U nga hunga kharini esi u nga si khodwago?

Mafu, ndzadzi ni womi si di vangwa khu Nungungulu mwendro si di tumbunuga? Hlamulo nya giwudziso gegi wu ningedwego khu va físico va khumbhugidwego gupheyani, wu hambanide ngudzu ni esi libhuku la Genesi 1:1 li si ganeyago. Hlamulo ni hlamulo wu na ni vaseketeyi vawo. Ambari ulolo, vathu nya vangi kha va tiyisegi gu khavo va nga khodwa avba nya ginani. Omu nya mabhuku ni milongoloko nya dzitelivhizawu, gu ngu ganedwa ngudzu khu mahungu yaya.

Vahevbudzi vago xikwatuno, adzina va gu embede na va tiyisegide gu khavo mwalo Muvangi nigu mafu, ndzadzi ni womi si di tumbunuga. Ganiolu, ina avo va gu yeyedzide gilo nyo khaguri gi seketeyago gu khigyo mwalo Muvangi? Adzina u di ngapwa vathangeyi nya wukhongeyi na va gu ganeya gu khavo womo Muvangi. Ganiolu, ina va gu embede gu khavo khu ginani va ganeyago isoso? Mwendro avo va gu embede gu khavo u nga khodwa gu khuwe womo Muvangi, wa gu ba u ri ni gukhodwa basi.

Nya mba kanakana, adzina anuwe u di nga pimisa khu mahungu yaya. Adzina u nga pimisa gu khuwe mwalo a nga gu tiyisegisago gu khuwe womo Muvangi mwendro ne. Si nga gira na wu dzi wudzisa gu khuwe: “Ina si na ni lisima guti lisine khu mahungu yaya?”

Khendzugani wowu, wu na yeyedza sighelo si giridego vathu nya vangi va khodwa gu khavo womo Muvangi. Khu gu landreya wu na yeyedza gu khuwo khu ginani guti lisine nya gu vangwe nya ndzadzi, mafu ni womi si gu na ni lisima.