Vo Akuŵerenga Afumba
Kumbi ntchitu yakupharazga yazamumala zukwanji?
Yesu wangukamba kuti: “Uthenga wamampha uwu wa Ufumu, wazamupharazgika pacharu chosi chapasi kuti uje ukaboni ku ŵanthu amitundu yosi, ndipu pavuli paki umaliru uzengi.” (Mate. 24:14) Mazu nga Chigiriki ngo akungafwatuliya kuti “umaliru” pa vesi ili, kweniso pa vesi 6 ndi 13, ndi teʹlos. Mazu yanga ngang’anamuwa umaliru wa charu chaku Satana pa Aramagedoni. (Chivu. 16:14, 16) Venivi vilongo kuti tilutirizgengi kupharazga uthenga wamampha mpaka asani kwazija ŵaka kanyengu kamanavi kuti nkhondu ya Aramagedoni yiyambi. Ivi vilongo kuti pe kusintha pa mo tayivwiyanga fundu yeniyi.
Kali tagomezganga kuti ntchitu yakupharazga yazamumala asani chisuzgu chikulu chaziyamba pa nyengu yo Babiloni Mukulu wazamubwangandulikiya. (Chivu. 17:3, 5, 15, 16) Tagomezganga kuti asani chisuzgu chikulu chaziyamba, ŵanthu azamuŵavi mwaŵi wakuti avwisiyi uthenga wamampha chifukwa “chaka chaku Yehova chakuchitiya ŵanthu lisungu” chazamuja kuti chamala. (Yesa. 61:2) Taŵanaŵananga kuti ŵanthu wo ateŵetiyanga Yehova mwakugomezgeka chisuzgu chikulu chechendayambi, ndiwu pe azamupona. Ŵanthu yaŵa taŵayeruzgiyanga ndi Ayuda wo angupona pa nyengu yo Yerusalemu wabwangandulikanga mu 607 B.C.E. Ayuda ŵenaŵa angusankhikiya limu kuti azamutaskika chifukwa chakuti asopanga Yehova kweniso atinkhanga vinthu viheni. (Ezeki. 5:11; 9:4) Kweni venivi vikoliyana cha ndi vo Yesu wangukamba pa Mateyu 24:14. Pa vesi ili Yesu wangulongo kuti ŵanthu azamupaskika mbwenu mwaŵi wakuti avwisiyi uthenga wamampha. Mwaŵi wenuwu wazamulutirizga kuŵapu mpaka po kwazamujaliya kanyengu kamanavi kuti umaliru uzi, kung’anamuwa kuti nkhondu ya Aramagedoni yiyambi.
Kusintha mo tavwiyanga fundu yo ye pa lemba la Mateyu 24:14 kwakwaska so mo tivwiya fundu ya pa Chivumbuzi 16:21 yo yikonkhoska uthenga wa nge mya yikuluyikulu ya matalala. Tati tafufuza mwakukwana, tasaniya kuti malemba ngaŵi ngenanga ngakoliyana. Kumbi ngakoliyana wuli? Vo ŵanthu achita asani avwa uthenga wamampha wa Ufumu ndivu vatiwovya kuziŵa kuti malemba yanga ngakoliyana. Wakutumika Paulo wangulemba kuti, ŵanthu “wo ataskika” awona kuti uthenga wo avwisiya ngwamampha ndipu we nge “fungu la umoyu.” Kweni arwani aku Chiuta, awona kuti uthenga wo avwisiya mbuthenga uheni ndipu we nge “fungu la nyifwa.” (2 Akori. 2:15, 16) Yiwu atinkha uthenga wa Ufumu chifukwa chakuti uvumbuwa kuti charu ichi cho atichiyanja ukongwa ntchiheni, chilamulika ndi Satana kweniso pambula kuswera chibwangandulikengi.—Yoha. 7:7; 1 Yoha. 2:17; 5:19.
Wonani kuti mya ya matalala yo yikambika pa Chivumbuzi 16:21 yazamukuŵa ‘yikulu ukongwa.’ Venivi vingang’anamuwa kuti pa chisuzgu chikulu, pakupharazga uthenga wamampha, tazamuyeŵangapu mani cha ndipu zina laku Yehova lazamuziŵika pacharu chosi kuluska kali. (Ezeki. 39:7) Pa nyengu yeniyi asani Babiloni Mukulu wazibwangandulika, kumbi ŵanthu anyaki azamuwona kuti uthenga wo upharazgika ngwamampha ndipu we nge kafungu kamampha? Venivi vingazichitika. Panyaki azamukumbuka pamwenga kusambira kuti kwa vyaka vinandi Akaboni aku Yehova aja achipharazga kuti visopa vosi vaboza vazamumala.
Venivi viyanana ndi vo vinguchitika ku Ijipiti pavuli pa Milili 10. Yehova wati wapereka “cheruzgu kwa achiuta wosi a ku Ijipiti . . . gulu la ŵanthu amitundu yakupambanapambana angulutiya limoza ndi Ayisirayeli.” (Eki. 12:12, 37, 38) Ŵanthu ŵenaŵa wo ŵenga Ayisirayeli cha, atenere kuti angwamba kusopa Yehova ŵati awona kuti vo Mozesi wangukamba vakukwaskana ndi Milili 10 vinguchitika nadi.
Weyosi yo wazamuyamba kuteŵete Yehova pavuli pakuti Babiloni Mukulu wabwangandulika, wazamukuŵa ndi mwaŵi wakovya abali aku Khristu wo azamuja kuti ŵeche pacharu chapasi. (Mate. 25:34-36, 40) Kweni mwaŵi wakuti munthu waziyeruzgiki kuti ndi mbereri wazamumala asani kwazija ŵaka kanyengu kamanavi kuti nkhondu ya Aramagedoni yiyambi. Chifukwa pa nyengu iyi Akhristu wosi akusankhika wo azamukuŵa kuti ŵeche pacharu chapasi azamutoleke kuchanya.
Kusintha kwenuku kulongo kuti Yehova watanja ukongwa ŵanthu kweniso ngwalisungu. Kukamba uneneska, iyu “wakhumba cha kuti weyosi wanangiki, kweni wakhumba kuti weyosi walapi.”—2 Petu. 3:9.