndikhumbisiska kuzikambiya ŵanthu wo azamuyuskika vinthu vamampha vo vinguŵapamba.”

Chinanga mbateŵeti akugomezgeka aku Yehova wo ŵengaku Yesu wechendazi pacharu chapasi, azamukhumbika kusambira vinthu vinandi. Aŵanaŵaniyani mo tazamukondwe kweniso mwaŵi wo tazamukuŵa nawu kukonkhoske Daniyeli mo mauchimi ngo wangulemba ngangufiskikiya chinanga kuti wangavwisanga cha. (Dani. 12:8) Tazamukondwa so kovya Ruti ndi Nawomi kuziŵa kuti Mesiya wangutuliya mu mphapu yawu. Tazamukondwa ukongwa kugwiraku ntchitu yakusambiza yo yazamuchitika pacharu chosi kwambula masuzgu kweniso vinthu vakutimbanyiza vo vichitika mucharu chiheni ichi mazuŵa nganu.

Mzichi watimugaŵiya kapepala munthukazi munyaki.

Kumbi pasonu panu mungalongo wuli kuti mwe akunozgeka kuzisambiza ŵanthu wo azamuyuskika? Nthowa yimoza yo mungachitiya venivi nkhusazgiyaku lusu linu lakusambiza kweniso kupharazga kaŵikaŵi. (Mate. 24:14) Chinanga kuti mungachita vinandi cha chifukwa cha ukoti pamwenga pa vifukwa vinyaki, kweni vo mutesesa kuchita pa ntchitu yakupharazga pasonu panu vingalongo kuti mwe akunozgeka kuzisambiza ŵanthu wo azamuyuskika.

Mwaviyo, mungachita umampha kuŵanaŵaniya mafumbu ngakukhumbika yanga: Kumbi ndikhumbisiska kuzihara charu chapasi? Kumbi ndikhumbisiska kuzigwiraku ntchitu yakunozga charu kuti chizije paradayisu, kovya ŵanthu wo azamuyuskika kusaniya vinthu vakukhumbika kweniso kuŵasambiza? Mungalongo kuti mwe akunozgeka asani pasonu panu mugwiraku ntchitu zakuyanana ndi zo mwazamuchita asani mwazihara charu chapasi!

a Wonani nkhani yakuti “Atovya Ŵanthu Anandi Kuti Aje Arunji” yo ye mu Chigongwi cha Mlinda cha September 2022.

    Mabuku nga Chitonga (1996-2025)
    Tuwanipu
    Sereni
    • Chitonga (Malawi)
    • Tumizani
    • Vo Mukhumba
    • Copyright © 2025 Watch Tower Bible and Tract Society of Pennsylvania
    • Fundu zo Mutenere Kulondo
    • Nkhani Yakusunga Chisisi
    • Kusintha Vinthu Vachisisi
    • JW.ORG
    • Sereni
    Tumizani