4 madzaha ma nga engisa Jehovha

Pfhumu Nabhukodhonozori a di mola madzaha ya nyumbani nya wufumu ni mambe madzaha nya dzindranga nyo thavisege dza Judha, a hongola nawo Bhabhiloni. Khavbovbo, a di ya hatha Asipenazi, mwama a nga ba a thuma nyumbani nya wufumu, gasi a khala muthangeyi wawe. Vbakari nya madzaha yaya ma nga ba ma modwe, Nabhukodhonozori a di embeya Asipenazi gu khuye a hatha madzaha ma gu mba khaleya gu dwala, na ma gengede ngudzu guvbindra aya mambe. Madzaha yoyo ma di hadzi hevbudzwa khu myaga miraru. Esi ma nga hadzi hevbudzwa si di hadzi gu ma dongiseya gasi ma khala vathangeyi nya lisima va Bhabhiloni. Madzaha yoyo ma di hadzi hevbudzwa gu leri, gu lova ni gu ganeya lidimi la Bhabiloni. Ma di yede gu hodza guhodza nyo fane ni ogu gu nga ba gu hodzwa khu pfhumu ni vatshavbo ava va nga ba va thuma nyumbani nya wufumu. Vbakari nya madzaha yoyo, gu diri ni Dhaniyeli, Hananiya, Misayeli ni Azariya. Asipenazi a di ma vbindrugedza malina, a ma ninga malina nya Gibhabhiloni khuye khu Bhalitazari, Sadraki, Misaki ni Abhedhi-Negho. Ina esi va nga hadzi hevbudzwa si di hadzi va gira va diga gu thumeya Jehovha?

Madzaha yaya nya 4 ma di dzi emisede gu engisa Jehovha. Ma di gu dziti gu khayo kha ma yeli gu hodza guhodza gogo kholu simbe kha sa nga ba si agide khu guya khu Nayo wa Jehovha. Khu kharato, va di embeya Asipenazi khavo: ‘Ho lomba gu khethu u si hi ningi guhodza ga pfhumu.’ Asipenazi khuye: ‘Mo mba hodza guhodza gogu, pfhumu yi mi wona na mu wondride, yi na nyi songa!’

Dhaniyeli a diri ni mawonelo nyo khaguri. A di embeya ava va nga ba va va woneleya, khuye: ‘Ho lomba gu khethu mu hi ninga mitongwe ni mati basi khu tanga nya 10 matshigu, mu vbedza mu hi fananisa ni ava vambe va hodzago guhodza ga pfhumu.’ Ava va nga ba va va woneleya, va di dzumeya.

Hwane nyo ba ma vbindride 10 matshigu yoyo, Dhaniyeli ni dzipari dzaye nya 3, va di gu khedzega gwadi guvbindra aya mambe madzaha. Jehovha a di tsaka ngudzu kholu va nga mu engisa. A di bwe a ninga Dhaniyeli wugengeyi nyo pwisise siwoniso ni miloro.

Tepo va nga vbedza gu hevbula, Asipenazi a di dzega madzaha yatshavbo a hongola nawo ga Nabhukodhonozori. Pfhumu Nabhukodhonozori a di wona gu khuye Dhaniyeli, Hananiya, Misayeli ni Azariya va diri ni guti ngudzu nigu va di gengede ngudzu guvbindra madzaha yatshavbo. A di hatha madzaha yaya nya 4 gasi ma thuma nyumbani nya wufumu. Pfhumu yi di gu vbweta gu ma lomba wusingalagadzi tepo ni tepo yi nga ba yi vbweta gu gira silo nya lisima. Jehovha a di va ningide wugengeyi nyo vbindre masingalagadzi ya pfhumu ni dzinyanga dzaye.

Ambari olu va nga ba vari hwindzo ni gaya, Dhaniyeli, Hananiya, Misayeli ni Azariya kha va divala gu khavo va diri vathu va Jehovha. Ahati uwe ke, u na mu dundruga Jehovha tepo yatshavbo, ambari wo ba uri hwindzo ni mamayi ni papayi?