Vo Akuŵerenga Afumba
Nge mo pakambiya pa Salimo 61:8, kumbi Davidi wachikamba kuti wathamikengi zina laku Chiuta “mpaka muyaya” wang’anamuwanga kuti wafwengi cha?
Awa. Kweni vo Davidi wangulemba venga vauneneska.
Tiyeni tiwoni vo wangulemba pa vesi lenili kweniso mu mavesi nganyaki. Iyu wangulemba kuti: “Ndimbengi sumu zakuthamika zina linu mpaka muyaya ndichifiska vo ndalapizga zuŵa lelosi.” “Nditikuthamikani ndi mtima wangu wosi yimwi Yehova Chiuta wangu, ndipu ndikankhuskengi zina linu mpaka muyaya.” “Ndithamikengi zina linu muyaya mpaka muyaya.”—Salimo 61:8; 86:12; 145:1, 2.
Davidi wachilemba mazu ngenanga wang’anamuwanga kuti walekengi kufwa cha. Iyu waziŵanga kuti Yehova wangukamba kuti ŵanthu afwengi chifukwa chakuti mbakubuda ndipu waziŵanga so kuti nayu ngwakubuda. (Gene. 3:3, 17-19; Salimo 51:4, 5) Iyu waziŵanga kuti chinanga mbanthu akugomezgeka nge Abrahamu, Isaki ndi Yakobe akufwa. Ndipu Davidi waziŵanga kuti nayu pakumaliya paki wafwengi. (Salimo 37:25; 39:4) Kweni vo wangulemba pa Salimo 61:8 vingulongo kuti iyu wakhumbisiskanga kuthamika Chiuta kwamuyaya, kung’anamuwa mpaka po watingi wafwiyengi.—2 Samu. 7:12.
Davidi wangulemba vinthu vinyaki vo vingumuchitikiya pa umoyu nge mo tiwone pa mazu ngo ngasanirika pakamutu ka pa Salimo 18, 51 ndi 52. Mu Salimo 23, Davidi yo nayu wenga mliska, watimukonkhoska Yehova nge mliska yo watimulongozga, kumusisipuwa ndipuso kumuvikiliya. Venivi vingumuchitiska kuti waje ndi mtima wakukhumbisiska kuteŵete Chiuta ‘mazuŵa ngosi nga umoyu waki.’—Salimo 23:6.
Kumbukani kuti Yehova ndiyu wangukambiya Davidi kuti walembi vosi vo wangulemba. Vo wangulemba visazgapu mauchimi ngo ngatingi ngazifiskikengi ukongwa kunthazi. Mwakuyeruzgiyapu, mu Salimo 110, Davidi wangulemba vakukwaskana ndi nyengu yo Ambuyaki atingi ‘azijaliyengi kujanja lamaryi laku Chiuta’ ndi kuzilonde mazaza ngakulu. Kuti azichitenji? Kuti azithereski arwani aku Chiuta ndipuso ‘kuziyeruzga mitundu’ ya ŵanthu pacharu chapasi. Davidi wenga mpapi waku Mesiya yo wazamulamuliya kutuliya kuchanya kweniso kuja “wasembi kwamuyaya.” (Salimo 110:1-6) Yesu wangukamba kuti uchimi wenuwu wo usanirika pa Salimo 110 wakwaskanga iyu ndipuso wazamufiskika kunthazi.—Mate. 22:41-45.
Yehova wangukambiya Davidi kuti walembi vinthu vo vinguchitika mu nyengu yaki kweniso vo vazamuchitika kunthazi, pa nyengu yo wazamuyuskikiya ndi kuthamika Yehova kwamuyaya. Mwaviyo, lemba la Salimo 37:10, 11, 29 litenere kuti likamba vinthu vo vinguchitika mu nyengu yakali mucharu cha Isirayeli kweniso vo vazamuchitika kunthazi pa nyengu yo Chiuta wazamufiskiya malayizgu ngaki.—Wonani ndimi 8 mu nkhani ya mutu wakuti “Wazamuja Ndi Ini mu Paradayisu” mumagazini yeniyi.
Mwaviyo, lemba la Salimo 61:8 ndipuso mavesi nganyaki ngalongo kuti Davidi wakhumbisiskanga kuthamika Yehova mpaka po watingi wafwiyengi. Kweniso ngalongo vo Davidi wazamuchita kunthazi asani Yehova wazimuyuska.