Gilewugiso Yiphwani nya Gufuviye

Tepo Faro a nga embedwa gu pwani Vaisrayeli va dugide Egipto, a di vbindrugedza mapimo yaye kholu a va digidego va hongola. A di embeya masotshwa yaye khuye: ‘Dongiseyani dzikareta dzangu dzatshavbo hi va landra! Na ha sa va diga va hongola.’ Faro ni vama vaye va di pheya gu landra Vaisrayeli.

Jehovha a di gu thangeya vathu vaye. Ni mihani a di gu thumisa lipfhi; ni wutshigu a di thumisa nilo. A di va yisa Yiphwani nya Gufuviye, a va embeya gasi va hefemula avbo.

Khavbovbo, Vaisrayeli va di wona Faro ni masotshwa yaye na vata. Va diri vbakari. Mbeli gwawe gu diri ni yiphwa, hwane gwawe gu diri ni masotshwa nya Vaegipto. Avo va di lileya Mosi, khavo: ‘U ngu wona gu khuwe vo vbweta gu hi songa! Na wu hi digide Egipto basi.’ Ganiolu Mosi a di khuye: ‘Mu nga thavi. Wonani esi Jehovha a na girago gasi a hi vbulugisa.’ Mosi a di gu tumba Jehovha khu monyo waye watshavbo, khandridzo?

Jehovha a di embeya vaIsrayeli gu khuye va na dzi dongiseye gasi va khuga. Ni wutshigu, Jehovha a di resa lipfhi vbakari ga Vaisrayeli ni Vaegipto. Ga Vaegipto gu diri gidema. Ganiolu, ga Vaisrayeli gu di gu wonegeya.

Jehovha a di embeya Mosi gu khuye a thawuludza libogo laye vbatshani nya yiphwa. Khavbovbo, Jehovha a di gira gu yi veta phuvbo nya yikhongolo wutshigu watshavbo. Mati ma di kabanega khu vbakari, yi tshala ndziya. Vaisrayeli vovo nya vangi va di gimbiya mafuni nyo bange, mati na ma bangide ma khala sigomo mudzimbambe, kala va tshatuga vatshavbo.

Masotshwa ya Faro ma di landra khu hwane, anayo ma gimbiya mafuni nyo bange. Khavbovbo, Jehovha a di gira gu masotshwa ma manana ni sigaradzo. Marodha nya dzikareta dzawe ma di pheya gu ghwawugeya. Masotshwa ma di keta khayo: ‘Hongoleni hi dugani khomu! Jehovha a ngu va dwaneya.’

Jehovha a di embeya Mosi khuye: ‘Thawuludza libogo lago vbatshani nya yiphwa.’ Khu gitepwana, masotshwa nya Vaegipto ma di dzama. Faro ni vathu vaye vatshavbo va difa. Mwalo ni moyo wawe a nga vbuluga.

Vaisrayeli va di dhumisa Jehovha khu gu embeleya dzindzimo khavo: ‘Hongoleni hi mu embeleyani dzindzimo Jehovha, kholu uye a khugegide ngudzu; rinyide kavhalu ni mukhileyi wayo phwani.’ Tepo vathu va nga ba va embeleya, vanyamayi va di hana ni gu womba singomana. Vatshavbo va di tsakide kholu va di tshudzisidwe.